-
- ሰላም፡ ለስምክሙ፡ ዘፍትው፡ ዝክሩ፨
- ወለሥዕርትክሙ፡ ሰላም፡ ዘሕብረ፡ ሜላት፡ ሕብሩ፨
- ሕፃናት፡ ቅዱሳን፡ ለዘጸውዓክሙ፡ መንገለ፡ ክብሩ፨
- ግሩም፡ ግብርከ፡ ይበልዎ፡ ሕዝበ፡ ቤተ፡ ልሄም፡ ሀገሩ፨
- ለእጓለ፡ እመ፡ ሕያውሂ፡ መንክሮ፡ ይንግሩ፨
-
- ሰላም፡ ለርእስክሙ፡ ዘተሳለቅዎ፡ ሐራ፨
- ወለገጽክሙ፡ ኅትው፡ ማኅቶተ፡ ተቅዋም፡ ክብረ፡ ይብደራ፨
- ሕፃናት፡ ቅዱሳን፡ ለእንተ፡ ተወልደት፡ እምቤተ፡ ቅስራ፨
- በእንተ፡ መንግሥቱ፡ ለእግዚአብሔር፡ በኵራ፨
- መንክር፡ ላዕሌክሙ፡ ዘበጽሐ፡ መክራ፨
-
- ሰላም፡ ለቀራንብቲክሙ፡ እለ፡ ይቀጽባ፡ ኂሩተ፨
- ወለዐይንክሙ፡ ሰላም፡ ዘንጻሬሁ፡ ተአኵተ፨
- እምቅድመ፡ ጊዜ፡ ሕፃናት፡ ዘሠለጥክሙ፡ መዊተ፨
- ዘእንበሌክሙ፡ ሰማያዊተ፡ ማሕሌተ፨
- ከመ፡ ዘየአምር፡ አልቦ፡ ዮሐንስ፡ ከሠተ፨
-
- ሰላም፡ ለአእዛኒክሙ፡ አናቅጸ፡ ሰሚዕ፡ ቅድው፨
- ወለመላትሒክሙ፡ ቀይሕ፡ ከመ፡ ጽጌ፡ ረዳ፡ ፍትው፨
- ሕፃናት፡ ቅዱሳን፡ በእንተ፡ ክርስቶስ፡ ሕያው፨
- ማየ፡ ደምክሙ፡ አመ፡ ምግበ፡ ሄሮድስ፡ ዕልው፨
- ዘበውስቴቱ፡ ኢውሕዘ፡ ኢተረክበ፡ በድው፨
-
- ሰላም፡ ለአእናፊክሙ፡ እለ፡ መዐዛ፡ ምድር፡ ኢይጼነዋ፨
- ለከናፍሪክሙሂ፡ እለ፡ በሥቃይ፡ መጽለዋ፨
- ሕፃናት፡ ቅዱሳን፡ እማቲክሙ፡ ፈተዋ፨
- ኪያክሙ፡ እምቅድመ፡ ሞት፡ አጥባቲሆን፡ ያጥብዋ፨
- ወአመ፡ ተምኔቶን፡ ኢኮነ፡ በኀዘን፡ ጸመዋ፨
-
- ሰላም፡ ለአፉክሙ፡ አፈ፡ በረከት፡ ሠናይ፨
- ወለአስናኒክሙ፡ ሰላም፡ ዘኢያፅረሶን፡ ጌጋይ፨
- ሕፃናት፡ ንጹሓን፡ መላእክተ፡ ልዑል፡ ሰማይ፨
- ተፈጸመ፡ በሞትክሙ፡ በኢየሩሳሌም፡ ዐባይ፨
- ኀዘን፡ ይሠርቅ፡ ዘይቤ፡ ነቢይ፨
-
- ሰላም፡ ለልሳንክሙ፡ ልሳነ፡ መላእክት፡ ዘአርያም፨
- ወሰላም፡ ካዕበ፡ ለቃልክሙ፡ ግሩም፨
- እስመ፡ ሕፃናት፡ አንትሙ፡ ቀደምተ፡ ሰማዕታት፡ በደም፨
- ለክሙ፡ ዘኢተቀንየ፡ እመንገለ፡ ክብር፡ ፍጹም፨
- አልቦ፡ የማን፡ ወአልቦ፡ ፀጋም፨
-
- ሰላም፡ ለእስትንፋስክሙ፡ መዐዛ፡ ኂሩት፡ ወፍቅር፨
- ዓዲ፡ ሰላም፡ ለጕርዔክሙ፡ ክቡር፨
- ሕፃናት፡ ጠቢባን፡ በግዕዘ፡ አርዌ፡ ዘምድር፨
- ነገሥክሙ፡ እምቅድመ፡ ጊዜ፡ ውስተ፡ ዐውደ፡ ጽዮን፡ ደብር፨
- ወህየ፡ ቀደስክምዎ፡ ለዋሕድ፡ ወበኵር፨
-
- ሰላም፡ ለክሳድክሙ፡ ዘመተርዎ፡ አይሁድ፨
- ወለመትክፍትክሙ፡ ሰላም፡ ሥርግወ፡ ደም፡ ኤፉድ፨
- ሕፃናት፡ ትኩኑ፡ ሰማዕታተ፡ ክርስቶስ፡ ወልድ፨
- ተጋባእክሙ፡ ውስተ፡ ቤተ፡ ልሔም፡ ዐውድ፨
- እምነ፡ ቤርሳቤሕ፡ ወዳን፡ በትእዛዝ፡ ክቡድ፨
-
- ሰላም፡ ለዘባንክሙ፡ እምልብሰ፡ ዓለም፡ ዘተዐርቀ፨
- ወለእንግድዓክሙ፡ ሰላም፡ ዘበደመ፡ ክሳድ፡ ተጠምቀ፨
- ነገሥተ፡ ምድረ፡ ፋርስ፡ ሕፃናት፡ አመ፡ አምኅዎ፡ ወርቀ፨
- ለክርስቶስ፡ ንጉሥክሙ፡ ዘእምከርሠ፡ ድንግል፡ ተዐውቀ፨
- እብነ፡ መከራ፡ ወግፍዕ፡ ላዕሌክሙ፡ ወድቀ፨
-
- ሰላም፡ ሰላም፡ ለሕፅነ፡ ዚአክሙ፡ እብል፨
- ወለእዴክሙ፡ ሐራ፡ ዘመሠጥዎ፡ በኀይል፨
- ሕፃናት፡ ቅዱሳን፡ ሰማዕታተ፡ ሐዲስ፡ ገድል፨
- አመ፡ ትትለሐዩ፡ ቅድመ፡ ማርያም፡ ድንግል፨
- አስተባይጹኒ፡ በጸጋ፡ ወብዕል፨
-
- ሰላም፡ ለመዛርዒክሙ፡ አዕፁቀ፡ መትከፍ፡ አርዝ፨
- ወለኵርናዕክሙ፡ ሰላም፡ በቃለ፡ ማሕሌት፡ ሐዋዝ፨
- ሕፃናት፡ ቅዱሳን፡ ሠናያነ፡ ባሕርይ፡ ወግዕዝ፨
- አጽንዑ፡ ዐቂቦትየ፡ ለገብርክሙ፡ ትኩዝ፨
- አመ፡ ላዕለ፡ ኵሉ፡ ይወፅእ፡ ፩ትእዛዝ፨
-
- ሰላም፡ ለእመትክሙ፡ መሥፈርተ፡ ቤተ፡ ንጽሕ፡ ሐብል፨
- ወለእርኅክሙ፡ ስፉሕ፡ ትእምርተ፡ ቅዱስ፡ መስቀል፨
- ሕፃናት፡ ቅዱሳን፡ ከዋክብተ፡ ሰማይ፡ ልዑል፨
- ይምርሐኒ፡ ፍና፡ ጽልመት፡ ብርሃንክሙ፡ ጽዱል፨
- ወወልታ፡ ረድኤት፡ ይኩነኒ፡ ጊዜ፡ ፀብእ፡ ወቀትል፨
-
- ሰላም፡ እብል፡ ለአፃብኢክሙ፡ ወትረ፨
- እንዘ፡ አስተበፅዕ፡ ለፌ፡ ዘላዕሌሆን፡ አጽፋር፨
- ሕፃናት፡ ቅዱሳን፡ እለ፡ ፈጸምክሙ፡ በድረ፨
- ምስሌክሙ፡ ለተዋርሶ፡ ሰማያዊተ፡ ሀገረ፨
- እንዘ፡ አጋእዝት፡ አንትሙ፡ እኩንክሙ፡ ገብረ፨
-
- ሰላም፡ ለገቦክሙ፡ ዘበዐራተ፡ ደም፡ ስኩብ፨
- ወለከርሥክሙ፡ ሰላም፡ እምሀሊበ፡ አጥባት፡ ርኁብ፨
- ሕፃናት፡ ቅዱሳን፡ ቅድመ፡ መንበሩ፡ ለአብ፨
- አዘክሩ፡ ተገፍዖትየ፡ እምእደ፡ ነኪራን፡ ሕዝብ፨
- ወበእንቲአየ፡ አንሶሰው፡ ውስተ፡ ሣህል፡ መርህብ፨
-
- ሰላም፡ ለልብክሙ፡ ዘይዋሄሁ፡ መንክር፨
- ለኵልያቲክሙሂ፡ ፍቱናነ፡ ጥበብ፡ ከውር፨
- ሕፃናት፡ ቅዱሳን፡ ሠናያነ፡ ዜና፡ ወዝክር፨
- ብርሃነ፡ ፀሓይ፡ ይመስለኒ፡ ዘጸልመ፡ በቀትር፨
- ሶበ፡ እዜክሮ፡ ለሞትክሙ፡ ክቡር፨
-
- ሰላም፡ ለኅሊናክሙ፡ ዘኢያእመረ፡ እከየ፨
- ለአማዑቲክሙሂ፡ ዘበነደ፡ ሥቃይ፡ ውዕየ፨
- ሕፃናት፡ አጽምዑ፡ ቃለ፡ ስእለትየ፨
- እምኀይለ፡ ጸላኢ፡ ከመ፡ ኢይፍራህ፡ ልብየ፨
- ወአመ፡ በትስቢት፡ ሮዱ፡ ጸባኢት፡ ኪያየ፨
-
- ሰላም፡ ለንዋየ፡ ውሥጥክሙ፡ መዝገበ፡ የውሃት፡ ሐዲስ፨
- ወለኅንብርትክሙ፡ ህልው፡ ምእከለ፡ ክርሥ፨
- መልእክተ፡ አድም፡ አቡነ፡ ዘበእንተ፡ ዋሕድ፡ ክርስቶስ፨
- ድኅረ፡ ሰምዐ፡ ቅድመ፡ ጉባኤ፡ እምቃለ፡ ነገሥታት፡ ዘፋርስ፨
- ኪያክሙ፡ ሕፃናት፡ አቅተለ፡ ሄሮድስ፨
-
- ሰላም፡ ለሐቌክሙ፡ ዘኢጸንዐ፡ መሌሊት፨
- ወለአቍያጺክሙ፡ ሰላም፡ አዕማደ፡ ጽኑዕ፡ ብርት፨
- ሕፃናት፡ ቅዱሳ፡ ምሉኣነ፡ ጸጋ፡ ወሀብት፨
- ዘቀደመ፡ እምኔክሙ፡ በከዊነ፡ ክቡር፡ ሰማዕት፨
- አልቦ፡ በምድር፡ እምኵሉ፡ ፍጥረት፨
-
- ሰላም፡ ለአብራኪክሙ፡ ወለአእጋሪክሙ፡ ካዕበ፨
- እለ፡ ኢያንሶሰዋ፡ ምዕረ፡ ዘኀጢአት፡ መርህበ፨
- ሕፃናት፡ ቅዱሳን፡ ከመ፡ ቃለ፡ መጽሐፍ፡ ነበበ፨
- ለሕይወትክሙ፡ ድኅረ፡ ሰኰናሃ፡ ዐተበ፨
- አርዌ፡ ፍና፡ እከይ፡ ሄሮድስ፡ በመቅሠፍት፡ ሰከበ፨
-
- ሰላም፡ ለሰኰናክሙ፡ ድኅረ፡ ዐረፍተ፡ እግር፡ ቤት፨
- ለመከየድክሙሂ፡ ዘኢያጸመዎ፡ ፍኖት፨
- ሕፃናት፡ ለክሙ፡ እምነቢበ፡ ብዙኀ፡ ማሕሌት፨
- ኢየዐርፍ፡ ቃለ፡ ዚአየ፡ በኍልቈ፡ ኵሉ፡ ዕለት፨
- እስመ፡ አኰቴት፡ ዘስምክሙ፡ ይእቲ፡ ዕረፍት፨
-
- ሰላም፡ ለአፃብዒክሙ፡ ወለአጽፋሪሆን፡ ሰላም፨
- እለ፡ ቅቡኣት፡ በደም፨
- ሕፃናት፡ ፍሡሓን፡ እንዘ፡ ውስተ፡ ኵሉ፡ ዓዸም፨
- በወርኀ፡ ልደቱ፡ ለዳግማዊ፡ አዳም፨
- ዲበ፡ እምክሙ፡ ራሄል፡ ተስፍሐ፡ ሕማም፨
-
- ሰላም፡ ለቆምክሙ፡ ዘኢያብጽሐ፡ አምጣነ፨
- ወለመልክእክሙ፡ ሰላም፡ ሥርግወ፡ ላህይ፡ ዘኮነ፨
- ሕፃናት፡ ቅዱሳን፡ ዐፅፈ፡ መላእክት፡ ብርሃነ፨
- እንዘ፡ ትትዐፀፉ፡ ወትሬስዩ፡ ክዳነ፨
- ሐወጹ፡ በትፍሥሕት፡ ዓለመ፡ ኅዙነ፨
-
- ሰላም፡ ለፀአትክሙ፡ እምቤተ፡ ሥጋ፡ በነፍስ፨
- ወለበድንክሙ፡ ግዱፍ፡ ውስተ፡ መርኅበ፡ ሳሌም፡ ቍድስ፨
- ሕፃናት፡ ዕሡራን፡ ለከብካበ፡ መንግሥት፡ ሐዳስ፨
- በአክሊለ፡ ጸጋ፡ ለዘዚአክሙ፡ ርእስ፨
- ክልልዎ፡ ኃይላቲሁ፡ ለጥሕድ፡ ክርስቶስ፨
-
- ሰላም፡ ለግንዘትክሙ፡ በእደ፡ መላእክት፡ ኄራን፨
- ለመቃብሪክሙሂ፡ ኢየሩሳሌም፡ መካን፨
- ሕፃናት፡ ማሕሌተ፡ ምስለ፡ ድምፀ፡ መጥቅዕ፡ ወቀርን፨
- ያቄርቡ፡ ለክብርክሙ፡ ካህናተ፡ ዘይብል፡ ብፅዓን፨
- ወባረከ፡ ዓመተ፡ ጻድቃኑ፡ ንዑ፡ ንትፈሣሕ፡ ዮም፡ በበዓሎሙ፡ ለቅዱሳን፨
- ተረፈ፡ መልክእ፡
-
- ሰላም፡ ለክሙ፡ ለርስተ፡ ቅዱሳን፡ ክርስቶስ፡ ወሀገረ፡ አበው፡ ጻድቃን፨
- ተዋርሶቶ፡ በክብር፡ ሕፃናት፡ ኄራን፨
- አድማዕክሙ፡ ቅድመ፡ ዘመን፨
-
- ሰላም፡ ለክሙ፡ ወልደ፡ ዐመፃ፡ ሄሮድስ፡ መዐርገ፡ ሐራ፡ ለክሙ፨
- እንዘ፡ ሕፃናት፡ ይመስል፡ ዘይሁበክሙ፨
- ለሞት፡ ጸውዐክሙ፨
-
- ሰላም፡ ለክሙ፡ ንጽሓ፡ ዓለምክሙ፡ ይኩን፡ ሕፃናትክሙ፡ ውስተ፡ መጽሐፍ፡ ተጽሕፈ፨
- ምግበ፡ አሐቲ፡ ዕለት፡ እስከ፡ ኀለፈ፨
- ደምክሙ፡ ዘአንጸፍጸፈ፨
-
- ሰላም፡ ለክሙ፡ ሚመጠን፡ ዕለትክሙ፡ ግሩም፨
- እስመ፡ ሕፃናት፡ አእላፍ፡ በቤተ፡ ልሔም፨
- ጸበትክሙ፡ በማየ፡ ደም፨
-
- ሰላም፡ ለክሙ፡ ቃለ፡ ደምክሙ፡ ይጽራኅ፡ ለአግብኦ፡ በቀል፡ ወፍዳ፨
- እስከ፡ አመ፡ ትኄይስ፡ ጢሮስ፡ እምቤተ፡ ሳይዳ፨
- ሕፃናት፡ ዘእምይሁዳ፨
-
- ሰላም፡ ለክሙ፡ ዜና፡ ክብርክሙ፡ እጽሕፍ፡ ሕፃናት፡ በሰሌዳ፡ ንባብ፡ ወሪቅ፨
- ፍና፡ መርሐኒ፡ ወነገረ፡ ጽድቅ፨
- ዮሐንስ፡ ልሳነ፡ ወርቅ፨
-
- ሰላም፡ ለክሙ፡ ሄሮድስ፡ እንዘ፡ ትሰክይዎ፡ ወትረ፨
- ኵሎ፡ ዓለመ፡ ኀበ፡ ዘገብረ፨
- ማሕፀንትክሙ፡ ዘኮነኒ፡ ፀረ፨
- ሕፃናት፡ ስክዩ፡ ኅቡረ፨