ለኵሎን፡ መልክእኪ፡ La-kʷǝllon Malkǝʾǝki

To All the Parts of Your Image

- ሰላም፡ ሰላም፡ ለኵሎን፡ መልክእኪ፨
- እመ፡ እግዚአብሔር፡ እምየ፡ እግዝእትየ፡ ማርያም፨
- ዓዲ፡ ሰላም፡ በክልኤ፡ ማሕተመ፡ ድንግልናኪ፨
- በቀርነ፡ መንፈስ፡ ማሕሌተኪ፡ ረስየኒ፡ ከመ፡ እሕሊ፡ ለኪ፨
- ይትዐቀብ፡ መልክእየ፡ በመልክእኪ፨
- ይዜውራኒ፡ ምንትዋት፡ አክናፍኪ፨
- ሰላም፡ ለርእስኪ፡ እግዝእትየ፡ ማርያም፡ ዘደለለ፨
- ሥዕርተ፡ ንጽሕ፡ ዘአብቈለ፨
- አብያዘ፡ ብርሃን፡ ቦቶን፡ አክሊለ፨
- ሰሎሞን፡ አቡኪ፡ በእንቲአኪ፡ ማሕሌተ፡ አልዐለ፨
- ወጽፍሮ፡ ርእስኪ፡ ከመ፡ ሜላት፡ ትብህለ፨
- በመንፈስ፡ ቅዱስ፡ ኅሊናኪ፡ ወሥጋኪ፡ ተደንገለ፨
- ሰላም፡ ለገጽኪ፡ እግዝእትየ፡ ማርያም፡ ከመ፡ ገጸ፡ ኤር፡ ዘያዋኪ፨
- በከመ፡ ይቤ፡ በመዝሙር፡ ዳዊት፡ አቡኪ፨
- ኵሎሙ፡ ብዑላነ፡ ምድር፡ ይትመሐለሉ፡ ለገጽኪ፨
- ማርያም፡ በየማንኪ፡ ፍጽምየ፡ ባርኪ፨
- ሰላም፡ ለአእዛንኪ፡ እግዝእትየ፡ ማርያም፡ በናዝሬት፡ ዘገሊላ፨
- ብስራተ፡ ገብርኤል፡ እለ፡ ሰምዓ፨
- ዘኢልማድ፡ በድንግልና፡ ከመ፡ ትፅንሲ፡ እግዚአ፨
- ወዓዲ፡ ለሕፃንኪ፡ ቃሎ፡ አጽምአ፨
- ሰላም፡ ለቆምኪ፡ ከመ፡ በቀልት፡ ዘይመስል፨
- እግዝእትየ፡ ማርያም፡ ዘሰቀዩኪ፡ ወትረ፡ አፍላገ፡ ለት፡ ወሜል፨
- ኦድንግል፡ ድንግል፡ ወለቱ፡ ለስእራኤል፨
- ጽጌ፡ ከርሥኪ፡ ልዑል፡ አማኑኤል፨
- ሰላም፡ ለድንግልና፡ ኅሊናኪ፡ ወለድንግልናኪ፡ እግዝእትየ፡ ማርያም፡ ወለተ፡ ነቢያት፡ ወነቢይ፨
- ጽጌ፡ ከርሥኪ፡ ልዑል፡ እግዚአብሔር፡ አዶናይ፨
- ሲሳየ፡ መርዔትኪ፡ ዘኢየዐርብ፡ ፀሓይ፨
- ኅብስተ፡ ሥጋሁ፡ ቅዱስ፡ መለኮታዊ፡ ስርናይ፨
- መለኮታዊ፡ ደመ፡ ገቦሁ፡ ዘወይን፡ ቀላይ፨
- ሰላም፡ ለመልክእኪ፡ ማርያም፡ እምነ፨
- ወእሙ፡ ለእግዚእነ፨
- በአክናፈ፡ ድንግልናኪ፡ ክልኤቱ፡ ክድኒ፡ ኪያነ፨
- በእዴኪ፡ ዕቀቢ፡ ነፍሳቲነ፨
- ሐመረ፡ ሥጋነ፡ እንበይነ፡ ወልድኪ፡ ሕፅነኪ፡ አርፍቅነ፨
- ሰላም፡ ሰላም፡ ለኵሎን፡ መልክእኪ፡ እግዝእትየ፡ ማርያም፨
- ይትዐቀአብ፡ መልክእየ፡ በእዴኪ፡ እም፨
- አክናፈ፡ ንጽሕኪ፡ በመንፈስ፡ ቅዱስ፡ ሕቱም፨
- ለእግዚእየ፡ እሙ፡ ቀርነ፡ ሰላም፨
- ሰላም፡ ሰላም፡ ለኵሎን፡ መልክእኪ፡ ማርያም፡ እግዝእትየ፨
- አንቲ፡ እምየ፡ ወልድኪ፡ አቡየ፨
- አክሊለ፡ ባሕርይ፡ ኩኒ፡ ለርእስየ፨
- ሠርጐ፡ ብርሃን፡ ለመልክእየ፨
- በየማንኪ፡ ዕቀቢ፡ ነፍስየ፡ ወሥጋየ፨
- ሰላም፡ ሰላም፡ ለኵሎን፡ መልክእኪ፡ እግዝእትየ፡ ማርያም፡ ለሥጋኪ፡ ወነፍስኪ፨
- ለዐጽምኪ፡ ወደምኪ፨
- ለአሥራውኪ፡ ወአምትንትኪ፡ እመ፡ እግዚአብሔር፡ በሐኪ፨
- መልክእየ፡ ይትዐቀብ፡ በመልክእኪ፨
- ለዓለመ፡ ዓለም፡ ዘልፈ፡ ይዜወር፡ በእዴኪ፨
- ሰላም፡ እብሎን፡ ለኵሎን፡ መልክእኪ፨
- እምቅድመ፡ ዓለም፡ ወልደ፡ አምላክ፡ ለከዊነ፡ እሙ፡ ኀረየኪ፨
- እምውሉደ፡ ሰብእ፡ አልቦ፡ ከማኪ፨
- ማርያም፡ ድግንል፡ በኅሊናኪ፡ ወሥጋኪ፨
- አባግዐ፡ ወንጌል፡ ሕዝበኪ፡ ባርኪ፡ በእዴኪ፨
- ሰላም፡ ሰላም፡ ለኵሎን፡ መልክእኪ፨
- እምሥዕርትኪ፡ እስከ፡ አእጋርኪ፨
- ቅድስተ፡ ቅዱሳን፡ እንተ፡ ተሰመይኪ፨
- ተንሥኢ፡ ድንግል፡ ልበሲ፡ ኀይለኪ፨
- ወሞእዮሙ፡ ለአይሁድ፡ ፀርኪ፨
- ክድንኒ፡ ርግበ፡ ሰሎሞን፡ በአክናፍኪ፡ ዘብርሃን፨
- ወዕቀብኒ፡ ከመ፡ ብንተ፡ ዐይን፨
- በዘይመጽእ፡ ዓለም፡ እምእደ፡ ሰይጣን፨
- ወበዝየኒ፡ እምሰብእ፡ እኩያን፨
- ተማሕፀንኩ፡ ተማሕፅኖ፡ በመልክእኪ፡ ኵሎን፨
- ማርያም፡ ሐረገ፡ ወይን፡ ዘወንጌል፡ ቍርባን፨

Bibliography Z

Hayoz, Chrysostome. “Portrait de Marie, Complainte de la Vierge : deux poésies mariales éthiopiennes inédites. Texte, traduction, commentaire.” Université de Fribourg, 1956.

Krawczuk, Marcin. “Trzy zabytki etiopskiego piśmiennictwa sakralnego z języka gyyz.” Literatura na Świecie, 2014.