Subjects
Righteous
ዜና፡ ማርያም፡
Zenā Māryām
Zenā Māryām
Zenā Māryām
Zenā Māryām
Malkəʾ
-
- ሰላም፡ ለዝክረ፡ ስምኪ፡ እንተ፡ አልዐሎ፡ ፈጣሪ፨
- በሞገስ፡ ወክብር፡ እምስመ፡ አዋልድ፡ ዘቤተ፡ ኔሪ፨
- ዜና፡ ማርያም፡ ብፅዕት፡ ማኅሌትየ፡ ሰመሪ፨
- ወምስሌኪ፡ ይኩን፡ ንብረትየ፡ ከመ፡ ይሄሉ፡ ነባሪ፨
- አመ፡ እምስፍሐ፡ ባሕር፡ ግሩም፡ ይሠዓር፡ አንበሪ፨
-
- ሰላም፡ ለሥዕርተ፡ ርእስኪ፡ ዘየዓውዶ፡ ሱራሔ፨
- ይምዕዝ፡ ጥቀ፡ እመዓዛ፡ ሰሒን፡ ወጼና፡ ርኄ፨
- ዜና፡ ማርያም፡ ርግብ፡ ዘተአፀፍኪ፡ የዋሄ፨
- ተበጽዐ፡ ድንግልናኪ፡ ወተሰብሐ፡ ስባሔ፨
- ከመ፡ ወለቱ፡ ድንግልተ፡ ሥጋ፡ ለመስፍን፡ ዮፍታሔ፨
-
- ሰላም፡ ለርእስኪ፡ አክሊለ፡ ብርሃን፡ ፀዓዳ፨
- ዘይኬልሎ፡ አምላክ፡ በዕለተ፡ ደይን፡ ወፍዳ፨
- ዜና፡ ማርያም፡ እምነ፡ ንጽሕተ፡ ምግባር፡ እምነውረ፡ ዕዳ፨
- ይትፌሣሕ፡ ጴጥሮስ፡ በጽድቅኪ፡ መምህረ፡ ሮሜ፡ ወሳይዳ፨
- ወይትሐሠይ፡ በገድልኪ፡ ጊዎርጊስ፡ ዘልዳ፨
-
- ሰላም፡ ለገጽኪ፡ በደኅራዊ፡ ትንሣኤ፨
- ዘይፀድል፡ ጥቀ፡ አምሳለ፡ ብርሃናት፡ ክልኤ፤
- ዜና፡ ማርያም፡ ይኵነኒ፡ ኀይለ፡ ዚአኪ፡ ረዳኤ፨
- ላዕሌየ፡ ሶበ፡ ተንሥኣ፡ ወአፈድፈዱ፤ ውዋኤ፨
- አርእስተ፡ አርዌ፡ ግሩም፡ ፍቅሮም፡ ሱባዔ፨
-
- ሰላም፡ ለቀራንብትኪ፡ አመተ፡ ገድል፡ እስከ፡ ፈጸማ።
- ዘኢፈተወ፡ ድቃስ፡ እምግብረ፡ ድካም፡ ወፃማ፨
- ዜና፡ ማርያም፡ ሥርጉት፡ ዐሠርጐ፡ ቅዱሳን፡ አስኬማ፨
- ብክይ፡ ለደቂቅኪ፡ ቅድመ፡ ገጸ፡ አምላክ፡ ፌማ፨
- ከመ፡ ራኄል፡ ለደቂቃ፡ በከየት፡ በራማ፨
-
- ሰላም፡ ለአዕይንትኪ፡ እለ፡ ርእያ፡ በበጾታ፨
- ስነ፡ ሱራሬሃ፡ ለቤት፡ በእመተ፡ መልአክ፡ መስፈርታ።
- ዜና፡ ማርያም፡ ንዝሕት፡ በደመ፡ መድኃኒት፡ በጎልጎታ፨
- ኢተዓቅፉ፡ እለ፡ ነጸሩ፡ ለዕለትኪ፡ ፍኖታ፨
- አምጣነ፡ አሥር፡ ወክልኤ፡ ሰዓታ።
-
- ሰላም፡ ለአእዛንኪ፡ ለብስራተ፡ ሕይወት፡ ዘተዳለዋ፤
- አኮ፡ አኮ፡ ለብሥራተ፡ ሕይወት፡ አምሳለ፡ ሔዋ፤
- ዜና፡ ማርያም፡ ዜናኪ፡ ኀበ፡ መጻሕፍት፡ ዜነዋ፤
- በሐሊበ፡ እሙ፡ ከመ፡ ይትፌሣሕ፡ ጣዕዋ፨
- ልቡና፡ ጊዮርጊስ፡ መስተ፡ ጋድለንፈርአፀ፡ ናአዋ፤
-
- ሰላም፡ ለመላትሕኪ፡ ቃላተ፡ ወንጌል፡ በልባዌ፨
- ሜላተ፡ ኣንብዕ፡ ውዑየ፡ እለ፡ ረሰየ፡ ሥርጋዌ፤
- ዜና፡ ማርያም፡ ህሉት፡ ውስተ፡ ሕፅነ፡ አብርሃም፡ በህላዌ፨
- አልአዛር፡ አጥባትኪ፡ ተወከፌ፡ ሕማም፡ ወደዌ፨
- እምዋዕየ፡ እሳት፡ ያጥልለኒ፡ ለጊጉይ፡ ነዌ፨
-
- ሰላም፡ ለአእናፍኪ፡ ዘአፄነዋ፡ በውዳሴ፡
- መዓዛ፡ መሥዋዕት፡ ፍጹመ፡ ውስተ፡ ጸርሐ፡ ቅድስት፡ ሥላሴ፤
- ዜና፡ ማርያም፡ ሰብኪ፡ ስቃየ፡ ሲኦል፡ ለሕዝበ፡ ራምሴ፨
- ኢይበል፡ ቃለ፡ ዚአኪ፡ እስከ፡ ይመጽእ፡ ድምሳሴ፨
- መጽሐፈ፡ ነቢያት፡ ቦሙ፡ በኦሪት፡ ዘሙሴ፨
-
- ሰላም፡ ለከናፍርኪ፡ እምነቢበ፡ ጸሎት፤ ዘኢተዐርቃ፤
- በውሣጤ፡ በዐት፡ ቅድስት። አዕዳወ፡ ጻድቃን፡ ዘጸደቃ፨
- ዜና፡ ማርያም፡ ምግብኪ፡ ምግበ፡ ይስሐቅ፡ ትምህርተ፡ ርብቃ፨
- ምስለ፡ አጋር፡ ደብረ፡ ሲና፡ ሥርጉተ፡ አውሎ፡ ወጣቃ፨
- ለኢሩሳም፡ አግአዚት፡ አቅነየት፡ ደቂቃ፨
-
- ሰላም፡ ለአፉኪ፡ ዘአምሐ፡ በጥያቄ፨
- ለመስቀለ፡ አምላክ፡ ዘቆመ፡ ድኅሬኪ፡ በኢኑፋቄ፨
- ዜና፡ ማርያም፡ እምየ፡ እስእለኪ፡ በጥንቃቄ፡
- ሥውርኒ፡ በአክናፍኪ፡ እምሐሩረ፡ ዓቢይ፡ መርቄ፨
- ከመ፡ ዕጐሊሁ፡ ይሠውር፡ ክንፈ፡ ንስር፡ ወአንቄ፨
-
- ሰላም፡ ለአስናንኪ፡ ፅዕድዋተ፡ እለ፡ ኮና፨
- አምሳለ፡ በረድ፡ ዘዘንመ፡ ለሰሎሞን፡ በደብረ፡ ሲና፨
- ዜና፡ ማርያም፡ ንጽሕት፡ ዜና፡ ማርያም፡ ልዕልተ፡ ዜና፨
- ሰአሊ፡ በእንቲአየ፡ ኀበ፡ አምላክ፡ ጽድቅ፡ ዳሕና፨
- አመ፡ እምኵራዜ፡ በድን፡ ትሔይሰከ፡ ሲዶና፨
-
- ሰላም፡ ለልሳንኪ፡ አመታተ፡ ገድል፡ ወምናኔ፤
- አንብቦተ፡ ጸሎት፡ ዘትጽሕቅ፡ እንበለ፡ ውሳኔ፤
- ዜና፡ ወልድኪ፡ ከመ፡ ኢይርአይ፡ ክነኔ፤
- ያሩጸኒ፡ በፍና፡ ገድል፡ እንተ፡ ዘአልቦቱ፡ ትንታኔ፨
- ዕፍረተ፡ አልባስጥሮስ፡ ዘይጼኑ፡ ፍቅርኪ፡ ከልበኔ፨
-
- ሰላም፡ ለቃልኪ፡ ዘኢነአበ፡ ዓመፃ፤
- እምድምፀ፡ ዚአሁ፡ ዘይሔይስ፡ ለመሰንቆ፡ ዳዊት፡ እምነ፡ ድምፃ፨
- ዜና፡ እምየ፡ ለቤተ፡ ሕግኪ፡ ሠናይተ፡ ሕንጻ፤
- ተንሥኢ፡ ቅድመ፡ ገጽየ፡ ከመ፡ ታርኅዊ፡ አንቀፃ፨
- እስመ፡ ቤተ፡ ዚአየ፡ ዚአየ፡ ንሕለ፡ ዘኅኑጽ፡ በኆፃ፨
-
- ሰላም፡ ለእስትንፋስኪ፡ እንተ፡ ዘአልቦቱ፡ ኑታጌ፨
- እምነ፡ እፍረት፡ ወጼና፡ ጽጌ፤
- ዜና፡ እኅቶሙ፡ ለደቂቀ፡ ወንጌል፡ ዘአኔርጌ፤
- ትፍሥሕተ፡ ዓለም፡ እንዘ፡ ይከውን፡ ኀዳጌ፤
- አንፈርአፀ፡ በገድልኪ፡ ልቦናየ፡ ኀርጌ፨
-
- ሰላም፡ ለጉርዔኪ፡ በአብሠርቀ፡ ዕለት፡ ዘይሰቲ፤
- ማየ፡ ዕፅ፡ መሪረ፡ በዐፀደ፡ ዓለም፡ ዛቲ፨
- ዜና፡ ንሥእኒ፡ አስራተ፡ ሕይወት፡ ለመዋቲ፨
- እንዘ፡ ይነሥኡ፡ እምነ፡ አዕማት፡ ክልኤቲ፨
- አመ፡ ውስተ፡ ማኅረፅ፡ ለሞት፡ ትተርፍ፡ አሐቲ፨
-
- ሰላም፡ ለክሳድኪ፡ ዘሠርጐ፡ ጸጋሁ፡ ፍሉጥ፤
- እምሠርጎ፡ ባዝግና፨ ምድራዊ፡ ብዙሐ፡ ሐሳብ፡ ወሤጥ፤
- ዜና፡ ፍቅርኪ፡ እንተ፡ ይትበደር፡ እምቁስጥ፨
- ነፀርኪ፡ ዓለመ፡ ሥጋ፡ በዓይነ፡ ሕሊና፡ ዘውስጥ፤
- ከመ፡ ድኅሬሃ፡ ነጸረት፡ ብእሲቱ፡ ለሎጥ፨
-
- ሰላም፡ ለመትከፍትኪ፡ ፍጹመ፡ እለ፡ ተግሕሳ፨
- ለጸዊረ፡ ጌጋይ፡ ወአበሳ፤
- ዜና፡ እምየ፡ ለዕለተ፡ ግሩ፡ ኀሠሣ፤
- ዕቀብኒ፡ ለበግዕኪ፡ ምስለ፡ ካልዓ፡ እንስሳ፤
- ከመ፡ ኢይምስጠኒ፡ ሊተ፡ ገሃነም፡ አበሳ።
-
- ሰላም፡ ለዘባንኪ፡ ዘአፈድፈደ፡ ጥብጣቤ፤
- እምኣዕፁቀ፡ ዕፅ፡ ብዙኅ፡ መጽሐፈ፡ ገድልኪ፡ አርአያ፡ ይቤ፨
- ዜና፡ ማርያም፡ ጽድልት፡ ዕንቈ፡ ባሕርይ፡ ክርስቲሎቤ፨
- ኣድኅንኒ፡ በጸሎትኪ፡ ጊዜ፡ ይመጽእ፡ ምንዳቤ፨
- እስመ፡ ጋዳ፡ ዚአኪ፡ ዘንተ፡ አቅረብኩ፡ ይባቤ፨
-
- ሰላም፡ ለዕንግድዓኪ፡ በውሣጤ፡ በዓት፡ ዘውቅሮ፨
- ሱራሔ፡ መለኮት፡ ዘይሠውሮ፨
- ዜና፡ ማርያም፡ ኪያየ፡ ለእግዚአብሔር፡ በአዘክሮ፨
- በልዮ፡ አድክም፡ ጸላኢሁ፡ ዘበዓይነ፡ ቅንዓት፡ ነጸሮ፨
- እስመ፡ ድካም፡ ተአምር፡ ወትጠየቅ፡ ግብሮ፤
-
- ሰላም፡ ለሕፅንኪ፡ ጠለ፡ ባረኮት፡ ወጸጋ፨
- በአምሳለ፡ ፀምር፡ ዲቤሁ፡ ዘወረደ፡ እንበለ፡ ንትጋ፨
- ዜና፡ ማርያም፡ ብፅዕት፡ በአፈ፡ ኅሩያን፡ እንግልጋ፨
- ሕፅንኒ፡ በሕፃንኪ፡ ለወንጌለ፡ ጽፍቅ፡ በሕጋ፤
- አኮ፡ ከመ፡ ተወልዱ፡ ዘበደም፡ በሥጋ፨
-
- ሰላም፡ ለአዕዳውኪ፡ አልባሰ፡ ንዴት፡ ዘተገልበባ፤
- ልብሰ፡ ክብር፡ አኮ፡ እምጢሮስ፡ ወምድረ፡ ሰባ፨
- ዜና፡ ማርያም፡ ስድኒ፡ አመሖርኪ፡ ውስተ፡ መርኅባ፨
- ተንሥኢ፡ በፍና፡ ለርክ፡ ለመንግሥተ፡ ሰማይ፡ መዝገባ፨
- ምስለ፡ እለ፡ ፆሩ፡ ለዕለት፡ ላህባ፨
-
- ሰላም፡ ለመዛርዕኪ፡ ውስተ፡ ቤተ፡ ጸሎት፡ መጥባቢ፤
- እለ፡ ስፉሐት፡ ኮና፡ ከመ፡ ዓምደ፡ ብርት፡ ግብረ፡ ነሀቢ፨
- ዜና፡ ማርያም፡ ኪያዬ፡ እሞተ፡ ሙስና፡ ዕቀቢ።
- እምደ፡ ነሣኢ፡ ከመ፡ ይትወፈይ፡ ወሀቢ፨
- ወእምንባቡ፡ ያርምም፡ ነባቢ።
-
- ሰላም፡ ለኵርናዕኪ፡ በመስማከ፡ ተድላ፤ ምድራዊ፤
- ዘኢያስመከ፡ ንስቲተ፡ ከመ፡ ይዜኑ፡ ዜናዊ፨
- ዜና፡ ማርያም፡ ሰአሊ፡ እምቅሠፍተ፡ ፈያት፡ ሰብኣ፡ ዐላዊ፨
- ያንሥአኒ፡ እምያሪሆ፡ ወሬዛ፡ ርኅራኄ፡ ሣምራዊ፨
- እስመ፡ ካህነ፡ ሕግ፡ ኢሐወፀኒ፡ ሊላዊ፨
-
- ሰላም፡ ለእመታትሕኪ፡ በሀገረ፡ ተስፋ፡ ሉዓሌ፤
- ፆታ፡ ህላዌሁ፡ ዘይሰፍር፡ ለማሕፈደ፡ ዕንቍ፡ ኅብረ፡ ቢረሌ፤
- ዜና፡ ማርያም፡ አዝልፊ፡ በእንቲአየ፡ ትንባሌ፨
- ከመ፡ እክሀል፡ እምፅንዓ፡ ኃይሉ፡ ለመልአከ፡ ኃዘን፡ ወወይሌ፨
- እስመ፡ እምትካት፡ ኮነ፡ ነፍሰ፡ ሰብእ፡ ቀታሌ፨
-
- ሰላም፡ ለእራኃትኪ፡ እንተ፡ አዝለፋ፡ ተሰፍሖ፤
- ለሀገረ፡ ሰማይ፡ ልዕልት፡ መስቀለ፡ መድኃኒት፡ በተአምሖ፨
- ዜና፡ ማርያም፡ ብፅዕት፡ በምሂክ፡ ወተራኅርኆ፤
- ቃልኪ፡ ለልብየ፡ እስከ፡ የኃድግ፡ ፅራሖ፨
- ብስራተ፡ ተስፋ፡ ያስምዖ፡ እንዘ፡ ይብል፡ ኦሆ፨
-
- ሰላም፡ ለመቃብርኪ፡ እንተ፡ ይትሌዐል፡ ሥርዐታ፨
- እመቃብርሃ፡ ለራሄል፡ በምርዋፀ፡ ፈረስ፡ ዘኤፍራታ፨
- ዜና፡ ማርያም፡ ብፅዕት፡ ለዕለተ፡ ደይን፡ ዘዕብሬታ፨
- ብክዪ፡ በእንቲአየ፡ ኢይርከበኒ፡ ሐተታ፨
- አርአያ፡ በከየት፡ ቅድመ፡ ቅድሜሁ፡ ማርታ፨
-
- በዝንቱ፡ ማሕሌተ፡ ስምኪ፡ ሶበ፡ ይስእል፡ ወጸሊ፨
- ውስተ፡ ቤትኪ፡ ብእሲ፡ እንዘ፡ ይገይሰ፡ ያሌሊ፨
- ዜና፡ ማርያም፡ ብፅዕት፡ በእንቲአሁ፡ ሰአሊ፨
- ወአዕርጊ፡ ስእለቶ፡ ኀበ፡ አምላከ፡ ጽድቅ፡ ከሃሊ፨
- እስመ፡ ኢይፈቅድ፡ ውእቱ፡ ደመ፡ ላህም፡ ወጠሊ፨