Details
-
- በስመ፡ አብ፡ ወወልድ፡ ወመንፈስ፡ ቅዱስ፡ ዘከሠተ፨
- ልሳነ፡ በሃማን፡ ያንብብ፡ ምሥጢረ፡ ትስልሥቱ፡ ኅብእተ፨
- ድርሳነ፡ አቦሊ፡ እትናገር፡ ወዘውዳሴሁ፡ ኩነተ፨
- ያውርድ፡ ሊተ፡ ይእዜ፡ ጽዋዐ፡ ልቡና፡ ምልእተ፨
- እስከ፡ እፌጽም፡ ዘወጠንኩ፡ እሎንተ፡ ቃላተ፨
-
- ሰላም፡ ለዝክረ፡ ስምከ፡ ኀበ፡ ዓምደ፡ ወርቅ፡ ዘተጽሕፈ፨
- ወለሥዕርትከ፡ ሲሩይ፡ ደመ፡ ደመና፡ ነፍኒፈ፨
- ሶበ፡ አቦሊ፡ ልብከ፡ በጥብጣቤ፡ ፍቅሩ፡ ተቀሥፈ፨
- ሰማዕተ፡ ኮንከ፡ ለክርስቶስ፡ ወበዐውደ፡ ስምዕ፡ ግዱፈ፨
- ከመ፡ ኢትስግድ፡ ለጣዖት፡ እደ፡ ሰብእ፡ ዘገልፈ፨
-
- ሰላም፡ ለርእስከ፡ አክሊለ፡ መንግሥት፡ መኒኖ፨
- ወለገጽከ፡ ብሩህ፡ ውሒዘ፡ ደም፡ ዘአደመኖ፨
- አቦሊ፡ ሰማዕት፡ ወልደ፡ ዮስጦስ፡ በተአምኖ፨
- ናሁ፡ አብደርከ፡ ወኀረይከ፡ አሠረ፡ ኢየሱስ፡ ዴግኖ፨
- በየማነ፡ ንግሡ፡ ትንግሥ፡ ወጎሮ፡ ትኩኖ፨
-
- ሰላም፡ ለቀራንብቲከ፡ አርአያ፡ ቄድሮስ፡ አምሳሉ፨
- ወለአዕይንቲከ፡ ብሩህ፡ ዘሥርቀተ፡ ኮከብ፡ ሥነ፡ ፀዳሉ፨
- አቦሊ፡ ጽዑር፡ ወኵኑን፡ በውስተ፡ ኵሉ፨
- ክሥት፡ ሊተ፡ እግዚእየ፡ ሥቃይከ፡ ፊደሉ፨
- ከመ፡ እንግር፡ በበ፡ ገጹ፡ ወግብሮ፡ ዘይተሉ፨
-
- ሰላም፡ ለአእዛኒከ፡ ወለመላትሒከ፡ ልሑያት፨
- ኂጠተ፡ ቃሉ፡ ኢሰምዐ፡ ለዲዮቅልጥያኖስ፡ ምይንት፨
- አቦሊ፡ ቅዱስ፡ ወልደ፡ ታውክልያ፡ ቅድስት፨
- ናሁ፡ አንሣእከ፡ ተአሚነከ፡ በአነዳከ፡ ዝኅቅት፨
- ዘምስለ፡ ታስዕ፡ ዓሥር፡ ምቁታን፡ ዘጥንት፨
-
- ሰላም፡ ለአእናፊከ፡ መዐዛ፡ ክርስቶስ፡ ዘአጼነዋ፨
- ወለከናፍሪከ፡ ጥዑም፡ እምጼና፡ ስኂን፡ ወመዐዛ፡ አልዋ፨
- አቦሊ፡ ኵኑን፡ በእሳት፡ እምነ፡ ዕድዋ፨
- ለእምከ፡ ቤተ፡ ክርስቲያን፡ ምህርካ፡ አማኑኤል፡ ፄዋ፨
- በምክረ፡ መስቴማ፡ ድሩክ፡ ዘጌጋይ፡ ሥርዋ፨
-
- ሰላም፡ ለአፉከ፡ ዘነበበ፡ ክብረ፡ አምላክ፨
- ወለአስናኒከ፡ ጽዕድዋት፡ አርአያ፡ አዕናቍ፡ ቡሩክ፨
- አቦሊ፡ ሰማዕት፡ ፀሓየ፡ ሮምያ፡ ዘሰርክ፨
- አድኅነኒ፡ እምአፅራርየዘልማዶሙ፡ ሀከክ፨
- ከመ፡ ኢያንሥኡ፡ ብየ፡ ምንሳዌ፡ ወሀውክ፨
-
- ሰላም፡ ለልሳንከ፡ ንባበ፡ ፈጣሪ፡ ልሳን፨
- ወለቃልከ፡ ድሙጽ፡ ዘዐዋዴ፡ ወንጌል፡ ቀርን፨
- አቦሊ፡ ዘኮንከ፡ ቢጸ፡ ሰማዕታት፡ ኵኑን፨
- ዕቀበኒ፡ በረድኤትከ፡ እምልሳነ፡ ብእሲ፡ ምኑን፨
- ከመ፡ ኢያቍስለኒ፡ ሊተ፡ በኅምዙ፡ ርሱን፨
-
- ሰላም፡ ለእስትንፋስከ፡ ፈዋሴ፡ ድዉያን፡ በንፍሐቱ፨
- ወለጕርዔከ፡ ሰላም፡ መዓዛ፡ ቅዳሴ፡ ቦቱ፨
- አቦሊ፡ ጽዑር፡ ወቅቡእ፡ ዝፍተ፡ እልክቱ፨
- ከመ፡ ኢትክሐድ፡ አምላክከ፡ እንተ፡ ረከበከ፡ ዝንቱ፨
- አኮ፡ በጌጋይከ፡ ዳእሙ፡ በከንቱ፨
-
- ሰላም፡ ለክሳድከ፡ ዘኢያፍቀረ፡ ባዝግና፨
- ወለመትክፍትከ፡ ለይ፡ ዘኢለብሰ፡ ልብሰ፡ ሙስና፨
- እስመ፡ አቦሊ፡ ረከብከ፡ ለነፍስከ፡ ጽድቀ፡ መካና፨
- አትልወኒ፡ መንገለ፡ ሖርከ፡ ውስተ፡ ኀበ፡ ይትፈቀድ፡ ፍና፨
- አምጣነ፡ ነፍስየ፡ ለከ፡ ረሰየት፡ ምእመና፨
-
- ሰላም፡ ለዘባንከ፡ ዘዘሐቅዎ፡ በመጥባሕት፨
- ወለእንግድዓከ፡ ሰላም፡ ምርፋቀ፡ በረከት፨
- አቦሊ፡ ኩነኒ፡ ህየንተ፡ ቡራኬ፡ ወሀብት፨
- ሀበኒ፡ እንሣእ፡ ለምስኪን፡ መዛግብተ፡ ኵሉ፡ ሲሲት፨
- ወኅጡአ፡ ጸጋ፡ ኢይኩን፡ እምዘ፡ ለከ፡ ፍት፨
-
- ሰላም፡ ለኅፅንከ፡ መከራ፡ ሥቃይ፡ ዘረከቦ፨
- ምስለ፡ አእዳዊከ፡ በተስሕቦ፨
- አቦሊ፡ ኵኑን፡ ወባዕል፡ በተመንድቦ፨
- ናሁ፡ አድማዕከ፡ ለነፍስከ፡ ነፍሰ፡ ሰማዕታት፡ ኀበቦ፨
- ለአካለ፡ ዚአየ፡ ሥመር፡ ኀቤከ፡ ታቅርቦ፥፨
-
- ሰላም፡ ለመዛርዒከ፡ ወለኵርናዕከ፡ ኽርናዓ፡ ድብ፨
- እለ፡ ያነፍጻ፡ ፀረ፡ በውሣጤ፡ ዕሙቅ፡ ግብ፨
- አቦሊ፡ ሰማዕት፡ እኅወ፡ ጊዮርጊስ፡ ዘርብ፨
- ፀርየ፡ አንትዕ፡ ዘቅድሜየ፡ እስከ፡ ይጸብቦ፡ ርኂብ፨
- ወእለ፡ ዘድኅሬየ፡ አውድቅ፡ ኀበ፡ ኢወድቀ፡ ሕዝብ፨
-
- ሰላም፡ ለእመትከ፡ ወለእራኃቲከ፡ አኃዚ፨
- እለ፡ ወሐዛ፡ ደመ፡ ከመ፡ ማየ፡ ተከዚ፨
- አቦሊ፡ ኀያል፡ እግረ፡ ኀያላን፡ መስአዝዚ፨
- አጽንዖ፡ በሥልጣንከ፡ ለኅሊናየ፡ አዛዚ፨
- ከመ፡ ኢያንሶሱ፡ በመርኅባ፡ ለግርምት፡ ኰራዚ፨
-
- ሰላም፡ ለአፃብዒከ፡ ወለአጽፋሪከ፡ ዘላዕሉ፨
- እንተ፡ ተሴረየ፡ ደመ፡ በበ፡ ጾታሁ፡ ወበበ፡ ክፍሉ፨
- አቦሊ፡ ዝክርከ፡ ለትውልደ፡ ትውልድ፡ ዘይሄሉ፨
- ናሁ፡ ኪዳነ፡ ወሀበከ፡ በዘኢይሔሱ፡ ቃሉ፨
- ለዘገብረ፡ ተዝካረከ፡ ከመ፡ ይድኀን፡ ኵሉ፨
-
- ሰላም፡ ለገቦከ፡ ወለከርሥከ፡ ቢጹ፨
- ለሥቃየ፡ ስምዕ፡ ኵሉ፡ እለ፡ ኢገገጹ፨
- አቦሊ፡ ሰማዕት፡ ለአምላክ፡ ዐቃቤ፡ አንቀጹ፨
- አርኁ፡ ሊተ፡ እግዚእየ፡ ከመ፡ እትፌሣሕ፡ በገጹ፨
- ለቤተ፡ መርዓዊ፡ ክርስቶስ፡ ዘጥዑም፡ ድምፁ፨
-
- ሰላም፡ ለልብከ፡ ወለኵልያቲከ፡ ኀሣሢ፨
- ነደ፡ እሳት፡ መፍርህ፡ አምሳለ፡ ኅዝአት፡ ዘይሬሲ፨
- አቦሊ፡ ፍቁር፡ ወክቡር፡ ጽድቀ፡ ወራሲ፨
- ሞትከ፡ ኮነ፡ በልደታ፡ ለእመ፡ አምላክ፡ ነጋሢ፨
- ወበነጊሦታ፡ ትነግሥ፡ ጊዜ፡ ግብር፡ ይጠሲ፨
-
- ሰላም፡ ለኅሊናከ፡ ወለአማዑቲከ፡ ዘመዱ፨
- እምሕይወተ፡ ዓለም፡ ዛቲ፡ እለ፡ መዊተ፡ ፈቀዱ፨
- አቦሊ፡ ዘኮንከ፡ ለጥበበ፡ ሰማይ፡ ምዕላዱ፨
- ነፍስከ፡ ምስለ፡ እግዝእት፡ በሰዐ፡ ሞትየ፡ ይረዱ፨
- ወአየረ፡ እሳት፡ ኢትፍራህ፡ ምስሌሃ፡ ይንግዱ፨
-
- ሰላም፡ ለንዋየ፡ ውሥጥከ፡ አምሳለ፡ ወርቅ፡ ንጡፍ፨
- ወለኅንብርትከ፡ ኅሩይ፡ በእደ፡ ክርስቶስ፡ ግሉፍ፨
- አቦሊ፡ ሰማዕት፡ እምነ፡ ሰማዕታት፡ ትሩፍ፨
- ማሕሌትየ፡ በላ፡ ሠመርክዋ፡ በተወክፎተ፡ ልብ፡ ወአፍ፨
- ጸሪቀ፡ መበለት፡ ይእቲ፡ ዘብህላ፡ መጽሐፍ፨
-
- ሰላም፡ ለሐቌከ፡ ዘቀነተ፡ ሐብለ፡ ጽዋዔ፨
- ወለአቍያጺከ፡ አዕማድ፡ ጽርሐ፡ ምእመናን፡ መጽንዔ፨
- አቦሊ፡ በለኒ፡ ፍቁርየ፡ ቅድመ፡ ጉባኤ፨
- ጊዜ፡ ይፈልጥ፡ ክርዳዳተ፡ እምነ፡ ስርናይ፡ በመስዔ፨
- ዘምስለ፡ ስርናይ፡ ትበውእ፡ ዘዚአየ፡ ቍልዔ፨
-
- ሰላም፡ ለአብራኪከ፡ ወለአእጋሪከ፡ እለ፡ ቆማ፨
- ቅድመ፡ ሄርሜኔዎስ፡ ኀያል፡ ወግሩም፡ ኅስወ፡ ግርማ፨
- እንዘ፡ ትትአመኖ፡ አቦሊ፡ ለክርስቶስ፡ ንጉሠ፡ ራማ፨
- ኢፈርህከ፡ ሕቀ፡ ምንተኒ፡ ሥቃያተ፡ ሕማም፡ ወጻማ፨
- ዘመከረ፡ ብከ፡ አበ፡ ፀር፡ መስቴማ፨
-
- ሰላም፡ ለሰኰናከ፡ ወለመከየድከ፡ እለ፡ ሖራ፨
- ኀበ፡ አንጾኪያ፡ ሀገር፡ ከመ፡ ትትወከፍ፡ ግብረ፡ መከራ፨
- አቦሊ፡ ጥዑም፡ ውስቴነ፡ ወይነ፡ ነከራ፨
- ታስተፌሥሕ፡ ኅሊና፡ ሰብእ፡ ወዘታረስዕ፡ ጻዕራ፨
- ለብዝኅተ፡ መፍቅድ፡ ዓለም፡ ዘመሪር፡ ምግባራ፨
-
- ሰላም፡ ለአፃብዒከ፡ ወለአፍጻረ፡ እግርከ፡ ጽዕድዋት፨
- እለ፡ ተአለሉ፡ ደመ፡ ዘደመ፡ ንዝኀት፨
- አቦሊ፡ ጽዑር፡ ጽጉበ፡ ሥዋያት፨
- ግድፍ፡ ሊተ፡ ለርኁብ፡ እምፍርፋርከ፡ ንስቲት፨
- አርአያ፡ ግዱፍ፡ ከልብ፡ ወቅውም፡ እምቤት፨
-
- ሰላም፡ ለቍሰሊከ፡ ሚካኤል፡ መልአክ፡ ዘአጥዐዮ፨
- በገሲስ፡ ወአናኅስዮ፨
- ለአበስኪሮንኒ፡ ምእመነ፡ እንተ፡ ረሰዮ፨
- አቦሊ፡ ሥጋከ፡ መዋኢተ፡ ወመንሥኢተ፡ ርእዮ፨
- እስከ፡ ክሕደቶ፡ ገደፈ፡ ወኵሎ፡ እከዮ፨
-
- ሰላም፡ ለቆምከ፡ ወለመልክእከ፡ በበ፡ መትሎ፨
- ለለ፡ አሐዱ፡ አሐዱ፡ እንበለ፡ ተከፍሎ፨
- አቦሊ፡ ኀያል፡ ወትሩፍ፡ በተጋድሎ፨
- ተወከፍ፡ ሊተ፡ አምኃየ፡ ወቃለ፡ ተምኔትየ፡ ኵሎ፨
- እስመ፡ ፍቅረ፡ ክርስቶስ፡ ፍጹም፡ በኀቤከ፡ ሀሎ፨
-
- ሰላም፡ ለፀአተ፡ ነፍስከ፡ ዘፍጻሜሃ፡ ክላሌ፨
- ወለበድነ፡ ሥጋከ፡ ዕንቈ፡ ቢረሌ፨
- አቦሊ፡ ፍቅርከ፡ እምኔየ፡ በኢስሳሌ፨
- ተሀሉ፡ ደርገ፡ ማሕፀንተከ፡ ኢይፍልጠኒ፡ ውልዋሌ፨
- ወኢያቅንተኒ፡ ዘጌጋይ፡ ብልባሌ፨
-
- ሰላም፡ ለግንዘተ፡ ሥጋከ፡ ዘገነዝዎ፡ በጻሕቅ፨
- ወለዝኅርከ፡ ክቡር፡ ውስተ፡ ሀገረ፡ ምስር፡ ህንደቅ፨
- አቦሊ፡ ትሩፍ፡ ሰምዕተ፡ ኢየሱስ፡ ሊቅ፨
- መኑ፡ ከማከ፡ እግዚእየ፡ በተጋድሎ፡ ጽፉቅ፨
- ዘበድሮ፡ ፈጸመ፡ ወሖረ፡ በጽድቅ፨
-
- ሰላም፡ ለኀይለ፡ ሥጋከ፡ ባዕበተ፡ ክብር፡ ዘተውህባ፨
- ከመ፡ በሕይወታ፡ ታነሥእ፡ ትፈውስ፡ ውስተ፡ ምስካባ፨
- አቦሊ፡ ኀያል፡ ለሀገረ፡ ሮሜ፡ መጋቤ፡ ሕዝባ፨
- እፎ፡ በክየት፡ ሀገርከ፡ ወአስቆቀወት፡ በልባ፨
- ሶበ፡ ዜና፡ ሞትከ፡ ደምፀ፡ በኵሉ፡ መርኅባ፨
-
- ሰላም፡ ለትንሣኤ፡ ሥጋከ፡ ምስለ፡ ነፍስከ፡ በዋሕድና፨
- አርአያ፡ ክርስቶስ፡ ተንሥአ፡ ድኅረ፡ ጼሐ፡ መስቀለ፡ ፍና፨
- በየማነ፡ ንግሡ፡ ዐረይከ፡ ነቢረ፡ በኢሙስና፨
- እስከ፡ ትረስዐ፡ ለሥዋይ፡ ለዘዚአከ፡ መጠና፨
- አቦሊ፡ አድማዕከ፡ ጽድቀ፡ ክብር፡ ልዕልና፨
-
- ሶበ፡ ስእንኩ፡ በጺሐ፡ ኀደግዎ፡ በኅፁር፨
- ድርሳነ፡ ውዳሴከ፡ ናሁ፡ በኍቈ፡ ሠላስ፡ ዓሥር፨
- ኢትበለኒ፡ እንብየ፡ እስመ፡ አቦሊ፡ ፍቁር፨
- ወዐስብየ፡ ፍዲ፡ ዳእሙ፡ እምዘ፡ ተውህበከ፡ ክቡር፨
- ፍዳ፡ ፍቁሩ፡ ይፈዲ፡ ልማዱ፡ ለኄር፨