Details
- ማስገቢያ፡
-
- እወጥን፡ አንሰ፡ ለውዳሴ፡ መልክእኪ፡ በተላጽቆ፨
- እምብዙኅ፡ ወፍድፉድ፡ ንስቲተ፡ ለአጠይቆ፨
- መዐዛ፡ ጴጥሮስ፡ ማርያም፡ ዕፍረተ፡ ጳውሎስ፡ ዘደማስቆ፨
- ረስይኒ፡ እግዝእትየ፡ ለውዳሴኪ፡ መሰንቆ፨
- ምስለ፡ ሐዋርያት፡ እሕሊ፡ ወእዜኑ፡ ጽድቆ፨
-
- ሰላም፡ ለዝክረ፡ ስምኪ፡ አምሳለ፡ ስቴ፡ ወይን፡ መጥለሊ፨
- ወለሥዕርትኪ፡ ስኑያት፡ እምጽሕደተ፡ ሜላት፡ ግብረ፡ ፈታሊ፨
- ማርያም፡ ድንግል፡ መራኁተ፡ ጴጥሮስ፡ ቢጸ፡ ጳውሊ፨
- አርኅዊ፡ ማዕፆ፡ ልብየ፡ በረድኤትኪ፡ ከሃሊ፨
- ከመ፡ አሳፍ፡ ወኤማን፡ ማሕሌተኪ፡ እሕሊ፨
-
- ሰላም፡ ለርእስኪ፡ ወለገጽኪ፡ ጽጌ፡ ረዳ፨
- ለቀራንብትኪ፡ ሰላም፡ ወለአዕይንትኪ፡ ቤዘ፡ መርሙዳ፨
- ጽንዐ፡ ስብከቱ፡ ማርያም፡ ለእንድርያስ፡ መምህረ፡ ልዳ፨
- አጽንዒ፡ በረድኤትኪ፡ ለሥርወ፡ ሕይወትየ፡ ድዳ፨
- ኢያንቀልቅልዋ፡ ነፋሳት፡ ጊዜ፡ ነፍሑ፡ ዐውዳ፨
-
- ሰላም፡ ለፀአተ፡ ነፍስኪ፡ ወለበድነ፡ ሥጋኪ፡ ማኅፈዳ፨
- ለግንዘትኪ፡ ወዝኅርኪ፡ ወለፍልሰትኪ፡ ፈዳዬ፡ ዕዳ፨
- ክብረ፡ ማትያስ፡ ማርያም፡ ዘተሠይመ፡ ድኅረ፡ ይሁዳ፨
- በኍልቈ፡ አዕናቍ፡ እለ፡ ተሰክዓ፡ ውስተ፡ ልብሰ፡ ክህነት፡ እንግዳ፨
- ተወከፊ፡ ማሕሌትየ፡ ዘአባእኩ፡ ጋዳ፨
- ተረፈ፡ መልክእ፡
-
- ስብሐት፡ ለኪ፡ ማርያም፡ በአፈ፡ ኵሉ፡ ዘሥጋ፨
- ስብሐት፡ ለኪ፡ ማርያም፡ በአፈ፡ መላእክት፡ እንበለ፡ ንትጋ፨
- ስብሐት፡ ለኪ፡ ማርያም፡ ለደብተራ፡ ስምዕ፡ ታቦተ፡ ሕጋ፨
- ስብሐት፡ ለኪ፡ ማርያም፡ በውስተ፡ ዛቲ፡ እንግልጋ፨
- ከመ፡ ሠርጐ፡ ሜላት፡ ይኩነኒ፡ ዘዚአኪ፡ ጸጋ፨
-
- አምኃ፡ ሰላም፡ አቅረብኩ፡ ለመልክእኪ፡ በበ፡ ፍቅዱ፨
- እንዘ፡ አቄርብ፡ ስብሐታተ፡ ወእሰግድ፡ ለለ፡ አሐዱ፨
- ማርያም፡ ድንግል፡ ለዳዊት፡ ወለተ፡ ወልዱ፨
- ገብርኪ፡ ቅሩፀ፡ ክንፍ፡ በሐመረ፡ ንጽሕኪ፡ እእዱ፨
- ለባሕረ፡ እሳት፡ ግሩመ፡ ዘመፍርህ፡ ሞገዱ፨