Bibliography
Z
Tedros Abraha. “L’effigie dell’Assunzione.” Adveniat Regnum Tuum 75–76 (2001): 45–52.
- ማስገቢያ፡
-
- ሰላም፡ ለኪ፡ ማርያም፡ እምነ፨
- መግመሪተ፡ ነድ፡ ርስነ፨
- ዐምደ፡ ባሕርይ፡ ዘኢተእምሪ፡ ጸኒነ፨
- ድንግልናተ፡ ክሌተ፡ ምልአ፡ ሥጋኪ፡ ተከድነ፨
- አፍለሰኪ፡ ወልድ፡ ሉዓሌ፡ መካነ፨
-
- ምንተ፡ ኣዐሥዮ፡ ለእግዚአብሔር፡ አሐተ፨
- በእንተ፡ ኵሉ፡ ዘገብረ፡ ሊተ፨
- ረስዪኒ፡ እሙ፡ አሥምሮ፡ ግብተ፨
- ማርያም፡ እግዝእትየ፡ ዘሜጥኪ፡ እሳተ፨
- ድኅረ፡ በጽሐ፡ ልሳኑ፡ ዘለኪ፡ ቤተ፨
-
- አፉየ፡ አስተንፈሰ፡ ወልሳንየ፡ አልኆሰሰ፨
- ለክብረ፡ ፍልሰትኪ፡ ድንግል፡ ሶበ፡ ኣቄርብ፡ ተውዳሰ፨
- ማርያም፡ ዘኮንኪ፡ ቅድስተ፡ ቅዱሳን፡ መቅደሰ፨
- በቅሜኪ፡ እግዝእትየ፡ እመ፡ ረከብኩ፡ ሞገሰ፨
- በየማንኪ፡ ባርክኒ፡ ሥልሰ፨
-
- ሰላም፡ ለፍልሰተ፡ ሥጋኪ፡ ምስለ፡ ነፍስኪ፡ ኢመዋቲ፨
- በተሰናእዎ፡ አሐቲ፨
- ድንግል፡ በክልኤ፡ ማርያም፡ ወለተ፡ ማቲ፨
- ሐመረ፡ ተርሴስ፡ ዘሰሎሞን፡ አንቲ፨
- እንተ፡ አእተዉ፡ ጠቢባን፡ ወርቀ፡ አፌዝ፡ ባቲ፨
-
- ሰላም፡ ለፍልሰተ፡ ሥጋኪ፡ መካነ፡ ፍሥሓ፡ ወኑዛዜ፨
- ኀበ፡ ይረስዕዎ፡ ለላሕ፡ ወኢይሔልይዎ፡ ለትካዜ፨
- ማርያም፡ ህሉት፡ ውስተ፡ ልበ፡ አምላክ፡ እምቅድመ፡ ጊዜ፨
- ትፍሥሕተሰ፡ ተፈሣሕኩ፡ በፍልሰትኪ፡ ይእዜ፨
- ገጸ፡ ዚአኪ፡ እሬኢ፡ ማእዜ፨
-
- ሰላም፡ ለፍልሰተ፡ ሥጋኪ፡ እግዚአብሔር፡ ዘባረካ፨
- ወአልዐለ፡ ክብራ፡ እምፍልሰተ፡ ሄኖክ፡ ወልደ፡ ባረካ፨
- ማርያም፡ ስብሕት፡ ወቡርክት፡ ዕለተ፡ ዋካ፨
- ይገብሩ፡ በእንቲአኪ፡ ውስተ፡ ሰማያዊት፡ ታዕካ፨
- ነገደ፡ መላእክት፡ አእላፍ፡ ሱባዔ፡ ፋሲካ፨
-
- ሰላም፡ ለፍልሰተ፡ ሥጋኪ፡ ውስተ፡ ልበ፡ ሰብእ፡ ዘኢተኀለየ፨
- እንዘ፡ ትትዐጸፊ፡ ጸጋ፡ ወትለብሲ፡ ዕበየ፨
- ማርያም፡ ሥጋኪ፡ ዘተመሰለ፡ ባሕርየ፨
- ተኀፍረ፡ ሞት፡ አኮኑ፡ ሶበ፡ ነጸረ፡ ወርእየ፨
- አመ፡ በደመና፡ ብሩህ፡ የዐርግ፡ ሰማየ፨
-
- ሰላም፡ ለፍልሰተ፡ ሥጋኪ፡ ዘኢየኀልቅ፡ ሞገሱ፨
- ወዘኢይነጽፍ፡ ባሕረ፡ ተውዳሱ፨
- ማርያም፡ ታዕካ፡ ለእግዚአብሔር፡ ጽርሐ፡ መቅደሱ፨
- ተበሀሉ፡ በሰማያት፡ እለ፡ ኪያኪ፡ አፍለሱ፨
- ማርያምሰ፡ እንተ፡ በምድር፡ ታንሶሱ፨
-
- ሰላም፡ ለፍልሰተ፡ ሥጋኪ፡ ዘአፈድፈደ፡ ስባሔ፨
- እምፍልሰተ፡ ያዕቆብ፡ ዐርከ፡ ኤሎሄ፨
- ማርያም፡ ቀንሞስ፡ ማርያም፡ አፈወ፡ ርሔ፨
- እለ፡ ብርሃነ፡ ይለብሱ፡ ወይትዐጸፉ፡ ሱራሔ፨
- በዓለ፡ ፍልሰትኪ፡ ማርያም፡ ሰበኩ፡ ኵለሄ፨
-
- ሰላም፡ ለፍልሰተ፡ ሥጋኪ፡ ስቡሐ፡ ዘተሰብሐ፨
- እምሥነ፡ ፀሓይ፡ ወወርኅ፡ ሥነ፡ ስብሐቲሁ፡ አብርሀ፨
- ዘእንበሌኪ፡ ማርያም፡ ወዘእንበለ፡ ወልድኪ፡ በኵረ፡ ፍሥሓ፨
- አልቦ፡ ለሞት፡ ማእሰሪሁ፡ ዘፈትሓ፨
- ወሙታነ፡ እምሲኦል፡ አንቅሐ፨
-
- ሰላም፡ ለፍልሰተ፡ ሥጋኪ፡ ለሊቀ፡ ካህናት፡ ዘአደሞ፨
- መሥዋዕተ፡ መድኃኒት፡ ያዕርግ፡ ቅድስተ፡ ቅዱሳን፡ ቀዊሞ፨
- ለመልአከ፡ ሞት፡ ፀዋግ፡ መልአከ፡ በቀል፡ ወተቀይሞ፨
- ሚመጠነ፡ አድወዮ፡ ወሚመጠነ፡ አሕመሞ፨
- በዓለ፡ ፍልሰትኪ፡ ማርያም፡ ዘአምላክ፡ ሐተሞ፨
-
- ሰላም፡ ለፍልሰተ፡ ሥጋኪ፡ እምዓለመ፡ መትሕት፡ ኀላፊ፨
- ውስተ፡ ዐውደ፡ ቡሩክ፡ ወሱራፊ፨
- ማርያም፡ ምዕዝት፡ እምሥነ፡ ጽጌያት፡ ዘወርኀ፡ ታውፊ፨
- ናሁ፡ ተሠጠምኩ፡ ውስተ፡ ባሕረ፡ ስሕተት፡ ጽነፊ፨
- በሐመረ፡ ንጽሕኪ፡ ወትረ፡ ኪያየ፡ ሐድፊ፨
-
- ሰላም፡ ለፍልሰተ፡ ሥጋኪ፡ ዘአጥናን፡ ኀይሉ፨
- ወዘአኤናዎን፡ መዝራዕተ፡ ብዕሉ፨
- ማርያም፡ ዝክርኪ፡ ለትውልደ፡ ትውልድ፡ ዘይሄሉ፨
- አምጻኢተ፡ ምሕረት፡ ማርያም፡ ለኃጥኣነ፡ ምድር፡ ኵሉ፨
- ወቡርክት፡ ማርያም፡ ለክርስቶስ፡ አባሉ፨
-
- ሰላም፡ ለፍልሰተ፡ ሥጋኪ፡ እግዚአብሔር፡ ዘአልዐሎ፨
- እምፍልሰተ፡ ኤልያስ፡ ነቢየ፡ ሲሎ፨
- ውስተ፡ ብሔረ፡ ፍግዕ፡ ስድኒ፡ ማርያም፡ በክነፈ፡ ዐውሎ፨
- ለምንት፡ ሊተ፡ በፍግዓ፡ ወበጥዒና፡ እዴሎ፨
- እንዘ፡ ይዴግነኒ፡ ሞት፡ ዘይኴንን፡ ኵሎ፨
-
- ሰላም፡ ለፍልሰተ፡ ሥጋኪ፡ እግዚአብሔር፡ ዘተዋሐዳ፨
- ወተካፈለ፡ ክበዳ፨
- ለፍልሰትኪ፡ ማርያም፡ እምኢየሩሳሌም፡ ምድረ፡ ይሁዳ፨
- ስኂነ፡ ተዝካር፡ ወአፈወ፡ ዕጣን፡ ጸዐዳ፨
- ነገሥተ፡ ተርሴስ፡ ወደስያት፡ ያበውኡ፡ ጋዳ፨
-
- ሰላም፡ ለፍልሰተ፡ ሥጋኪ፡ በሰዋስወ፡ ብርሃን፡ ምጡቅ፨
- ከመ፡ ትኩኒዮሙ፡ እመ፡ ለኅሩያን፡ ደቂቅ፨
- ተሣየጥኒ፡ ማርያም፡ በንዋየ፡ ሣህልኪ፡ ጽድቅ፨
- ከመ፡ ይሣየጡ፡ አመ፡ ዕለተ፡ ፍዳ፡ ወጻዕቅ፨
- ዘመደ፡ አዕዋፍ፡ ኀምስ፡ በክልኤ፡ ጸሪቅ፨
-
- ሰላም፡ ለፍልሰተ፡ ሥጋኪ፡ ውስተ፡ ብሔር፡ ስዑር፨
- እንተ፡ ኬንያ፡ ወገባሪሃ፡ እግዚአብሔር፨
- ማርያም፡ ፍትሕኒ፡ እምግብርናተ፡ ሞት፡ መሪር፨
- ለኪሰ፡ ንግሥተ፡ ሰማይ፡ ወምድር፨
- ኢይሰአነኪ፡ አግዕዞቱ፡ ለኃጥእ፡ ገብር፨
-
- ሰላም፡ ለትንሣኤ፡ ሥጋኪ፡ ከመ፡ ትንሣኤ፡ ክርስቶስ፡ መንታ፨
- ርእሶ፡ ሕያወ፡ እምድኅረ፡ ኀብአ፡ ውስቴታ፨
- በጽላሎትኪ፡ ክድንኒ፡ ማርያም፡ ርግበ፡ ኤፍራታ፨
- ሰውርኒ፡ በአክናፍኪ፡ አመ፡ ይከውን፡ ሐተታ፨
- ወአመ፡ ታገብእ፡ ምድር፡ ዘነሥአት፡ ማሕፀንታ፨
-
- ሰላም፡ ለዕርገተ፡ ሥጋኪ፡ ዘተወጥነ፡ ቦቱ፨
- ዕርገተ፡ ቅዱሳን፡ ሰብእ፡ እለ፡ ፈድፋደ፡ ተአኵቱ፨
- ለሊቀ፡ ካህናት፡ አሮን፡ ማርያም፡ ሠርጐ፡ ትርሲቱ፨
- ሥዑለ፡ ይኩን፡ በልብስኪ፡ እንተ፡ ላዕሉ፡ ወታሕቱ፨
- ፍሬ፡ ከናፍር፡ ወአፍ፡ ውዳሴኪ፡ ዝንቱ፨