Bibliography
Z
Turaiev, Boris. Vitae Sanctorum Indigenarum. II. Acta S. Aaronis et Philippi. Corpus Scriptorum Christianorum Orientalium, Scriptores Aethiopici, II, 20. Paris: E typographeo reipublicae, 1908.
-
- በመሠረተ፡ ቃል፡ አንበርኩ፡ ለማኅፈደ፡ ዝክርከ፡ ስሞ፨
- ላዕላዐ፡ ልሳን፡ ወልድከ፡ በጽሂቅ፡ አስተሐምሞ፨
- ተራድአኒ፡ አሮን፡ ዘልማድከ፡ ተርጕሞ፨
- ኢይበል፡ አፈ፡ በሀሊ፡ ለለ፡ ይኔጽር፡ ቀዊሞ፨
- አኀዘ፡ ይሕንጽ፡ ወስእነ፡ ፈጽሞ፨
-
- ሰላም፡ ለዝክረ፡ ስምከ፡ ምስለ፡ ስመ፡ ነቢይ፡ ዘተሳተፈ፨
- ለአምላከ፡ ፈርዖን፡ ሙሴ፡ እንተ፡ ይሰምይዎ፡ አፈ፨
- ሐረሳዊ፡ መስቀል፡ አሮን፡ ከመ፡ ዜናከ፡ ተጽሕፈ፨
- በገራህተ፡ ገድል፡ እምአመ፡ አኀዝከ፡ ዕርፈ፨
- ኢያጽነንከ፡ ትልመ፡ አሐተ፡ ምዕራፈ፨
-
- ሰላም፡ ለመቃብሪከ፡ አስከሬነ፡ ኅቡእ፡ መዝገብ፨
- ንፍቀ፡ ደብረ፡ ፋራን፡ ዛቲ፡ ወግረ፡ ጎልጎታ፡ ዘዐርብ፨
- ጊዜ፡ ነቂሆትከ፡ አሮን፡ እምዐራተ፡ ዛቲ፡ ምስካብ፨
- ኢታቁመኒ፡ በአፍአ፡ እምአፀድከ፡ ከብካብ፨
- ምስለ፡ አብያጽየ፡ ኀምስቱ፡ አክላብ፨
-
- አመ፡ ወርኀ፡ ማእረር፡ አልጸቀ፡ አብድንቲሆሙ፡ አውያን፨
- ሶበ፡ ክምረ፡ ከምር፡ ኮነ፡ በማዕፀደ፡ ሞት፡ ፈጣን፨
- ዘዘ፡ ገበቶሙ፡ ፈራን፡ በአምሳለ፡ ኅቡእ፡ መድፍን፨
- ሰላም፡ ሰላም፡ ለመምህርከ፡ አሮን፨
- ወሰላም፡ ካዕበ፡ ለእሉ፡ ኄራን፨
-
- ሰላም፡ ለትንሣኤከ፡ እንተ፡ ኮነቶ፡ አእጋረ፨
- ለትንሣኤ፡ ክርስቶስ፡ ርእስ፡ ከመ፡ ቃለ፡ ምጽሐፍ፡ ነገረ፨
- መከየደ፡ ፍቅርከ፡ አሮን፡ ጊዜ፡ ፈቀደ፡ ወሠምረ፨
- አረፍተ፡ ልብየ፡ ከመ፡ ይኩኖ፡ ምሕዋረ፨
- በቆብዐ፡ አባ፡ ሣሉሲ፡ ፍጹመ፡ ተሰቍረ፨
-
- ሰላም፡ ለዕርገትከ፡ መንግሥተ፡ ሰማያት፡ ትትዋረሱ፨
- ዘዐይነ፡ መዊት፡ ኢርእያ፡ ወዘኢኀለያ፡ መንፈሱ፨
- አበ፡ አእላፍ፡ አሮን፡ ምስለ፡ ወልድከ፡ ኢያሱ፨
- ወምስለ፡ ኵሎሙ፡ እለ፡ ጻማከ፡ ኀሠሡ፨
- ወእለ፡ ምስሌከ፡ ህላዌ፡ ቀደሱ፨
-
- ሰላም፡ ለማሕሌተ፡ ዝክርከ፡ አባ፡ ሶበ፡ ሐወጸት፡ ተቅራማ፨
- ዘሲሳየ፡ ዕለት፡ ነሥአት፡ በስራሐ፡ ድካም፡ ወሐፈ፡ ጻማ፨
- አሮን፡ ብእስ፡ ታስተበቍዐከ፡ አስተሐሚማ፨
- ሩት፡ አፈ፡ ነፍስየ፡ ታሕተ፡ እግርከ፡ ነዊማ፨
- አረፍተ፡ ቤታ፡ ታሤኒ፡ ወታሰርር፡ ጥቅማ፨
-
- እመ፡ ኢፈደዮሙ፡ ሰርከ፡ ለገባእተ፡ ወፍር፡ ወሐቅል፨
- እስመ፡ ይከውኖ፡ ኀፍረተ፡ ለበዓለ፡ ገራህት፡ ባዕል፨
- ጸግወኒ፡ አሮን፡ ዕሴተ፡ ቡራኬ፡ በቃል፨
- ተዘኪረከ፡ እግዚኦ፡ በመጽሐፈ፡ ዳግም፡ ክፍል፨
- ለዐሳብ፡ ዐስቦ፡ ኢታቢት፡ ዘይክል፨
-
- እኵት፡ እግዚአብሔር፡ ዘክብረ፡ አኰቴት፡ ይደልዎ፨
- በአንቀጸ፡ አፉየ፡ ዝንቱ፡ እንበለ፡ አብእ፡ ሐስዎ፨
- ጽድቀ፡ ትሩፋቲከ፡ አሮን፡ ዘከፈለኒ፡ ለተዜያንዎ፨
- ለአድግኒ፡ ቀዲሙ፡ ዘኢየአምር፡ ለብዎ፨
- ስሕተተ፡ ነቢይ፡ ይገሥጽ፡ ንባበ፡ ጸገዎ፨