መልክአ፡ ኖብ፡
Malkəʾa Nob
Image of Noub
-
- ሰላም፡ ለዝክረ፡ ስምከ፡ ዘተተርጐመ፡ በወርቅ፨
- ወለሥዕርትከ፡ ሰላም፡ በልሳነ፡ ትጋህ፡ ወጻህቅ፨
- ለነቢበ፡ ክርስቶስ፡ ኖብ፡ ሰማዕት፡ ህላዌ፡ ረቂቅ፨
- ሳውል፡ ሳውል፡ በብሂል፡ እምሰማየ፡ ጸጋ፡ ምውቅ፨
- ተግሣጸ፡ ጸውዖ፡ ይኩነኒ፡ ሀብትከ፡ መብረቅ፨
-
- ሰላም፡ ለርእስከ፡ ዘአክሊለ፡ ሰማይ፡ ከለሎ፨
- ወለብርሃናዊ፡ ገጽከ፡ ዘሰበነ፡ ላህይ፡ ጠብለሎ፨
- ለአምላከ፡ ሰማይ፡ ኖብ፡ አመንኩከ፡ ሶበ፡ ትቤሎ፨
- ለአጵሎን፡ እደ፡ ኬንያ፨ ዘበአምሳለ፡ ሰብእ፡ ሠዓሎ፨
- ቅድመ፡ ዐላውያን፡ ነገሥት፡ አኅሠርከ፡ ኃይሎ፨
-
- ሰላም፡ ለፀአተ፡ ነፍስከ፡ ከመ፡ መርዓዊ፡ እምጽርሑ፨
- ወለዘገነዘ፡ በድንከ፡ ለዮልዮስ፡ እደ፡ ዚአሁ፨
- ለሐመረ፡ ባሕር፡ ኖብ፡ ስቁል፡ ዲበ፡ ሠርዌሁ፨
- ተዝካረ፡ ሞትከ፡ መላእክተ፡ ሰማይ፡ ሐራሁ፨
- ለእግዚአ፡ ስብሐት፡ ክርስቶስ፡ ይገብሩ፡ ናሁ፨
-
- ሰላም፡ ለግንዘተ፡ ሥጋከ፡ በመዐዛ፡ ዕፍረት፡ መንክር፨
- ወለመቃብሪከ፡ ሰላም፡ ውስተ፡ ንኂሳ፡ ሀገር፨
- ክርስቶስ፡ ኖብ፡ ትሩፈ፡ ዕበይ፡ ወክብር፨
- ሐውጻ፡ በሣህልከ፡ አመ፡ ዕለተ፡ ደይን፡ ወጻዕር፨
- ለኢየሩሳሌም፡ ነፍስየ፡ እምልዑል፡ ጠፈር፨
-
- አምጣነ፡ አእምሮ፡ ለልብየ፡ ሀብተ፡ መንፈስ፡ ቅዱስ፡ ወሀቦ፨
- ሰላመ፡ መልክእከ፡ ነዋ፡ ምስለ፡ ብዙኅ፡ የብቦ፨
- ግብረ፡ አምላክከ፡ ኖብ፡ ዘተኣምር፡ በአስተርክቦ፨
- ብዙኀሰ፡ እምኔየ፡ እመ፡ ተኀሥሥ፡ አቅርቦ፨
- ጸሪቀ፡ መበለት፡ ጥቀ፡ በእዴየ፡ አልቦ፨
-
- ሰላም፡ ለከ፡ ሕፃነ፡ መንክራት፡ ኖብ፡ በእንተ፡ ስሙ፡ ለወልድ፨
- ተፈልጦተ፡ ዘመድ፡ አብደርከ፡ በከዊነ፡ ነገድ፨
- ከመ፡ ትፍልስ፡ ብሔረ፡ ባዕድ፨
-
- ሰላም፡ ለከ፡ አመ፡ ከፈሉከ፡ ሐራ፡ ወረሰዩከ፡ ሠለስተ፨
- እምተወከፎ፡ ሥቃይ፡ ኵሎ፡ ዕለተ፨
- ልብከ፡ ኢተአተተ፨
-
- ሰላም፡ ለከ፡ እፎ፡ ትትፌሣሕ፡ በእንቲአከ፡ ንኂሳ፨
- እስመ፡ ብዝኀ፡ ጌጋይ፡ ኖብ፡ እስመ፡ ቀደሳ፨
- ንጽሕከ፡ አክሊለ፡ ርእሳ፨
-
- ሰላም፡ ለከ፡ አምልኮ፡ አማልክት፡ ሰብዓ፡ ተውላጠ፡ መነንከ፡ ኖብ፨
- እስመ፡ መልአ፡ ብከ፡ ሀብተ፡ ጥበብ፨
- እምሥራቀ፡ ፀሓይ፡ ብሩህ፡ እስከ፡ ምዕራብ፨
- አዕበዩከ፡ አሕዛብ፡ ወሕዝብ፨