Malkəʾa Gabra Krəstos (Image of Gabra Krəstos)

- ሰላም፡ ለዝክረ፡ ስምከ፡ በሰመ፡ ወልደ፡ አምላክ፡ ዘተጸውዐ፨
- ለሥዕርተ፡ ርእስከ፡ ካዕበ፡ ዘቅብዐ፡ ቅዳሴ፡ ተቀብዐ፨
- ገብረ፡ ክርስቶስ፡ መናኒ፡ ክብረ፡ ቤተ፡ መንግሥት፡ ወክብረ፡ መርዐ፨
- ከመ፡ ትፈውስ፡ ቍስለ፡ ነፍስየ፡ ውስተ፡ ኵሉ፡ ዘፄአ፨
- እመልዕልተ፡ ሰማይ፡ ፈኑ፡ ፈውሰከ፡ ጽኑዐ፨
- ሰላም፡ ለገጽከ፡ በገርዜነ፡ ብርሃን፡ ግልቡብ፨
- ወለቀራንብቲከ፡ ሰላም፡ ምስለ፡ ዐይንከ፡ ክዑብ፨
- ገብረ፡ ክርስቶስ፡ ጸዋሪ፡ መስቀለ፡ ትዕግሥት፡ ዘዓርብ፨
- እንዘ፡ ትተሉ፡ በድኅሬሁ፡ ለወጣኔ፡ ትዕግሥት፡ ጥበብ፨
- እስከ፡ አመ፡ አዕረፍከ፡ ኀበ፡ ሀሎ፡ ዘሎቱ፡ መዝገብ፨
- ሰላም፡ ለአእዛኒከ፡ ወለመላትሒከ፡ ጥቃ፡ አፍ፨
- ለከናፍሪከ፡ ሰላም፡ መንጦላዕተ፡ አስናን፡ ወአፍ፨
- ገብረ፡ ክርስቶስ፡ ጻድቅ፡ እምጽድቀ፡ ኢዮብ፡ ሱቱፍ፨
- ሥቃየ፡ ዘተወከፍከ፡ በአምሳለ፡ ነዳይ፡ ግዱፍ፨
- ዐቃቤ፡ ይኩነነ፡ እምአርዌ፡ ጽሩፍ፨
- ሰላም፡ ለቃልከ፡ ወለእስትንፋስከ፡ ምዑዝ፨
- ወለጕርዔከ፡ ሰላም፡ እምስቴ፡ ወይን፡ ግዑዝ፨
- ገብረ፡ ክርስቶስ፡ ወጣኒ፡ ወፈጻሜ፡ ዐሥር፡ ትእዛዝ፨
- ኅብአኒ፡ በጽላሎትከ፡ እምነ፡ ወልደ፡ አብ፡ ዐዚዝ፨
- ውስተ፡ ምድረ፡ መርገም፡ ፀጋማዊ፡ ኢይቁም፡ በጋዕዝ፨
- ሰላም፡ ለዘባንከ፡ ወለእንግድዓከ፡ ምስለ፡ ሕፅኑ፨
- ለአእዳዊከ፡ ቅዱሳት፡ ዘአውቃፈ፡ ቀርቅ፡ መነኑ፨
- ገብረ፡ ክርስቶስ፡ ከማከ፡ ኢተንሥአ፡ በበ፡ ዘመኑ፨
- ሕማምኑ፡ ጻዕርኑ፡ ረኀብኑ፨
- ምንዳቤ፡ ሥጋ፡ ዘሞአከ፡ መኑ፨
- ሰላም፡ ለመዛርዒከ፡ ወለእመትከ፡ ምስለ፡ ኵርናዑ፨
- ወለአጻብኢከ፡ ንጹሓት፡ መሥዋዕተ፡ ጸልዮ፡ ዘሦዑ፨
- ገብረ፡ ክርስቶስ፡ አንተ፡ ለወልደ፡ ማርያም፡ ረድኡ፨
- ለፍቁርከ፡ ድኩም፡ እመ፡ ፀርየ፡ ተንሥኡ፨
- ይትኀፈሩ፡ በኀይልከ፡ ወድኅረ፡ ይግብኡ፨
- ሰላም፡ ለአጽፋረ፡ እዴከ፡ ወለገቦከ፡ ጻማዊ፨
- ለመዝገበ፡ ጥበብ፡ ከርሥከ፡ ወለልብከ፡ ለባዊ፨
- ገብረ፡ ክርስቶስ፡ ድንግል፡ እንዘ፡ ስምከ፡ መርዓዊ፨
- መኑ፡ ከማከ፡ ፍቁርየ፡ እምእጓለ፡ እመሕያው፡ ምድርዊ፨
- እንበለ፡ ጠቢብ፡ ኢዮብ፡ በትዕግሥት፡ ዘይደዊ፨
- ሰላም፡ ለሕሊናከ፡ ወለኵልያቲከ፡ ክልኤቲ፨
- ለንዋየ፡ ውስጥከ፡ ሰላም፡ ወለሕንብርትከ፡ አሐቲ፨
- ገብረ፡ ክርስቶስ፡ መናኒ፡ መንግሥተ፡ ሥጋ፡ መዋቲ፨
- ህየንተ፡ ሣቀዩከ፡ በፈቃድከ፡ ሠራዊተ፡ ሰይጣን፡ መስሐቲ፨
- ለዓለመ፡ ሕይወት፡ ሐዳስ፡ ተኀሠይከ፡ ባቲ፨
- ሰላም፡ ለሐቌከ፡ ወለአቍያጺከ፡ ዘይትጋወሩ፨
- ወለአእጋሪከ፡ ከዋዋት፡ ፍኖተ፡ ምናኔ፡ ዘሖሩ፨
- በአማን፡ አንተ፡ ለወልደ፡ ማርያም፡ ገብሩ፨
- አብአኒ፡ ውስተ፡ ቤትከ፡ ዘመብረቀ፡ ስብሐት፡ ዘውሩ፨
- ወከመ፡ በረድ፡ ጽሩይ፡ ዘይመስል፡ ሕብሩ፨
- ሰላም፡ ለሰኰናከ፡ ወለመከየድከ፡ ዘዘዚአሁ፨
- ለአጻብኢከ፡ ሰላም፡ ምስለ፡ አጽፋሪሁ፨
- ገብረ፡ ክርስቶስ፡ መናኒ፡ ለዓለመ፡ ትፍሥሕት፡ ጽርሑ፨
- መጽአት፡ ብእሲትከ፡ እንዘ፡ ቅድሜከ፡ ትላሁ፨
- ኀበ፡ ቦእከ፡ አንተ፡ ዘቦአት፡ ኀቤሁ፨
- ሰላም፡ ለቆምከ፡ ወለመልክእከ፡ አዳም፨
- ለፀአተ፡ ነፍስከ፡ ክቡር፡ በማኅሌተ፡ ዜማ፡ ጥዑም፨
- ገብረ፡ ክርስቶስ፡ ወሬዛ፡ ብጹሐ፡ መዋል፡ ወዐቅም፨
- ምርሐኒ፡ ለፍቁርከ፡ ፍኖተ፡ ጸሎት፡ ወጾም፨
- እስመ፡ ተስፋ፡ ሕይወት፡ ተሠርዐ፡ በሐዳስ፡ ዓለም፨
- ሰላም፡ ለግንዘተ፡ ሥጋከ፡ በአፈወ፡ ከርቤ፡ ወስኂን፨
- ወለመቃብሪከ፡ ሰላም፡ ምስለ፡ ዘዚአሁ፡ ሣፁን፨
- ገብረ፡ ክርስቶስ፡ ወሬዛ፡ ፡ ብጹሐ፡ አምጣን፨
- ሥቃየ፡ ዘተወከፍከ፡ መጠነ፡ ፴፡ ዘመን፨
- መድኅነ፡ ይኩነኒ፡ እምግሩም፡ ደይን፨
- ተዘኪረከ፡ ብዝኀ፡ ብካያ፡ ወጸንዐ፡ ዐቢይ፡ ትካዛ፨
- ለወላዲትከ፡ መርኬዛ፨
- ለናዝዞትየ፡ ነዓ፡ ገብረ፡ ክርስቶስ፡ ወሬዛ፨
- ነፍስየ፡ ፈሪሳዊት፡ ዘግዕዘ፡ ከለባት፡ ግዕዛ፨
- እስመ፡ ረስየተከ፡ ውስተ፡ ኵሉ፡ ጸወነ፡ ወቤዛ፨
- ተዘኪረከ፡ ብዝኀ፡ ብካዮሙ፡ ለአቡከ፡ ወለእምከ፨
- በክብር፡ ወበፍቅር፡ እለ፡ ሐጸኑከ፨
- ገብረ፡ ክርስቶስ፡ ጸወነ፡ እስመ፡ ረሰይኩ፡ ኪያከ፨
- ሀበኒ፡ ዐስበ፡ ፃማየ፡ አምጣነ፡ ተቀነይኩ፡ ለከ፨
- እምሥያመ፡ ጽርዓት፡ ዘመንየ፡ ገቢእየ፡ ሰርከ፨

ተረፈ፡ መልክእ፡
- ሰላም፡ ለከ፡ ገብረ፡ ክርስቶስ፡ ሰላማዊ፨
- ኀዳጌ፡ መርዐ፡ ምድራዊ፨
- ዐጽፈ፡ ድንግልና፡ ሥርግው፡ ወጽዉዕ፡ መርዓዊ፨
- ለከብካብ፡ ሰማያዊ፨
- ሰላም፡ ለከ፡ ሰመየተከ፡ ማርያም፡ ዘእግዚአብሔር፡ ብእሴ፨
- ኀበ፡ ኮንከ፡ ነግደ፡ ወፈላሴ፨
- በአማን፡ ገብረ፡ ሥላሴ፨
- ሰላም፡ ለከ፡ ጥበበ፡ መከርከ፡ ለነሢአ፡ ጸጋ፡ ፍድፉድ፨
- በዴዴ፡ አቡከ፡ ዘትሰመይ፡ ወልድ፨
- ድልው፡ ለብሔረ፡ ባዕድ፨
- ሰላም፡ ለከ፡ እንዘ፡ ይብሉከ፡ ጼአነ፡ ጼና፡ ቅንቱ፡ ቍሱል፨
- ከዐዉ፡ ብከ፡ ሕፃባተ፡ ጻሕል፨
- ኮለ፡ ሐቅል፡ ምዑዘ፡ ገድል፨
- ሰላም፡ ለከ፡ አዕፅምተ፡ እንስሳ፡ ላዕሌከ፡ ሶበ፡ ወገሩ፡ አግብርት፨
- እንዘ፡ ይትናሰኩ፡ ዲቤከ፡ አክልብት፨
- ፈጸምከ፡ ስምዐ፡ ትዕግሥት፨
- ሰላም፡ ለከ፡ ዘመነንኩከ፡ በኢያእምሮ፡ ሶበ፡ መሰልከኒ፡ ነዳየ፨
- አቡከ፡ በከየ፡ እንዘ፡ ይቤ፡ ወይልየ፨
- ወልድየ፡ ወራሴ፡ ንግሥየ፨
- ሰላም፡ ለከ፡ በከየት፡ እምከ፡ መርኬዛ፨
- እንዘ፡ ትሠጥጥ፡ አራዛ፨
- አምጣነ፡ አልቦ፡ በጊዜ፡ ትካዛ፨
- ወልድ፡ ዘይናዝዛ፨
- ሰላም፡ ለከ፡ ብእሲትከ፡ ትብለከ፡ እምከመ፡ ኀደገኒ፡ አንተ፨
- ከመ፡ ዖፈ፡ መንጤጥ፡ ነበርኩ፡ ምታ፡ ዘሞተ፨
- ወኮንኩ፡ መበለተ፨
- ሰላም፡ ለከ፡ በመቃብሪከ፡ ሶቤ፡ እንተ፡ ሠረቀ፡ ብርሃን፨
- በድነ፡ ሥጋከ፡ ፈዋሴ፡ ዱያን፨
- ጽጌ፡ ስኂን፡ ዘወርኀ፡ ታስሪን፨
- ሰላም፡ ለከ፡ በጽሌ፡ ስምከ፡ ለስብሐትየ፡ ጸሐፎ፨
- ተወከፎ፡ ወትረ፡ ወኢትግድፎ፨
- በተፋቅሮ፡ አሀሉ፡ ወበተሳትፎ፨
- ለሰላምየ፡ በሰላም፡ ሕቅፎ፨

መልክአ፡ ገብረ፡ ክርስቶስ፡ Malkəʾa Gabra Krəstos

Image of Gabra Krəstos

Subject