Details
-
- ሰላመ፡ መልክኦሙ፡ ወይን፡ እንተ፡ አንኃ፡ ሐረገ፨
- ለአርብዓ፡ ሐራ፡ ውስተ፡ ማይ፡ እለ፡ ተኰነኑ፡ ደርገ፨
- ባሕረ፡ ኢተረክቦ፡ አምላክ፡ ዘኢተአምር፡ ንተገ፨
- አስተናብበኒ፡ አመ፡ መንገለ፡ ባላቅ፡ ዓርገ፨
- ከመ፡ አስተናበብከ፡ ቅድመ፡ ዘበለአም፡ ዓድገ፨
-
- ሰላም፡ ለዝክረ፡ ስምክሙ፡ ዘመጽሐፈ፡ ሕይወት፡ መጽሐፉ፨
- ወለስእርትክሙ፡ ጸምር፡ ለጠለ፡ አርያም፡ ምዕራፉ፨
- አርብዓ፡ ሐራ፡ ብርሃነ፡ እለ፡ ትትዐጸፉ፨
- ኪያየ፡ ማኅፀንተክሙ፡ እማእከለ፡ እሳት፡ አሕልፉ፨
- ከመ፡ ምስለ፡ ሕዝቡ፡ ሐለፈ፡ ጳውሎስ፡ እምጳፉ፨
-
- ሰላም፡ ለግንዘተ፡ ሥጋክሙ፡ በአዕዳወ፡ ኄራን፡ ሕዝብ፨
- ለመቃብሪክሙ፡ ካዕበ፡ ውስተ፡ ወንጌላዊት፡ ምኵራብ፨
- አርብዓ፡ ሐራ፡ በሉኒ፡ ለከሢተ፡ ጽዱቅ፡ ንባብ፨
- አምኃ፡ ሰላም፡ ለክሙ፡ እስመ፡ አቅረብኩ፡ ቅድመ፡ ሰብአ፡ ሐዲስ፡ ከብካብ፨
- ዕሤተ፡ ሰላምከ፡ ይኩን፡ ጸጋሁ፡ ለአብ፨
- ተረፈ፡ መልክእ፡
-
- ሰላም፡ ልክሙ፡ አርብዓ፡ ሐራ፡ ኄራን፡ እለ፡ ኮንክሙ፡ በእንተ፡ ኢየሱስ፡ ኬንያ፨
- ኀበ፡ ቆመ፡ ማይ፡ ዘአስሐትያ፨
- ሰማዕታት፡ በስብጥያ፨
-
- ሰላም፡ ልክሙ፡ ውስተ፡ አዘቅተ፡ ማይ፡ ቅድመ፨
- አርብዓ፡ ሐራ፡ ወውስተ፡ እሳት፡ ዳግመ፨
- ውስተ፡ ባሕር፡ ሥልሰ፡ ጾርክሙ፡ ሕማመ፨
- ገድልክሙ፡ እስከ፡ ተደመ፨
-
- ሰላም፡ ልክሙ፡ አክሊለ፡ ርእስክሙ፡ ድኅሬ፡ አርብዓ፡ ሐራ፡ ዲበ፡ ርእሶሙ፡ አንበሩ፨
- ተዝካረ፡ ዚአክሙ፡ ዘልፈ፡ ከመ፡ ይግበሩ፨
- በዓለም፡ ለእለ፡ ሠምሩ፨
-
- ሰላም፡ ልክሙ፡ ልዑላነ፡ መጠን፡ ወዓቅም፡ ሰማያት፡ ለዘ ፡ ስብሐቲሁ፡ ነገራ፨
- ሰማዕተ፡ ስሙ፡ አርብዓ፡ ሐራ፡
- ዕሤተ፡ ሰላምየ፡ ዝንቱ፡ ከልሉኒ፡ ጌራ፨
- ወኅብኡኒ፡ እምኵሉ፡ መከራ፨