Subjects
Apostle
ማቴዎስ፡
Mātewos
Matthew
Matthew
Malkəʾ
-
- ሰላም፡ ለፅንሰትከ፡ በዕለት፡ ቡርክት፨
- ወለልደትከ፡ ክቡር፡ እምክብረ፡ ልደት፨
- ምድረ፡ ሃይማኖት፡ ማቴዎስ፡ ወወንጌላዊ፡ ገራህት፨
- ተረክበ፡ ውስቴትከ፡ መድግነ፡ ምእመናን፡ ሕይወት፨
- ወፈረዩ፡ ላዕሌከ፡ ህልዋን፡ አዝእት፨
-
- ሰላም፡ ለዝክረ፡ ስምከ፡ ዘትርጓሜሁ፡ ኅሩይ፨
- ወለሥዕርትከ፡ ጊሜ፡ ሠርጐ፡ ርእስከ፡ ሰማይ፨
- ነዳየ፡ ዓለም፡ ማቴዎስ፡ ወብዕለ፡ ነዳያን፡ ንዋይ፨
- አስትየኒ፡ ማየ፡ ፈውስ፡ እምረድከ፡ ቀላይ፨
- እስመ፡ ጽሙዐ፡ ነፍስ፡ አነ፡ ወብእሲ፡ ድዉይ፨
-
- ሰላም፡ ለርእስከ፡ ጸዋራ፡ አክሊል፡ ትሕትና፨
- ወለገጸ፡ ሙሴ፡ ገጽከ፡ ዘተሰብሐ፡ በሲና፨
- ሰማየ፡ ረድኤት፡ ማቴዎስ፡ ወመንፈሳዊ፡ ደመና፨
- ያቍርረኒ፡ እምዋዕየ፡ ደዌ፡ ወእምነ፡ ሐሩር፡ ሙስና፨
- በምድረ፡ ሰብእናየ፡ ይረድ፡ ጠልከ፡ ጥዒና፨
-
- ሰላም፡ ለግንዘተ፡ ሥጋከ፡ ወለመቃብሪከ፡ ገራህት፨
- ዘፈረየት፡ ፈውሰ፡ ሲሳየ፡ ሕሙማን፡ ሐ<ረ>ስት፨
- ልሳነ፡ አምላክ፡ ማቴዎስ፡ ጸዋሬ፡ ሕይወት፡ ወሞት፨
- ተናበብ፡ በእንቲአየ፡ በንባብከ፡ በቍዔት፨
- እመ፡ እምነቢብ፡ ያረምም፡ ነባቢ፡ ፍጥረት፨
-
- ዘአቅረብኩ፡ ስብሐታተ፡ ወጸሎታተ፡ ዘአፍ፨
- እስመ፡ ጸሎተ፡ ልብ፡ አልብየ፡ እንተ፡ አዘዘ፡ መጽሐፍ፨
- ተወኪፈከ፡ ማቴዎስ፡ ተወክፎተ፡ መሥዋዕት፡ ውኩፍ፨
- ጸጋ፡ ፈውስ፡ ዕረፍተ፡ ጸግወኒ፡ እምጻማ፡ ሕማም፡ ወሐፍ፨
- ወነፍሰ፡ ጌጋይየ፡ ይቅትል፡ ከርየትከ፡ ሰይፍ፨