Subjects
Martyr
መርቆሬዎስ፡
Marqorewos
Mercurius
Mercurius
Malkəʾ
-
- ሰላም፡ ለዝክረ፡ ስምከ፡ ገብረ፡ ኢየሱስ፡ ብሂል፨
- ወለሥእርተ፡ ርእስከ፡ ጸሊም፡ ዘቈናዝዒሁ፡ ፍቱል፨
- መርቆሬዎስ፡ ሰማዕት፡ ገባሬ፡ ተአምር፡ ወኃይል፨
- ለዮሐንስ፡ ፍና፡ ድኂን፡ ከመ፡ መራሕኮ፡ በሐቅል፨
- መርሐኒ፡ ለወልድከ፡ ፍና፡ ጽድቅ፡ ወሣህል፨
-
- ሰላም፡ ለርእስከ፡ ምስለ፡ ገጽከ፡ በአኅብሮ፨
- ቅድመ፡ ገጸ፡ መምህር፡ ባስልዮስ፡ ዘአድነነ፡ ለተናግሮ፨
- መርቆሬዎስ፡ ሰማዕት፡ ምሉዓ፡ ጥበብ፡ ወአእምሮ፨
- ጹረኒ፡ በፈረስከ፡ ወሰውረኒ፡ ሰውሮ፨
- እምገጸ፡ ዓለም፡ ዘይከብድ፡ ጾሮ፨
-
- ሰላም፡ ለመቃብሪከ፡ ለህላዌከ፡ መካኑ፨
- ወለሥጋከ፡ ቀይጠኑ፨
- መርቆሬዎስ፡ ከማከ፡ ኢተንሥአ፡ በበ፡ ዘመኑ፨
- መኑ፡ መኑ፡ ዘይትማስለከ፡ መኑ፨
- እንበለ፡ ጊዮርጊስ፡ ሰማዕት፡ ዘአዳም፡ ሥኑ፨
-
- እምተአምሪከ፡ አሐዱ፡ ስእለ፡ ዚአከ፡ ኀበ፡ ሀሎ፨
- መምህር፡ ባስዮስ፡ ለእግዚአብሔር፡ ሶበ፡ ሰቀሎ፨
- ለጎልያኖስ፡ ዕልው፡ እንዘ፡ ግብረ፡ ፀብዕ፡ ይመስሎ፨
- ዝኩ፡ ሥዕልከ፡ በገሐድ፡ በኴናተ፡ በቅል፡ ቀተሎ፨
- እስከ፡ ሥልጣኖ፡ አግሃደ፡ ወአርአየ፡ ኀይሎ፨
-
- ካልዕ፡ ተአምሪከ፡ ዕፁብ፡ ወመድምም፨
- ሶበ፡ ስመከ፡ ጸውዓ፡ በውሳጤ፡ መፍርህ፡ ገዳም፨
- አሐዱ፡ ወሬዛ፡ ዘቤተ፡ ሙላዱ፡ መስጥም፨
- መርቆሬዎስ፡ በከመ፡ ጾርኮ፡ በፈረስከ፡ ጸሊም፨
- ይጹረኒ፡ ረድኤትከ፡ ለብእሲ፡ ድኵም፨
-
- ሣልስ፡ ተአምሪከ፡ ለፈረስከ፡ በአምሳሉ፨
- ፍቁራኒከ፡ ለዝክር፡ እምድኅረ፡ ሰአሉ፨
- መርቆሬዎስ፡ ሰማዕት፡ ለክርስቶስ፡ መልአከ፡ ኃይሉ፨
- ሐንጸፍጸፍከ፡ ሐፍ፡ ከመ፡ ማይ፡ እስከነ፡ ርኅሰ፡ አባሉ፨
- ከመ፡ ጎልያኖስ፡ ሞተ፡ ወሕዝቡ፡ ተኃጕሉ፨
-
- ተዘኪረከ፡ ክርስቶስ፡ ፍቅረ፡ ዚአየ፡ ለአብድ፨
- ከመ፡ አፍቀሮሙ፡ ጥቀ፡ ለዘዚአከ፡ ነገድ፨
- ሞገሰ፡ ስም፡ ሀበኒ፡ በዘይመጽእ፡ ትውልድ፨
- ነፍስየ፡ ለተቤዝዎ፡ እንዘ፡ ይእኅዝ፡ በእድ፨
- መርቆሬዎስ፡ ያርብሐዊ፡ ወቡሩክ፡ ወልድ፨