Subjects
Righteous
ጰንጠሌዎን፡
Ṗanṭalewon
Ṗanṭalewon
Ṗanṭalewon
Malkəʾ
-
- በስመ፡ እግዚአብሔር፡ ሕያው፡ ለሰማይ፡ ዘረበቦ፨
- ወኵሎ፡ ዓለመ፡ ዘአምጽአ፡ እምኀበ፡ አልቦ፨
- ናሁ፡ ወጠንኩ፡ ስብሐተ፡ መልክእከ፡ በአስተርክቦ፨
- ጰንጠሌዎን፡ ሥመር፡ ባሕቱ፡ ለልሳንየ፡ ንባቦ፨
- ወተናበበኒ፡ እምከሓ፡ ወገቦ፨
-
- ሰላም፡ ለዝክረ፡ ስምከ፡ ዘሥነ፡ ስብሐቲሁ፡ የዐዱ፨
- እምስብሐተ፡ ንጉሥ፡ ኃላፊ፡ ዘይገብእ፡ ኀበ፡ ሙላዱ፨
- ጰንጠሌዎን፡ እንተ፡ እምነ፡ ቅዱሳን፡ አሐዱ፨
- እምጽርዕ፡ ወእምሮምያ፡ እለ፡ ኀቤነ፡ ነገዱ፨
- ምድርነ፡ ኢትዮጵያ፡ አድያማ፡ ይዑዱ፨
-
- ሰላም፡ ለጽዋዔ፡ ሞትከ፡ ለእግዚአብሔር፡ በፈቅዱ፨
- ኀበ፡ ትዔሪ፡ መንግሥተ፡ ወሕይወተ፡ በውስተ፡ ዐውዱ፨
- ጰንጠሌዎን፡ ጽጌ፡ ወምዑዝ፡ ዕቍረ፡ ናርዱ፨
- ይመስል፡ ሰዐ፡ ሞትከ፡ በዓለ፡ መርዓዊ፡ አሐዱ፨
- ወንጉሥ፡ ዘገብረ፡ ከብካበ፡ ለወልዱ፨
-
- ሰላም፡ ለመቃብሪከ፡ ዘአስተርአየ፡ ውስቴታ፨
- ዐቢይ፡ ኀይል፡ ዘተገብረ፡ በጎልጎታ፨
- ጰንጠሌዎን፡ እኩን፡ ኢትኅድገኒ፡ እጓለ፡ ማውታ፨
- ለኃጥእ፡ ወለጻድቅ፡ አመ፡ ይከውን፡ ሐተታ፨
- ወአመ፡ ታገብር፡ ምድር፡ ዘነሥአት፡ ማሕፀንታ፨
-
- ናሁ፡ አቅረብኩ፡ ለመልክእከ፡ ተውዳሰ፨
- መጠነ፡ ብየ፡ ምድራሰ፨
- ጰንጠሌዎን፡ አዕቢ፡ ቃለ፡ አፉየ፡ ንኡሰ፨
- ከመ፡ አፈድፍድ፡ ለስምከ፡ ስብሐተ፡ ማሕሌት፡ ሐዲሰ፨
- እስመ፡ ኅሊናየ፡ ደክመ፡ ወልብየ፡ ፀብሰ፨