Subjects
Righteous
ምኒልክ፡
Mənilək
Mənilək II
Mənilək II
Malkəʾ
-
- ሰላም፡ ለዝክረ፡ ስምከ፡ መልዕልተ፡ ኵሉ፡ ዘኮነ፨
- ወበግርማሁ፡ ግሩም፡ እንተ አጥፍን፡ ኢጣሊያነ፨
- ንጉሠ፡ ነገሥት፡ ምኒልክ፡ ዘኢትዮጵያ፡ መድኅነ፨
- ቀተልኮ፡ ለአላዊ፡ በምድረ፡ ትግሬ፡ መካነ፨
- ምስለ፡ ባሺ፡ ብዙቂሁ፡ ዘርዘርኮ፡ ወረሰይኮ፡ በድነ፨
-
- ሰላም፡ ለስእርተ፡ ርእስከ፡ አምሳለ፡ ኀሪር፡ ፍቱል፨
- ወስእነ፡ አርአያሁ፡ ጸሊም፡ አርአያ፡ ኵህል፨
- ንጉሠ፡ ነገሥት፡ ምኒልክ፡ ፈጻሜ፡ ቃላተ፡ ወንጌል፨
- እስመ፡ ተማኅጸንኩ፡ አነ፡ በዘዚአከ፡ ሳህል፨
- ታከብርሂ፡ ወፍጡነ፡ ታብዕል፨
-
- ሰላም፡ ለርእስከ፡ ዘበላዕሌሁ፡ ዘውደ፨
- ዘይመስል፡ ቀስተ፡ ደመና፡ ወእንቈ፡ ጳዝዮን፡ ክቡደ፨
- ንጉሠ፡ ነገሥት፡ ምኒልክ፡ ዘተክለ፡ ገነት፡ ዓጸደ፨
- መንግሥትከሰ፡ እምነ፡ ሰሎሞን፡ ፈድፈደ፨
- ከፋ፡ ወባሕር፡ ረሰይከ፡ አሐደ፨
-
- ሰላም፡ ለገጽከ፡ ከመ፡ ገጸ፡ አንበሳ፡ ዘገዳም፨
- ወጽዱል፡ ንጻሬሁ፡ ከመ፡ እንቈ፡ ሰም፨
- ንጉሠ፡ ነገሥት፡ ምኒልክ፡ ዘመንበርከ፡ ግሩም፨
- ቀተልከ፡ አላዌ፡ ዘመጽአ፡ እምብሔረ፡ ሮም፨
- ወነፍሱሂ፡ ተወድየ፡ ውስተ፡ ገሃነም፨
-
- ሰላም፡ ለቀራንብቲከ፡ ከመ፡ ሜላት፡ ርሱይ፨
- ጥቀ፡ አዳም፡ ወጥቀ፡ ሠናይ፨
- ንጉሠ፡ ነገሥት፡ ምኒልክ፡ ዘኢትዮጵያ፡ ፀሐይ፨
- አጥፋዕኮ፡ ለባሺ፡ ብዙቅ፡ በምክረ፡ ዚአከ፡ ጊጉይ፨
- ሥጋሁ፡ ለመጥባሕት፡ ወነፍሱ፡ ለእሳተ፡ ሰማይ፨
-
- ሰላም፡ ለአዕይንቲከ፡ ከመ፡ ዐይነ፡ ጳውሎስ፡ ሐዋርያ፨
- አምሳለ፡ ብረሌ፡ ጽዱል፡ ወመንክር፡ ለአርአያ፨
- ንጉሠ፡ ነገሥት፡ ምኒልክ፡ ለኢትዮጵያ፡ ፀሐያ፨
- ሶበ ተፈጸመ፡ ወሞተ፡ አይሁዳዊ፡ ኢጣልያ፨
- ወይሌ፡ ወላህ፡ ኮነ፡ በሮምያ፨
-
- ሰላም፡ ለአዕዛኒከ፡ ስዕለተ፡ ነዳይ፡ ዘያጽምዓ፨
- ሶበ፡ ይሰዕል፡ ኀቤከ፡ ወይጸርሕ፡ በውውዓ፨
- ንጉሠ፡ ነገሥት፡ ምኒልክ፡ ዘኢትዮጽያ፡ እግዚኣ፨
- ዘይገርምሰ፡ ዘማዕድከ፡ መብልዓ፨
- ዘይትሃረጽ፡ የፈ፡ ወለፈ፡ ገንዓ፨
-
- ሰላም፡ ለመላትኒከ፡ ከመ፡ ጽጌ፡ ሮማን፡ ቀይህ፨
- ዘይዔድም፡ ጥቀ፡ እምነ፡ ፀሐይ፡ ወወርኅ፨
- ንጉሠ፡ ነገሥት፡ ምኒልክ፡ ኮከበ፡ ጽባሕ፡ ብሩኅ፨
- ሶበ፡ ተንሣእከ፡ አንተ፡ ምስለ፡ ሠራዊትከ፡ ብዙኅ፨
- ጀነራል፡ ጠፍን፡ ወደምሰሰ፡ አይኅ፨
-
- ሰላም፡ ለአዕናፊከ፡ ከመ፡ ፄና፡ ገነት፡ ምዑዝ፨
- ሱራሬሆን፡ ሠናይ፡ ወጥቀ፡ ሐዋዝ፨
- ንጉሠ፡ ነገሥት፡ ምኒልክ፡ ዘኢትዮጵያ፡ አርዝ፡
- ሶበ፡ ተለቅሃ፡ ኢጣሊያ፡ ወርቀ፡ አይሁደዊ፡ እንግሊዝ፨
- ዘይከፍል፡ ስዕነ፡ አሐዞ፡ ትካዝ፨
-
- ሰላም፡ ለከናፍሪከ፡ እለ፡ ሰብሑ፡ ለእግዚአብሔር፨
- ሤመከ፡ ትኩን፡ እግዚአ፡ ኵሉ፡ ፍጡር፨
- ንጉሠ፡ ነገሥት፡ ምኒልክ፡ መሐሪ፡ ወኄር፨
- ሶበ፡ ተባረቀ፡ ፉዚግራ፡ ወተዘርአ፡ ዓረር፡
- ኢጣሊያ፡ ደንገፀ፡ ወውሕጠቶ፡ ምድር፨
-
- ሰላም፡ ለአፉከ፡ ለፈጣሪ፡ ዘየአኵቶ፨
- ኢይትናገር፡ ስላቀ፡ ወኢይነብብ፡ ከንቶ፨
- ንጉሠ፡ ነገሥት፡ ምኒልክ፡ ለኢትዮጵያ፡ ማኅቶቶ፨
- ሐልቀ፡ ማንጆር፡ ወስዕነ፡ ፍኖቶ፨
- ጀነራል፡ ባራቴሪ፡ ሶበ፡ ገብዓ፡ ደንገፀ፡ ዖምበርቶ፨
-
- ሰላም፡ ለአስናኒከ፡ እለ፡ ይጸአድዋ፡ እምበረድ፨
- ሠናይ፡ ፍጥረቶን፡ ወጥቀ፡ ብዑድ፨
- ንጉሠ፡ ነገሥት፡ ምኒልክ፡ ሥዩመ፡ ክርስቶስ፡ ወልድ፨
- ሶበ፡ ተባረቀ፡ ፉዚግራ፡ ከመ፡ ነጐድጓድ፨
- ኢጣሊያ፡ ፈርሃ፡ ወአሐዞ፡ ረዓድ፨
-
- ሰላም፡ ለልሳንከ፡ እንተ፡ ምዕዝት፡ ይእቲ፨
- ሠናይ፡ ትትናገር፡ ወእኩይ፡ አልባቲ፨
- ንጉሠ፡ ነገሥት፡ ምኒልክ፡ ሃይማኖትከ፡ አሐቲ፨
- አጥፋዕኮ፡ ለኢጣሊያ፡ እህው፡ ሰይጣን፡ መስሐቲ፨
- ጐየ፡ ግብጣን፡ ወሞተ፡ ትልንቲ፨
-
- ሰላም፡ ለቃልከ፡ እንተ፡ ኢይነብብ፡ ጽርፈተ፨
- እንበለ፡ ዳዕሙ፡ ዘአምላክ፡ ስብሐተ፨
- ንጉሠ፡ ነገሥት፡ ምኒልክ፡ ወልደ፡ ሰሎሞን፡ አንተ፨
- ሶበ፡ ሖርከ፡ ትግሬ፡ ሰሰለ፡ ጽልመተ፨
- ተኃጕለ፡ ሰይጣን፡ ወጀነራል፡ ሞተ፨
-
- ሰላም፡ ለእስትንፋስከ፡ እስትንፋሰ፡ መልአክ፡ አምሳሉ፨
- ዘአድኅኖ፡ ለድውይ፡ ዘሐመ፡ አባሉ፨
- ወልደ፡ ሰሎሞን፡ ምኒልክ፡ እግዚአ፡ ኵሉ፨
- ተበቀልኮሙ፡ ለአይሁድ፡ ሶበ፡ እግዚኦሙ፡ ሰቀሉ፨
- ተፈጸመ፡ ኢተርፈ፡ ፩ደ፡ እምእሉ፨
-
- ሰላም፡ ለጉርዔከ፡ መዓርዔር፡ ጣዕሙ፨
- ዘኢይፈርሁ፡ ሞተ፡ ሠራዊትከ፡ ኵሎሙ፨
- ንጉሠ፡ ነገሥት፡ ምኒልክ፡ለአዕላፈ፡ አእላፋት፡ ሊቆሙ፨
- አሐደ፡ ዕስላም፡ ማንጆር፡ ገልያኖ፡ ዘስሙ፨
- ሠናየ፡ ፉዚግራ፡ ኮነ፡ ወተክእው፡ ደሙ፨
-
- ሰላም፡ ለክሣድከ፡ ከመ፡ አርማስቆስ፡ ስኑ፨
- ቃማ፡ ወርቅ፡ ጽሩይ፡ ዘኮነ፡ ክዳኑ፨
- ወልደ፡ሰሎሞን ምኒልክ ሰዳዴ፡ሰይጣናት በሥልጣኑ።
- ሶበ፡ አተብከ፡ ሠይፈከ፡ አውአዮሙ፡ ርስኑ፨
- ተዘርዉ፡ ከመ፡ ጢስ፡ ወአብድንተ፡ ኮኑ፨
-
- ሰላም፡ ለመትከፍትከ፡ ዓርዑተ፡ ወንጌል፡ ዘፆረ፡
- ኢያዕመረ፡ ከልዓ፡ እምአመ፡ ተፈጥረ፨
- ንጉሠ፡ ነገሥት፡ ምኒልክ፡ ዕንቈ፡ ኢያሴጲድ፡ ክቡረ፨
- ለጸብዕ፡ ሶበ፡ ኃለየ፡ ፈረሰ፡ እሳት፡ ሠረረ፨
- አውአዮሙ፡ ነዱ፡ ወኮነ፡ ሐሠረ፨
-
- ሰላም፡ ለዘባንከ፡ ሜላተ፡ ወርቅ፡ ልብሱ፨
- ጥቀ፡ ሠናይ፡ ወአዳም፡ ሞገሱ፨
- ንጉሠ፡ ነገሥት፡ ምኒልክ፡ ዘነደ፡ እሳት፡ ፈረሱ፨
- ዘመጽኡ፡ እምሮሜ፡ ሶበ፡ ኪያሁ፡ ኃሡሡ፨
- አክልብተ፡ አድዋ፡ በልዕዎሙ፡ ወደሞሙ፡ ለሐሱ፨
-
- ሰላም፡ ለእንግድኣከ፡ ዘይትሞጣሕ፡ ልብሰ፡ መንግሥት፨
- ዘወሀበከ፡ ለሊሁ፡ እግዚአብሔር፡ ጸባዖት፨
- ንጉሠ፡ ነገሥት፡ ምኒልክ፡ ወልደ፡ ወልዱ፡ ለዳዊት፡
- ዘመጽኡ፡ ኀቤከ፡ ዓረማውያን፡ ጸላዕት፨
- አውአዮሙ፡ ፉዚግራ፡ ወበልዖሙ፡ እሳት፨
-
- ሰላም፡ ለሕጽንከ፡ ከመ፡ ስሂን፡ ወርሄ፨
- ዘይትዓኰት፡ እምኵሉ፡ ወይሴባሕ፡ ስባሔ፨
- ወልደ፡ ሰሎሞን፡ ምኒልክ፡ ንጉሠ፡ ርኅራኄ፨
- ዘመጽኡ፡ ጸላዕትከ፡ ተሰጥሙ፡ ኵለሄ፨
- እስመ፡ ፈጻሜ፡ ፈቃዱ፡ አንተ፡ ለአምላክ፡ ዔሎሄ፨
-
- ሰላም፡ ለአዕደዊከ፡ እንተ፡ አኃዛ፡ ሰይፈ፨
- ከመ ይምትራ፡ለባሺ፡ብዙቅ አምነፉዚግራ፡ዘተርፈ።
- ንጉሠ፡ ነገሥት፡ ምኒልክ፡ እንተ፡ ትኵንን፡ አዕላፈ፨
- አፍቀረከ፡ አምላክ፡ ወጸሎተከ፡ ተወክፈ፨
- ተፈጸሙ፡ ጸላዕትከ፡ አሐዱ፡ ኢተርፈ፨
-
- ሰላም፡ ለመዘርዒከ፡ ከመ፡ መዘርዓ፡ አንበሳ፡ ወድብ፨
- በፈትለ፡ ወርቅ፡ ርሱይ፡ ወበልብሰ፡ ሜላት፡ ግልቡብ፨
- ንጉሠ፡ ነገሥት፡ ምኒልክ፡ ኰናኔ፡ ሕዝብ፡ ወአሕዛብ፨
- በዘመንከ፡ ትፍሥሕት፡ ወጥቀ፡ ጽጋብ፨
- ውኂዘ፡ መዓር፡ ወመልዓ፡ ሐሊብ፨
-
- ሰላም፡ ለኵርናዕከ፡ ኃይለ፡ ኢጣልያ፡ ዘአድከመ፨
- ሶበ፡ ሰበሮ፡ ለሐመሩ፡ በከመ፡ ፈርዖን፡ ተሰጥመ፨
- ንጉሠ፡ ነገሥት፡ ምኒልክ፡ አንተ፡ ትኵንን፡ ዓለመ፨
- አጥፋዕኮ፡ ለዓላዊ፡ ዘአርአያ፡ ገጹ፡ ኅሡመ፨
- እስከ፡ አውአዮ፡ ፉዚግራ፡ ወአንደደ፡ ፍህመ፨
-
- ሰላም፡ ለእመትከ፡ አምሳለ፡ መባርቅት፡ ኅብሩ፨
- ጥቀ፡ ሠናይ፡ ወአዳም፡ ምሥጢሩ፨
- ንጉሠ፡ ነገሥት፡ ምኒልክ፡ ለእግዚአብሔር፡ ፍቁሩ፨
- ርኁባነ፡ ከዊኖሙ፡ ሶበ፡ ርእዮሙ፡ ለፀሩ፨
- አረረ፡ መጠዎሙ፡ ፉዚግራ፡ ተጻሩ፨
-
- ሰላም፡ ለእራኅከ፡ ኃይለ፡ ኃጥዓን፡ መቅሰሌ፨
- ለፀሩ፡ ይትቤቀል፡ ወለፍቁራኒሁ፡ ከሃሌ፨
- ወልደ፡ ሰሎሞን፡ ምኒልክ፡ ፅዱል፡ ከመ፡ ብረሌ፨
- አይቴ፡ እግብእ፡ አነ፡ ሰዓተ፡ ብካይ፡ ወወይሌ፨
- እንዘ፡ ይብል፡ አስቆቀወ፡ ማንጆር፡ ወመቀሌ፨
-
- ሰላም፡ ለአፃብኢከ፡ ህልቀተ፡ ወርቅ፡ ዘላዕሌሁ፨
- ዘግሩም፡ ለራእዩ፡ ወመንክር፡ ለንጻሬሁ፨
- ንጉሠ፡ ነገሥት፡ ምኒልክ፡ ወልደ፡ ሰሎሞን፡ ለሊሁ፨
- ሶበ፡ ርእዮሙ፡ ሰይፈ፡ እሳት፡ እኂዞ፡ ውስተ፡ እዴሁ፨
- ሰብአ፡ ሮሜ፡ ጥቀ፡ ደንገፁ፡ ወፈርሁ፨
-
- ሰላም፡ ለአጽፋረ፡ እዴከ፡ ዘጥቀ፡ ሠናያን፨
- ዘይዔድማ፡ ለእዝን፡ ወይጌርማ፡ ለዓይን፨
- ንጉሠ፡ ነገሥት፡ ምኒልክ፡ ከመ፡ ዕንቍራ፡ ማይ፡ ዘልብን።
- ሶበ፡ ሖርከ፡ ትግሬ፡ እኂዘከ፡ መስቀለ፡ ብርሃን፨
- ጐየ፡ ሰይጣን፡ ምስለ፡ ባሺ፡ ብዙቂሁ፡ ጸዋጋን፨
-
- ሰላም፡ ለገቦከ፡ ዲበ፡ ዓራተ፡ ወርቅ፡ ዘሰከበ፨
- ነቢሮ፡ ላዕሌሁ፡ ከመ፡ ይኴንን፡ አሕዛበ፨
- ንጉሠ፡ ነገሥት፡ ምኒልክ፡ ለእጓለ፡ ማውታ፡ አበ፨
- ፍቁር፡ በኀበ፡ ማርያም፡ ወፍቁረ፡ ጊዮርጊስ፡ ካዕበ፨
- ረሰየ፡ ትኩን፡ ዘመና፡ መሶበ፨
-
- ሰላም፡ ለከርስከ ኃዳጌ፡ በቀል፡ ውእቱ፨
- ዘእንበለ፡ ምሕረት፡ ለአባስያን፡ ወካዕበ አልቦቱ፨
- ወልደ፡ ሰሎሞን፡ ምኒልክ፡ ፍቁረ ኪሩባውያን፡ ፬ቱ፨
- እምባሕረ፡ ወዳሴከ፡ አይኅ፡ ዘቶሳህኩ፡ ዝንቱ፨
- ጸሐፌ፡ ትእዛዝ፡ ያንብቦ፡ ኢይኩን፡ ለክንቱ፨
-
- ሰላም፡ ለልብከ፡ ዘኢየአምር፡ ተቀይሞ፨
- እንበለ፡ ዳዕሙ፡ አርመሞ፨
- ወልደ፡ ሰሎሞን፡ ምኒልክ፡ ርኄ፡ አፈው፡ ዘቀናንሞ፨
- ፈጸሞ፡ ለኢጣልያ፡ ወከዓዉ፡ ደሞ፨
- ወለባሺ፡ ብዙቅኒ፡ በአፈ፡ መጥባሕት፡ ገዘሞ፨
-
- ሰላም፡ ለኵልያቲከ፡ ኵልያተ፡ መንፈስ፡ ቅብዓ፨
- በፍቅረ፡ ክርስቶስ፡ ወይን፡ ዘኮነ፡ ጥብአ፨
- ወልደ፡ ሰሎሞን፡ ምኒልክ፡ ንጉሠ፡ ውሳጤ፡ ወአፈአ፨
- አሐዱ፡ ቃል፡ እምአፉከ፡ ሶበ፡ ወጽአ፨
- አይሁዳዊ፡ ተፈጸመ፡ ወጠፍአ፨
-
- ሰላም፡ ለሕሊናከ፡ ሕሊና፡ ሠናይ፡ ማኅየዊ፨
- አረማውያነ፡ ይጽልእ፡ ወለክርስቲያን፡ ጸጋዊ፨
- ወልደ፡ ሰሎሞን፡ ምኒልክ፡ ፍቁረ፡ ኢየሱስ፡ ናዝራዊ፨
- አጥፋእኮ፡ ለሰይጣን፡ ወቀጥቀጥከ፡ አርዊ፨
- እስመ፡ ያፈቅረከ፡ ጥቀ፡ አምላክከ፡ ሰማያዊ፨
-
- ሰላም፡ ለሕንብርትከ፡ ከመ፡ ዓይነ፡ ማኅተም፡ አምሳሉ፨
- ዘፈጠሮ፡ በጥበቢሁ፡ ጸባዖት፡ እግዚአ፡ ኵሉ፨
- ንጉሠ፡ ነገሥት፡ ምኒልክ፡ ለኢትዮጵያ፡ ፀዳሉ፨
- ሶበ፡ ተባረቀ፡ ፉዚግራ፡ ከመ፡ ነጐድጓድ፡ ቃሉ፨
- ተሰብረ፡ ወጨፎ፡ ወተክዕወ፡ አባሉ፨
-
- ሰላም፡ ለሐቌከ፡ ቅናተ፡ ወርቅ፡ ዘአጠቀ፨
- ዘይኤድም፡ ለንጻሬሁ፡ እንዘ፡ ሀሎ፡ ርኁቀ፨
- ንጉሠ፡ ነገሥት፡ ምኒልክ፡ወእግዚአ፡ፉዚግራ፡መብረቀ፨
- ኀልቀ፡ እደዊሁ፡ ምስለ፡ ባሺ፡ ብዙቂሁ፡ ጥዩቀ፨
- ወጀነራልኒ፡ እንዘ፡ ይጐይይ፡ ወድቀ፨
-
- ሰላም፡ ለአቈያጺካ፡ ከመ፡ አምደ፡ ወርቅ፡ ፍሉጠ፨
- ኣይዴምን፡ ስኑ፡ ወኢየአምር፡ ተውላጠ፨
- ንጉሠ፡ ነገሥት፡ ምኒልክ፡ ዘኢየሩሳሌም፡ ሠግላጠ፨
- ዘፉዚግራ፡ ቅብዕ፡ ዲበ፡ ርእሰ፡ ኢጣልያ፡ ሶበ፡ ተሠጠ፨
- ተሰብረ፡ ናሁ፡ ወጥቀ፡ ተቀጥቀጠ፨
-
- ሰላም፡ እብል፡ ወዘዚአከ፡ አብራክ፨
- በትሕትና፡ ሕሊና፡ ዘልፈ፡ እንተ፡ ትሰግዶ፡ ለአምላክ፨
- ንጉሠ፡ ነገሥት፡ ምኒልክ፡ መሐሪ፡ ወቡሩክ፨
- ተፈጸመ፡ አረማዊ፡ በሰንበተ፡ ጽባህ፡ ወሰርክ፨
- ሶበ፡ ረድአከ፡ ለሊሁ፡ ልዳዊ፡ መልኣክ፨
-
- ሰላም፡ ለአእጋረከ፡ ብሔረ፡ ትግሬ፡ ዘሖራ፨
- ከመ ይፈጽማ ለኢጣልያ፡ ወአእጋራ፡ ባሺ ብዙቅ ይመትራ።
- ንጉሠ፡ ነገሥት፡ ምኒልክ፡ ወሊቀ፡ አዕላፍ፡ ሐራ፨
- ዘደረስኩ፡ አነ፡ ለመልአክከ፡ ክብራ፨
- ያንብባ፡ በቅድሜከ፡ ጸሓፌ፡ ትእዛዝ፡ ዕብራ፨
-
- ሰላም፡ ለሰኳንዊከ፡ እንተ፡ ይመስላ፡ አእማደ፡ ወርቅ፨
- ዘህበሪሆን፡ ሠናይ፡ ወጥቀ፡ ጥንቁቅ፨
- ንጉሠ፡ ነገሥት፡ ምኒልክ፡ እግዚአ፡ ፉዚግራ፡ መብረቅ፨
- ሶበ፡ ሰአልከ፡ በይዋሄ፡ ለጊዮርጊስ፡ ጻድቅ፨
- ፈጸሞሙ፡ ለጸላዕትከ፡ ዘመጽኡ፡ እምርሁቅ፨
-
- ሰላም፡ ለመኪየድከ፡ አሣእነ፡ ወርቅ፡ ተረሰየ፨
- ዘያሐውር፡ በርትዕ፡ ወኢየአምር፡ ጌጋየ፨
- ንጉሠ፡ ነገሥት፡ ምኒልክ፡ ዘኢትዮጽያ፡ ፀሐየ፨
- ተሐውከት፡ እምሮምያ፡ እንዘ፡ ሀሎከ፡ ዝየ፨
- ሶበ፡ ሰምአት፡ በእዝና፡ ዘዚአከ፡ ዕበየ፨
-
- ሰላም፡ ለአጻብኢከ፡ በፍቅረ፡ ክርስቶስ፡ ቅብእ፨
- ዘይመስል፡ ሮማነ፡ ወዕንቈ፡ ጳዝዮን፡ ስኩዕ፨
- ወልደ፡ ሰሎሞን፡ ምኒልክ፡ ፈጻሜ፡ ኢጣልያ፡ በሰንእ፨
- ዘመጽኡ፡ በሐመር፡ አረማውያን፡ ሰብእ፨
- ማየ፡ ኢትዮጵያ፡ ውኅጦሙ፡ በኃይልከ፡ ጽኑዕ፨
-
- ሰላም፡ ለአጽፋረ፡ እግርከ፡ መጽሔተ ብርሃን ዘይመስላ።
- ለመንግሥትከ፡ ሰላም፡ ዘኢይደመን፡ ጸዳላ፨
- ንጉሠ፡ ነገሥት፡ ምኒልክ፡ ኰናኔ፡ ዓላማት፡ ኵላ፨
- ፈጸምኮ፡ ለኢጣልያ፡ ለብሔረ፡ ትግሬ፡ በማእከላ፨
- ተፈሥሐት፡ ኢትዮጵያ፡ ወገብረት፡ ተድላ፨
-
- ሰላም፡ ለቆምከ፡ እምስነ፡ በቀልት፡ ዘይሰኒ፨
- ሠናይ፡ ውእቱ፡ ወአልቦቱ፡ ምንትኒ፨
- ንጉሠ፡ ነገሥት፡ ምኒልክ፡ አጽናፈ፡ ዓለም፡ ኰናኒ፨
- ከመ፡ አድኅንከ፡ ለኢትዮጵያ፡ እምደመ፡ ሰይጣን ተቃራኒ፨
- ፉዚግራከ፡ ጽኑዕ፡ ወልታ፡ ይኵነኒ፨
-
- ሰላም፡ ለመልክእከ፡ ዘስነ፡ ራእዩ፡ ፍትው፨
- መአድም፡ ስኑ፡ ወጥቀ፡ ቅድው፨
- ወልደ፡ ሰሎሞን፡ ምኒልክ፡ ፍቁረ፡ ክርስቶስ፡ ሕያው ፡
- ቦአ፡ ኢጣልያ፡ ውስተ፡ ሀገረ፡ ኅማም፡ ወበድው፨
- ኀበ፡ አልቦቱ፡ እክል፡ ወአልቦቱ፡ ጼው፨
-
- ለዘአቅረብኩ፡ አምኃ፡ ከሢትየ፡ አፈ፨
- በክብረ፡ ንግሥከ፡ ይጽሐፍ፡ ከመ፡ ይትነበብ፡ ዘልፈ፨
- ንጉሠ፡ ነገሥት፡ ምኒልክ፡ እግዚአ፡ ፉዚግራ፡ አእላፈ፨
- በከመ፡ አፍቀርከ፡ እግዚእ፡ ወጸሎትከ፡ ተወክፈ፨
- ተወከፍ፡ ጸሎትየ፡ ኢይኪን፡ ግዱፈ፨