Details
Subject
Clavis Aethiopica: 2953
CAe: 2953
MC: 234, 102
Permalink: https://w3id.org/malke/2953/
Last modified:
MC: 234, 102
Permalink: https://w3id.org/malke/2953/
Last modified:
-
- ስብሐት፡ ለአብ፡ ወስብሐት፡ ለወልድ፡
- ምስለ፡ መንፈስ፡ ቅዱስ፡ ዋሕድ፨
- ከመ፡ እንዘ፡ እብል፡ እጽሐፍ፡ ሰማዕተ፡ አክሚም፡ ዐጸድ፨
- ዜና፡ ገድልክሙ፡ ዘእምተጋድሎ፡ ብዑድ፨
- መንፈሰ፡ ጥበብ፡ ምልኡኒ፡ እስመ፡ አነ፡ አብድ፨
-
- ተማኅጸንኩ፡ በደምክሙ፡ ከመ፡ ማየ፡ ፈለፍ፡ ዘተክዕወ፨
- በዕለተ፡ ልደቱ፡ እምድንግል፡ ለዘተሠገወ፨
- ሰማዕታተ፡ አክሚም፡ በገድል፡ ዘአሥመርክሙ፡ ሕያወ፨
- ክብረክሙ፡ ለተሳትፎ፡ ከመ፡ እትረከብ፡ ድልወ፨
- በሀብተ፡ ትሩፋት፡ ወገድል፡ ኩነኒ፡ አበወ፨
-
- ተማኅፀንኩ፡ በኅድረትክሙ፡ ውሣጤ፡ ዓባይ፡ ፈለግ፨
- ለፈጽሞ፡ መፍቅድ፡ ዘነፍስ፡ እንዘ፡ አልብክሙ፡ ጹግ፨
- ዲዮስቆሮስ፡ ሥርዓት፡ ወሰከላስዮስ፡ ሕግ፡
- ምስሌክሙ፡ ወቢጽክሙ፡ አማዕታተ፡ አክሚም፡ አእሩግ፨
- ረስዩኒ፡ ቢጸ፡ አሀሉ፡ በደርግ፨
-
- ተማኅጸንኩ፡ በሑረትክሙ፡ እንዘ፡ ቃለ፡ ራእይ፡ ትሰምዑ፨
- መንገለ፡ አረጋይ፡ ሙሴ፡ ሥርዓተ፡ እንጦኒ፡ ትንሥኡ፨
- ሰከላስዮስ፡ ፩ወዲዮስቆሮስ፡ ካልኡ፨
- ኪያየ፡ እምኃጢአት፡ መንገለ፡ ንስሐ፡ ጸውዑ፨
- ከመ፡ ቀዳሚ፡ ኤልያስ፡ ጸውዖ፡ ለረድኡ፨
-
- ተማኅፀንኩ፡ በፍልሰትክሙ፡ ከመ፡ እምድራር፡ ኀበ፡ ድራር፨
- ውስተ፡ ዓፀደ፡ ሞት፡ እሞት፡ በአምልኮ፡ ዋሕድ፡ ወበኵር፨
- ኦሰማዕታት፡ ከዋክብተ፡ አክሚም፡ ጠፈር፨
- ኮከብ፡ ከመ፡ መርሖሙ፡ ለነገሥተ፡ ርኁቅ፡ ብሔር፨
- ምርሑኒ፡ ፍናሆሙ፡ ለጥበብ፡ ወምክር፨
-
- ተማኅጸንኩ፡ በገድልክሙ፡ ኮርዮን፡ ወፊልሞን፨
- ምስለ፡ ሕዝበ፡ አክሚም፡ ሀገር፨ ሰማዕተ፡ ክርስቶስ፡ መድኅን፨
- ደመ፡ አዕሩግ፡ አንትሙ፡ ለገብርክሙ፡ ሕፃን፨
- ይኩነኒ፡ ልብሰ፡ ብርሃናዊ፡ አመምግበ፡ ጽልመት፡ ዕርቃን፨
- እስመ፡ ደምክሙ፡ ውእቱ፡ ብርሃን፨
-
- ተማኅጸንኩ፡ አጋእዝትየ፡ ሰማዕታተ፡ አክሚም፡ ብክሙ፨
- እምገድልክሙ፡ ኅዳጠ፡ እንዘ፡ አነብብ፡ ለክሙ፨
- ባሕቱ፡ ኅዳጠ፡ ኢትበልዎ፡ አንትሙ፨
- ነጽሩ፡ አፍቅሮትየ፡ ወቀድሱኒ፡ ዳእሙ፨
- በዘቅዱሳን፡ አንትሙ፡ ኮንክሙ፨
- ተረፈ፡ መልክእ፡
-
- ሰላም፡ ለክሙ፡ ለርስትክሙ፡ አክሚም፡ ልሳናተ፡ ኵሉ፡ መካን፨
- ሰማዕታቲሃ፡ አንትሙ፡ እስመ፡ ኅሩያን፨
- ሰመይዋ፡ ደብረ፡ ጽዮን፨
-
- ሰላም፡ ለክሙ፡ ሥጋክሙ፡ ልብሰ፡ ሰማዕታተ፡ ሀገር፡ አክሚም፨
- በየማነ፡ መንግሥት፡ ትቁሙ፡ እምነ፡ ፀጋም፨
- ሐፀብክሙ፡ በማየ፡ ደም፨
-
- ሰላም፡ ለክሙ፡ ጥብሐ፡ በግዕ፡ ወላህም፡ በይነ፡ ክብረ፡ በዓል፡ ልማድ፨
- ህየንተ፡ ዝንቱሰ፡ ዮም፡ ሰማዕታተ፡ ወልድ፨
- ከዓውክሙ፡ ደመ፡ ክሳድ፨
-
- ሰላም፡ ለክሙ፡ መንግሥተ፡ ሰማያት፡ ለክሙ፡ እስመ፡ ይእቲ፡ ድሉት፨
- ትግርምተ፡ መኰንን፡ ወሰይፍ፡ ከመ፡ ኢምንት፨
- ኮነክሙ፡ ሰማዕታት፨
-
- ሰላም፡ ለክሙ፡ ለእሳተ፡ ምድር፡ መግርህ፡ አእንተ፡ ፍቅረ፡ አብ፡ ወወልዱ፨
- ሰማዕታተ፡ አክሚም፡ አንትሙ፡ ለለ፩፨
- ቆምክሙ፡ ውስተ፡ ዓፀዱ፨
-
- ሰላም፡ ለክሙ፡ ሰማዕታተ፡ አክሙም፡ ጥዑም፡ ለተናግሮ፡ በአፍ፨
- ዜና፡ ገድልክሙ፡ ጥቀ፡ ፍካሬ፡ መጽሐፍ፨
- ክብርክሙ፡ እስመ፡ ትሩፍ፨
-
- ሰላም፡ ለክሙ፡ አዕባነ፡ ህንደኬ፡ አክሚም፡ ሰማዕታተ፡ ክርስቶስ፡ ሥሉጥ፨
- በኃፍረት፡ ኢይሑር፡ ውስተ፡ ምሥራጥ፨
- ማኅቶተ፡ ብርሃን፡ ይኩነኒ፡ እንበለ፡ ተውላጥ፨
- ገድልክሙ፡ ዘአፍአ፡ ወውሥጥ፨