መልክአ፡ አርባዕቱ፡ እንስሳ፡
Malkəʾa ʾArbāʿəttu ʾƎnsəsā
Image of the Four Living Creatures
-
- በስመ፡ እግዚአብሔር፡ አሐዱ፡ ወሥሉስ፡ በተገጽዎ፨
- ወዘአምጽአ፡ ዓለመ፡ እምኀበ፡ ኢሀሎ፡ ኀበ፡ ሀልዎ፨
- ውዳሴ፡ ክብርክሙ፡ እንብብ፡ መንፈሰ፡ ጥበብ፡ ወአለብዎ፨
- ጸግዉኒ፡ መላእክቲሁ፡ እንዘ፡ አተሉ፡ አትልዎ፨
- ወዝክረ፡ ስምክሙ፡ እስመ፡ ናሁ፡ ፈቀድኩ፡ ዜንዎ፨
-
- ሰላም፡ ለስምክሙ፡ በስመ፡ አርባዕ፡ እንስሳ፨
- ዘሰመይዎ፡ ቀዳሚ፡ ነቢያተ፡ ራእይ፡ ዘወለ፡ ምሕሳ፨
- ወለሥዕርትክሙ፡ ሰላም፡ ዘኢተቀብአ፡ ቅብአ፡ አበሳ፨
- ረስይዎ፡ ለማሕሌትየ፡ ኀጠተ፡ ዘራኢ፡ ኀሠሣ፨
- ህየንተ፡ አሐዱ፡ ዘይፈሪ፡ ሠላሳ፡ ወስሳ፨
-
- ሰላም፡ ለአርእስቲክሙ፡ እለ፡ ወደያ፡ ቀጸላ፨
- ህየንተ፡ ቀጸላ፡ ዘወርቅ፡ ክቡረ፡ ስመ፡ መሐላ፨
- ወለገጽክሙ፡ ሰላም፡ ዘይጸድል፡ እምሥነ፡ እብላ፨
- ረስዩ፡ ወንጌላዊያን፡ ለሃይማኖትየ፡ ቃላ፨
- ዘያፈልስ፡ ደብረ፡ ወይመልሕ፡ ሰግላ፨
-
- ሰላም፡ ለአካለ፡ ቆምክሙ፡ ዐይነ፡ ነቢያት፡ ዘነጸሮ፨
- ምስለ፡ መልክእክሙ፡ ስቡሕ፡ እስከ፡ አእመረ፡ ምሥጢሮ፨
- ዐስበ፡ ጻማየ፡ ሀቡኒ፡ መላእክተ፡ ምሕረት፡ በአኅፅሮ፨
- ለመልክእክሙ፡ ዝንቱ፡ እስመ፡ አብጻሕኩ፡ መዝሙሮ፨
- ወለስምክሙ፡ ፈጸምኩ፡ ነገሮ፨
-
- በኍልቈ፡ ፳ወክልኤ፡ ዘመደ፡ ፍጡራን፡ ኵሉ፨
- ለአሐዱ፡ ድኅረ፡ አሐዱ፡ እንዘ፡ አስተታሉ፨
- ናሁ፡ አብጻሕኩ፡ ውዳሴ፡ ስምክሙ፡ ዘላዕሉ፨
- ሀቡኒ፡ ዐስበ፡ ጻማየ፡ በዘይረትዕ፡ ወይደሉ፨
- እምነ፡ ብዕልክሙ፡ አምላካዊ፡ ዘሀሎ፡ ወይሄሉ፨
-
- ሰላም፡ ለክሙ፡ ኪሩባዊያን፡ እንስሳ፡ ዘትጸውሩ፡ መንበረ፨
- ወትሴብሕዎ፡ ኵሎ፡ አሚረ፨
- ኪያክሙ፡ ለዘፈጠረ፨
-
- ሰላም፡ ለክሙ፡ ኪሩባዊያን፡ እንስሳ፡ በከመ፡ ነቢያት፡ ነገሩ፨
- ለእግዚአብሔር፡ ዐቢይ፡ ወግሩም፡ ግብሩ፨
- ዘትጸውርዎ፡ ለመንበሩ፨
-
- ሰላም፡ ለክሙ፡ ኪሩባዊያን፡ እንስሳ፡ ወመንፈሳዊያን፡ ማኅበር፨
- ዘትሴብሕዎ፡ በሐዋዝ፡ መዝሙር፨
- ለዘላዕሌክሙ፡ የኀድር፨
-
- ሰላም፡ ለስምክሙ፡ ስቡሕ፡ እስመ፡ አብዛኅኩ፡ ዘምሮ፨
- መላእክተ፡ ውሂብ፡ ወምሕሮ፨
- በሉኒ፡ ንሣእ፡ ለክብርነ፡ ክብሮ፨
- ዘኢቦአ፡ ውስቴቱ፡ አእምሮ፨