Details
Other Titles
-
መልክአ፡ ጽዮን፡ ካልኣይ፡
Malkəʾa Ṣəyon Kāləʾāy
Second Image of Sion
-
- ሰላም፡ ለዝክረ፡ ስምኪ፡ ስመ፡ ዕበይ፡ ወተልዕሎ፨
- ዘያጸድቆ፡ ለኃጥእ፡ ሶበ፡ ይጼውዐኪ፡ በተወክሎ፨
- ማርያም፡ ጽዮን፡ ታቦተ፡ ቀዳሚት፡ ሴሎ፨
- ለስምኪ፡ ቅዱስ፡ በውሑድ፡ ተንብሎ፨
- ናሁ፡ ወጠንኩ፡ ሰላመ፡ እብሎ
-
- ሰላም፡ ሰላም፡ ለዝክረ፡ ስምኪ፡ ሐመር፨
- ዘአዕደወ፡ ዓለመ፡ እምቀላየ፡ ጻማ፡ ወጻዕር፨
- ማርያም፡ ጽዮን፡ ልዕልተ፡ ስም፡ ወዝክር፨
- ይገንዩ፡ ለዕበይኪ፡ ተዐይነ፡ ሰማይ፡ ወምድር፨
- እስመ፡ ወለድኪዮ፡ ለእግዚኦሙ፡ በመንክር፡ ምስጢር፨
-
- ሰላም፡ ለርእስኪ፡ ቅብአ፡ ቅድስና፡ መንክር፨
- ዘተቀብአ፡ ቅድመ፡ በእደ፡ እግዚአብሔር፨
- ታቦተ፡ መድኃኒት፡ ጽዮን፡ ወመርገመ፡ አረፍት፡ ዘሰናኦር፨
- ላዕሌኪ፡ አመ፡ ተጽሕፈ፡ ፊደለ፡ ህላዌ፡ ክቡር፨
- ብልጣሶር፡ ሰይጣን፡ ተቀትለ፡ በምዕር፨
-
- ሰላም፡ ለክሳድኪ፡ ዘአነቀ፡ ቃማ፡ ብፅዓን፨
- በአፈ፡ ንጉሥ፡ ሰሎሞን፨
- ታቦተ፡ መድኃኒት፡ ጽዮን፡ ነገደ፡ ካልኣን፨
- አመ፡ ፄወዉኪ፡ በግበ፡ ኤሊ፡ ካህን፨
- ተቀጥቀጠ፡ ቤል፡ ወወድቀ፡ ዳጎን፨
-
- ሰላም፡ ለአጥባትኪ፡ እለ፡ አውሐዛ፡ ሐሊበ፨
- አመ፡ ወለድኪ፡ ወልደ፡ እንበለ፡ ታእምሪ፡ ሰብሳበ፨
- ማርያም፡ ልብየ፡ በሐብለ፡ ፍቅርኪ፡ ተስሕበ፨
- መኑ፡ ከማኪ፡ ጽዮን፡ እምትውልደ፡ አንስት፡ ተረክበ፨
- በድንግልና፡ ዘአጥበወ፡ ጥበ፨
-
- ሰላም፡ ለኅሊናኪ፡ ኅአልዮ፡ ርኅራኄ፡ ልማዱ፨
- ለኵሉ፡ ፍጥረት፡ በበ፡ ዘመዱ፨
- ማርያም፡ ጽዮን፡ ለእግዚአብሔር፡ ማኅፈዱ፨
- እስመ፡ ኀደረ፡ ላዕሌኪ፡ እምነ፡ ሥልስቱ፡ አሐዱ፨
- ዕድዋኒሃ፡ ለነፍስ፡ ደንገፁ፡ ወርዕዱ፨
-
- ሰላም፡ ለንዋየ፡ ውስጥኪ፡ አምሳለ፡ ቀዳሚት፡ ሀይከል፨
- ዘይጼልል፡ ባቲ፡ መንፈስ፡ ቅዱስ፡ ምሥሃል፨
- ማርያም፡ ጽዮን፡ ታቦተ፡ ሕጉ፡ ለልዑል፨
- አመ፡ ተሥዕለ፡ ላዕሌኪ፡ ፊደለ፡ ባሕርዩ፡ ለቃል፨
- እምዓለም፡ ሰሰለ፡ ምንሳዌ፡ ወሐጕል፨
-
- ሰላም፡ ለትንሣኤኪ፡ በኀይለ፡ ወልድኪ፡ ኢመዋቲ፨
- እምነ፡ ሙታን፡ ተንሣእኪ፡ እምድኅረ፡ ዕለታት፡ ክልኤቲ፨
- ዐጽቀ፡ መድኃኒት፡ ጽዮን፡ ዘሠረፅኪ፡ እምጕንደ፡ ማቲ፨
- ኢይትዔረይዋ፡ ዘንተ፡ ለክብረ፡ ትንሣኤኪ፡ ዛቲ፨
- ትንሣኤ፡ ምዉት፡ ዘቢታንያ፡ ወወለት፡ አሐቲ፨
-
- ሰላም፡ ለዕርገትኪ፡ እምዝኅርኪ፡ ሊቶስጥራ፨
- አመ፡ ዕርገትኪ፡ ኮነ፡ ውስተ፡ ሰማያዊት፡ ደብተራ፨
- ማርያም፡ ጽዮን፡ ክልልተ፡ መዊእ፡ ጌራ፨
- ተቀበሉኪ፡ አሜሃ፡ ሥርግዋነ፡ ዕበይ፡ ሐራ፨
- እንዘ፡ ይዜምሩ፡ በሐዋዝ፡ ዕንዚራ፨
-
- ሰላም፡ ለፍልሰተ፡ ሥጋኪ፡ እምጌቴሴማኒ፡ ዔላም፨
- አመ፡ ፍልሰትኪ፡ ኮነ፡ ውስተ፡ ሰማያዊት፡ ሳሌም፨
- ማርያም፡ ጽዮን፡ ጸወነ፡ ምእመናን፡ ዘቅድም፨
- ወረዱ፡ ይትቀበሉኪ፡ ምስለ፡ አቡኪ፡ አዳም፥
- አበው፡ ቅዱሳን፡ አብርሃም፡ ወሴም፨
-
- በዝንቱ፡ ማሕሌት፡ ኀቤኪ፡ ዘሰአለ፨
- ወበኪዳንኪ፡ ዘተወከለ፨
- ማርያም፡ ለኪ፡ ከመ፡ ወልድኪ፡ መሐለ፨
- ኵሉ፡ ሰብእ፡ ውስተ፡ ዐውደ፡ ሥቃይ፡ ዘኤለ፨
- ፍጡነ፡ እምኔኪ፡ ይረክብ፡ ሣህል፨
-
- እንዘ፡ ሀሎኩ፡ በተሰዶ፡ ሶበ፡ ፍቅርኪ፡ አገበረኒ፨
- ሐለይኩ፡ ለኪ፡ ማሕሌተ፡ በቃለ፡ ሰቆቃው፡ ማኅዘኒ፨
- ማርያም፡ ጽዮን፡ ወላዲተ፡ ክርስቶስ፡ መድኃኒ፨
- እንበለ፡ ጐንድዮ፡ ዐስበ፡ ጻማየ፡ ይኩነኒ፨
- መንገለ፡ ንስሓ፡ ፍጡነ፡ ሜጥኒ፨
- ተረፈ፡ መልክእ፡
-
- ስብሐት፡ ለኪ፡ ጽዮን፡ ማርያም፡ በኍልቈ፡ ኵሉ፡ ሥዕርትየ፨
- ስብሐት፡ ለኪ፡ ጽዮን፡ ማርያም፡ በኍልቈ፡ ኵሉ፡ አዕጽምትየ፨
- ስብሐት፡ ለኪ፡ ጽዮን፡ ማርያም፡ በኍልቈ፡ ኵሉ፡ ዘተርእየ፨
- ስብሐት፡ ለኪ፡ ጽዮን፡ ማርያም፡ በኍልቈ፡ ኵሉ፡ ዘኢያስተርአየ፨
- ስብሐተ፡ ድንግልናኪ፡ ዘልፈ፡ ይነግር፡ አፉየ፨
-
- ዘኢያፈቅረኪ፡ ጽዮን፡ ማርያም፡ ውኩፈ፡ ኢይኩን፡ ጸሎቱ፨
- ይትገዘም፡ ኑኀ፡ ዓመቱ፡ ወይጥፋእ፡ በከንቱ፨
- በአፈ፡ መላእክት፡ ወሰብእ፡ ይትረገም፡ ለለ፡ ሰዓቱ፨
- ዘያስተማስሎ፡ በተውኔት፡ ለማሕሌተ፡ ንግሥኪ፡ ዝንቱ፨
- ጌጋዩ፡ ኃጢአቱ፡ ኢይትኀደግ፡ ሎቱ፨