Details
Subject
Clavis Aethiopica: 2892
CAe: 2892
MC: 4, 173 | HK: 57
Permalink: https://w3id.org/malke/2892/
Last modified:
MC: 4, 173 | HK: 57
Permalink: https://w3id.org/malke/2892/
Last modified:
-
- ሕይወተ፡ ወላዲ፡ ወወልድ፡ ወመንፈስ፡ ቅዱስ፡ ከሣቴ፡ ኅቡኣት፡ በበ፡ ጾታ፨
- ለነቢያት፡ ቅድመ፡ ወለሐዋርያት፡ ሕዝበ፡ ኤፍራታ፨
- እምዝቀ፡ ሥምረትከ፡ እቅዳሕ፡ ለእኅተ፡ ክርስቶስ፡ ወይነ፡ ማሕሌታ፨
- ይሰወጥ፡ ለልሳንየ፡ ቅድስናከ፡ ውስቴታ፨
- ወይጸልለኒ፡ እምሰምይ፡ አክናፊከ፡ መንታ፨
-
- ሰላም፡ ለዝክረ፡ ስምኪ፡ ሞገሰ፡ ሃይማኖት፡ ዘተረሰየ፨
- እንዘ፡ እምዓሠርቱ፡ ይነትግ፡ ኆኅያተ፡ ፊደል፡ ስኑየ፨
- እኅተ፡ ክርስቶስ፡ ልብኪ፡ ቀናንሞ፡ እስመ፡ ጽጌ፡ ተስፋ፡ ጸገየ፨
- ለዓለም፡ ግብረ፡ ኅልፈታ፡ ኅልፈተ፡ ጽላሎት፡ ረሰየ፨
- ወጸሙእ፡ በሕልም፡ ዘይሰቲ፡ ማየ፨
-
- ሰላም፡ ለሥዕርተ፡ ርእስኪ፡ ወለርእስኪ፡ ማኅደራ፨
- ለበዓልተ፡ ዜና፡ ጥበብ፡ ዘሕሊና፡ አብዳን፡ ኢያፈቅራ፨
- ኰናኒተ፡ ዓለም፡ አጋር፡ እኅተ፡ ክርስቶስ፡ ሳራ፨
- ህየንተ፡ ጻማኪ፡ ወትእግሥትኪ፡ መከራ፨
- ውስተ፡ ሕፅነ፡ አብርሃም፡ ወሰዱኪ፡ ትጉሃን፡ ሐራ፨
-
- ሰላም፡ ለገጽኪ፡ አመ፡ ትጠበለል፡ የብስ፨
- ዘያፈደፍድ፡ ሡራኄ፡ እምኦርያሬስ፨
- መግደላዊት፡ እምነ፡ እኅተ፡ ክርስቶስ፨
- ኮኖሙ፡ ለኅዙናን፡ ትፍሥሕተ፡ ሥጋ፡ ወነፍስ፨
- ዘከሠተ፡ ልኪ፡ ትንሣኤ፡ ሐዲስ፨
-
- ሰላም፡ ለቀራንብትኪ፡ ወለአዕይንትኪ፡ እለ፡ ኢኖማ፨
- እንዘ፡ ይተግሃ፡ ለጸሎት፡ ወያስተሐምማ፨
- እኅተ፡ ክርስቶስ፡ ማስያስ፡ ምስለ፡ ወለተ፡ ጴጥሮስ፡ ክልልተ፡ ግርማ፨
- ከመ፡ ተሐድሲ፡ ለጉባኤነ፡ ሰላማ፨
- እምሉዓሌ፡ ሰማይ፡ ሐውጺ፡ ወንዒ፡ እምራማ፨
-
- ሰላም፡ ለአእዛንኪ፡ ምክረ፡ መንፈስ፡ ቅዱስ፡ እለ፡ ተወክፋ፨
- ወለመላትሕኪ፡ አዕርፎ፡ እንተ፡ መደልዋን፡ ገደፋ፨
- ዕጣነ፡ ትንባሌ፡ አዕርጊ፡ እኅተ፡ ክርስቶስ፡ በቅድመ፡ አልፋ፨
- ይኩነኒ፡ አክሊለ፡ መዊእ፡ ወተስፋ፨
- በረከቶሙ፡ ለሳውል፡ ወኬፋ፨
-
- ሰላም፡ ለአእናፍኪ፡ እለ፡ አጼነዋ፡ መዓዛ፡ ፍቅር፨
- ወለከናፍርኪ፡ ዝጉሓት፡ በፍትሐ፡ መስቀል፡ ክቡር፨
- እኅተ፡ ክርስቶስ፡ ገነት፡ ጽጌያተ፡ ጽጌ፡ ስሙር፨
- አጽልልኒ፡ ማእከሌኪ፡ እምላህበ፡ ኵነኔ፡ መሪር፨
- ጊዜ፡ ኅልፈቶሙ፡ ለሰማይ፡ ወምድር፨
-
- ሰላም፡ ለአፉኪ፡ ወለአስናንኪ፡ እለ፡ ኢፀርሳ፨
- በቆዓ፡ ኃጢአት፡ ወአበሳ፨
- እኅተ፡ ክርስቶስ፡ በልነ፡ ለአጋብዕኪ፡ ጊዜ፡ ኃሠሣ፨
- ኢይጥኅር፡ በቅድሜክሙ፡ አምሳለ፡ ካልአን፡ እንስሳ፨
- ውስተ፡ ገዳመ፡ ደይን፡ መፍርህ፡ ዘሀሎ፡ አንበሳ፨
-
- ሰላም፡ ለልሳንኪ፡ ወለቃልኪ፡ ርሑቅ፨
- እምተናግሮ፡ ቃል፡ ከንቱ፡ ወንባበ፡ ኵሉ፡ ስላቅ፨
- ለፀሓየ፡ አሚን፡ አንቀጹ፡ እኅተ፡ ክርስቶስ፡ ምሥራቅ፨
- ይባልሀነ፡ ረድኤትኪ፡ ለመሲሐውያን፡ ደቂቅ፨
- እምጓህልዎቱ፡ ብዙኅ፡ ለሰይጣን፡ ለዕሩቅ፨
-
- ሰላም፡ ለእስትንፋስኪ፡ ወለጕርዔኪ፡ ኅሩም፨
- አፍቅሮተ፡ መብልዕ፡ ቅሱም፡ ወጣዕመ፡ ስቴ፡ ጥዑም፨
- እኅተ፡ ክርስቶስ፡ አብርሂ፡ ማእከለ፡ ጉባኤነ፡ ዮም፨
- ዋካ፡ በረከት፡ እንተ፡ ተውህቦ፡ ለሴም፨
- ድኅረ፡ ማየ፡ መዓት፡ ኃለፈ፡ ወሐልቀ፡ ዝናም፨
-
- ሰላም፡ ለክሣድኪ፡ ወለመታክፍትኪ፡ እለ፡ ጾሩ፨
- አርዑተ፡ አስኬማ፡ ቅዱስ፡ ወልዑለ፡ ልዑል፡ ዝክሩ፨
- እኅተ፡ ክርስቶስ፡ እምነ፡ ለአብ፡ ቀዳሜ፡ በኵሩ፨
- ይበላነ፡ ከናፍርኪ፡ በዓለ፡ ፍሥሐ፡ ግበሩ፨
- እስመ፡ እጽዋኒክሙ፡ አርስሳን፡ በኲናት፡ ተገምሩ፨
-
- ሰላም፡ ለዘባንኪ፡ አራዛ፡ ሱራሄ፡ ዘተሞጥሐ፨
- ዘኢያርሐቶ፡ ዓለም፡ ከመ፡ ልብሳ፡ አብዳት፡ አዋልዲሃ፨
- እኅተ፡ አሐዱ፡ አምላክ፡ እንዘ፡ ንሰምዮ፡ መሲሐ፨
- ዘትጸምዕ፡ ነፍስ፡ በፍቅርኪ፡ ትትፈቀር፡ ብዙኀ፨
- ወበረከትኪ፡ የኃድር፡ ላዕሌሃ፨
-
- ሰላም፡ ለእንግድዓኪ፡ ወለሕፅንኪ፡ አስተጋባኢ፨
- ከላስስተ፡ ጸጋ፡ ወጽድቅ፡ ዘኢይረእዮሙ፡ ዓይነ፡ ቀናዒ፨
- ሕይወተ፡ አቡሁ፡ ወርእሱ፡ እኅተ፡ ክርስቶስ፡ ተቀባዒ፨
- ቃለ፡ ስእለተነ፡ ለለአፈ፡ ጽባሕ፡ አጽምዒ፨
- ወይጽብዖ፡ ለሰይጣን፡ ኃይልኪ፡ መዋኢ፨
-
- ሰላም፡ ለአእዳውኪ፡ ወለመዛርእኪ፡ በኁባሬ፨
- እለ፡ ይሰፍሐ፡ ለበቍዔት፡ ከመ፡ ባሕለ፡ ንጹሕ፡ ፍካሬ፨
- እኅተ፡ ክርስቶስ፡ ዘንተ፡ ጸናጽለ፡ ንኡስ፡ ዝማሬ፨
- ስክዒ፡ ውስተ፡ ልብየ፡ ልብሰ፡ መንፈስ፡ ቅዱስ፡ ጶዴሬ፨
- ወአኮ፡ በጽፈ፡ ልብሱ፡ ለካህን፡ ኅሬ፨
-
- ሰላም፡ ለኵርናዕኪ፡ ወለክልኤሆን፡ እመታት፨
- ዘአስተዋድዶን፡ ፈጣሪ፡ ገባሬ፡ ኵሉ፡ ፍጥረት፨
- እኅተ፡ ክርስቶስ፡ ሐዳስ፡ ደብተራ፡ ጸሎት፨
- ሠናየ፡ መከረ፡ ሕሊናኪ፡ እምሐውዘ፡ ሐላፊ፡ ንብረት፨
- ለጸዊረ፡ ጸልቦ፡ መስቀል፡ ዘውእቱ፡ ንጼት፨
-
- ሰላም፡ ለእራኃትኪ፡ ምስለ፡ አፃብዕ፡ ዐሠርቱ፨
- ወለአጽፋርኪ፡ ቦቶን፡ እለ፡ ውዱዳት፡ እማንቱ፨
- ለወላዴ፡ ወልድ፡ ወለቱ፡ ወለተወላዲ፡ እኅቱ፨
- ይትዓየን፡ ማኅበረነ፡ ስብሐተ፡ ፍልሰትኪ፡ ዝንቱ፨
- ከመ፡ ሚካኤል፡ መልአክ፡ ዘውኩፍ፡ ስእለቱ፨
-
- ሰላም፡ ለአጥባትኪ፡ እለ፡ አንቅዓ፡ ከመ፡ ሐሊብ፨
- ፈልፈለ፡ በረከት፡ ሐዲስ፡ ትፍሥሕተ፡ ኅዙናን፡ ሕዝብ፨
- እኅተ፡ ክርስቶስ፡ ባሕርይ፡ ዘኢትፈለጥ፡ እምአብ፨
- ያንጸብርቅ፡ በኵለንታየ፡ ዘኵለንታኪ፡ ጥበብ፨
- እምስነ፡ ስንቡል፡ ኮከብ፡ ወሐሓይ፡ ልሁብ፨
-
- ሰላም፡ ለገቦኪ፡ አጽፈ፡ ምንኵስና፡ ዘተገልበበ፨
- ወለከርሥኪ፡ ዘኮነ፡ ለኅብስተ፡ ቍርባን፡ መሶበ፨
- እኅተ፡ ክርስቶስ፡ ወንጌል፡ ነባቢ፡ ከመ፡ አቅደመ፡ ንባበ፨
- ዘያስቲ፡ ማየ፡ በስምኪ፡ ወዘይሴሲ፡ ርኁበ፨
- ብእሲ፡ ምዕመነ፡ ኢየኃጕል፡ ዓስበ፨
-
- ሰላም፡ ለልብኪ፡ ወለኵልያትኪ፡ እምእከይ፨
- እለ፡ ንጹሐት፡ እማንቱ፡ ከመ፡ ኅብረ፡ ብሩር፡ ጽሩይ፨
- እኅተ፡ መለኮት፡ ቃል፡ ዋሕደ፡ ጠባይዕ፡ ባሕርይ፨
- ምሉጠ፡ ይኩን፡ ስእለተነ፡ በስእለትኪ፡ ሠናይ፨
- ኀበ፡ ማርያም፡ ድንግል፡ ዳግሚት፡ ሰማይ፨
-
- ሰላም፡ ለሕሊናኪ፡ ዘብዕዘ፡ ጽርየቱ፡ በረድ፨
- ወለአማዑትኪ፡ ውዑይ፡ በላህበ፡ ሃይማኖት፡ ነድ፨
- እመ፡ ብዙኃን፡ እኅቱ፡ ሊቀ፡ ካህናቲነ፡ ወልድ፨
- አማኅፀንኩ፡ ሕይወትየ፡ በኃይለ፡ ጸሎትኪ፡ ዓምድ፨
- እመከራሆሙ፡ ለአዝማድ፡ ወባዕድ፨
-
- ሰላም፡ ለንዋየ፡ ውስጥኪ፡ ወለኅንብርትኪ፡ አርአያ፨
- እንተ፡ ማእከለ፡ ከርሥ፡ ስራዒ፡ ኵሉ፡ ኬንያ፨
- እኅተ፡ ክርስቶስ፡ ቡርክት፡ በአፈ፡ ነቢይ፡ ወሐዋርያ፨
- ተአኵተኪ፡ እንዘ፡ ትብል፡ ጉባኤ፡ ማኅበር፡ ነያ፨
- እምአስቴር፡ ወዮዲት፡ ይትሌዓል፡ ዕበያ፨
-
- ሰላም፡ ለማኅፀንኪ፡ እንተ፡ ረስያ፡ ስርጋዌ፨
- ጸጋ፡ መንፈስ፡ ቅዱስ፡ ንጽሕና፡ ወጥበብ፡ ሰማያዌ፨
- ምስለ፡ ሰቃልያን፡ አይሁድ፡ አመ፡ ትትፋታሕ፡ ነነዌ፨
- ተአመንኩ፡ እኅተ፡ ክርስቶስ፡ ትብልናኪ፡ ማኅየዌ፨
- ከመ፡ ያብጽሐኒ፡ እምሁከት፡ ኀበቦ፡ ጽማዌ፨
-
- ሰላም፡ ለሐቌኪ፡ በአኅብሮ፡ ፪አቍያጽ፨
- እንበለ፡ ምንተኒ፡ ኅጸጽ፨
- እኅተ፡ ክርስቶስ፡ ዕቀቢ፡ እግረ፡ ልብየ፡ እምዳኅፅ፨
- ወእለበወኒ፡ አፍቅሮተ፡ አምላክ፡ ወቢጽ፨
- በዘተውኅበ፡ ለኪ፡ እምሰማይ፡ ቀኖና፡ ቅሩጽ፨
-
- ሰላም፡ ለአብራክኪ፡ እለ፡ አስተብረካ፡ ለልዑል፨
- ወለአእጋርኪ፡ ዘቆማ፡ ዲበ፡ አድማስ፡ ኃያል፨
- እኅተ፡ ክርስቶስ፡ አንክአ፡ እኅተ፡ ክርስቶስ፡ ኮል፨
- ይዜምሩ፡ ለኪ፡ በብሂል፡ ካህናተ፡ ሐዲስ፡ ወንቤል፨
- ሐፁር፡ የዓውዳ፡ ወጽጌ፡ ረዳ፡ በትእምርተ፡ መስቀል፨
-
- ሰላም፡ ለሰኳንውኪ፡ ምስለ፡ መከየድ፡ ዘተራወጹ፨
- ውስተ፡ ምድረ፡ ሥጋ፡ ወነፍስ፡ ማኅደረ፡ ትሩፋት፡ ይሕንጹ፨
- እኅተ፡ ክርስቶስ፡ ይጕየዩ፡ ለስእለትኪ፡ በድምፁ፨
- አጋንንት፡ ፀዋጋን፡ እለ፡ እምሰማያት፡ ቀነጹ፨
- ከመ፡ ኢይጽፍሩ፡ ሀብለ፡ ሞት፡ ኪያነ፡ ያዕቅጹ፨
-
- ሰላም፡ ለአፃብዓ፡ እግርኪ፡ ወለአጽፋርኪ፡ አምጣኒሆን፨
- እንተ፡ ይደምር፡ ክልኤተ፡ ዲበ፡ ኍላቌሆን፡ ሰመን፨
- እኅተ፡ ክርስቶስ፡ ለኪ፡ ሐመረ፡ ኪዳን፨
- ያስድወኒ፡ ለእሊአኪ፡ እምቀላየ፡ ግሩም፡ ደይን፨
- ኀበ፡ ማዕዶተ፡ መርስ፡ ወሠናይ፡ ዛኅን፨
-
- ሰላም፡ ለቆምኪ፡ ሐመልማለ፡ ገነት፡ አርዝ፨
- ወመልክእኪ፡ ብሩህ፡ ከመ፡ ሠርቀ፡ ቤዝ፨
- እኅተ፡ ክርስቶስ፡ በልኒ፡ በንባብኪ፡ ሐዋዝ፨
- እንዘ፡ ሕይወትከ፡ ውስተ፡ እደ፡ አምላክ፡ እኁዝ፨
- ለምንት፡ ብከ፡ ይበዝኅ፡ ትካዝ፨
-
- ሰላም፡ ለፀአተ፡ ነፍስኪ፡ ዕረፍተ፡ ኅሩያን፡ ኀበ፡ ተነጽፈ፨
- ወለበድነ፡ ሥጋኪ፡ ዕንቍ፡ እንተ፡ ያበርህ፡ ሰደፈ፨
- እኅተ፡ ክርስቶስ፡ ሀብኒ፡ መምህረ፡ ልቡና፡ መጽሐፈ፨
- ፍሬ፡ ዘሞት፡ ወአበሳ፡ እንተ፡ ያስተጋብእ፡ ዘልፈ፨
- ናሁ፡ መዋዕልየ፡ በከንቱ፡ ኃለፈ፨
-
- ሰላም፡ ለግንዘትኪ፡ አዕሩገ፡ አስቄጥስ፡ በከመ፡ ሠርዑ፨
- ወለመቃብርኪ፡ ኅኑጽ፡ ለእግዚአብሔር፡ ኀበ፡ ምስዋዑ፨
- እኅተ፡ ክርስቶስ፡ ደዪ፡ ለኪሩቤል፡ ውስተ፡ ጽዋዑ፨
- ዋለ፡ ማኅሌት፡ ለዕበይኪ፡ ያብዑ፨
- እንተ፡ ልሳንየ፡ ወአፉየ፡ ንስቲተ፡ አውሥኡ፨
-
- ለቆብዕኪ፡ አምኃ፡ ሰላም፡ ምስለ፡ አስኬማ፡ ወአጽፍ፡ ወቀሚስ፨
- ዓዲ፡ ለቅናት፡ ዘቃለ፡ አዋዲ፡ ቅዱስ፨
- ናሁ፡ አቅረብኩ፡ እኅተ፡ ክርስቶስ፨
- አንቲኒ፡ በረከተ፡ ሥጋ፡ ወነፍስ፨
- ሀብኒ፡ ለወልድኪ፡ መሌሊተ፡ ንዑስ፨
-
- ቡሩክ፡ ውእቱ፡ አምላክነ፡ ዘዓቢይ፡ ኃይሉ፨
- ወምሉዕ፡ ባሕረ፡ ሣህሉ፨
- እስመ፡ አንቅሐኒ፡ ሊተ፡ እምዝንጋዔ፡ ልማድ፡ ኵሉ፨
- እስከ፡ እፌጽም፡ ውዳሴሃ፡ ለእኅተ፡ ወልዱ፡ ወቃሉ፨
- ወአቄርብ፡ አኰቴተ፡ ለዛቲ፡ ይደሉ፨
- ተረፈ፡ መልክእ፡
-
- እኅተ፡ ክርስቶስ፡ ሥርጉት፡ ወርቀ፡ መሲሐዊት፡ አሚን፨
- አምሳለ፡ ቢሶስ፡ ትርሲተ፡ ካህን፨
- ወንጹሕ፡ ሄጶዴጤን፨
-
- ሰላም፡ ለኪ፡ በቀላየ፡ ኃፍረት፡ አስጠምኪ፡ ትዝኅርተ፡ ዲያብሎስ፡ ከይሲ፨
- አካላተ፡ ሥሉስ፡ እንዘ፡ ትቄድሲ፨
- ወእምጽድቅ፡ ኢትትገሀሲ፨
-
- ሰላም፡ ለኪ፡ እኅተ፡ ክርስቶስ፡ ትባኢ፡ ውሣጤ፡ መንጦላዕት፡ ከዋላ፨
- መነንኪያ፡ ጥቀ፡ ከመ፡ ኳሔላ፨
- ለዓለም፡ ካልእተ፡ ህላ፨
-
- ሰላም፡ ለኪ፡ በጸሎት፡ ወጾም፡ ወሰጊድ፡ ህየንተ፡ ድካምኪ፡ በዝኃ፨
- እንተ፡ ኢያስተርኢ፡ ቀርን፡ በጊዜ፡ ተነፍሐ፨
- ትትሌዓሊ፡ ደብረ፡ ፍሥሐ፨
-
- ሰላም፡ ለኪ፡ ለነፍሰ፡ አዳም፡ ነፍስኪ፡ ጊዜ፡ ተዳደቀ፡ ፍልሰት፨
- ለቀበላሃ፡ ወረዱ፡ ምስለ፡ ማኅሌት፨
- ትጉሃን፡ እምሰማያት፨
-
- ሰላም፡ ለኪ፡ ዘያስተሐቅር፡ ኪያኪ፡ እመቦ፡ እስመ፡ እምልቡና፡ ተዐርቀ፨
- ይሁዳ፡ ሰይጣን፡ ዘአፍቀረ፡ ወርቀ፨
- ይረፍቅ፡ ኀበ፡ ረፈቀ፨
-
- ሰላም፡ ለኪ፡ እኅተ፡ ክርስቶስ፡ እምነ፨
- ቀላተ፡ ማኅሌት፡ እምአፉነ፨
- ኵሎ፡ ዕለተ፡ ወኵሎ፡ ዘመነ፨
- መንገሌኪ፡ ናንቀዓዲ፡ ዐይነ፨