Details
-
- ሰላም፡ ለዝክረ፡ ስምከ፡ በመጽሐፈ፡ ዳንኤል፡ ዘተጠየቀ፨
- እስመ፡ ወርኀ፡ ብስራት፡ ቀርበ፡ ወዘመነ፡ ወንጌል፡ አልጸቀ፨
- ገብርኤል፡ ዘኮንከ፡ ለመገብተ፡ ሐዲስ፡ ሊቀ፨
- ናሁ፡ ወጠንኩ፡ እግዚኦ፡ ከመ፡ እወድስከ፡ ሕቀ፨
- ሞገሰ፡ ጰራቅሊጦስ፡ ጸግወኒ፡ ዘይፌጽም፡ ጻህቀ፨
-
- ሰላም፡ ለሥዕርተ፡ ርእስከ፡ ሥነ፡ ጽእዳዌ፡ ዘለብሰ፨
- አመ፡ ለማርያም፡ አብሰርከ፡ በድንግልና፡ ጸኒሰ፨
- ሐዋርያ፡ ክርስቶስ፡ ገብርኤል፡ እንተ፡ ትትኖለው፡ ሐዲሰ፨
- አጽሕዶ፡ ለሥዕርትየ፡ በቅብአ፡ ኃጥኣን፡ ዘረኵሰ፨
- ወሱጥ፡ በላዕሌሁ፡ ቅብአከ፡ ቅዱሰ፨
-
- ሰላም፡ ለመልክእከ፡ ዘአስተርአየ፡ በሥነ፡ መብረቅ፨
- ዐቀብተ፡ መቃብር፡ ያደንግፅ፡ አመ፡ ትንሣኤሁ፡ ለሊቅ፨
- ዕቀበኒ፡ ገብርኤል፡ ለዐቃቤ፡ ፍቅርከ፡ ጽድቅ፨
- ከመ፡ ይትዐቀቡ፡ በበ፡ በይኖሙ፡ እስከ፡ ኑኀ፡ ዘመን፡ ርኁቅ፨
- ሐዲስ፡ ወይን፡ ወሐዲስ፡ ዝቅ፨
-
- ውዳሴ፡ መልክእከ፡ እንብብ፡ አገበረኒ፡ ፍቅርየ፨
- ወኢተሀበልኩ፡ እንከ፡ በእንተ፡ አእምሮ፡ ዘብየ፨
- ኢይኩን፡ በከ፡ ባሕቱ፡ ግብረ፡ ትጋህየ፨
- ገብርኤል፡ ዕሥየኒ፡ ዕሤተ፡ ሠናየ፡ ዘዐይን፡ ኢርእየ፨
- ወእዝን፡ ኢሰምዐ፡ ውስተ፡ ልበ፡ ሰብእ፡ ዘኢተሐለየ፨