Subjects
Prophet
ሐና፡
Ḥannā
Hanna
Hanna
Malkəʾ
-
- ሰላም፡ ለዝክረ፡ ስምኪ፡ እምዝክረ፡ ማሕሌት፡ አዳም፨
- ለሥዕርተ፡ ርእስኪ፡ ሰላም፡ ዘሕበሪሁ፡ ጸሊም፨
- እመ፡ ማርያም፡ ሐና፡ ሕይወተ፡ ኵሉ፡ ዓለም፨
- ብኪ፡ ተሣረሩ፡ እለ፡ ዘሥጋ፡ ወደም፨
- ወመላእክት፡ ዘልዑል፡ አርያም፨
-
- ሰላም፡ ለርእስኪ፡ ወለገጽኪ፡ ጎህ፨
- ለቀራንብትኪ፡ ሰላም፡ ወለአዕይንትኪ፡ ብሩህ፨
- አድኅንኒ፡ ሐና፡ እምኀዘነ፡ ወወይሌ፡ ወላህ፨
- ከመ፡ ድኀነ፡ በእንቲአኪ፡ እምሰርመ፡ አበሳ፡ ወአይኀ፨
- ምእመን፡ ምስለ፡ ደቂቁ፡ ወጻድቅ፡ ኖኅ፨
-
- ሰላም ለአእዛንኪ፡ ወለመላትሕኪ፡ በአምኆ፨
- ለአእናፍኪ፡ ሰላም፡ ወለከናፍርኪ፡ በስብሖ፨
- እመ፡ ማርያም፡ ሐና፡ ኢይምጽአኒ፡ ሰይፈ አይኆ፨
- ፀርየሰ፡ ለእመ፡ ሐነፀ፡ በሰማይ፡ ጽርሖ፨
- በህየ፡ ፍጡነ፡ ሰይፈ፡ ሞት፡ ይንጽሖ፨
-
- ሰላም፡ ለአፉኪ፡ ወለአስናንኪ፡ ዕብነ፡ በረድ፨
- ለልሳንኪ፡ ሰላም፡ ወለቃልኪ፡ መርዕድ፨
- ለእስትንፋስኪ፡ ወለጕርዔኪ፡ ወለዘዚአኪ ከሣድ፨
- ከመ፡ ታርእዪኒ፡ ሐና፡ ኀልፈተ፡ ፀርየ፡ አብድ፨
- ናሁ፡ እፀንሐኪ፡ በዝንቱ፡ ዓፀድ፨
-
- ሰላም፡ ለመታክፍትኪ፡ መንጦላዕተ፡ ዘባን፡ ዘተዋሐዳ፨
- ለእንግድዓኪ፡ ረቅ፡ ወለሕጽንኪ፡ ሰሌዳ፨
- መጽሐፈ፡ ሕይወት፡ ሐና፡ ወእመ፡ ማርያም፡ ሳይዳ፨
- ይደምሰሱ፡ ፀረ፡ ዚአየ፡ ወኢይትርፉ ለፍዳ፨
- ከመ፡ ተደምስሰ፡ ወልዳ፡ ኃጕል፡ ይሁዳ፨
-
- ሰላም፡ ለአእዳውኪ፡ ዘምስለ፡ መዘርእ፡ ወኵርናዕ፨
- ለእመታትኪ፡ ሰላም፡ ወለእራኃትኪ፡ አርባዕ፨
- እመ፡ ማርያም፡ ሐና፡ ወእምሔውተ፡ ክርስቶስ፡ እግዚእ፨
- ይሀኃጐሉ፡ ፀረ፡ ዚአየ፡ በናተ፡ አምላክ፡ ኅቡእ፨
- በከመ፡ ተኃጕለ፡ ቅድመ፡ ኤግሎም፡ ረሲዕ፨
-
- ሰላም፡ ለአፃብዕኪ፡ ፅዕዳዌ፡ አጽፋር፡ ዘገልበቦ፨
- ለአጥባትኪ፡ ሰላም፡ ወለዘዚአኪ፡ ገቦ፨
- ዕበያትኪ፡ ሐና፡ ዕፁብ፡ ለተናብቦ፨
- መቅሠፍተ፡ ምንዳቤ፡ ይንሣእ፡ ፀረ፡ ዚአየ፡ አስቦ፨
- ለአርዌ፡ ርጉም፡ ይትበሀል፡ ዘነቦ፨
-
- ሰላም፡ ለከርሥኪ፡ ወለልብኪ ይደሉ፨
- ለአማዑትኪ፡ ሰላም፡ ወለንዋየ ውስጥኪ፡ ኵሉ፨
- ለህሊናኪ፡ ሐና፡ ዘኢይትረከብ አምሳሉ፨
- ብኪ፡ ይትሜክሑ፡ ወብኪ፡ ያጸሉ፨
- ፍጥረታት፡ ዘታሕቱ፡ ወፍጥረታት፡ ዘላዕሉ፨
-
- ሰላም፡ ለኀንብርትኪ፡ ወለማኀፀንኪ፡ ቡሩክ፨
- ለአቍያጽኪ፡ ሰላም፡ ዘምስለ፡ አብራክ፨
- እመ፡ ማርያም፡ ሐና፡ ወእምሔውተ፡ ክርስቶስ፡ አምላክ፨
- ለእመ፡ ይፀብዑኒ፡ በጽባሕ፡ ወሠርክ፨
- ፍኖተ፡ ዐርየ፡ ዕዕዊ፡ በሦክ፨
-
- ሰላም፡ ለአእጋርኪ፡ ወለሰከናኪ፡ ወትረ፨
- ለመከየድኪ፡ ሰላም፡ ወለአፃብዕኪ፡ ዘተሠርገዋ፡ አጽፋረ፨
- እመ፡ ማርያም፡ ሐና፡ እስእለኪ፡ ነገረ፨
- እስከ፡ ማእዜኑ፡ እግዚእትየ፡ እሄሉ፡ ኀቡረ፨
- ምስለ፡ እለ፡ ይጸልዑ፡ ሰብእ፡ ሰላም፡ ወፍቅረ፨
-
- ሰላም፡ ለቆምኪ እንበለ፡ ሕፀዕ፡ ወንትጋ፨
- ለመልክእኪ፡ ሰላም፡ ወለፀአተ፡ ነፍስኪ፡ ምስለ፡ በድነ፡ ሥጋ፨
- እመ፡ ማርያም፡ ሐና፡ ወእምሔውተ፡ ክርስቶስ፡ ቀዳሜ፡ ጸጋ፨
- ይትዐሠር፡ ልሳነ፡ ፀርየ፡ ዘከመነ፡ መንሱት፡ ወጹጋ፨
- በሰናስል፡ ጽኑዕ፡ ወበድሩክ፡ ጋጋ፨
-
- ሰላም፡ ለግንዘተ ሥጋኪ፡ በአልባስ፡ ሜላት፡ ኢማሳኒ፨
- ለመቃብርኪ፡ ሰላም፡ ውስተ፡ ርስተ፡ አቡኪ፡ ምድረ፡ ዮፎኒ፨
- እመ፡ ማርያም፡ ሐና፡ ወእምሔውተ፡ ክርስቶስ፡ መድኃኒ፨
- ባሕቱ፡ ለንስሐ፡ ንስቲተ፡ አጽንሕኒ፨
-
- አኮ፡ አኮ፡ በአብዝኆ፡ ነገር፡ ወተርጕሞ፡
- አላ፡ ኀዳጠ፡ ወደስኩኪ፡ በኢያርምሞ፨
- ሐና፡ ግበሪ፡ ለልብየ፡ ዘይኤድሞ፨
- እመ፡ ሰፍሐ፡ አዕፁቂሁ፡ ወለእመ፡ አንኅ፡ ቆሞ፨
- ለጕንደ፡ ፀርየ፡ ሰይፈ፡ ሞት፡ ይግዝሞ፨
-
- ስብሐት፡ ይደሉ፡ ለማርያም፡ በሰጊድ፡ ወዝማሬ፨
- ዘምስለ፡ ፪ሆን፡ በኁባሬ፨
- እመ፡ ማርያም፡ ሐና፡ ዕንቈ፡ ሶም፡ ወወራውሬ፨
- ይደምሰሱ፡ ፀረ፡ ዚአየ፡ ወኢይትርፉ፡ ለፍሬ፨
- ከመ፡ ተደምሰሱ፡ ደቂቁ፡ ለቆሬ፨