Subject
Angelic
ፋኑኤል፡
Fānuʾel
Phanuel
Phanuel
Malkəʾ
-
- ሰላም፡ ለዝክረ፡ ስምከ፡ ዘይደልዎ፡ ተበፅዖ፨
- እምውሉደ፡ ሰብእ፡ ኵሉ፡ በተዜያንዎ፡ ወበተዛውኦ፨
- እስመ፡ ቀዋሚሆሙ፡ አንተ፡ ዘትተግህ፡ ለተራድኦ፨
- ፋኑኤል፡ ስመ፡ ዚአከ፡ ሶበ፡ እወጥን፡ ጸውዖ፨
- በከመ፡ ልማድከ፡ ለፀርየ፡ ፍጡነ፡ ፅብኦ፨
-
- ሰላም፡ ለሥዕርትከ፡ ዘኢይቀርቦ፡ መላፄ፨
- ኮከበ፡ ራማ፡ ፋኑኤል፡ ምሉአ፡ ሱራሔ፡ እንበለ፡ ሑፃፄ፨
- ኢያስትት፡ ኪያየ፡ ለዐቂብ፡ ወለሕዋፄ፨
- መቲሮ፡ እምነ፡ ለምለሙ፡ ከመ፡ ዘበመፍጽሕ፡ ወማኅፄ፨
- ሥርወ፡ ሕይወትየ፡ ኢያማስን፡ ዕፄ፨
-
- ሰላም፡ ለቆምከ፡ ዘግሩም፡ ራእዩ፨
- ወአዳም፡ ሥነ፡ ላህዩ፨
- ፋኑኤል፡ ክቡር፡ ለእግዚአብሔር፡ መልአከ፡ ዕበዩ፨
- ረስዮሙ፡ ለዕድዋንየ፡ ቅድመ፡ ፀርየ፡ ይስክዩ፨
- በውዴት፡ ዘሐለዩ፡ እሙንቱ፡ ይድወዩ፨
-
- ሰላም፡ ሰላም፡ ለማኅበረ፡ መልክእከ፡ እብሎሙ፨
- ለለ፡ አሐዱ፡ ዘበበ፡ ስሙ፨
- ፋኑኤል፡ ክቡር፡ ለእግዚአብሔር፡ መልአከ፡ ሰላሙ፨
- ሰሐበኒ፡ ኀብለ፡ ፍቅርከ፡ ለውዳሴከ፡ እፃሙ፨
- በረከተከ፡ ዐስብየ፡ ሀበኒ፡ ዳእሙ፨
-
- መኑ፡ መርዔተ፡ ዘይርኢ፡ ወኢይሰቲ፡ ሐሊቦ፨
- ወመኑ፡ ዘይተክል፡ ወይነ፡ ወኢይቀስም፡ ሕንባቦ፨
- ፋኑኤል፡ ሀበኒ፡ ዕሤተ፡ ጸሎትየ፡ በአመክዕቦ፨
- ተኣምር፡ አንተ፡ አኮኑ፡ ለእግዚአብሔር፡ ንባቦ፨
- እስመ፡ ይቤ፡ ኢታቢት፡ ለነዳይ፡ ዐስቦ፨