መልክአ፡ ኢየሱስ፡ Malkəʾa ʾIyyasus

Image of Jesus

  1. ማስገቢያ፡
    • ኢየሱስ፡ ኢየሱስ፡ ኢየሱስ፡ ክርስቶስ፨
    • ዘሠረፅከ፡ እምቤተ፡ ሌዊ፡ ኮሬባዊ፡ መለኮታዊ፨
    • ቃል፡ ሰማያዊ፡ እምድንግል፡ ተወልደ፨
    • ሰላም፡ ለዝክረ፡ ስምከ፡ ስመ፡ መሐላ፡ ዘኢይሔሱ፨
    • በአንበረ፡ ቅድመ፡ እግዚአብሔር፡ በአትሮንሱ፨
    • ኢየሱስ፡ ክርስቶስ፡ ለዳዊት፡ ባሕርየ፡ ከርሡ፨
    • አክሊለ፡ ስምከ፡ እንዘ፡ ይትቄጸል፡ በርእሱ፨
    • አህጉረ፡ ፀር፡ ወረሰ፡ ኢያሱ፨
    • ሰላም፡ ለሥዕርተ፡ ርእስከ፡ ዘሥሙር፡ አብቋሉ፨
    • ወጽፉቅ፡ ጥቀ፡ ለአርዘ፡ ሊባኖስ፡ አምሳለ፡ ቈጽሉ፨
    • ኢየሱስ፡ ክርስቶስ፡ ሊቀ፡ ካህናት፡ ዘላዕለ፡ ኵሉ፨
    • ይሠዐል፡ በልሳንየ፡ ለውዳሴ፡ ፊደሉ፨
    • ኢይትገደፍ፡ ዲበ፡ ምድር፡ ንባቡ፡ ወቃሉ፨
    • ሰላም፡ ለዕርገትከ፡ ዘኢይትረከብ፡ መጠኑ፨
    • ወለንብረትከ፡ ሰላም፡ ለአቡከ፡ ውስተ፡ የማኑ፨
    • ኢየሱስ፡ ክርስቶስ፡ እለ፡ ኪያከ፡ ተአምኑ፨
    • ቅዱሳነ፡ ዘእምኀቤከ፡ ወንጹሓነ፡ ይኩኑ፨
    • ጰራቅሊጦስሃ፡ መንፈሰከ፡ ፈኑ፨
    • ሰላም፡ እብል፡ ለምጽአትከ፡ ከዋላ፨
    • በደመና፡ ሰማይ፡ ብርህት፡ ዘትጸድል፡ እምሥነ፡ እብላ፨
    • አመ፡ ትመጽእ፡ በስብሐት፡ ክርስቶስ፡ ርእሰ፡ መሐላ፨
    • ጸውዐነ፡ ለአግብርቲከ፡ ውስተ፡ ዐጸደ፡ ፍግዕ፡ ወተድላ፨
    • ናንሶሱ፡ ምስሌከ፡ በሐዳስ፡ ቀጸላ፨
    • እምሥራቀ፡ ፀሓይ፡ እስከ፡ ነዐረብ፡ ይትአኰት፡ ስሙ፡ ለእግዚአብሔር፡ አምላክነ፨
    • ኪያከ፡ ወልዶ፡ ዘፈነወ፡ ለነ፨
    • ኢየሱስ፡ ክርስቶስ፡ ሊቀ፡ ካህናቲኒ፨
    • አስተጋብአነ፡ ኀበ፡ ትረፍቅ፡ መካነ፨
    • ትሑታነ፡ አግብርቲከ፡ ንሕነ፨
  1. ተረፈ፡ መልክእ፡
    • ስብሐት፡ ለከ፡ አምላኪየ፡ በኍልቈ፡ ኵሉ፡ ሥዕርትየ፨
    • ስብሐት፡ ለከ፡ አምላኪየ፡ በኍልቈ፡ ኵሉ፡ አዕጽምትየ፨
    • ስብሐት፡ ለከ፡ አምላኪየ፡ በኍልቈ፡ ኵሉ፡ ዘተርእየ፨
    • ስብሐት፡ ለከ፡ አምላኪየ፡ በኍልቈ፡ ኵሉ፡ ዘኢያስተርአየ፨
    • ስብሐተ፡ ሥላሴከ፡ ወትረ፡ ይነግር፡ አፉየ፨
    • እምኵሉ፡ ይኄይስ፡ በሥላሴከ፡ ተአምኖ፨
    • ወበወላዲትከ፡ ተማሕፅኖ፨
    • ኢየሱስ፡ ክርስቶስ፡ እምቤተ፡ መንግሥት፡ ወተክህኖ፨
    • ተሰብኦተከ፡ እመቦ፡ ዘያስተሐቅር፡ መኒኖ፨
    • ያንኰርኵር፡ ታሕተ፡ ደይን፡ ግዱፈ፡ ከዊኖ፨
Bibliography Z
Habtemichael Kidane. “Mälkǝʾa Iyäsus.” In Encyclopaedia Aethiopica, edited by Siegbert Uhlig, III:705a–705b. Wiesbaden: Harrassowitz Verlag, 2007.
Tedros Abraha. “Il Mälkə‘a ’Iyyäsus (Effigie di Gesù).” Orientalia Christiana Periodica 71 (2005): 97–120.
መልክአ ቅዱሳን በዐማርኛ. አዲስ አበባ: ማኅበረ ቅዱሳን, ፳፻፲፫ ዓ/ም.
መልክዐ ጉባኤ. አሥመራ: ኮከበ ጽባሕ, ፲፱፻፸፬ ዓ/ም.
ኃይለ ሚካኤል ተስፋ ኢየሱስ, and ዘይቤ ሚካኤል, eds. ዝክረ አበው መልክአ ጉባኤ ወመዝገበ ጸሎት በልሳነ ግዕዝ ባለ መቶ አሥራ አራት አርእስት፣ በማኅሌት ጊዜም አንድኛና ሁለትኛ መክፈያዎችን ያያካተተ መጽሐፍ እነሆ።, n.d.