መልክአ፡ እንድርያስ፡ Malkəʾa ʾƎndrəyās

Image of Andrew

    • ሰላም፡ ለፅንሰትከ፡ ወለልደትከ፡ እማሕፀን፨
    • ለዝክረ፡ ስምከኒ፡ ትፍሥሕተ፡ ኅሊና፡ እምወይን፨
    • ካህነ፡ ዓለሙ፡ እንድርያስ፡ ለካህነ፡ ዓለም፡ ምእመን፨
    • ታስተበፅዐከ፡ ቤተ፡ ክርስቲያን፨
    • ልሳን፡ እስመ፡ ለብፁዕ፡ ይደሉ፡ ብፅዓን፨
    • ሰላም፡ ለሥዕርተ፡ ርእስከ፡ ወለርእስከ፡ ዘጾረ፨
    • አክሊለ፡ ጸጋ፡ ወኀይል፡ ምስለ፡ ገጽከ፡ ኅቡረ፨
    • በኵረ፡ አርዳኢሁ፡ እንድርያስ፡ ለዘተሰምየ፡ በኵረ፨
    • እምሀጕለ፡ ዓለም፡ ዕቀበኒ፡ ወትረ፨
    • በዓለምኒ፡ ዘይመጽአ፡ ድኅረ፨
    • ሰላም፡ ለመቃብሪከ፡ በአእዳወ፡ ሕዝብ፡ ጻድቃን፨
    • ወለትንሣኤከ፡ ሥርግው፡ ሜላተ፡ ሀላዊ፡ ብርሃን፨
    • ተሰካፌ፡ ስቅለት፡ እንድርያስ፡ ወዕጉሠ፡ ዝብጠት፡ ዘዕብን፨
    • ያስተበፅዑከ፡ ውሉደ፡ ወላዲ፡ አሚን፨
    • እስመ፡ ብፅኣንከ፡ አብየ፡ እምኵሉ፡ ብፅዓን፨
    • ናሁ፡ ነበብኩ፡ ስብሐቲከ፡ በኅዳጥ፡ ወበኅፁር፨
    • እንዘ፡ ብዙኅ፡ ጸጋከ፡ ዘኢይዌስኖ፡ ነገር፨
    • አንተኒ፡ እንድርያስ፡ ኰናኔ፡ ሰማይ፡ ወምድር፨
    • ተናበብ፡ ሊተ፡ ኀበ፡ አብ፡ ንባበ፡ ሰላም፡ ወፍቅር፨
    • አመ፡ በምሥጢር፡ ይትከሠት፡ ዘኵሉ፡ ምሥጢር፨