Subject
Apostle
ማርቆስ፡
Mārqos
Mark
Mark
Malkəʾ
-
- ሰላም፡ ለፅንሰትከ፡ በሀገረ፡ ዐባይ፡ ገሊላ፨
- ወለልደትከ፡ ትለድ፡ አእላፈ፡ ፍጽም፡ ወከዋላ፨
- ሊቀ፡ ጳጳሳት፡ ማርቆስ፡ ዘግብጽ፡ ወደወላ፨
- ከመ፡ መሐልኩ፡ ወአጥባዕኩ፡ ለሰብሖ፡ ስምከ፡ ተድላ፨
- ለወሂበ፡ ፈውስ፡ እምሕማም፡ ሀበኒ፡ መሐላ፨
-
- ሰላም፡ ለዝክረ፡ ስምከ፡ ዘአፈ፡ መላእክት፡ ወደሶ፨
- ወለሥዕርትከ፡ ሜላት፡ ዘዕርቃነ፡ ርእስከ፡ ለብሶ፨
- ሐዲሰ፡ ልቡና፡ ማርቆስ፡ ብልየተ፡ ልብ፡ ዘትሔድሶ፨
- ሐድሶ፡ ለሕሊናየ፡ ወለሥጋየ፡ ቀድሶ፨
- ዘበላዕሌሁ፡ ለጌጋይ፡ አንገሦ፨
-
- ሰላም፡ ለገጽከ፡ ምስለ፡ ቀራንብት፡ ወአዕይንት፨
- እለ፡ ድኅረ፡ ሌሊት፡ ኢኖማ፡ በዕብሬተ፡ ክርስቶስ፡ መዓልት፨
- ማርቆስ፡ ሕይወት፡ ማርቆስ፡ ሞት፨
- እስመ፡ ተበዋሕከ፡ በካዕከ፡ እሉ፡ ሀብታት፨
- ሀበኒ፡ ሀብተ፡ ዘባቲ፡ ምሕረት፨
-
- ሰላም፡ ለአእዛኒከ፡ ወለመላትሒከ፡ ዘተዛወጋ፨
- ፍሬያተ፡ ሮማን፡ አእናፈ፡ እንበለ፡ ይኅድጋ፨
- ቀናዒ፡ ማርቆስ፡ ለእንተ፡ ተዐቢ፡ ጸጋ፨
- ቅናዕ፡ ለክብርከ፡ እንዘ፡ በሥጋ፨
- እስመ፡ ላዕለ፡ ነፍስየ፡ ገብሩ፡ ሕማማት፡ እንግልጋ፨
-
- ሰላም፡ ለከናፍሪከ፡ እለ፡ መሐራ፡ ወንጌለ፨
- ምስለ፡ አፉከ፡ ወአስናኒከ፡ ኀበ፡ ቤተ፡ ጣዖት፡ ንህለ፨
- ማርቆስ፡ ክርስቶስሃ፡ ስቁለ፨
- መስልኮሙ፡ ለአብዳን፡ ከመ፡ ልቡናሁ፡ ዘሐጕለ፨
- ወለጠቢባን፡ ዘወለጠ፡ ቃለ፨
-
- ሰላም፡ ለልሳንከ፡ ወለቃልከ፡ ሰባኪ፨
- በኀይለ፡ እስትንፋስ፡ ዘይረድእ፡ ወንጌለ፡ መለኮት፡ መሐኪ፨
- ሱራፌላዊ፡ ማርቆስ፡ ቀዳሴ፡ ቅዱስ፡ መላኪ፨
- ለዮሐንስ፡ ሕሊናየ፡ ከመ፡ ለለ፡ ጊዜ፡ ኢይስኪ፨
- መጽሐፈ፡ አእምሮ፡ ጸግዎ፡ እንዘ፡ ትብል፡ ኢትብኪ፨
-
- ሰላም፡ ለጕርዔከ፡ ወለክሳድከ፡ ዘተስሕበ፨
- ምስለ፡ መትከፍትከ፡ በሐብል፡ አመ፡ መሀርከ፡ አሕዛበ፨
- ማርቆስ፡ እንተ፡ ተለውከ፡ ኮከበ፨
- እምያዕቆብ፡ ዘሠረቀ፡ ከመ፡ ቃለ፡ ነቢይ፡ ነበበ፨
- አትልወኒ፡ እባእ፡ ሐዳሰ፡ ከብካበ፨
-
- ሰላም፡ ለዘባንከ፡ ወለእንግድዓከ፡ ምስለ፡ ሕፅን፨
- ዘበላዕሁ፡ ረፈቀ፡ ብሉየ፡ መዋዕል፡ ሕፃን፨
- ምግባረ፡ ሠናያት፡ ማርቆስ፡ ወወንጌላዊ፡ አሚን፨
- ኪያኪ፡ ዘተምህረ፡ ይትመሀር፡ በደይን፨
- እስመ፡ ኀበ፡ አምላክ፡ ሀለዎ፡ ሀላዊ፨
-
- ሰላም፡ ለአእዳዊከ፡ ዘበሐብለ፡ አፅራር፡ እለ፡ ተዐሥራ፨
- ምስለ፡ መዛርዕ፡ ወኵርናዕ፡ ሶበ፡ ሠናያተ፡ ገብራ፨
- አምላከ፡ ግብጽ፡ ማርቆስ፡ ለቤተ፡ ክርስቲያን፡ በእንተ፡ ፍቅራ፨
- በጻሕከ፡ እስከ፡ ለሞት፡ በእደ፡ ምውታን፡ ሐራ፨
- ከመ፡ አዘዘከ፡ ለድንግል፡ በክራ፨
-
- ሰላም፡ ለእመታቲከ፡ ወለእራኃቲከ፡ እለ፡ መጠዋ፨
- ምስለ፡ አጻብእ፡ ለነፍስ፡ ኅብስተ፡ ሕይወት፡ ዘያሐይዋ፨
- መቅደሰ፡ ቤተ፡ ሕግ፡ ማርቆስ፡ ኪሩቤል፡ ዘይኬልልዋ፨
- በግዐ፡ ቅዳሴ፡ ወቃለ፡ ስብሐት፡ ጣዕዋ፨
- ካህናተ፡ ሰማይ፡ ውስቴትከ፡ ይሠውዑ፡ ነዋ፨
-
- ሰላም፡ ለአጽፋረ፡ እዴከ፡ ወለገቦከ፡ ምስለ፡ ከርሥ፨
- እለ፡ ነጸፉ፡ ሥቃየ፡ በእንተ፡ ኢየሱስ፡ ክርስቶስ፨
- ዘተድላ፡ መንበርከ፡ ፍትሕ፡ ማርቆስ፡ ንጉሥ፨
- ሐራከ፡ ፈኑ፡ ምሕረታተ፡ እማዕሠረ፡ ሕማም፡ በፈውስ፨
- ከመ፡ ይፍትሕዋ፡ ለሕምምት፡ ነፍስ፨
-
- ሰላም፡ ለልብከ፡ ወለኵልያቲከ፡ ሐልዮ፨
- እለ፡ ይጸውራ፡ ወትረ፡ እንበለ፡ ጽርዓት፡ ወተሀይዮ፨
- ቅዳሚሁ፡ ለወንጌል፡ እንዘ፡ ለክርስቶስ፡ ትሰምዮ፨
- ማርቆስ፡ ጊዜ፡ መሀርከ፡ ልቡና፡ አሕዛብ፡ ጌጋዮ፨
- ኀደገ፡ ይኅድግ፡ ዘባዕዳን፡ ተቀንዮ፨
-
- ሰላም፡ ለአማዑቲከ፡ ዘእምንዋየ፡ ውስጥ፡ ኢተፈልጠ፨
- ወለኅንብርትከ፡ ውስቴቱ፡ ዘደመ፡ ሥርዓት፡ ተሠውጠ፨
- ታቦተ፡ ሃይማኖት፡ ማርቆስ፡ ዘበወርቀ፡ ምግባር፡ ተለብጠ፨
- እምቅድስት፡ ዓለምነ፡ እንተ፡ ታጸንሕ፡ ተውላጠ፨
- ሙሴ፡ ወልደ፡ አምላክ፡ አብአከ፡ ውስጠ፨
-
- ሰላም፡ ለሐቌከ፡ ወለአቍያጺከ፡ ምስለ፡ አብራክ፨
- እለ፡ አብዝኀ፡ ሰጊደ፡ ለዘይሤለጥ፡ አምላክ፨
- ማርቆስ፡ ዘኢትመውት፡ መልአክ፨
- ዐወደነ፡ ዕቀብ፡ እምሶርያ፡ ፀረ፡ ነፍስነ፡ ድሩክ፨
- መልአከ፡ በረከት፡ ከመ፡ ዐቀቦ፡ ለኤልሳዕ፡ ቡሩክ፨
-
- ሰላም፡ ለአእጋሪከ፡ ወለሰኳንዊከ፡ ዘኢደክማ፨
- ምስለ፡ መከየድከ፡ ወአጻብዒከ፡ አመ፡ ዐውደ፡ ስምዕ፡ ቆማ፨
- ኢያሱ፡ ማርቆስ፡ ድቀተ፡ ንጉሣ፡ ወጥቅማ፨
- ለኢያሪኮ፡ ምድረ፡ ግብጽ፡ ማኅደረ፡ ነፍስ፡ ዘማ፨
- በኀይለ፡ ዕፍረትከ፡ ይደቅ፡ እምላዕሌየ፡ ጻማ፨
-
- ሰላም፡ ለአጽፋረ፡ እግርከ፡ ወለቆምከ፡ ዘዐቀምዎ፨
- ቅድመ፡ ገጸ፡ ንጉሥ፡ አብዳን፡ ከመ፡ ይቅሥፍዎ፨
- ንጉሠ፡ ጽድቅ፡ ማርቆስ፡ ዘኢተአምር፡ ሐስዎ፨
- ለምንት፡ ኀይለ፡ ደዌ፡ ለጥዒናየ፡ ፄወዎ፨
- እንዘ፡ ለመልእክት፡ ምስሌከ፡ እፈቅድ፡ ሀልዎ፨
-
- ሰላም፡ ለመልክእከ፡ ዘሣቀይዎ፡ በበ፡ ጾታ፨
- አፅራረ፡ ሃይማኖት፡ እምሥጋ፡ ለነፍስከ፡ አመ፡ ፀዓታ፨
- ለፍኖተ፡ ክርስቶስ፡ ማርቆስ፡ እንዘ፡ ትተሉ፡ ፍኖታ፨
- ለግብጽ፡ ኀይለ፡ አምላካዌ፡ አመ፡ ገበርከ፡ ውስቴታ፨
- አማልክቲሃ፡ ተዘርዉ፡ ወወድቀ፡ ትውክልታ፨
-
- ሰላም፡ ለበድነ፡ ሥጋከ፡ ዘገነዝዎ፡ አዕሩግ፨
- እለ፡ በፍቅርከ፡ ወፅኡ፡ እምፍቅረ፡ ጣዖት፡ ጸዋግ፨
- ሙሴ፡ ማርቆስ፡ እንዘ፡ ረድኤትከ፡ ሕግ፨
- ተቃተል፡ ለሕዝብከ፡ ኢይቅትሉኒ፡ በደርግ፨
- ሕማም፡ ሴዎን፡ ወጌጋይ፡ አግ፨
-
- ሰላም፡ ለዕለተ፡ ሞትከ፡ ዕለተ፡ ነጐድጓድ፡ ወመብረቅ፨
- ወለመቃብሪከ፡ ክብርት፡ በምድረ፡ ምሥራቅ፨
- በላዕለ፡ ሊቃናት፡ ኵሎሙ፡ ማርቆስ፡ ሊቅ፨
- ጽድቅከ፡ ሞአ፡ ወኀየለ፡ ግብረ፡ ኀይለ፡ አዕሩግ፡ ወደቅ፨
- እስመ፡ እምኵሉ፡ ኀይል፡ ይመውዕ፡ ጽድቅ፨
-
- ሰላም፡ ለትንሣኤከ፡ ዐለተ፡ ብዙኅ፡ ሃሌ፡ ሉያ፨
- ወለዕርገትከ፡ በክብር፡ መንገለ፡ ዐርገ፡ ኬንያ፨
- ዜናዌ፡ ተድላ፡ ዘነፍስ፡ ማርቆስ፡ ሐዋርያ፨
- ዜንወኒ፡ ፈውሰ፡ ለነፍስየ፡ እንዘ፡ ትኔጽር፡ ብካያ፨
- እስመ፡ ኀጢአት፡ ሰሰን፡ ፈድፉደ፡ አድወያ፨
-
- አምኃ፡ ማሕሌት፡ ነፍስየ፡ እንዘ፡ ትጸውር፡ በርእሳ፨
- ኀቤከ፡ አምጣነ፡ ባቲ፡ ኀሠሣ፨
- ዐቃቤ፡ ሥራይ፡ ማርቆስ፡ ለነፍሰ፡ ሕሙማን፡ ዘትሔድሳ፨
- ለፌ፡ ፈያት፡ ሕማማት፡ ወለፌ፡ አበሳ፨
- እስመ፡ አቍሰልዋ፡ አስተዳሉ፡ ፈውሳ፨