Malkəʾa Māryām (Image of Mary)

Malkəʾ

- ሰላም፡ ሰላም፡ ለዝክረ፡ ስምኪ፡ ሐዋዝ፨
- እምነ፡ ከልበኔ፡ ወቊስጥ፡ ወእምነ፡ ሰንበልት፡ ምዑዝ፨
- ማርያም፡ ድንግል፡ ለባሲተ፡ ዐቢይ፡ ትዕዛዝ፨
- ይስቅየኒ፡ ለለ፡ ጽባሑ፡ ወይነ፡ ፍቅርኪ፡ ዐዚዝ፨
- ከመ፡ ይሰቅዮ፡ ውሒዝ፡ ለሠናይ፡ አርዝ፨
- ሰላም፡ ለሥዕርተ፡ ርእስኪ፡ ዘተንእደ፡ ጽፍሮሁ፨
- ለአቡኪ፡ በከናፍሪሁ፨
- ማርያም፡ ድንግል፡ ለእግዚአብሔር፡ ጽርሑ፨
- ለገብርኪ፡ እግዝእትየ፡ ኢትኅድግኒ፡ እላሁ፨
- ከመ፡ ኢይበሉኒ፡ ፀር፡ አይቴኑ፡ ምክሑ፨
- ሰላም፡ ለርእስኪ፡ በቅብአ፡ ቅዳሴ፡ ርሑስ፨
- አኮ፡ አኮ፡ በቅብአ፡ ደነስ፨
- ማርያም፡ ድንግል፡ ንጽሕተ፡ ሥጋ፡ ወነፍስ፨
- ያንጽሐኒ፡ እምነ፡ ርኵስ፤ በፍሕመ፡ ቍርባኑ፡ ቅዱስ፨
- አዝዚዮ፡ ለሱራፊ፡ ዘሰማይ፡ ቀሲስ፨
- ሰላም፡ ለገጽኪ፡ ዘጥቀ፡ ይልሂ፨
- እምነ፡ ከዋክብት፡ ወወርኅ፡ ወእምነ፡ ፀሓይ፡ መብርሂ፨
- ማርያም፡ ድንግል፡ ፍናዋትየ፡ ሠርኂ፨
- በመዓልት፡ ወበሌሊት፡ ኢይርከበኒ፡ ጸናሒ፨
- መሥገርተ፡ አበሳ፡ ዘይጠፍር፡ ወግበ፡ ይደሂ፨
- ሰላም፡ ለቀራንብትኪ፡ ደመናተ፡ ብካይ፡ እለ፡ ኮና፨
- አመ፡ አሕመመ፡ ወልደኪ፡ ቅንአተ፡ ቀያፋ፡ ወሐና፨
- ማርያም፡ ድንግል፡ ለባሲተ፡ ንጽሕ፡ ወቅድስና፨
- አስምዕኒ፡ ነገረ፡ ጽድቅ፡ ዘያስተፌሥሕ፡ ሕሊና፨
- ከመ፡ አስተፍሥሐኪ፡ ጥቀ፡ ዘመልአክ፡ ዜና።፨
- ሰላም፡ ለአዕይንትኪ፡ ዘተመሰላ፡ አብያዘ፨
- እለ፡ ይፌጽማ፡ ትእዛዘ፨
- ማርያም፡ ድንግል፡ እንተ፡ ኢተአምሪ፡ ጋእዘ፨
- ናዝዝኒ፡ በንባብኪ፡ እመ፡ ልብየ፡ ተከዘ፨
- በሐብለ፡ ሰቆቃው፡ ጽኑዕ፡ ኢይኩን፡ እኁዘ፨
- ሰላም፡ ለአዕዛንኪ፡ እለ፡ ሰምዓ፡ ቃሎ፨
- እግዚአብሔር፡ እግዚእ፡ ሶበ፡ ለገብርኤል፡ ተመስሎ፨
- ማርያም፡ ድንግል፡ ጽሕቅት፡ ለተሣህሎ፨
- ሶበ፡ ለልብየ፡ እሳተ፡ ሐዘን፡ አሕለሎ፨
- ያፅምአኒ፡ እላ፡ ነገርየ፡ ኵሎ፨
- ሰላም፡ ለመላትሕኪ፡ በእሳተ፡ አንብዕ፡ እለ፡ ውዕያ፨
- ጊዜ፡ ሰቀሉ፡ በኵረኪ፡ ውሉደ፡ ራሄል፡ ወልያ፨
- ማርያም፡ ድንግል፡ ለነፍስየ፡ ደብረ፡ ምስካያ፨
- አድኅንኒ፡ እምአበ፡ ደም፡ ዘአናብስተ፡ ሐቅል፡ አርአያ፨
- ከመ፡ ማኅፈር፡ ጠቢብ፡ ወምእመን፡ ኬንያ፨
- ሰላም፡ ለአዕናፍኪ፡ መሳክወ፡ ሠናይ፡ መዐዛ፨
- ይኄይስ፡ ፈድፋደ፡ እምፄና፡ ስኂን፡ ዘጠረጴዛ፨
- ማርያም፡ ድንግል፡ ለሕይወትየ፡ ምርጉዛ፨
- ሰዋስው፡ ዘምድረ፡ ሎዛ፡ እንተ፡ ርእየኪ፡ ወሬዛ፨
- አመ፡ ዕለተ፡ ፍዳ፡ ኩንኒ፡ ቃውመ፡ ወቤዛ፨
- ሰላም፡ ለከናፍርኪ፡ ከመ፡ ፍሕሶ፡ ቀይሕ፨
- ሥርጉተ፡ ቅድሴ፡ ወንጽሕ፨
- ማርያም፡ ድንግል፡ ኆኅተ፡ ጽባሕ፨
- ባልሕኒ፡ እምነ፡ ወይሌ፡ ወአንግፍኒ፡ እምላሕ፡፨
- እስመ፡ ለልብየ፡ ሐዘኑ፡ ብዙኅ፨
- ሰላም፡ ለአፉኪ፡ ዘሰዐመ፡ ርስነ፨
- እንዘ፡ አበ፡ አእሩግ፡ ውእቱ፡ በጊዜ፡ ኮነ፡ ሕፃነ፨
- ማርያም፡ ድንግል፡ ዘትፄንዊ፡ ስኂነ፨
- ኀፍረተ፡ አበሳ፡ ሶበ፡ ገጽየ፡ ተከድነ፨
- ለናዝዞትየ፡ እሙ፡ ብጽሒ፡ ፍጡነ፨
- ሰላም፡ ለአስናንኪ፡ ሐሊበ፡ ዕጐልት፡ ዘተዛወጋ፨
- ወመራዕየ፡ ቅሩፃተ፡ እለ፡ እምሕፃብ፡ ዐርጋ፨
- ማርያም፡ ድንግል፡ ለደብተራ፡ ስምዕ፡ ታቦተ፡ ሕጋ፨
- አፍቅርኒ፡ እንበለ፡ ንትጋ፡ ለብእሴ፡ ደም፡ ወሥጋ፨
- ዘየዐቢ፡ እምዝ፡ ኢየኀሥሥ፡ ጸጋ፨
- ሰላም፡ ለልሳንኪ፡ ሙሐዘ፡ ሐሊብ፡ ወመዓር፨
- ዘተነብዮ፡ ወፍቅር፨
- ማርያም፡ ድንግል፡ ወለተ፡ ድኁኃን፡ አድባር፨
- ኅብእኒ፡ እምዐይነ፡ ፀር፡ ወአንጽሕኒ፡ እምነውር፨
- እስመ፡ ተስፋየ፡ አንቲ፡ በሰማይ፡ ወምድር፨
- ሰላም፡ ለቃልኪ፡ እምአስካለ፡ ወይን፡ ጥዑም፨
- ወእምድምፀ፡ ናብሊስ፡ አዳም፡ ዘያረስዖ፡ ለሕማም፨
- ማርያም፡ ድንግል፡ ዘብርሃነ፡ ሕይወት፡ ተቅዋም፨
- እመ፡ ተሀውከ፡ በላዕሌየ፡ ማዕበለ፡ ዝንቱ፡ ዓለም፨
- ከመ፡ ያርምም፡ ገሥፂዮ፡ መሓሪት፡ እም፨
- ሰላም፡ ለእስትንፋስኪ፡ ዘመዐዛሁ፡ ሕይወት፨
- ከመ፡ መዐዛ፡ ዕፅ፡ ኅሩይ፡ ዘውስተ፡ ገነት፨
- ማርያም፡ ድንግል፡ ቤተ፡ ቅድሳት፨
- ጽንሕኒ፡ ውስተ፡ ሠናይ፡ ወሠውርኒ፡ እሞት፨
- በአክናፍኪ፡ ርግብየ፡ ኅሪት፨
- ሰላም፡ ለጕርዔኪ፡ ሠናይ፡ እምወይን፨
- በከመ፡ ይቤ፡ ሰሎሞን፨
- ማርያም፡ ድንግል፡ ለባሲተ፡ ዐቢይ፡ ብርሃን፨
- ክድንኒ፡ ገርዜነ፡ ጸጋ፡ ኢያዕፅበኒ፡ ዕርቃን፨
- ዘኢአነምዎ፡ ጠቢባን፡ በኪን፨
- ሰላም፡ ለክሳድኪ፡ ቃማ፡ ንጽሕ፡ ዘዐነቀ፨
- ከመ፡ አዋልድ፡ አኮ፡ ብሩረ፡ ወወርቀ፨
- ማርያም፡ ድንግል፡ ዘተመሰልኪ፡ ማዕነቀ፨
- ሕይወትየ፡ በንዝህላል፡ እመ፡ ተሠልጠ፡ ወኀልቀ፨
- ወስክኒ፡ ክራማተ፡ እስከ፡ እገብር፡ ጽድቀ፨
- ሰላም፡ ለመታክፍትኪ፡ እለ፡ ግኁሣት፡ እማንቱ፨
- ለጌጋይ፡ እምነ፡ አርዑቱ፨
- ማርያም፡ ድንግል፡ ለዮሴዕ፡ ሠርጐ፡ ትርሲቱ፨
- በልኒ፡ እግዝእትየ፡ ጻሕቀ፡ ሕሊናየ፡ ዝንቱ፨
- ፍኖተ፡ የማን፡ ይምራሕከ፡ ወተአኵት፡ ቦቱ፨
- ሰላም፡ ለዘባንኪ፡ እምዘባነ፡ ኪሩብ፡ ዘዐብየ፨
- ሐዚሎ፡ እሳተ፡ ወእምርስነ፡ ነዱ፡ ኢውዕየ፨
- ማርያም፡ ድንግል፡ ፈጻሚተ፡ ኵሉ፡ ጻሕቅየ፨
- ሀብኒ፡ እግዝእትየ፡ ዘተመነይኩ፡ ሠናየ፨
- እንበለ፡ አፅርዖ፡ ፍጡነ፡ በጺሐኪ፡ ዝየ፨
- ሰላም፡ ለእንግድዓኪ፡ ለእሳተ፡ መለኮት፡ ምርፋቁ፨
- ዘይቄድስ፡ ነፍሰ፡ ወያጥዒ፡ ሞቁ፨
- ማርያም፡ ድንግል፡ ለነዳይ፡ ንዋየ፡ ወርቁ፨
- እመ፡ ነገደ፡ ርሑቀ፡ ወሖረ፡ ዕራቁ፨
- ኢያሐዝኖ፡ ሲሳይ፡ እስመ፡ አንቲ፡ ስንቁ፨
- ሰላም፡ ለሕፅንኪ፡ ለጥበበ፡ ሰማይ፡ ምዕራፋ፨
- ዘኢትረከብ፡ ሱታፋ፨
- ማርያም፡ ድንግል፡ ጸጋዊተ፡ ሰላም፡ ወተስፋ፨
- ኩንኒ፡ እግዚእተየ፡ ቅድመ፡ ፀርየ፡ ሐገፋ፨
- ከመ፡ ዖፍ፡ አፍኅርቲሃ፡ ትሴውር፡ በክንፋ፨
- ሰላም፡ ለአእዳውኪ፡ እሳተ፡ መለኮት፡ እለ፡ ገሠሣ፨
- አውቃፈ፡ ብሩረ፡ ወወርቅ፡ ለስርጋዌሆን፡ ኢኀሠሣ፨
- ማርያም፡ ድንግል፡ ለመካን፡ ህንባበ፡ ከርሣ፨
- አንጽሕኒ፡ እግዝእትየ፡ ለፍትወተ፡ ዓለም፡ እምርኵሳ፨
- በዲበ፡ ሥጋየ፡ ኢትንበር፡ ነጊሣ፨
- ሰላም፡ ለመዛርዕኪ፡ ዘተረሰያ፡ ኀይለ፨
- ከመ፡ ይጹራ፡ ነበልባለ፨
- ማርያም፡ ድንግል፡ እንተ፡ ኀጣእኪ፡ መምሰለ፨
- ኃጢአትየ፡ ለገብርኪ፡ እመ፡ ፈድፋደ፡ ተለዐለ፨
- ከመ፡ ጥቅም፡ ዘባቢል፡ ረስዪ፡ ንኁለ፨
- ሰላም፡ እብል፡ ለኵርናዕኪ፡ እዌድሶ፨
- ለእሳተ፡ መለኮት፡ በላዒ፡ አምጣነ፡ ኮነ፡ ትርአሶ፨
- ማርያም፡ ድንግል፡ ምዕዝት፡ ዘእምአንክሶ፨
- ሀልዊ፡ ደርገ፡ ምስሌየ፡ እንተ፡ አልብኪ፡ ተግኅሦ፨
- ለሕሊና፡ ልብየ፡ ወትረ፡ እንግርኪ፡ ማኅሠሦ፨
- ሰላም፡ ለእመታትኪ፡ እለ፡ ጸንዓ፡ ይፍትላ፨
- ሜላተ፡ ወወርቀ፡ በናዝሬት፡ ዘገሊላ፨
- ማርያም፡ ድንግል፡ ለዮዲት፡ ጥበበ፡ ቃላ፨
- ብጽሒ፡ በሠረገላ፡ ንትመሐል፡ መሐላ፨
- ከመ፡ ታኅድርኒ፡ በብሔር፡ ዘተድላ፨
- ሰላም፡ ለእራሓትኪ፡ እለ፡ ስፋሓት፡ ለመጥዎ፨
- ስቴ፡ መድኃኒት፡ ጽሩየ፡ ወእክለ፡ አሕይዎ፨
- ማርያም፡ ድንግል፡ እስእለኪ፡ በተሰፍዎ፨
- ከመ፡ እክሀል፡ በበ፡ ጾታሁ፡ ስብሐታተኪ፡ ዜንዎ፨
- ለገብርኪ፡ ዐብድ፡ ምልእኒ፡ ለብዎ፨
- ሰላም፡ ለአፃብዕኪ፡ እምእራሓ፡ እዴኪ፡ እለ፡ ሠረጻ፨
- እምኍልቈ፡ ሠላስ፡ ወስብዕ፡ እንዘ፡ ኢየሐጻ፨
- ማርያም፡ ድንግል፡ ደብረ፡ ኤልያስ፡ ነቢየ፡ ፋጻ፨
- ዕቀብኒ፡ በረድኤትኪ፡ እምነ፡ አርዌ፡ ዘኆፃ፨
- ህየንተ፡ ሠናይ፡ ለሰብእ፡ ዘይሁብ፡ ዐመፃ፨
- ሰላም፡ ለአጽፋረ፡ እዴኪ፡ መልዕልተ፡ አፃብዕ፡ እለ፡ ሠረቃ፨
- በበ፡ ሕቅ፡ ዘልፈ፡ እንዘ፡ ይልህቃ፨
- ማርያም፡ ድንግል፡ ማኅቶትየ፡ በውስተ፡ ጣቃ፨
- ኢትሰድኒ፡ ለገበርኪ፡ ለዓመትየ፡ በንፍቃ፨
- ዝንቱ፡ ውእቱ፡ ለልብየ፡ ጻሕቃ፨
- ሰላም፡ ለአጥባትኪ፡ እለ፡ አውሐዛ፡ ፍጹመ፨
- ድንግልናዌ፡ ሐሊበ፡ ውስተ፡ አፈ፡ አምላክ፡ ቅድመ፨
- ማርያም፡ ድንግል፡ እንተ፡ አምጻእኪ፡ ሰላመ፨
- ሕፅንኒ፡ በአጥባትኪ፡ ለእመ፡ ኮንኩ፡ ደክታመ፨
- ዘእንበሌኪ፡ ኢየኀሥሥ፡ እመ፨
- ሰላም፡ ለገቦኪ፡ ዘሐመልማለ፡ ወርቅ፡ ክዳኑ፨
- በከመ፡ ዳዊት፡ ይዜኑ፨
- ማርያም፡ ድንግል፡ ለያዕቆብ፡ ሞገሰ፡ ሥኑ፨
- በልኒ፡ እግዝእትየ፡ አፈቅረከ፡ አኮኑ፨
- እንዘ፡ ረዳኢትከ፡ አነ፡ ዘይክለከ፡ መኑ፨
- ሰላም፡ ለከርሥኪ፡ ዘአፈድፈደ፡ ተበፅዖ፨
- እምታቦተ፡ ሙሴ፡ ነቢይ፡ ለጽሌ፡ ትእዛዝ፡ ዘየኀብኦ፨
- ማርያም፡ ድንግል፡ ጊዜ፡ ጽዋዕኩኪ፡ በአስተብቍዖ፨
- ለፀርየ፡ ብእሴ፡ ዐመፃ፡ ኀይለ፡ ዚአኪ፡ ይጽብኦ፨
- እስከነ፡ ያስቆቁ፡ ጥቀ፡ ድኅሪተ፡ ገቢኦ፨
- ሰላም፡ ለልብኪ፡ እምነ፡ በቀል፡ ርሑቅ፨
- እምጣነ፡ ዐረብ፡ ወሠርቅ፨
- ማርያም፡ ድንግል፡ ገነተ፡ ኅሩያን፡ ደቂቅ፨
- ክድንኒ፡ ልብሰ፡ ከብካብ፡ ለቅኑይኪ፡ ዕሩቅ፨
- ከመ፡ ጶዴሬ፡ ጽጌሁ፡ ዘወርቅ፨
- ሰላም፡ እብል፡ ለኵልያትኪ፡ ክልኤ፨
- ዘቅብአ፡ ክህነት፡ ቀርን፡ ወዘወይነ፡ ትፍሥሕት፡ ግምዔ፨
- ማርያም፡ ድንግል፡ ብልኒ፡ ቅድመ፡ ጉባኤ፨
- ሕፃንየ፡ በእንቲአየ፡ ይከውነከ፡ ረዳኤ፨
- እመራደ፡ ፀርከ፡ ሕቀ፡ ኢትፍራህ፡ ትንሣኤ፨
- ሰላም፡ ለሕሊናኪ፡ ሐልዮ፡ ሠናያት፡ ልማዱ፨
- ወገቢረ፡ ምሕረት፡ መፍቅዱ፨
- ማርያም፡ ድንግል፡ ለዳዊት፡ ወለተ፡ ወልዱ፨
- ንዝሕኒ፡ በአዛብኪ፡ ዘይትረከብ፡ ዘመዱ፨
- ወበማየ፡ ሕይወት፡ ሕፅብኒ፡ እምበረድ፡ እፃዕዱ፨
- ሰላም፡ ለአማዑትኪ፡ ነበልባለ፡ ሐዘን፡ ዘአውዐዮ፨
- እመ፡ ወዐለ፡ ወልድኪ፡ ስቁለ፡ በቀራንዮ፨
- ማርያም፡ ድንግል፡ ፀምረ፡ ጠል፡ ዘተነብዮ፨
- ጌጋይየ፡ ለአስተርአዮ፡ እንተ፡ አልብኪ፡ ተፈልዮ፨
- በሥርዐተ፡ ካህን፡ ላዕሌየ፡ አንኂ፡ ጸልዮ፨
- ሰላም፡ ለንዋየ፡ ውስጥኪ፡ አምሳለ፡ ንዋያ፡ ለደብተራ፨
- ስብሐተ፡ ልዑል፡ ዘይሤውራ፨
- ማርያም፡ ድንግል፡ ትምክሕተ፡ ደቂቃ፡ ለሣራ፨
- ባልሕኒ፡ ወለተ፡ ቅስራ፡ ለዓለመ፡ ጽልመት፡ እምጻዕራ፨
- እስመ፡ መቅዓን፡ ወጠዋይ፡ ምሕዋራ፨
- ሰላም፡ ለሕንብርቲኪ፡ ከመ፡ ማዕከክ፡ ርእየቱ፨
- ዘኢየዐርቅ፡ እምቱስሕቱ፨
- ማርያም፡ ድንግል፡ ለካህን፡ ዕፀ፡ ኅርየቱ፨
- ከመ፡ ኢይኩን፡ ፅሩዐ፡ ንባበ፡ አፉየ፡ ዝንቱ፨
- በጽዋዐ፡ ኪሩብ፡ ደዪዮ፡ ወሡጢዮ፡ ሎቱ።፨
- ሰላም፡ ለማሕፀንኪ፡ ለእግዚአብሔር፡ ማኅፈዱ፨
- ዘሐነጸኪ፡ የማነ፡ እዱ፨
- ማርያም፡ ድንግል፡ ምዕዝት፡ ዘእምናርዱ፨
- ኀቤኪ፡ ያንቀዐዱ፡ ለረኪበ፡ ኵሉ፡ ምፍቅዱ፨
- ምስለ፡ ካልኡ፡ ዐይንየ፡ አሐዱ፨
- ሰላም፡ ለማሕፀንኪ፡ ለእግዚአብሔር፡ ዘውጉ፨
- ብዑድ፡ ሥርዐቱ፡ ወፍሉጥ፡ ሕጉ፨
- ማርያም፡ ድንግል፡ ለአስካለ፡ ሕይወት፡ ሐረጉ፨
- በልኒ፡ እግዝእትየ፡ ኃጢአተከ፡ ኀደጉ፨
- ወመኃልየከ፡ ሰማየ፡ አዕረጉ፨
- ሰላም፡ እብል፡ ለድንግልናኪ፡ ዕፅው፨
- እንተ፡ እምኔሁ፡ ሠረቀ፡ ፀሓየ፡ መለኮት፡ ኅትው፨
- ማርያም፡ ድንግል፡ ዘሥነ፡ ንጽሕኪ፡ ፍትው፨
- በማኅደር፡ ወበፍናው፡ በአህጉር፡ ወበድው፨
- ዕቀብኒ፡ ወለቶሙ፡ ለኄራን፡ አበው፨
- ሰላም፡ ለሐቌኪ፡ በትረ፡ ሌዋዊ፡ ሣውዕ፨
- ዘኢሐፀነኪ፡ ጠል፡ ወዘኢሠቀየኪ፡ ነቅዕ፡ ፨
- ማርያም፡ ድንግል፡ እግዝእተ፡ መላእክት፡ ወሰብእ፨
- ሰድኒ፡ ብሔረ፡ ፍግዕ፡ በትንባሌኪ፡ ባቍዕ፨
- ምስለ፡ ኅሩያንኪ፡ ደርገ፡ አሀሉ፡ በስንዕ፨
- ሰላም፡ ለአቍያጽኪ፡ እለ፡ ይነብራ፡ ድርገተ፨
- እምነ፡ አብራክኪ፡ ላዕለ፡ ወእምነ፡ ሐቌኪ፡ ታሕተ፨
- ማርያም፡ ድንግል፡ እንተ፡ ኢተአምሪ፡ ርስሐተ፨
- ጽባሐ፡ ወምሴተ፡ ኵሎ፡ ዕለተ፨
- ዘይሰማዕ፡ ምሕረተኪ፡ ግበሪ፡ ሊተ፨
- ሰላም፡ ለአብራክኪ፡ በስብሐተ፡ ልዑል፡ ዘአስተብረካ፨
- እምአመ፡ ወሀቡኪ፡ ብፅዐ፡ ውስተ፡ አሪታዊ፡ ታዕካ፨
- ማርያም፡ ድንግል፡ መንበር፡ ዘእብነ፡ ፔካ፨
- ጊዜ፡ ስደቶሙ፡ ለኃጥኣን፡ እምዐፀደ፡ ዐባይ፡ ፋሲካ፨
- ፄውውኒ፡ መንገሌኪ፡ እኩንኪ፡ ምህርካ፨
- ሰላም፡ ለአእጋርኪ፡ እለ፡ ጻመዋ፡ በረዊፅ፨
- እምቤተ፡ ልሔም፡ ዘይሁዳ፡ እስከ፡ ምድረ፡ ግብጽ፨
- ማርያም፡ ድንግል፡ ሥርጉተ፡ ነበልባል፡ ዕፅ፨
- ለኀዲር፡ በቤተ፡ ናሕስ፡ እንተ፡ መልዕልተ፡ ኰኵሕ፡ ሕኑጽ፨
- አጥብብኒ፡ በተግሳጽ፡ ወሡቅኒ፡ እምዳኅፅ፨
- ሰላም፡ እብል፡ ለዘዚአኪ፡ ሰኰና፨
- ዘኢድኅፀ፡ በውስተ፡ ፍና፨
- ማርያም፡ ድንግል፡ ትእምርተ፡ ኪዳን፡ ቀስተ፡ ደምና፨
- አምዕዝኒ፡ በዕፍረትኪ፡ ወጸግውኒ፡ ጥዒና፨
- በከመ፡ ትገብር፡ እም፡ ለንኡስ፡ ሕፃና፨
- ሰላም፡ ለመከየድኪ፡ እለ፡ ረከቦን፡ መከራ፨
- እምፍርሀተ፡ ቀተልት፡ ሐራ፡ ፡ እንበለ፡ አሣእን፡ አመ፡ ሖራ፨
- ማርያም፡ ጽዮን፡ ታቦተ፡ ቃለ፡ ጽድቅ፡ መንፈቀ፡ ዕሥራ፨
- ዕጐላት፡ እምዕጐሊሆን፡ ከመ፡ ኪያኪ፡ አፍቀራ፨
- አፍቀርኩኪ፡ አፍቅርኒ፡ እምይእዜ፡ ለግሙራ፨
- ሰላም፡ እብል፡ ዘአእጋርኪ፡ አፃብዐ፨
- ሐሳበ፡ ኍልቆን፡ ዘኮነ፡ ምስለ፡ ስድስ፡ ርብዐ፨
- ማርያም፡ ድንግል፡ ዘተሰመይኪ፡ ምሥዋዐ፨
- በረዊፅ፡ ወብጕጕዓ፡ አፍጥኒ፡ መጺአ፨
- ሶብ፡ አፉየ፡ ስመኪ፡ ጸውዐ፨
- ሰላም፡ ለጽፋረ፡ እግርኪ፡ ዘኢፈቀዳ፡ ለስርጋዌ፨
- ጥምዐታተ፡ ሕምር፡ ምድራዌ፨
- ማርያም፡ ድንግል፡ ሐውልተ፡ ስምዕ፡ ዘወልደ፡ ነዌ፨
- ሡቅኑ፡ እምትንታኔ፡ ወባልህኒ፡ እምአርዌ፨
- ላዕለ፡ እምየ፡ ዘአምጽአ፡ ደዌ።፨
- ሰላም፡ ለቆምኪ፡ በቀልተ፡ ዘተመሰለ፨
- ኀበ፡ ሙሐዘ፡ ማይ፡ ዘበቈለ፨
- ማርያም፡ ድንግል፡ እስእለኪ፡ ስኢለ፨
- ኢይረድ፡ ታሕቲተ፡ ምጥቅኒ፡ ላዕለ፨
- ኢረከብኩ፡ በርኅራኄ፡ ከማኪ፡ ዘብዕለ፨
- ሰላም፡ ለመልክእኪ፡ ዘተሰርገወ፡ አሜረ፨
- ዘያበርህ፡ ወትረ፨
- ፍቅርትየ፡ አንቲ፡ እንተ፡ ታበድሪ፡ ፍቅረ፨
- አርእይኒ፡ ገጸ፡ ዚአኪ፡ ማርያም፡ ምዕረ፨
- ዘኢይሰምዖ፡ ካልእ፡ እንግርኪ፡ ነገረ፨
- ሰላም፡ ለፀአተ፡ ንፍስኪ፡ እንበለ፡ ጻዕር፡ ወጻማ፨
- ለነቢር፡ ዘልፈ፡ በየማነ፡ ወልድኪ፡ ፌማ፨
- ማርያም፡ ድንግል፡ ለባሲተ፡ ሞገስ፡ ወግርማ፨
- አጽንዒ፡ በረድኤትኪ፡ ለሕይወትየ፡ ድካማ፨
- እምሕይወተ፡ ኄራን፡ አበው፡ ኢታሕጽጺ፡ ዐቅማ፨
- ሰላም፡ እብል፡ በድነ፡ ሥጋኪ፡ ጽሩየ፨
- ዘተመሰለ፡ ባሕርየ፨
- ማርያም፡ ድንግል፡ ዐፀደ፡ ወይንየ፨
- ንስቲተ፡ ለዕበይኪ፡ እንተ፡ አቅረብኩ፡ ግናየ፨
- ኢይትኀደግ፡ ዲበ፡ ምድር፡ ምስጢ፡ ሰማየ፨
- ሰላም፡ ለግንዘተ፡ ሥጋኪ፡ በእደ፡ ሐዋርያት፡ አርጋብ፨
- በአፈወ፡ ዕፍረት፡ ቅድው፡ ዘሐሳበ፡ ሤጡ፡ ዕፁብ፨
- ማርያም፡ ድንግል፡ ወለተ፡ ኅሩያን፡ ሕዝብ፨
- ረሰይኩኪ፡ እግዝእትየ፡ ህየንተ፡ እም፡ ወአብ፨
- ይሕፅነኒ፡ ከመ፡ ጥብ፡ ፍቅርኪ፡ ሐሊብ፨
- ሰላም፡ ለመቃብርኪ፡ ለጌቴሴማኒ፡ በመርሕባ፨
- እንተ፡ ይእቲ፡ ለኢየሩሳሌም፡ ቅሩባ፨
- ማርያም፡ ድንግል፡ ለሀገረ፡ መንግሥት፡ ርግባ፨
- ትትሜጦ፡ ወርቀ፡ እምአፌር፡ ወጸበለ፡ አፈው፡ እምሳባ፨
- ጌቴሴማኒ፡ ለሥጋኪ፡ ምስካባ፨
- ሰላም፡ ለፍልሰተ፡ ሥጋኪ፡ መካነ፡ ፍሥሓ፡ ምጡቀ፨
- በአእባነ፡ ባሕርይ፡ በተነድቀ፨
- ማርያም፡ ደብተራ፡ እንተ፡ ኢትትከደኒ፡ ሠቀ፨
- ጽሒፈ፡ ውዳሴኪ፡ እምኢኀልቀ፡ ሶበ፡ ኮነ፡ ጥቀ፨
- ዝናመ፡ ክረምት፡ ቀለመ፡ ወሰማይ፡ ረቀ፨
- ሰላም፡ ለፍልሰተ፡ ሥጋኪ፡ ወለተ፡ ንጉሥ፡ ይሁዳ፨
- ወወለተ፡ ሌዊ፡ እኁሁ፡ ዘሀብተ፡ ክህነቱ፡ አገዳ፨
- ማርያም፡ ድንግል፡ ምዕዝት፡ ዘእምጽጌ፡ ረዳ፨
- በጽሒፍ፡ ኢይፌጽሞ፡ ለስብሐትኪ፡ እንግዳ፨
- እመ፡ ኮነ፡ በቅድሜየ፡ ስፍሐ፡ ምድር፡ ሠሌዳ፨
- ሰላም፡ ለፍልሰተ፡ ሥጋኪ፡ ደባትረ፡ ብርሃን፡ ኀበ፡ ተተክሉ፨
- ለገነተ፡ ጽባሕ፡ በማእከሉ፨
- ስብሕት፡ አንቲ፡ ወውድስት፡ በአፈ፡ ኵሉ፨
- እምነ፡ ጻድቃን፡ ዘታሕቱ፡ ወእምትጉሃን፡ ዘላዕሉ፨
- ማርያም፡ ለኪ፡ ስብሐተ፡ አደሉ፨
- በዝንቱ፡ ቃለ፡ ማሕሌት፡ ወበዝንቱ፡ ይባቤ፨
- ለዘይስእለኪ፡ ብእሲ፡ ጊዜ፡ ረከቦ፡ ምንዳቤ፨
- ብጽሒ፡ ፍጥዑነ፡ ትሰጠውዮ፡ ዘይቤ፨
- ማርያም፡ ዕንቍየ፡ ክርስቲሎቤ፤ ምዕዝተ፡ ምግባር፡ እምከርቤ፨
- ዘጸገየ፡ ማሕፀንኪ፡ አፈወ፡ ነባቤ፨

Tarafa Malkəʾ

- ስብሐት፡ ለኪ፡ ማርያም፡ በኊልቈ፡ ኵሉ፡ ሥዕርትየ፨
- ስብሐት፡ ለኪ፡ ማርያም፡ በኊልቈ፡ ኵሉ፡ አዕፅምትየ፨
- ስብሐት፡ ለኪ፡ ማርያም፡ በኊልቈ፡ ኵሉ፡ ዘተርአየ፨
- ስብሐት፡ ለኪ፡ ንግሥትየ፡ በኊልቈ፡ ኵሉ፡ ዘኢያስተርአየ፨
- ስብሐተ፡ ድንግልናኪ፡ ዘልፈ፡ ይነግር፡ አፉየ፨
- ለዘኢያፈቅረኪ፡ እግዚትየ፡ ማርያም፡ ውኩፈ፡ ኢይኩን፡ ጽሎቱ፨
- ይትገዘም፡ ኑኀ፡ ዓመቱ፡ ወይጥፋእ፡ በከንቱ፨
- በአፈ፡ መላእክት፡ ወሰብእ፡ ይትረገም፡ ለለ፡ ሰዓቱ፨
- ዘአስተማሰሎ፡ በተውኔት፡ ለማኅሌተ፡ ንግሥኪ፡ ዝንቱ፨
- ጌጋዩ፡ ወኃጢአቱ፡ ኢይትኀደግ፡ ሎቱ፨
- እግዚአብሔር፡ ኀቤኪ፡ ፈነወ፡ ቃሎ፨
- አምሳለ፡ ገብርኤል፡ አስተማሲሎ፨
- ማርያም፡ አምላከ፡ ዘወለድኪ፡ በተደንግሎ፨
- ሰላም፡ ሰላም፡ ወሰላም፡ እብሎ፨
- ለመልክእኪ፡ ፈጺምየ፡ ኵሎ፨

መልክአ፡ ማርያም፡ Malkəʾa Māryām

Image of Mary