Details
Other Titles
-
መልክአ፡ ሰንበት፡
Malkəʾa Sanbat
Image of the Sabbath
-
- ሰላም፡ ለዝክረ፡ ስምኪ፡ ጸዳለ፡ ምሥራቅ፡ ወምዕራብ፨
- ሰሜን፡ ወደቡብ፨
- ሰንበተ፡ ክርስቲያን፡ ቅድስት፡ መርዓተ፡ በግዑ፡ ለአብ፨
- በመዓልት፡ ወበሌሊት፡ በልሳነ፡ ኵሉ፡ ንባብ፨
- ይትፌሥሑ፡ ብኪ፡ አሕዛብ፡ ወሕዝብ፨
-
- ሰላም፡ ለሥዕርተ፡ ርእስኪ፡ ለአዳም፡ ዘጸለሎ፨
- አመ፡ አክበረኪ፡ ወልድ፡ በቃለ፡ ወንጌል፡ አብዕሎ፨
- ሰንበተ፡ ክርስቲያን፡ ቅድስት፡ እስእለኪ፡ በተወክሎ፨
- ሥዕርትየ፡ አንሰ፡ አምሳለ፡ ጌሚ፡ ሶበ፡ ይትረአይ፡ በቊሎ፨
- ዕፍረተ፡ ቅብእኪ፡ በርእስየ፡ ያጥልሎ፨
-
- ሰላም፡ ለቀራንብትኪ፡ ለኢየሩሳሌም፡ ያክንታ፨
- ቀዳሚ፡ አዳም፡ ዘኢተቀብረ፡ በውስቴታ፨
- ሰንበተ፡ ክርስቲያን፡ ቅድስት፡ ለጽዮን፡ ሠርጐ፡ ትርሲታ፨
- ምድርኒ፡ አመ፡ ታገብዕ፡ ማሕፀንታ፨
- በገነተ፡ ጽጌ፡ ሢምኒ፡ አንሶሱ፡ ውስቴታ፨
-
- ሰላም፡ ለከናፍርኪ፡ ዘነበበ፡ በኁባሬ፨
- እንበለ፡ እማሬ፨
- ሰንበተ፡ ክርስቲያን፡ ቅድስት፡ ሙዳየ፡ ምጽዋት፡ ዘቤተ፡ ኅሬ፨
- ክሥቲ፡ ልቡናየ፡ ዘአልቦ፡ እማሬ፨
- በመዝሙር፡ ሐዲስ፡ ወሠናይ፡ ዝማሬ፨
-
- ሰላም፡ ለአፉኪ፡ አፈ፡ ነቢያት፡ ዘከሠተ፨
- አምኃ፡ ሰንበተ፨
- እግዚአብሔር፡ ስቡሕ፡ ዘላዕሌኪ፡ ተአኵተ፨
- ክሥቲ፡ አእዛንየ፡ ወኅሊናየ፡ ጽሚተ፨
- ጸጋ፡ መንፈስ፡ ቅዱስኒ፡ ጸግውኒ፡ ሊተ፨
-
- ሰላም፡ ለአስናንኪ፡ በቅድመ፡ ሥላሴ፡ እለ፡ አክሞሰሳ፨
- ለውሉደ፡ ሰብእ፡ ሣህለ፡ እንዘ፡ የኀሥሣ፨
- ሰንበተ፡ ክርስቲያን፡ ቅድስት፡ ለጽዮን፡ ሥነ፡ ሞገሳ፨
- አስናንየ፡ እለ፡ እምዓለም፡ ለነቅዐ፡ ኀጢአት፡ እምፅንሳ፨
- ጸጋ፡ መንፈስ፡ ቅዱስ፡ ሀብኒ፡ ዘይሰሪ፡ አበሳ፨
-
- ሰላም፡ ለመልክእኪ፡ በሥምረተ፡ አብ፡ ወወልድ፨
- ወመንፈስ፡ ቅዱስ፡ ዋሕድ፨
- ሰንበተ፡ ክርስቲያን፡ ቅድስት፡ እስእለኪ፡ በዐምድ፨
- ብኪ፡ ለዘገብረ፡ ፯ቱ፡ ዘመድ፨
- መባርቅት፡ ወነጐድጓድ፡ ነፋሳት፡ ወነድ፨
-
- ሰላም፡ ለመልክእኪ፡ እግዚአብሔር፡ ዘንዕዶ፨
- አክበረኪ፡ ወልድ፡ በቃለ፡ ወንጌል፡ አውሕዶ፨
- ሰንበተ፡ ክርስቲያን፡ ቅድስት፡ እስእለኪ፡ በተአንግዶ፨
- ለዘይጸልዐኪ፡ ሥላሴኪ፡ ክሒዶ፨
- መብረቀ፡ እሳት፡ ይኅርዶ፡ እምሰማይ፡ ወሪዶ፨