Details
-
- ነገረ፡ ፅንሰትከ፡ ወልደትከ፡ ሶበ፡ ጸውዐተኒ፡ ፈቃድ፨
- በቃል፡ ኅፁፅ፡ ወበንባብ፡ ውሑድ፨
- አኀዝኩ፡ እንግር፡ ውስተ፡ ወንጌላዊት፡ አውድ፨
- ዮሐንስ፡ ፍሥሐ፡ አስሳሌ፡ ሐዘን፡ ክቡድ፨
- ወሐዋርያሁ፡ ዮሐንስ፡ ለክርስቶስ፡ ወልድ፨
-
- ሰላም፡ ለተበስሮ፡ ፅንስከ፡ በየማነ፡ መስዕ፡ ዘኮነ፨
- እስመ፡ አልጸቀ፡ ጊዜሁ፡ ለዘይኴንን፡ የማነ፨
- ወለልደትከ፡ ሰላም፡ ዘአስተፍሥሐ፡ መካነ፨
- ዮሐንስ፡ መምህር፡ እንተ፡ ትሜህር፡ መድኅነ፨
- ወማኅቶተ፡ ገዳም፡ ዘታበርህ፡ ጽልመተ፡ ክዱነ፨
-
- ሰላም፡ ለፀንሰትከ፡ እምናዝሬት፡ ዓጸዳ፨
- ዘአስተናስዓ፡ ለማርያም፡ ለሐዊር፡ መንገለ፡ ዘመዳ፨
- ወለልደትከ፡ ሰላም፡ ዮሐንስ፡ ፈዳዬ፡ እዳ፨
- እንዘ፡ ያነክሩ፡ ለኢየሩሳሌም፡ ውሉዳ፨
- ዘተናገርዎ፡ በኵሉ፡ ይሁዳ፨
-
- በኍልቈ፡ ዓሥር፡ ወክልኤ፡ ደቂቀ፡ እስራኤል፡ ኵሎሙ፨
- በልብሰ፡ አዕናቍ፡ ከቡራን፡ እለ፡ ተጽሕፈ፡ ስሞሙ፨
- ዘአቅረብኩ፡ ለከ፡ ዮሐንስ፡ እንዘ፡ ንስቲተ፡ እጻሙ፨
- ተወከፍ፡ ሊተ፡ ሰላምየ፡ ከመ፡ ተወክፈ፡ ቀዲሙ፨
- ጸሪቀ፡ መበለት፡ እግዚእከ፡ ኢየሱስ፡ ስሙ፨
- ተረፈ፡ መልክእ፡
-
- ሰላም፡ ለከ፡ ዮሐንስ፡ ስቡሐ፡ ልደት፡ ወዜና፨
- ሰላም፡ ለከ፡ ዮሐንስ፡ ለመካን፡ ፈታሔ፡ ማሕፀና፨
- ዕሤተ፡ ሰላምየ፡ ዝንቱ፡ እማዕምቀ፡ ልብ፡ ወኅሊና፨
- ሐሊ፡ ሊተ፡ ሠናያተ፡ እስመ፡ አዘዘት፡ ቀኖና፨
- ሐልዮ፡ ሠናይት፡ ለፍቁር፡ ውስተ፡ ቤት፡ ወፍና፨