Details
-
- በስመ፡ እግዚአብሔር፡ ሕያው፡ ዘአምጻእክሙ፡ እምኀበ፡ አልቦ፨
- እዌጥን፡ ጽሒፈ፡ ዜና፡ ውዳሴክሙ፡ በአስተርክቦ፨
- ማኅበረ፡ መላእክት፡ ወሰብእ፡ ጥዑማነ፡ ዝክር፡ ለተናብቦ፨
- አዕርጉኒ፡ ደብረ፡ ራእይ፡ በክንፍክሙ፡ ዘገቦ፨
- ለስብሐቲክሙ፡ እነጽር፡ መዝገቦ፨
-
- ሰላም፡ ለዝክረ፡ ስምክሙ፡ ዘጽሕፈተ፡ እግዚእ፡ ጽሕፈቱ፨
- ኀበ፡ ዐምደ፡ ወርቅ፡ ወቀይሕ፡ ዘብርሩ፡ ስክተቱ፨
- ማኅበረ፡ መላእክት፡ ወሰብእ፡ ዘላዕሉ፡ ወታሕቱ፨
- ስረዩ፡ ኃጢአትየ፡ በእንተ፡ ስምክሙ፡ ዝንቱ፨
- እስመ፡ ብዙኅ፡ ወትሩፍ፡ ውእቱ፨
-
- ሰላም፡ ለመላክኢክሙ፡ እንተ፡ ለሐኮን፡ እግዚአብሔር፨
- በኪነ፡ ኅቡእ፡ ኅሊና፡ ኵሉ፡ ፍጡር፨
- ማኅበረ፡ መላእክት፡ ወሰብእ፡ ማኅበራነ፡ በኵር፨
- ጸግዉኒ፡ አጋእዝትየ፡ ዕሤተ፡ ዝንቱ፡ መዝሙር፨
- መንግሥተ፡ ዘሰማይ፡ ወአኮ፡ ዘምድር፨
-
- እግዚአብሔር፡ እግዚእ፡ እንዘ፡ ይረድአኒ፡ ኀይሉ፨
- ዘነበርኩ፡ ንስቲተ፡ እምዜናክሙ፡ ዘይደሉ፨
- ማኅበረ፡ መላእክት፡ ወሰብእ፡ ኢታአትትዎ፡ ለቃሉ፨
- ወኢትግድፉ፡ አሐተ፡ እምዘተጽሕፈ፡ ፊደሉ፨
- እስከ፡ ሶበ፡ ኵሉ፡ ይትገበር፡ ወይከውን፡ ኵሉ፨
-
- እግዚአብሔር፡ በላዕሌየ፡ እንዘ፡ ይከውነኒ፡ ከመ፡ ዖፍ፨
- ዘተናገርኩ፡ ሕቀ፡ እምዜናክሙ፡ ትሩፍ፨
- ማኅበረ፡ መላእክት፡ ወሰብእ፡ ተናበብዎ፡ ዘዘልፍ፨
- ወአዕረግዎ፡ ቅድመ፡ ፈጣሪ፡ ከመ፡ መሥⷃዕተ፡ ሰርክ፡ ውኩፍ፨
- ወከመ፡ ዕጣን፡ ዘይጼኑ፡ ለአንፍ፨