መልክአ፡ ሥዕል፡ Malkəʾa Śəʿl

Image of the Icon

Māsgabiyā

    • ኦርኅሩኃነ፡ ሕሊና፡ አፍቅሮተ፡ ሰብእ፡ ልማድክሙ፨
    • በጥቡዕ፡ ልብ፡ ንስእለክሙ፨
    • ሥሉስ፡ ቅዱስ፡ ምሕረተክሙ፡ አንዝሙ፨
    • ክሳደ፡ ፀርነ፡ በሰይፍክሙ፡ ግዝሙ፨
    • ወዲበ፡ ርእስነ፡ እዴክሙ፡ ሢሙ፨
    • ኦርኅርኅተ፡ ሕሊና፡ አፍቅሮተ፡ ሰብእ፡ ልማዳ፨
    • ሰአሊተ፡ ምሕረት፡ ይእቲ፡ ማርያም፡ ሐጹረ፡ መስቀል፡ ዘየዐውዳ፨
    • ንትቀበላ፡ ንዑ፡ ለወለተ፡ ዳዊት፡ ዘይሁዳ፨
    • መጽአት፡ ነያ፡ ኅቡረ፡ ምስለ፡ ወልዳ፨
    • ናንፈርዕፅ፡ ቅድመ፡ ሥዕላ፡ እንዘ፡ ንሁብ፡ ጋዳ፨
    • ለለ፡ ጌሠሙ፡ ትመስል፡ እንግዳ፨
    • ቅድመ፡ ሥዕልኪ፡ እሰግድ፡ ወአስተበርክ፡ ክሡተ፨
    • ቅድመ፡ ማኅበራንኪ፡ እሉ፡ እንዘ፡ እቀውም፡ ድርገተ፨
    • ፈጻሚተ፡ መፍቅድ፡ ማርያም፡ እስእለኪ፡ ስእለተ፨
    • ጸግውኒ፡ እግዝእትየ፡ ለዓለመ፡ ዓለም፡ ሕይወተ፨
    • እምእደ፡ እኩያን፡ አፅራርየ፡ አድኅንኒ፡ ሊተ፨

Malkəʾ

    • ሰላም፡ ለሥዕልኪ፡ ዘይኤድም፡ ለንጻሬ፨
    • ዓዲ፡ ሰላም፡ ለሥዕለ፡ ወልድኪ፡ በኁባሬ፨
    • አክሊለ፡ ሢመቱ፡ ለጴጥሮስ፡ ማርያም፡ እንተ፡ ትጸድሊ፡ እምወራውሬ፨
    • ለተአምርኪ፡ ባቍዕ፡ ሶበ፡ አቄርብ፡ ዝማሬ፨
    • ክድንኒ፡ ሊተ፡ ለገብርኪ፡ ሣህለኪ፡ ጶዴሬ፨
    • ሰላም፡ ለሥዕልኪ፡ ወለሥዕለ፡ ወልድኪ፡ አልፋ፨
    • ማርያም፡ ዘኮንኪ፡ ለኃጥአነ፡ ምድር፡ ተስፋ፨
    • እመቦ፡ እምሰብእ፡ ዘይሜንና፡ ወዘይገድፋ፨
    • ለተአምርኪ፡ ባቍዕ፡ እንተ፡ ደቅስዮስ፡ ጸሐፋ፨
    • ውጉዘ፡ ይኩን፡ በቃሎሙ፡ ለሳውል፡ ወኬፋ፨

Tarafa Malkəʾ

    • እሰግድ፡ ለኪ፡ ከመ፡ ኃጢአትየ፡ ታስተስርዪ፨
    • ማርያም፡ ንግሥት፡ ቅድመ፡ ዓይነ፡ ኵሉ፡ ጸላዪ፨
    • ሥዕለ፡ አድኅኖ፡ ሥዕልኪ፡ እንተ፡ ትሰመዪ፨
    • ተአምረ፡ ከመ፡ ታርእዪ፨
    • እሰግድ፡ ለኪ፡ ማርያም፡ ረድአቶ፡ ለዘእምዓራቱ፡ ተነጽሐ፨
    • ሥዕለ፡ አድኅኖ፡ ሥዕልኪ፡ መዝራዕታ፡ ሰፊሓ፨
    • ትርድአኒ፡ ከመ፡ አሜሃ፨
    • እሰግድ፡ ለኪ፡ ማርያም፡ ኩኒ፡ ለሕይወትየ፡ ጸወኖ፨
    • እስመ፡ ተማኅፀንኩ፡ አንሰ፡ ተማኅፅኖ፨
    • በሥዕልኪ፡ ሥዕለ፡ አድኅኖ፨
    • እሰግድ፡ ለኪ፡ በእንተ፡ ዛቲ፡ ግርምት፡ ሥዕለ፡ አድኅኖ፡ ሥዕልኪ፨
    • ወሥዕለ፡ መለኮት፡ ሕፃንኪ፨
    • ጽጌያተ፡ ማኅሌት፡ ስብዓ፡ ዘአወፈይኩኪ፨
    • ንሥኢ፡ ማርያም፡ ቀጸላ፡ ይኩንኪ፨