Subject
Malkəʾ
-
- ሰላም፡ ለዝክረ፡ ስምከ፡ ዘምዑዝ፡ ጣዕማ፨
- አምሳለ፡ ማርያም፡ ድንግል፡ ዘጥዑም፡ ስማ፨
- ሰላማ፡ እንድርያስ፡ ዳግማየ፡ እንድርያስ፡ ወሰላማ፨
- ያስተበጽዑከ፡ ሊቃውንተ፡ ሞገስ፡ ወግርማ፨
- እለ፡ የእምሩ፡ ትርጓሜ፡ ወዜማ፨
-
- ሰላም፡ ለሥዕርተ፡ ርእስከ፡ ጸሊም፡ ከመ፡ ቋዕ፨
- ወለርእስከ፡ ዘጽሕደ፡ በቅብአ፡ እንጦኒ፡ ቆብዕ፨
- ሰላማ፡ እንድርያስ፡ ቢጸ፡ ሐዋርያት፡ አርዳዕ፨
- አጥለልክ፡ ሃይማኖተ፡ ሲበት፡ ረሲዓን፡ ሰብእ፨
- በቅብዓ፡ ብሂል፡ ወልድ፡ ቅባኢ፡ ወቅብዕ፨
-
- ሰላም፡ ለቆምከ፡ ርስያ፡ ጶዴሬ፡ ወቢሶስ፨
- ወለመልክእከ፡ አዳም፡ አምሳለ፡ ዳዊት፡ ንጉሥ፨
- ሰላማ፡ እንድርያስ፡ ሐዋርያ፡ ሕያው፡ ክርስቶስ፨
- ዘልፈ፡ ተአኵተከ፡ በቃለ፡ ማሕሌት፡ ሐዲስ፨
- እንተ፡ ጸግበት፡ እምጸጋከ፡ ርህብት፡ ነፍስ፨
-
- ኀበ፡ ነሣእከ፡ እምጴጥሮስ፡ ሢመተ፡ ወከብረ፨
- ኀበሂ፡ ለበውከ፡ እንተ፡ ማርቆስ፡ መንበረ፨
- ሰላማ፡ እንድርያስ፡ በዘልብከ፡ አእመረ፨
- ከመዝ፡ እዜምር፡ ለስምከ፡ ወእሴብሐከ፡ ወትረ፨
- ከመ፡ ትሀበኒ፡ ትምኔትየ፡ ኵሎ፡ አሚረ፨