Subjects
Martyr
ዲዮስቆሮስ፡
Diyosqoros
Dioscorus
Dioscorus
Malkəʾ
-
- በስመ፡ አብ፡ ወወልድ፡ ወመንፈስ፡ ቅዱስ፡ እንዘ፡ እብል፨
- ናሁ፡ ወጠንኩ፡ መዝሙረ፡ ማሕሌት፡ ወስኢል፨
- አውተረ፡ ውዳሴከ፡ እዝብጥ፡ በድኅንጻ፡ መንፈስ፡ ወቃል፨
- ዲዮስቆሮስ፡ አርትዕ፡ ልሳንየ፡ በዘዚአከ፡ ክሂል፨
- እስመ፡ ወልደ፡ አምላክ፡ አንተ፡ በጸጋ፡ ወሣህል፨
-
- ሰላም፡ ለዝክረ፡ ስምከ፡ እምነ፡ ጸቃውዕ፡ ጥዑም፨
- ወቃለ፡ እማኄ፡ እተሉ፡ ለሥዕርትከ፡ ጸሊም፨
- ዲዮስቆሮስ፡ ጴጥሮስ፡ ጥበበ፡ ስሕተታ፡ ለሮም፨
- ሶበ፡ ወፅአት፡ እምትእዛዝከ፡ ወሥርዓትከ፡ እቁም፨
- ከፈለቶ፡ ለክርስቶስ፡ እምሥጋ፡ ወደም፨
-
- ሰላም፡ ለርእስከ፡ ለመንፈሰ፡ ጥበብ፡ መካኑ፨
- ወለገጽከ፡ እምወርኀ፡ ዘይኤድም፡ መልክአ፡ ሥኑ፨
- ዲዮስቆሮስ፡ ፀሓይ፡ ለዓለመ፡ ጽልመት፡ ብርሃኑ፨
- ኢይነጽሩ፡ ብርሃንከ፡ ዘዐይነ፡ ኅሊና፡ ከደኑ፨
- እንዘ፡ ቦሙ፡ አዕይንተ፡ ዕዉራን፡ ኮኑ፨
-
- ሰላም፡ ለጽሕምከ፡ በእንተ፡ ሃይማኖት፡ ዘተነጽየ፨
- ወለመልክእከ፡ ፍሡሐት፡ አመ፡ ተወከፈ፡ ሥቃየ፨
- ዲዮስቆሮስ፡ ልዮን፡ ዘግዘትከ፡ ዐበየ፨
- ምስለ፡ ደቂቅከ፡ ነቡረ፡ በእበዱ፡ ኀበ፡ ኢይረክብ፡ ማየ፨
- እንዘ፡ ነቅዐ፡ ገነት፡ የኀድግ፡ ውስተ፡ በድው፡ ሳኰየ፨
-
- ሰላም፡ ሰላም፡ ለመዝገበ፡ ሠናያት፡ ኅሊናከ፨
- ወለአማዑቲከ፡ በቅናት፡ በእንተ፡ ሃይማኖት፡ ዘተሀውከ፨
- ዲዮስቆሮስ፡ በሎ፡ ለእግዚአብሔር፡ አምላክከ፨
- ለምንት፡ በወርኀ፡ ምንዳቤ፡ ዘኢተሠሀል፡ ሕዝብከ፨
- አይቴ፡ ውእቱ፡ ዘትካት፡ ሣህልከ፨
-
- ሰላም፡ ለፀአተ፡ ነፍስከ፡ አመ፡ ሳብዑ፡ ለመስከረም፨
- ወለበድነ፡ ሥጋከ፡ ዘይጸንሕ፡ ስብሐተ፡ ትንሣኤ፡ ዘገዳም፨
- ዲዮስቆሮስ፡ ሥመር፡ ከመ፡ ትበለኒ፡ ዮም፨
- ተንሥእ፡ ነዓ፡ ቅሩብየ፡ እስመ፡ ኀላፊ፡ ዝናም፨
- ታሕተ፡ ጽላሎተ፡ ኰኵሕ፡ አሀሉ፡ ቅሩበ፡ ጥቅም፨
-
- ሰላም፡ ለመልክእከ፡ ክቡር፡ በበ፡ አስማቲሁ፡ ወፍቅዱ፨
- ናሁ፡ አቅረብኩ፡ አምኃ፡ ዘቀደምትየ፡ አውሐዱ፨
- ለሊቀ፡ ጳጳሳት፡ ቄርሎስ፡ ዲዮስቆሮስ፡ የማነ፡ እዱ፨
- ለኅርቱም፡ ገብርከ፡ ባርከኒ፡ በበረከተ፡ ቃል፡ አሐዱ፨
- ከመ፡ ባረኮ፡ አብርሃም፡ ለይስሐቅ፡ ወልዱ፨
-
- በዓመት፡ ዐሥር፡ ምእት፡ ወአሐዱ፡ ምእት፡ ሰብዓ፡ ወስድስቱ፨
- ማኅበረ፡ ኬልቄዶን፡ አብዳን፡ እምአመ፡ ሰደድዎ፡ ሎቱ፨
- ተጽሕፈት፡ ዛቲ፡ ለዲዮስቆሮስ፡ ዜና፡ ስደቱ፨
- ለንጉሥ፡ ኢትዮጵያዊ፡ በሣልስ፡ ጉባኤ፡ መንግሥቱ፨
- በወርኀ፡ መጋቢት፡ በራብዕ፡ ዕለቱ፨