Subjects
Righteous
ያሬድ፡
Yāred
Yāred
Yāred
Malkəʾ
-
- በስመ፡ እግዚአብሔር፡ ሥሉስ፡ ዘበሰማያት፡ አቡነ፨
- በምግባር፡ ወግዕዝ፡ ዘወለደነ፨
- ያሬድ፡ ወጠንኩ፡ ለመልክእከ፡ ድርሳነ፨
- አብርህ፡ ኅሊናየ፡ ወዘልብየ፡ ዐይነ፨
- ወበልሳንየ፡ ጸሐፍ፡ ሐዲሰ፡ ልሳነ፨
-
- ሰላም፡ ለዝክረ፡ ስምከ፡ እኵት፡ ወቡሩክ፨
- በአፈ፡ ፈጣሪ፡ አምላክ፨
- መዝሙረ፡ በረከት፡ ያሬድ፡ ከመ፡ አብርሃም፡ ዓርክ፨
- አስተበቍዓከ፡ ለለ፡ ጊዜ፡ በጽባሕ፡ ወሰርክ፨
- ከመ፡ ታድኅነኒ፡ እመንሱት፡ ወሀውክ፨
-
- ሰላም፡ ለሥዕርተ፡ ርእስከ፡ ዘኢትቀርጻ፡ ለፈጊዕ፨
- ወዘኢሀለወ፡ ውስቴቶን፡ ዘደነስ፡ ቅብዕ፨
- ካህን፡ ያሬድ፡ ዘሰማያዊት፡ ምሥዋዕ፨
- ኀበ፡ መሠጠከ፡ የማነ፡ አብ፡ ጽኑዕ፨
- ሰደኒ፡ ምስሌከ፡ አሀሉ፡ በስንዕ፨
-
- ሰላም፡ ለርእስከ፡ ጸጕረ፡ ዘተገልበበ፨
- መልዕልተ፡ ኵሉ፡ ከዊኖ፡ ተድባበ፨
- ከመ፡ ታቅርብ፡ ያሬድ፡ ለአምላከ፡ ጽድቅ፡ ንባበ፨
- እግዚአብሔር፡ ለሕሊናከ፡ አእምሮ፡ ወሀበ፨
- ወበርእስከ፡ ሠዓለ፡ ጥበበ፨
-
- ሰላም፡ ለገጽከ፡ እምስነ፡ ፀሓይ፡ ያዋኪ፨
- ወእምነ፡ ፅዱል፡ ወርኅ፡ ዘኑኃ፡ ሌሊት፡ መላኪ፨
- መምህረ፡ ሃይማኖት፡ ያሬድ፡ ትንሣኤ፡ ክርስቶስ፡ ሰባኪ፨
- አድኅነኒ፡ ወሰውረኒ፡ እምልሳነ፡ ሰብእ፡ ሀዋኪ፨
- እስመ፡ ንስቲት፡ ይእቲ፡ እምኵሉ፡ ተኣኪ፨
-
- ሰላም፡ ለቀራንብቲከ፡ ዘአዕይንቲከ፡ ይጼልላ፨
- ለለ፡ አሐዱ፡ ልጹቀ፡ እንዘ፡ ይትማሰላ፨
- ኀበ፡ ተወለድከ፡ ያሬድ፡ ለሀገረ፡ አክሱም፡ በማእከላ፨
- እምትንበር፡ ምስለ፡ ንጉሥ፡ በፍግዕ፡ ወተድላ፨
- እፎ፡ መነንከ፡ ለዓለም፡ ብዕላ፨
-
- ሰላም፡ ለአዕይንቲከ፡ ከመ፡ ወይን፡ ፍሡሓት፨
- ለነጽሮ፡ ሐዲስ፡ ሥርዓት፨
- ዓቢይ፡ ያሬድ፡ ሊቀ፡ ካህናት፨
- አባ፡ ኢትሰደኒ፡ ኀበ፡ ሀሎ፡ መሥገርት፨
- ወክፍለኒ፡ እትመሀር፡ ዘለከ፡ ትምህርት፨
-
- ሰላም፡ ለአእዛኒከ፡ ነገረ፡ ማሕሌት፡ ዘአምጽኣ፨
- አመ፡ ሰማያተ፡ ቦኣ፨
- ብፁዕ፡ ያሬድ፡ ከመ፡ ገድልከ፡ አይድን፨
- በስንከ፡ ወበምግባርከ፡ ያስተበፅዑከ፡ ብፅዓ፨
- ኵሉ፡ ዘርእየ፡ ወኵሎ፡ ዘሰምዓ፨
-
- ሰላም፡ ለመላትሒከ፡ አውዏዞ፡ አንብዕ፡ ዘኢያዕረፋ፨
- እንዘ፡ ይስእላ፡ ምሕረተ፡ እምእግዚአብሔር፡ አልፋ፨
- ካህን፡ ያሬድ፡ ቢጸ፡ ሳውል፡ ወቢጸ፡ ኬፋ፨
- ነፍስየ፡ ትስእለከ፡ እምነገደ፡ አዝማን፡ ሐድፋ፨
- ወበሕፅንከ፡ ረሲ፡ ምዕራፋ፨
-
- ሰላም፡ ለአዕናፊከ፡ መዓዛ፡ ኪሩብ፡ ዘአፄነዉ፨
- አመ፡ መሠጠከ፡ መንፈስ፡ ኀበ፡ ቅዱሳን፡ ሀለዉ፨
- ከመ፡ ይስምዑ፡ ያሬድ፡ ለጕሕናከ፡ መሰናቅዉ፨
- ዕድ፡ ወአንስት፡ ድኅሬከ፡ ተለዉ፨
- ወምግባራቲከ፡ ለኵሉ፡ ዜነዉ፨
-
- ሰላም፡ ለከናፍሪከ፡ ስሙ፡ አምላክ፡ ዘሰብሓ፨
- ወለታቦተ ጽዮን፡ ንግሥት፡ ዘይቤላ፡ በሃ፨
- በንባስከ፡ ያሬድ፡ ሰላም፡ ወፍሥሓ፨
- አምሳለ፡ ደመና፡ ድኅረ፡ በዓለም፡ ተሰፍሐ፨
- ኮነ፡ ሕይወተ፡ ወኮነ፡ ምክሐ፨
-
- ሰላም፡ ለአፉከ፡ ዘተመልአ፡ ከመ፡ አይግ፨
- ፈልፈለ፡ ረባሕ፡ ወሕግ፨
- ካህን፡ ያሬድ፡ አበ፡ አዕሩግ፨
- ክፍለኒ፡ ሀብተ፡ በረከቱ፡ ለያዕቆብ፡ ዘሥሩግ፨
- ከመ፡ እሰብሐከ፡ ምስሌሁ፡ በደርግ፨
-
- ሰላም፡ ለአስናኒከ፡ ዘአልቦን፡ ምሳሌ፨
- እለ፡ ይጸዓድዋ፡ እምቢረሌ፨
- ሰሚዓከ፡ ያሬድ፡ ቃለ፡ ትጉሃን፡ በሉዓሌ፨
- ትቤ፡ ከማሆሙ፡ በምድር፡ ሃሌ፨
- ወሰላም፡ ለማርያም፡ ዘባቲ፡ ድንጋሌ፨
-
- ሰላም፡ ለልሳንከ፡ ዘከሠተ፡ አርያመ፨
- በጽዮን፡ ኤላመ፨
- ቀሲስ፡ ያሬድ፡ እንተ፡ ቀደስከ፡ ዓለመ፨
- አልቦ፡ ከማከ፡ ዘኃለፈ፡ ቅድመ፨
- ወአልቦ፡ ዘይመጽእ፡ ከማከ፡ ዳግመ፨
-
- ሰላም፡ ለቃልከ፡ በጽዮን፡ አንቀጽ፨
- ስብሐተ፡ አምላክ፡ ዘከልሐ፡ እንበለ፡ ኅፀፅ፨
- ምስሌከ፡ ያሬድ፡ ነበሩ፡ አብያጽ፨
- መጽኡ፡ ይስምዑከ፡ በጕጕዓ፡ ወረዊጽ፨
- ወንጉሥ፡ ተንሥአ፡ እመንበር፡ ኀኑፅ፨
-
- ሰላም፡ እብል፡ ለዘዚአከ፡ እስትንፋስ፨
- ዘተመሥጠ፡ ቦቱ፡ ዕፍረተ፡ መንፈስ፡ ቅዱስ፨
- ያሬድ፡ ካህን፡ ምሉአ፡ ሞገስ፨
- ለቃልከ፡ ሶበ፡ ቀደስኮ፡ በጽዮን፡ መቅደስ፨
- አድማዕከ፡ ተስፋ፡ ለኵሉ፡ ዘነፍስ፨
-
- ሰላም፡ እብል፡ ለዘዚአከ፡ ጕርዔ፨
- ዘኢሰትየ፡ ማየ፡ እንዘ፡ ይጸውም፡ ለለ፡ ሱባዔ፨
- ክቡር፡ ያሬድ፡ ካህነ፡ ትንሣኤ፨
- ዝርዎሙ ለአዕራርየ፡ ከመ፡ ይዘሩ፡ መስዔ፨
- ጊዜ፡ ላዕሌየ፡ ብሩ፡ ወገብሩ፡ ጉባኤ፨
-
- ሰላም፡ ለክሣድከ፡ ከመ፡ ባዝግና፡ ወማ፨
- ዘአነቀ፡ አልባሰ፡ ግርማ፨
- ማኅሌታይ፡ ያሬድ፡ በዓለ፡ አቢይ፡ ዜማ፨
- ለመልክእከ፡ ዛቲ፡ ከመ፡ እፈጽማ፨
- ይንግራ፡ አዕዋፍ፡ ለአስማት፡ ስማ፨
-
- ሰላም፡ ለመትከፍትከ፡ መረግደ፡ እለ፡ ጾራ፡
- በውሣጤ፡ ቅድስት፡ ደብተራ፨
- ካህን፡ ያሬድ፡ ዘውግ፡ ኤልያስ፡ ወዘውግ፡ ዕዝራ፨
- እንበለ፡ አእምር፡ ለመንግሥት፡ ትፍሥሕታ፡ ወግብራ፨
- ከመ፡ ኢይሙት፡ ጸሊ፡ ገብርከ፡ ለግሙራ፨
-
- ሰላም፡ ለዘባንከ፡ ሞሕተ፡ ሱራሄ፡ ዘተዓፅፈ፨
- በቀለመ፡ ወርቅ፡ ዘተጽሕፈ፨
- ያሬድ፡ ክብርከ፡ እምክብረ፡ መላእክት ኃለፈ፨
- ከመ፡ ኤፌሶን፡ ወጤግሮስ፡ ውስተ፡ ልበ፡ ኵሉ፡ ሰፈፈ፨
- ንባበ፡ ቃልከ፡ በሐኬት፡ ኢተርፈ፨
-
- ሰላም፡ ለእንግድዓከ፡ በእንተ፡ ፈቃዱ፡ ወሥምረቱ፨
- ዘኢጾረ፡ ለጌጋይ፡ ጾረ፡ አርዑቱ፨
- እንበለ፡ ትፍልጥ፡ ያሬድ፡ በዜማ፡ ቃላት፡ ሠለስቱ፨
- ሰማዕታተ፡ ወጻድቃን፡ እለ፡ አዕረፉ፡ ወሞቱ፨
- ክብሮሙ፡ ዜናከ፡ ለዓለም፡ ዝንቱ፨
-
- ሰላም፡ ለሕፅንከ፡ ዘተሐቅፈ፡ ዲቤሁ፨
- ለኪሩብ፡ ቃለ፡ ቅዳሴሁ፨
- ዘይሰብክ፡ ያሬድ፡ ለክርስቶስ፡ ትንሣኤሁ፨
- ናሁ፡ በበዓሉ፡ ተፈሥሑ፡ ናሁ፨
- እስመ፡ ዓቢይ፡ ውእቱ፡ ወክቡር፡ ብእሲሁ፨
-
- ሰላም፡ ለአእዳዊከ፡ ለቀቲለ፡ ብእሲ፡ ዘኣስሕታ፨
- እንዘ፡ የኃድጋ፡ ቀስተ፡ ወገደፋ፡ ወልታ፨
- ክቡር፡ ያሬድ፡ ለገበዘ፡ አክሱም፡ ካህነ፡ ቤታ፨
- ጸሊ፡ ያስተጋብአነ፡ ለዝርዋን፡ ካህናታ፨
- ከመ፡ በ፩ኅቡረ፡ ነሀሉ፡ ውስቴታ፨
-
- ሰላም፡ ለመዛርዒከ፡ ጽኑዓን፡ ከመ፡ መሠረት፨
- በኃይለ፡ ጸሎት፨
- ዘሰተይከ፡ ያሬድ፡ በጽርሐ፡ ጽዮን፡ ቅድስት፨
- ስቴ፡ መንፈስ፡ ዘሰተይዎ፡ ሐዋርያት፨
- እንዘ፡ ጉቡኣን፡ እሙንቱ፡ በቤት፨
-
- ሰላም፡ ሰላም፡ ለኵርናዕከ፡ እምሰርዌ፨
- ለመልአከ፡ አርዌ፨
- ያሬድ፡ አቡየ፡ ምሉአ፡ ጥበብ፡ ወልባዌ፨
- ጽንሐኒ፡ ለገብርከ፡ እስከ፡ እበጽሕ፡ ውርዛዌ፨
- ወኢትመጥወኒ፡ ለሕማም፡ ወደዌ፨
-
- ሰላም፡ ለእመትከ፡ ዘኣሰፈረ፡ ለሰብእ፨
- መስፈርተ፡ ኃጣውእ፨
- ወዘኢቆምከ፡ ያሬድ፡ ውስተ፡ ዓውደ፡ ጽልእ፨
- በእንቲአየ፡ አስተበቍዖ፡ አመ፡ ይመጽእ፨
- ከመ፡ ይምሐረነ፡ ቃለ፡ አብ፡ እግዚእ፨
-
- ሰላም፡ ለእራኃቲከ፡ ዘያፈጥና፡ ውሂበ፨
- ከመ፡ ከርሥ፡ ዘርዓበ፨
- ፍዳ፡ አቅረብኩ፡ ያሬድ፡ ለመልክእከ፡ ንባበ፨
- ረስዮ፡ ለሕሊናየ፡ ዘክህነት፡ መዝገበ፨
- ካልኣንሰ፡ ኢይክሉ፡ ዓቂበ፨
-
- ሰላም፡ ለአፃብዒከ፡ እለ፡ ተደለዋ፡ ለጽሒፍ፨
- ትእዛዘ፡ አምላክ፡ ትሩፍ፨
- እንዘ፡ ይትና በባከ፡ ያሬድ፡ በከናፍር፡ ወአፍ፨
- ሰደኒ፡ ኀበ፡ ወሰዳከ፡ ሠላስ፡ አዕዋፍ፨
- እንዘ፡ ይትጓድዓ፡ አክናፈ፡ በክንፍ፨
-
- ሰላም፡ ለአጽፋረ፡ እዴከ፡ ዘይነብራ፡ መልዕልተ፨
- እምሥጋ፡ አፃብዕ፡ ነሢኦን፡ ሥርዓተ፨
- ከመ፡ እወድሰከ፡ ያሬድ፡ ቅድመ፡ ገጸ፡ ኵሉ፡ ክሡት፨
- መጺኦ፡ መልአከ፡ ሞት፡ ኢይሰደኒ፡ ግብተ፨
- አባ፡ በእንቲአየ፡ ጸሊ፡ አንተ፨
-
- ሰላም፡ ለገቦከ፡ ህየንተ፡ ሰከበ፡ በሠቅ፨
- እግዚአብሔር፡ ገልበቦ፡ ሐመልማለ፡ ወርቅ፨
- ካህን፡ ያሬድ፡ ምክሐ፡ አዕሩግ፡ ወደቂቅ፨
- ሡቀኒ፡ እምትንታኔ፡ ከመ፡ ኢይደቅ፨
- ወኢታግብአኒ፡ ውስተ፡ ግብ፡ ዕሙቅ፨
-
- ሰላም፡ እብል፡ ለከርሥከ፡ ሰሌዳ፨
- ዘተጽሕፈ፡ ቦቱ፡፡ አምኃ፡ ስብሐት፡ ወጋዳ፨
- በእንቲአየ፡ ያሬድ፡ ለልሳንከ፡ ከመ፡ ልማዳ፨
- ጸሊ፡ ኀበ፡ ማርያም፡ ወኀበ፡ ኢየሱስ፡ ወልዳ፨
- ከመ፡ ታድኅኑኒ፡ እመንሱት፡ ወዕዳ፨
-
- ሰላም፡ ለልብከ፡ ዘኢያእመረ፡ ቂመ፨
- እንበለ፡ ዳእሙ፡ ሰላመ፨
- እንዘ፡ ትሰሚ፡ ያሬድ፡ ዘማርያም፡ ስመ፨
- ለነቢብ፡ እምትናግሮ፡ አፈ፡ ሰብእ፡ አርመመ፨
- ወሕፃን፡ ሶቤሃ - አቀመ፨
-
- ሰላም፡ ለኵልያቲከ፡ እግዚአብሔር፡ ዘፈተኖን፨
- በማኅቶተ፡ ብርሃን፨
- ውዱሰ፡ ምግባር፡ በኵሉ፡ ያሬድ፡ ካህን፨
- አድኅነኒ፡ በጸሎትከ፡ እመከራ፡ ዝንቱ፡፡ ዘመን፨
- ወእመግሪሁ፡ ለእኩይ፡ ሰይጣን፨
-
- ሰላም፡ ለኅሊናከ፡ ንስቲተ፡ ዘኢሐለየ፨
- ምክረ፡ እኩየ፨
- ያሬድ፡ ካህን፡ ቀሪበከ፡ ዝየ፨
- አምዕዝ፡ በጸሎትከ፡ ዘስሕከ፡ ጕርዔየ፨
- ወስብሐተ፡ አምላክ፡ ምላእ፡ አፉየ፨
-
- ሰላም፡ ለአማዑቲከ፡ በፍርሃት፡ ዘኢተሀውካ፨
- እንዘ፡ በአምላክ፡ ያመልካ፨
- ስምከ፡ ያሬድ፡ ከመ፡ ያሬድ፡ ወልደ፡ ባረካ፨
- ለትንሣኤ፡ ክርስቶስ፡ ትቤላ፡ ዕለተ፡ በርህ፡ ወዋካ፨
- ዛቲ፡ ፋሲካ፡ ዛቲ፡ ፋሲካ፨
-
- ሰላም፡ ለንዋየ፡ ውሥጥከ፡ ኅቡእ፡ ዘኢይትረአይ፨
- እመልያልይ፨
- ያሬድ፡ ካህን፡ በቃለ፡ መዝሙር፡ ሠናይ፨
- ከመ፡ ትሰብሖ፡ ለትንሣኤ፡ ክርስቶስ፡ ዓቢይ፨
- መንገለ፡ ሰማያት፡ መሠጠከ፡ ማኅየዊ፡ ባሕርይ፨
-
- ሰላም፡ ለኅንብርትከ፡ ማእከለ፡ መላክዕ፡ ዘሣረሮ፨
- እግዚአብሔር፡ ርእሰ፡ አእምሮ፨
- ዘነበርከ፡ ያሬድ፡ ምስለ፡ ንጉሥ፡ በተፋቅሮ፨
- ሶበ፡ ነጸሩከ፡ እንዘ፡ ትዜምሮ፡ ዘምሮ፨
- ሠራዊት፡ ኵሎሙ፡ አንከሩ፡ አንክሮ፨
-
- ሰላም፡ ለሐቌከ፡ ህየንተ፡ ዘቀነተ፡ ጋጋ፨
- ለነሢአ፡ ጽድቅ፡ ወጸጋ፨
- ካህን፡ ያሬድ፡ መምህረ፡ ብዙኃን፡ እንግልጋ፨
- ለገበዘ፡ አክሱም፡ ሀገርከ፡ ወውላድከ፡ በሥጋ፨
- ከመ፡ ይትቀደስ፡ ጸሊ፡ ሥርዓታ፡ ወሕጋ፨
-
- ሰላም፡ ለአቍያጺከ፡ መልዕልተ፡ አብራክ፡ ዘተሐንጻ፨
- እንዘ፡ ይትባየፃ፨
- ብፁዕ፡ ያሬድ፡ ዘኣያእመርከ፡ ግብረ፡ ዓመፃ፨
- ለቃለ፡ አፉከ፡ ከመ፡ ይስምዓ፡ ድምፃ፨
- ዘመደ፡ አዕዋፍ፡ ኵሎን፡ መንገሌከ፡ ሮጻ፨
-
- ሰላም፡ ለአብራኪከ፡ ዘሰገዳ፡ ለስኢል፨
- ቅድመ፡ ገጸ፡ ክርስቶስ፡ ቃል፨
- ካህን፡ ያሬድ፡ ሰባኬ፡ ሐዲስ፡ ወንጌል፨
- ነሢአከ፡ ፆታ፡ እምኪሩቤል፨
- ለገበዘ፡ አክሱም፡ ቀደስከ፡ በማሕሌት፡ ወዕዝል፨
-
- ሰላም፡ ለአእጋሪከ፡ ዘኍልቆን፡ ክልኤቲ፨
- እንዘ፡ እኤምኆን፡ ለለ፡ አሐቲ፨
- አስተበቍዓከ፡ ያሬድ፡ በዕለተ፡ በዓልከ፡ ዛቲ፨
- ጸሊ፡ ከመ፡ ታድኅነኒ፡ እመሥገርተ፡ ሰይጣን፡ መስሐቲ፨
- ኀበ፡ ማርያም፡ ድንግል፡ ወለቱ፡ ለማቲ፨
-
- ሰላም፡ ለሰኳንዊከ፡ ከመ፡ ቃለ፡ ነቢይ፡ ዳዊት፨
- ዘኢዓገቶን፡ ኃጢአት፨
- ጊዜ፡ ትብል፡ ያሬድ፡ ቅድስት፡ ወብፅዕት፨
- እምድር፡ ተለዓልከ፡ መጠነ፡ እመት፨
- ቅድመ፡ ታቦተ፡ አምላከ፡ ጽዮን፡ ዘባቲ፡ ኦሪት፨
-
- ሰላም፡ ለመከየድከ፡ትእዛዘ፡ ወንጌል ከመ፡ይፈጽሙ፨
- በሐዊረ፡ ፍኖት፡ ዘኢደክሙ፨
- ለሰብአ አክሱም፡ ያሬድ፡ እንዘ ትትአመኖሙ፨
- ነሣእከ፡ ሰላሙ፡ እምኔሆሙ፨
- ወሰላሙከ፡ ኃደገ፡ ሎሙ፨
-
- ሰላም፡ ለአፃብዒከ፡ በከተማ፡ አእጋር፡ ዘተሣረረ፨
- እንዘ፡ ምስሌሁ፡ ይከውን፡ ኅቡረ፨
- ጻድቅ፡ ያሬድ፡ ከመ፡ ገድልከ፡ ነገረ፨
- እምንኡስ፡ ዕፄ፡ ነጺረከ፡ ምግባረ፨
- ወበእንተዝ፡ ተመየጥከ፡ ትትመሀር፡ መዝሙረ፨
-
- ሰላም፡ ለአጽፋረ፡ እግርከ፡ ዘኢያዕቀፎን፡ እብን፨
- ወዘኢተዳደቆን፨
- ያሬድ፡ ካህን፡ ጥዑመ ልሳን፨
- ሶበ፡ ሖርከ፡ ለነቢር፡ መንገለ፡ ሰሜን፨
- ሰብአ አክሱም፡ ተረክቡ፡ በብዙኅ፡ ኃዘን፨
-
- ያሬድ፡ ካህን፡ ለቆምከ፡ አዳም፨
- ሰላም፡ ሰላም፨
- ምስለ፡ መላክኢከ፡ ኵሎን፡ ዘሥጋ፡ ወደም፨
- እለ፡ ኢጸዋዕኩ፡ ወጸዋዕኩ፡ ዘዚአሆን፡ ስም፨
- ለለ፡ አሐዱ፡ አሐዱ፡ ስኡላን፡ በዓዕም፨
-
- ሰላም፡ እብል፡ ለህላዌ፡ ሥጋከ፡ ዓዐድ፨
- ዘቅጽራ፡ በረድ፨
- ያሬድ፡ ካህን፡ ክቡረ፡ ዘመድ፨
- አንቅሀኒ፡ በጸሎትከ፡ እምንዋመ፡ ሀኬት፡ ክቡድ፨
- ከመ፡ እሰብሖ፡ ለክርስቶስ፡ ዋሕድ፨
-
- ናሁ፡ አቅረብኩ፡ እምዘብየ፡ ንስቲተ፨
- ለመልክእከ፡ ማሕሌተ፨
- ኢትበለኒ፡ ያሬድ፡ ለምንት፡ ሊተ፨
- ተወከፍ፡ ባሕቱ፡ ወአዕርግ፡ ሰማያተ፨
- ከመ፡ ክርስቶስ፡ ተወከፈ፡ ዘአቤል፡ መሥዋዕተ፨