Malkəʾa Mikāʾel (Image of Michael)

ማስገቢያ፡
- አንሥእ፡ ኀይለከ፡ ወነዓ፡ አድኅነነ፨
- ሚካኤል፡ ርድአነ፨
- በጸሎትከ፡ ተማሕፀነ፨
- አርዌ፡ እኩይ፡ ኢይምአነ፡ ወኢይምሥጠነ፨
- እምነ፡ ገነቱ፡ ዘሄዶ፡ ለአዳም፡ አቡነ፨
- በስመ፡ እግዚአብሔር፡ ዘይነብር፡ ማኔ፨
- ወበስመ፡ እግዚአብሔር፡ ወልድ፡ ሥጋ፡ ማርያም፡ ተከዳኔ፨
- ወበስመ፡ እግዚአብሔር፡ መንፈስ፡ ቅዱስ፡ ዘይሥዕር፡ ግማኔ፨
- እወጥን፡ ዝክረ፡ ውዳሴከ፡ በሐዳስ፡ ኵርጓኔ፨
- ቤዝወኒ፡ ሚካኤል፡ እምሲኦል፡ ኵነኔ፨

- ሰላም፡ ለዝክረ፡ ስምከ፡ ምስለ፡ ስመ፡ ልዑል፡ ዘተሳተፈ፨
- ወልደ፡ ያሬድ፡ ሄኖክ፡ በከመ፡ ጸሐፈ፨
- ሶበ፡ እጼውዕ፡ ስመከ፡ ከሢትየ፡ አፈ፨
- ራዳኤ፡ ምንዱባን፡ ሚካኤል፡ በከመ፡ ታለምድ፡ ዘልፈ፨
- ለረዲኦትየ፡ ነዓ፡ ሰፊሐከ፡ ክንፈ፨
- ሰላም፡ ለሥዕርተ፡ ርእስከ፡ ዘኢይጤየቅ፡ ግዕዛ፨
- ሚካኤል፡ ካህን፡ አጸንሓሔ፡ ሠናይ፡ ጼና፡ መዐዛ፨
- በጺሐከ፡ ግብተ፡ ለነፍስየ፡ አመ፡ ትካዛ፨
- ለልበ፡ ዚአየ፡ በትንባሌከ፡ ናዝዛ፨
- እንበለ፡ ጊዜ፡ ወላሕ፡ ኢይርሳዕ፡ ወሬዛ፨
- ሰላም፡ ለቆምከ፡ ዘአሕመልመለ፡ ከመ፡ ዘግባ፨
- ለጽርሐ፡ አርያም፡ በዐውደ፡ መርኅባ፨
- ሚካኤል፡ የዋህ፡ ለገነተ፡ ሰማይ፡ ርግባ፨
- ከመ፡ ይዜውራኒ፡ ለመርቄ፡ ኀጢአት፡ እምላህባ፨
- አክናፊከ፡ ክልኤ፡ ዲቤየ፡ ይርብባ፨
- ሰላም፡ ሰላም፡ ለመላክኢከ፡ ኵሎን፨
- በበ፡ አስማቲሆን፨
- ሚካኤል፡ ካህን፡ ሥርግወ፡ ብርሃን፨
- ሠናይ፡ ተዐርኮትከ፡ በኵሉ፡ ዘመን፨
- ሰራዬ፡ ኀጢአት፡ አንተ፡ ዐርከ፡ ነፍስ፡ ምእመን፨
- አምኃ፡ ሰላም፡ አቅረብኩ፡ ለመላክኢከ፡ ኵሉ፨
- ለለ፡ አሐዱ፡ አሐዱ፡ ዘበበ፡ ክፍሉ፨
- ሚካኤል፡ ብኩር፡ ለልዑል፡ መልአከ፡ ኀይሉ፨
- ተወኪፈከ፡ አምኃየ፡ እምኑኀ፡ ሰማያት፡ ዘላዕሉ፨
- ዕሤተ፡ ጸሎትየ፡ ፈኑ፡ ወዐስብየ፡ ድሉ፨

መልክአ፡ ሚካኤል፡ Malkəʾa Mikāʾel

Image of Michael

Subject