Details
-
- ሰላመ፡ ገብርኤል፡ መልአክ፡ በላዕለ፡ ማርያም፡ ዘአዕረፈ፨
- ከመ፡ እዜኑ፡ ሕዳጠ፡ ወአኮ፡ ትሩፈ፨
- እግዚአብሔር፡ ሀበኒ፡ ሲሳየ፡ ልቡና፡ መጽሐፈ፨
- ወአፉየ፡ ሙሴ፡ ለእመ፡ ኮነ፡ ጸያፈ፨
- ጰራቅሊጦስ፡ አሮን፡ ይኩነኒ፡ አፈ፨
-
- ሰላም፡ ለተፈጥሮትከ፡ በሌሊተ፡ አሑድ፡ ቀዳሙ፨
- እምኀበ፡ ወኢምንት፡ ግብር፡ ዘኢይጤየቅ፡ ትርጓሜ፡ ስሙ፨
- ሐዋርያ፡ ልደት፡ ገብርኤል፡ ለበለዓለም፡ ኮከበ፡ ሕልሙ፨
- እንተ፡ ተሥዕለ፡ በላዕሌከ፡ መልክአ፡ ሕፃን፡ ወእሙ፨
- ንጉሠ፡ አይሁድ፡ ዝንቱ፡ ዘይቤ፡ ማሕተሙ፨
-
- ሰላም፡ ለዝክረ፡ ስምከ፡ ዘኢይተርጐም፡ ምሥጢር፨
- ባሕቱ፡ ይመስል፡ ብሂለ፡ እግዚእ፡ ወገብር፨
- ገብርኤል፡ ኪሩብ፡ ጸዋሬ፡ ዐቢይ፡ መንበር፨
- ሕዝቅኤል፡ ዘነጸረከ፡ በአምሳለ፡ ብእሲ፡ ክቡር፨
- ምስለ፡ ገጸ፡ ላሕም፡ ወአንበሳ፡ ወቀሊል፡ ንስር፨
-
- ሰላም፡ ለሥዕርተ፡ ርእስከ፡ ወለርእስከ፡ በአምኃ፨
- ዘአስተቀጸሎ፡ አምላክ፡ አክሊለ፡ ቅዳሴ፡ ስቡሐ፨
- ገብርኤል፡ ፀሓይ፡ እንተ፡ ትሠርቅ፡ ጽባሐ፨
- ብርሃነ፡ ቃልከ፡ እስከ፡ አጽናፈ፡ ምድር፡ በጽሐ፨
- ወውስተ፡ ኵሉ፡ ዓለም፡ ጸዳልከ፡ ሰፍሐ፨
-
- ሰላም፡ ለቆምከ፡ አካለ፡ ፍሥሓ፡ ወኑዛዜ፨
- ወለመልክእከ፡ ሕያው፡ እምጥንተ፡ ዓለም፡ እስከ፡ ይእዜ፨
- አለብወኒ፡ ገብርኤል፡ ሐሳበ፡ መዋዕል፡ ዘበበ፡ ጊዜ፨
- እስራኤል፡ ልብየ፡ ጼዋ፡ ፋርስ፡ እስከ፡ ይከውን፡ አግኣዜ፨
- ውስተ፡ ምድረ፡ ርስት፡ ዳግመ፡ እገብእ፡ ማእዜ፨
-
- አልቦእምሰብእ፡ ዘከማየ፡ ዘይቴክዝ፡ ነግሀ፡ ወሰርከ፨
- ወአልቦ፡ እመላእክት፡ ናዛዜ፡ ሕዙናን፡ ዘከማከ፨
- ወበእንተ፡ ዝ፡ ኀሠሥኩ፡ አእሚርየ፡ ኪያከ፨
- ኦገብርኤል፡ ናዝዘኒ፡ ወአስምዐኒ፡ ቃለከ፨
- ዕሤተ፡ ጸሎትየ፡ ዝንቱ፡ ዘአቅረብኩ፡ ለከ፨