መልክአ፡ ዮሐንስ፡ ወንጌላዊ፡ Malkəʾa Yoḥannəs Wangelāwi

Image of John the Evangelist

Malkəʾ

    • ሰላም፡ ለፅንሰትከ፡ ወለልደትከ፡ እማሕፀና፨
    • ለቅርብተ፡ ልደት፡ እምከ፡ እምልደተ፡ ድንግል፡ ወሐና፨
    • ሐዋርያ፡ ብስራት፡ ዮሐንስ፡ ወጸዋሬ፡ ሐዲስ፡ ዜና፨
    • ሀገረ፡ ስብሐቲከ፡ እርአይ፡ አዘዘኒ፡ መኰንነ፡ ኵሉ፡ ኅሊና፨
    • ባሕቱ፡ መንፈሳዊት፡ አምረኒ፡ ፍና፨
    • ሰላም፡ ለዝክረ፡ ስምከ፡ ዘተወደሰ፡ ብዙኅ፨
    • ወለሥዕርትከ፡ አቄርብ፡ ፍሬ፡ ከናፍር፡ አምኃ፨
    • ዘተረሰይከ፡ ዮሐንስ፡ ትርሲተ፡ መላእክት፡ ንጽሓ፨
    • ቃል፡ ኀደረ፡ ላዕሌነ፡ ወኮነ፡ መሢሐ፨
    • ቃለ፡ ዐዋዲ፡ ቃልከ፡ እንዘ፡ ይብል፡ ጸርሐ፨
    • ሰላም፡ ለግንዘተ፡ ሥጋከ፡ ወለመቃብሪከ፡ ዘተከብተ፨
    • ከመ፡ መቃብሩ፡ ክቡት፡ ለዘጸሐፈ፡ ኦሪተ፨
    • ወይነ፡ አእምሮ፡ ዮሐንስ፡ ዘያስተፌሥሕ፡ ነፍሳተ፨
    • ምላእ፡ ውስተ፡ ልብየመዋኤ፡ ኀዘን፡ ትፍሥተ፨
    • ወእምኅሊናየ፡ ሠዐር፡ ሥጋዌ፡ ሁከተ፨
    • ሰላም፡ ለሑረትከ፡ እንበለ፡ አሣዕን፡ ወበትር፨
    • በከመ፡ ይቤ፡ ታቴዎስ፡ ወቃለ፡ ሉቃስ፡ ማእምር፨
    • አምጣነ፡ በጸጋ፡ ተሐንጸት፡ ውስተ፡ ርእሰ፡ ልብ፡ ደብር፨
    • ተከብቶ፡ ኢትክል፡ ለዓለም፡ ሃይማኖትከ፡ ሀገር፨
    • ነሣኤ፡ ሀብተ፡ ፍቅር፡ ዮሐንስ፡ እምአምላክ፡ ፍቁር፨
    • በሕማምከ፡ ብዙኅ፡ ለዮሐንስ፡ እኁክሙ፨
    • ወበመንግሥትክሙ፡ ድኅረ፡ ክቡር፡ ሱታፌክሙ፨
    • ሐዋርያተ፡ ሕግ፡ ንዑ፡ በበ፡ ጾታክሙ፨
    • ሶበ፡ ተጸውዐ፡ ዝክረ፡ ትፍሥሕተ፡ ልብ፡ ስሙ፨
    • እስመ፡ ዘ፩፡ ርእስ፡ አባላት፡ አንትሙ፨
    • እንተ፡ አቅረብኩ፡ ስብሐተ፡ ለስብሐቲከ፡ ስቡሕ፨
    • እንዘ፡ ቦ፡ ላዕሌየ፡ ንዴተ፡ አእምሮ፡ ብዙኅ፨
    • ተወኪፈከ፡ ዮሐንስ፡ ተወክፎተ፡ ዕጣን፡ ንጹሕ፨
    • ዕሤተ፡ ጻድቅ፡ ዕረፍተ፡ ሴስየኒ፡ እመክፈልተ፡ ኃጥእ፡ ስራሕ፨
    • አመ፡ በምግባር፡ ይፈዲ፡ ሐታቲ፡ መሲሕ፨

Tarafa Malkəʾ

    • ሰላም፡ ለከ፡ ዮሐንስ፡ ቃል፡ ዘበጥንተ፡ አካል፡ ተሥዕለ፨
    • ሥጋነ፡ ኮነ፡ ወሥጋነ፡ ቃለ፨
    • እንዘ፡ ትብል፡ መሐርከ፡ ወንጌለ፨
    • ሰላም፡ ለከ፡ ቀድመ፡ ገጸ፡ ዓለም፡ ዮሐንስ፡ ቅድምና፡ ቀዳማይ፡ ቃል፨
    • ፈናወከ፡ ትስብክ፡ ጰራቅሊጦስ፡ ኀይል፨
    • ዘፈነዎ፡ ወላዲ፡ ልዑል፨
    • ሰላም፡ ለከ፡ ለልበ፡ ፎጢኖስ፡ ናባል፡ በድንጋጼ፡ ድምፁ፡ ቀተሎ፨
    • ዳዊት፡ ቃልከ፡ ነቢየ፡ ሴሎ፨
    • በቀዳሚ፡ ዮሐንስ፡ ዘመሀርከ፡ ኵሎ፨
    • ከመ፡ ቃል፡ ኀበ፡ አብ፡ ሀሎ፨