Subjects
Martyr
ጊዮርጊስ፡
Giyorgis
George
George
Malkəʾ
-
- ሰላም፡ ለዝክረ፡ ስምከ፡ ሞገስ፡ ዘቦ፨
- ወለአክሊልከ፡ ሰላም፡ ሱራሄ፡ መለኮት፡ ዘይገለብቦ፨
- ጊዮርጊስ፡ ፈድፋደ፡ ለጣዕመ፡ ስምከ፡ አስተዐጽቦ፨
- ነዳይኒ፡ ሲሳየ፡ ዕለት፡ ዘአልቦ፨
- በስምከ፡ እምወፍሩ፡ የዐቱ፡ ጸጊቦ፨
-
- ሰላም፡ ለሥዕርተ፡ ርእስከ፡ ከመ፡ እንተ፡ ሜላት፡ ፍቱል፨
- ወለርእስከ፡ ሰላም፡ ዘድምድማሁ፡ ድሉል፨
- ጊዮርጊስ፡ ኮከብ፡ እምከዋክብት፡ ጽዱል፨
- ይስቅየኒ፡ ለለ፡ ጽባሑ፡ ቅብአ፡ ርእሱ፡ ጥሉል፨
- ከመ፡ ይስቅያ፡ ዝናመ፡ ሣህል፡ ለጽምዕት፡ ሐቅል፨
-
- ሰላም፡ ለግንዘትከ፡ ለክርስቲያን፡ ከመ፡ ሕጎሙ፨
- ወለመቃብሪከ፡ ሰላም፡ ለሥጋ፡ ምስያሙ፨
- ጊዮርጊስ፡ ወሬዛ፡ ለክርስቶስ፡ ገባእተ፡ ስሙ፨
- ጾርኮ፡ ለሕማሙ፡ ወተዐገሥከ፡ ለድካሙ፨
- ከመ፡ ትንግሥ፡ ምስሌሁ፡ በሐዳስ፡ ዓለሙ፨
-
- ሰላም፡ ለመልአ፡ ሥጋከ፡ ለዓሥር፡ ከፍል፡ ዘተመትረ፨
- ወለአስራውከ፡ ሰላም፡ እለ፡ ተበትከ፡ ኅቡረ፨
- ጊዮርጊስ፡ ብከ፡ እግዚአ፡ ብርሃናት፡ ዘሠምረ፨
- ፈድፋደ፡ ኂሩትከ፡ በላዕሌየ፡ ተነክረ፨
- ወበኀበ፡ ኵሎን፡ መካናት፡ ኵነኒ፡ መዝሙረ፨
-
- ሰላም፡ ለአምትንቲከ፡ ለስምዐ፡ ገድል፡ እምጻመዋ፨
- ወለአዕጽምቲከ፡ ሰላም፡ ውስተ፡ ደብረ፡ ኤድራስ፡ ዘተዘርዋ፨
- ጊዮርጊስ፡ ምዑዝ፡ ለቤተ፡ ክርስቲያን፡ አፈዋ፨
- ማሕሌተ፡ አፉየ፡ መልዕልተ፡ ደመናት፡ ዐዲዋ፨
- በገራህተ፡ ልብየ፡ ትፍረይ፡ አእላፈ፡ መንቲዋ፨
-
- ሰላም፡ ቃለ፡ ማሕሌት፡ ዘአቅረብኩ፡ ለከ፡ በወውኦ፨
- ቅዱስ፡ ወቡሩክ፡ ረሲ፡ እግዚኦ፨
- ጊዮርጊስ፡ ኀይለ፡ ኩነኒ፡ እምተመውኦ፨
- ከመ፡ ንጥረ፡ መብረቅ፡ ረድኤትከ፡ እመንገለ፡ ሰማይ፡ መጺኦ፨
- ለዘያጻረረኒ፡ በዐመፃ፡ ፍጡነ፡ ይጽብኦ፨