Details
-
- ሰላም፡ ለዝክረ፡ ስምከ፡ ወለሥዕርትከ፡ ምስለ፡ ርእሱ፨
- ለሥነ፡ ኦርያሬስ፡ ገጽከ፡ ወለብንተ፡ ዐይንከ፡ ቅድመ፡ ዕጠሱ፨
- ሊቀ፡ ሰማዕታት፡ ጊዮርጊስ፡ ለትዕግሥት፡ ቤተ፡ መቅደሱ፨
- ነዳያን፡ በትዕግሥቶሙ፡ አመ፡ ከመ፡ አልዓዛር፡ ነግሡ፨
- ከመ፡ ኢይርከበኒ፡ ሰአል፡ ለነዌ፡ ተጽናሱ፨
-
- ሰላም፡ ለቅዳሴ፡ ቤትከ፡ ቅድመ፡ ገጸ፡ አእላፍ፡ ማኅበር፨
- አመ፡ ሰቡዑ፡ ለወርኀ፡ ኅዳር፨
- ጊዮርጊስ፡ ሰማዕት፡ መኰንነ፡ ሰላም፡ ወፍቅር፨
- ተበሀሉ፡ በእንቲአከ፡ ነገረ፡ ሰማያት፡ ወምድር፨
- አማን፡ ለሰማዕት፡ ዕረፍቱ፡ ክቡር፨
-
- ከመ፡ ፍልሰትከ፡ ደመረት፡ ምስለ፡ ፍልሰታ፡ ለማርያም፡ ድንግልት፡ በክልኤ፨
- ሶበ፡ ሰአልከ፡ ጥቡዐ፡ በንባብከ፡ ቀርነ፡ ጽዋዔ፨
- ጊዮርጊስ፡ ዳግመ፡ አመ፡ ይከውን፡ ጉባኤ፨
- ደምር፡ ተንሥኦትየ፡ ኀበ፡ ዘለከ፡ ትንሣኤ፨
- ቅድመ፡ ደናግል፡ እለ፡ ነሥአ፡ ቅብዓ፡ ዘይት፡ በግምዔ፨
-
- ይኄይስ፡ ፈድፋደ፡ ጊዮርጊስ፡ እምአጥርዮ፡ ብሩር፡ ወወርቅ፨
- ነቢበ፡ ውዳሴከ፡ ዘልፈ፡ በሰዓተ፡ ጽባሕ፡ ወሠርቅ፨
- ትስአል፡ ሊተ፡ በአስተሐምሞ፡ ወጻህቅ፨
- ቅድመ፡ አምላክ፡ ፈጣሪ፡ መኰንነ፡ ሰላም፡ ወዕርቅ፨
- አመ፡ ጉባኤ፡ አእላፍ፡ ወማኅበር፡ ጽፉቅ፨
-
- ሥቃያቲከ፡ ጊዮርጊስ፡ ዘኢየሐልቅ፡ በዜና፨
- አርአያ፡ ሙቁሕ፡ ጳውሎስ፡ ወጴጥሮስ፡ ወልደ፡ ዮና፨
- ለዕበየ፡ ንግሥከ፡ ዓለም፡ ሶበ፡ ነጸረት፡ በዐይና፨
- ከመ፡ ጢስ፡ ወከመ፡ ጊሜ፡ ኡረተ፡ ኃጢአት፡ ከደና፨
- ወገልበበ፡ ልባ፡ ግላ፡ ዕበድ፡ ደመና፨