Malkəʾa ʾArsemā (Image of Hripsime)

- ሰላም፡ ለዝክረ፡ ስምኪ፡ ዘሆህያቲሁ፡ አርባዕ፨
- ከመ፡ ግጻዌሁ፡ ግቡር፡ ለመስቀለ፡ ክርስቶስ፡ እግዚእ፨
- አርሴማ፡ ብፅዕት፡ ዕግሥተ፡ መከራ፡ ወስምዕ፨
- ውግዕኒ፡ እምአጥባትኪ፡ ሐሊበ፡ ፍሥሐ፡ ወፍግዕ፨
- ነገረ፡ ውዳሴኪ፡ እንብብ፡ በልሳን፡ ጥእጡእ፨
- ሰላም፡ ለሥዕርተ፡ ርእስኪ፡ ወለርእስኪ፡ ክሉል፨
- ወለገጽኪ፡ ቀይሕ፡ ከመ፡ ጽጌ፡ ሮማን፡ ወኮል፨
- አርሴማ፡ መዋኢት፡ መኳንንተ፡ ስሕተት፡ ወሐጕል፨
- ጸግወኒ፡ ዝቀ፡ አእምሮ፡ እምውዳሴኪ፡ ምዕቃል፨
- ንስቲተ፡ እቅዳሕ፡ ወእክዐው፡ በዔል፨
- ሰላም፡ ለቀራንብትኪ፡ ወለአዕይንትኪ፡ ወርኀ፡ ገሃህ፨
- ወለአእዛንኪ፡ ጽልዋት፡ ኀበ፡ ቃለ፡ መልአክ፡ ፍሡሕ፨
- ገሊላዊት፡ አርሴማ፡ ለባሲተ፡ አሚን፡ ስቡሕ፨
- እፎ፡ ኢያፍርሀኪ፡ እቶነ፡ ነበልባል፡ መፍርህ፨
- ወኢያደንገፀኪ፡ ምንተ፡ ጤገኑ፡ ፍሉሕ፨
- ሰላም፡ ለመላትሕኪ፡ እለ፡ ተጸፍዓ፡ ወተሰትራ፨
- ሶበ፡ በአእናፍኪ፡ ቦአ፡ ለመርዓተ፡ ቍስቋም፡ መዓዛ፡ ፍቅራ፨
- ርእሰ፡ ፀርየ፡ ምትሪ፡ አርሴማ፡ ወስቅሊ፡ ውስተ፡ ደብተራ፨
- ወለተ፡ ሜራራ፡ ለሆሎፎርኒስ፡ ፀራ፨
- ዲበ፡ ርእሰ፡ ተድባብ፡ ከመ፡ ሰቀለት፡ ክሳዶ፡ መቲራ፨
- ሰላም፡ ለከናፍርኪ፡ ወለአፉኪ፡ ወለአስናንኪ፡ ሥነ፡ እብላ፨
- ለልሳንኪኒ፡ ምስለ፡ እስትንፋሳ፡ ወቃላ፨
- ተመየጥኒ፡ አርሴማ፡ ለነዳይ፡ ኀሣሤ፡ ተድላ፨
- ከመ፡ ተሀብኒ፡ ለኅብስተ፡ ጸጋኪ፡ ክፍላ፨
- ወለኂሩትኪ፡ ከዋኒት፡ ብዕላ፨
- ሰላም፡ እብል፡ ለጕርዔኪ፡ ወለክሳድኪ፡ እሳለማ፨
- ለመታክፍትኪ፡ ሰላም፡ ወለዘባንኪ፡ ዑጽፍተ፡ ግርማ፨
- ለድክምት፡ ወለትኪ፡ ለባሲተ፡ አጥናን፡ አርሴማ፨
- ንጽሒ፡ ፀረ፡ ነፍስየ፡ ውስተ፡ ጸድፈ፡ ሕማም፡ ወጻማ፨
- ከመ፡ አስቴር፡ እመንበሩ፡ ነጽሐቶ፡ ለሓማ፨
- ሰላም፡ ለእንግድዓኪ፡ ወለሕፅንኪ፡ ክቡር፨
- ወለአእዳውኪኒ፡ ምስለ፡ መዛርዒሁ፡ ጽዑር፨
- ዓዲ፡ አርሴማ፡ ለእግዝእትኪ፡ መጾር፨
- ሰላም፡ ለንግደታ፡ ወዜና፡ ግፍዐታ፡ መንክር፨
- እንዘ፡ ንግሥት፡ ይእቲ፡ በሰማይ፡ ወምድር፨
- ሰላም፡ ለኵርናዕኪ፡ ወለእመታትኪ፡ ወለእራኅኪ፡ ሰላም፡ እብሎን፨
- ለአፃብዕኪ፡ ዐሥሮን፡ ወለአጽፋሪሆን፨
- አርሴማ፡ ለድንግል፡ በእንተ፡ ንግደታ፡ ማኅዝን፨
- ሐድሲ፡ ላዕሌየ፡ መዋዕለ፡ ዝንቱ፡ አዝማን፨
- እስመ፡ በኀቤየ፡ አኀዞ፡ ርስዓን፨
- ሰላም፡ ለአጥባትኪ፡ ወለገቦኪ፡ ዘሐመልማለ፡ ወርቅ፡ ትርሲቱ፨
- ለከርሥኪኒ፡ ዘምስለ፡ ልቡ፡ ወኵልያቱ፨
- በእንተ፡ ንግደታ፡ ለማርያም፡ ወስደተ፡ ወልዳ፡ ባሕቱ፨
- ኪያየ፡ ኃጥአ፡ ወምኑነ፡ ከመ፡ ታጽድቂ፡ በከንቱ፨
- አርሴማ፡ ለአምላክኪ፡ ሰአሊዮ፡ ሎቱ፨
- ሰላም፡ ለኅሊናኪ፡ እንተ፡ ይኄሊ፡ ሠናየ፨
- ወአማዑትኪኒ፡ ወለንዋየ፡ ውስጥኪ፡ ዕሩየ፨
- ንቅሒ፡ እንከ፡ ለንስሐ፡ ከመ፡ ታንቅሂ፡ ልብየ፨
- እፎ፡ ይደፍን፡ አርሴማ፡ ጽልመተ፡ ኀጢአት፡ ኪያየ፨
- እንዘ፡ ማኅቶትኪ፡ የሐውር፡ ቅድሜየ፨
- ሰላም፡ ለሕንብርትኪ፡ ወለድንግልናኪ፡ ሕቱም፨
- ለሐቌኪኒ፡ ወለአቍያጽኪ፡ አዳም፨
- ሰላም፡ እብለኪ፡ አርሴማ፡ ዘበሐዋዝ፡ ስዒም፨
- ዓዲ፡ ማኅደራ፡ ለቅድስት፡ ማርያም፡ ሰላም፨
- ሰላም፡ ሰላም፡ ለኪ፡ ቍስቋም፨
- ሰላም፡ ለአብራክኪ፡ በሰጊድ፡ ለልዑል፡ ዘጻመዋ፨
- ምስለ፡ አእጋር፡ ወሰኰና፡ ዘቅሩቦን፡ ሀለዋ፨
- አርሴማ፡ ክፍልኒ፡ ምስሌኪ፡ ውስተ፡ ፍናዋ፨
- ለገነተ፡ ጽባሕ፡ እትለሀይ፡ ወአንፈርዕፅ፡ በነሶሳዋ፨
- ከመ፡ እጕለ፡ ላህም፡ ዘይሰመይ፡ ጣዕዋ፨
- ሰላም፡ ለመከየድኪ፡ ወለአፃብዕኪ፡ በመዐርይ፨
- ወለአጽፋርኪኒ፡ ዘጽዕዳዌሆን፡ ባሕርይ፨
- ሞቅሒ፡ ሊተ፡ አርሴማ፡ በልጓመ፡ መንፈስ፡ ሠናይ፨
- ኢይቅትለኒ፡ አሥጋሪሃ፡ በሕምዘ፡ ንባባ፡ እኩይ፨
- ንስቲት፡ እምአባልየ፡ ወድምፃ፡ ዐባይ፨
- ሰላም፡ ለቆምኪ፡ ዘይመስል፡ በቀልተ፨
- ወለመልክእኪ፡ ኵሉ፡ እንበለ፡ እኅድግ፡ አሐተ፨
- አርሴማ፡ ሀብኒ፡ አምጣነ፡ ብየ፡ ተምኔተ፨
- ለክርስቶስ፡ በቋዔ፡ ተድላ፡ ምስለ፡ አሥምሮቱ፡ ሕይወተ፨
- እስመ፡ ፈድፋደ፡ እፈርህ፡ መዊተ፨
- ሰላም፡ ለፀአተ፡ ነፍስኪ፡ በዕለተ፡ መተሩኪ፡ ርእሰ፨
- ለበድነ፡ ሥጋኪ፡ ወለግንዘትኪ፡ ኅውሠ፨
- አርሴማ፡ ብዕልት፡ ኢታርእይኒ፡ ተጽናሰ፨
- ሴስይኒ፡ እመዝገብኪ፡ እስመ፡ ኢይክል፡ ሐሪሰ፨
- ወስኢለሂ፡ አኀፍር፡ አንሰ፨
- ሰላም፡ ለመቃብርኪ፡ ወለፍልሰትኪ፡ ኅቡረ፨
- ከመ፡ እለ፡ አሳፍ፡ ሎቱ፡ እንዘ፡ አቄርብ፡ መዝሙረ፨
- አርሴማ፡ እግዝእት፡ እንተ፡ ትሰረገዊ፡ ክብረ፨
- ኢትሰድኒ፡ ፄዋ፡ እምኀበ፡ ፈጣሪ፡ ኢሠምረ፨
- ዘሕሊናየ፡ ሞቅሒ፡ አእጋረ፨
- እምንዴትየ፡ ዘአቅረብኩ፡ ንዋየ፡ ማሕሌትኪ፡ ዝንቱ፨
- ስብሐተ፡ መልክእኪ፡ ኵሉ፡ እንተ፡ ሀለወ፡ ውስቱ፨
- አርሴማ፡ ብፅዕት፡ ለእግዚአብሔር፡ ሰማዕቱ፨
- አዕርጊ፡ ቅድመ፡ ገጽኪ፡ ወተወከፊዮ፡ ሎቱ፨
- ኀበ፡ ቅድመ፡ አምላክ፡ ዘዐርገ፡ ለአቤል፡ መሥዋዕቱ፨

ተረፈ፡ መልክእ፡
- ሰላም፡ ለኪ፡ አርሴማ፡ ኅሪት፨
- አመተ፡ ማርያም፡ ቡርክት፨
- ዘኢያፍርሀኪ፡ እቶነ፡ እሳት፨
- ፅዕዱት፡ ዖፈ፡ ገነት፨
- ሰላም፡ ለኪ፡ መዋግደ፡ ጽኑዕ፡ አዝማን፨
- አመ፡ አንሥአ፡ ሰይጣን፨
- ዘኢያፍርሀኪ፡ እሳተ፡ እቶን፨
- አርሴማ፡ ሰማዕተ፡ መድኅን፨
- ሰላም፡ ለኪ፡ ለብፅዕት፡ አርሴማ፨
- ሰማዕተ፡ ኢየሱስ፡ ፌማ፨
- እቶነ፡ እሳት፡ ዘኢያሕመማ፨
- ክልልት፡ በአክሊለ፡ ግርማ፨
- ሰላም፡ ለኪ፡ ለንጉሠ፡ ስሕተት፡ በዐውዱ፨
- እንተ፡ ላዕሌኪ፡ ዕልዋን፡ ሥቃየ፡ ኵነኔ፡ አክበዱ፨
- እስከ፡ አባልኪ፡ በእሳት፡ አንደዱ፨
- ምዕዝት፡ እምናርዱ፨
- ሰላም፡ ለኪ፡ አርሴማ፡ ሥጋኪ፡ ሶበ፡ ሰተሩ፨
- ወአዕፅምተኪ፡ ሰበሩ፨
- ክሳደኪኒ፡ መጦኪ፡ በመጥባሕት፡ ይምትሩ፨
- ለክርስቶስ፡ በእንተ፡ ፍቅሩ፨
- ሰላም፡ ለኪ፡ አርሴማ፡ ባሕርይ፨
- ለነፍሰ፡ ኵሉ፡ ምስካይ፨
- ከማኪ፡ አልቦ፡ እምታሕተ፡ ሰማይ፨
- በሥን፡ ወበላሕይ፨
- ሰላም፡ ለኪ፡ ሶበ፡ መተሩ፡ ክሳዳ፨
- ለስምዐ፡ ኵነኔ፡ በዐውዳ፨
- ደም፡ ውሕዘ፡ ወሐሊብ፡ ፀዓዳ፨
- ምዕዝት፡ እምጽጌ፡ ረዳ፨
- ሰላም፡ ለኪ፡ መጠነ፡ አማኅኩኪ፡ ሊተ፡ አርሴማ፡ እምየ፨
- ልበ፡ መዋቲ፡ ዘኢሐለየ፨
- ወዐይነ፡ ሰብእ፡ ዘኢርእየ፨
- ለፍቁርኪ፡ ዘድንግል፡ ድልዊ፡ ዐስብየ፨

መልክአ፡ አርሴማ፡ Malkəʾa ʾArsemā

Image of Hripsime

Subject