Subjects
Apostle
ታዴዎስ፡
Tādewos
Thaddeus
Thaddeus
Malkəʾ
-
- ሰላም፡ ለዕለተ፡ ፅንስከ፡ እግዚአብሔር፡ ዘባረካ፨
- ወለልደትከ፡ ክቡር፡ በዓለ፡ ምእመናን፡ ፋሲካ፨
- ለገራህተ፡ ኀይል፡ ታዴዎስ፡ አመ፡ ምስለ፡ ጴጥሮስ፡ ሐወጽካ፨
- በትፍሥሕት፡ ቦአ፡ ሐረሳዊ፡ ውሣጤ፡ ማዕረር፡ ታዕካ፨
- ከመ፡ ይትፌሥሑ፡ ሠራዊት፡ በብዙኅ፡ ምህርካ፨
-
- ሰላም፡ ለዝክረ፡ አስማቲከ፡ ቀዳማዊ፡ ወደኅራዊ፨
- ምስለ፡ ሥዕርትከ፡ ወርእስከ፡ ዘመልዕልተ፡ ገጽ፡ ሐላዊ፨
- ይሁዳ፡ ታዴዎስ፡ ረድአ፡ ኢየሱስ፡ ናዝራዊ፨
- ረጸየኒ፡ ረድአ፡ ዘነሣእከ፡ ጸጋ፡ መንፈስ፡ ቅዱስ፡ ማሕየዊ፨
- አምጣነ፡ በጸጋ፡ ትጼጉ፡ ለኵሉ፡ ዘይደዊ፨
-
- ሰላም፡ ለሰኳንዊከ፡ ወለመከየድከ፡ ዓለማተ፨
- በኀይለ፡ አፃብዕ፡ ለምሕሮ፡ እለ፡ አዝለፋ፡ ዑደተ፨
- ኢያሱ፡ ታዴዎስ፡ ከንዓንሃ፡ ኀጢአተ፨
- በኲናተ፡ ስርያት፡ ቅትል፡ ታውርሰነ፡ ሰማያዊተ፨
- ርስተ፡ እስመ፡ ድኅረ፡ ሙሴ፡ ለሕዝብ፡ መልአክነ፡ አንተ፨
-
- ሰላም፡ ለግንዘተ፡ ሥጋከ፡ ወለመቃብሪከ፡ ዘፈወሰ፨
- እምነ፡ ሕማማት፡ ክልኤ፡ ሥጋ፡ ወነፍስ፨
- ነዳየ፡ ዓለም፡ ታዴዎስ፡ እመ፡ ትረክብ፡ ንጉሠ፨
- አርእየኒ፡ ለወልድከ፡ ማኅደረከ፡ ቅዱስ፨
- ወእምነ፡ ዕርቃን፡ ክድነኒ፡ ብርሃነከ፡ ልብሰ፨
-
- ሰላም፡ ለዕለተ፡ ዕረፍትከ፡ እንዘ፡ ተኀድግ፡ ስራኀ፨
- ወለትንሣኤከ፡ ድኅረ፡ በዕለተ፡ ላሕ፡ ወፍሥሓ፨
- በዓለም፡ ታዴዎስ፡ ዘተኰነንከ፡ ብዙኀ፨
- ትኴንን፡ ኀያላነ፡ ወመኰንነ፡ ያርብሐ፨
- እስመ፡ ንጉሠ፡ ፍትሕ፡ ለከ፡ ያገብእ፡ ፍትሐ፨
-
- አምኃ፡ ስብሐት፡ ኅዳጠ፡ እስመ፡ አቅረብኩ፡ ለስብሐቲከ፡ ንጉሥ፨
- እንዘ፡ እጼዐር፡ ፈድፉደ፡ በሕማመ፡ ሥጋ፡ ወነፍስ፨
- ባርከኒ፡ ታዴዎስ፡ በበረከትከ፡ ፈውስ፨
- እምነ፡ አብዕልት፡ ከመ፡ ባረከ፡ ክርስቶስ፨
- ለበዓልተ፡ ኅዳጥ፡ ንዋይ፡ ዘባቲ፡ ተፅናስ፨