Subjects
Martyr
ጊዮርጊስ፡
Giyorgis
George
George
Malkəʾ
-
- በሓከ፡ ጊዮርጊስ፡ በሓከ፡ ወሬዛ፡ ኃያል፨
- ከመ፡ አንበሳ፡ ውኩል፨
- እምከመ፡ ተነፍሐ፡ ቀርነ፡ ኢዮቤል፨
- እንቋዕ፡ ለመዓዛ፡ ቀተል፡ ፈረስከ፡ ይበል፨
-
- በሓከ፡ ጊዮርጊስ፡ በሓከ፡ አስባብ፡ ወልደ፡ ማዕቀብ፨
- በከመ፡ ይቤ፡ መክብብ፨
- እምርእሰ፡ ጸላም፡ ነሣኤ፡ ግልባብ፨
- ዘአንበሩ፡ በላዕሌሃ፡ መሪራን፡ ሕዝብ፨
-
- በሓከ፡ ጊዮርጊስ፡ በሓከ፡ በእስትንፋሱ፡ ዘይንዑ፡ እምነ፡ አርያም፡ አዕዋፈ፨
- ከመ፡ ንስር፡ ዘቦ፡ በክልኤ፡ አክናፈ፨
- ደራጎን፡ ንጉሠ፡ ቢሩት፡ ዘይትበሀል፡ ዘልፈ፨
-
- በሓከ፡ ጊዮርጊስ፡ በሓከ፡ ለመስፍነ፡ ሀገር፡ ወለቱ፡ እንተ፡ ሀብዎ፡ አምኃ፨
- በትግርምት፡ መጺኦ፡ ኢይብላዕ፡ ኪያሃ፨
- ጊዮርጊስ፡ ለቀቲሎቱ፡ ዘቈልቈልከ፡ ረምሐ፨
-
- በሓከ፡ ጊዮርጊስ፡ በሓከ፡ እምይእቲ፡ ሰዓት፡ ደናግለ፡ ቢሩት፨
- በዘዚአከ፡ ኂሩት፡ ድኂኖን፡ እሞት፨
- ተወስባ፡ ለምእት፡ ወኮና፡ በዓልታተ፡ ቤት፨
- እስከ፡ ዛቲ፡ ዕለት፨
-
- በሓከ፡ ጊዮርጊስ፡ በሓከ፡ ስእለተ፡ መበለት፡ ዘኮንከ፡ ሰማዔ፨
- በእንተ፡ አዕማድ፡ ክልኤ፨
- በእምርት፡ ዕለት፡ ወትንሣኤ፨
- ከመ፡ እጹር፡ አሣዕኒከ፡ ረስየኒ፡ ቍልዔ፨
-
- በሓከ፡ ጊዮርጊስ፡ በሓከ፡ ዘአቅረብኩ፡ ጻህቀ፨
- እምተጽናሰ፡ ቤትየ፡ ህቀ፨
- ለነዳይ፡ ተወከፍ፡ ጸራይቀ፨
- ከመ፡ መጽሐፍከ፡ ዝክረኒ፡ ጥዩቀ፨
-
- በሓከ፡ ጊዮርጊስ፡ በሓከ፡ ለማኅደረ፡ ስምከ፡ ዛቲ፡ በረድኤትከ፡ ሐውጻ፨
- እምዝኅርከ፡ ልዳ፡ ኢታሕፅፃ፨
- ወማዕጾ፡ ቄድሮስ፡ ግብር፡ በአናቅጻ፨
- ረሲ፡ ኍልቈ፡ ሕዝባ፡ ዘይበዝኅ፡ እምኆፃ፨