Details
-
- ሰላም፡ ለሥርጸትከ፡ ለአቅሌስያ፡ እምጕንዳ፨
- ወእምሥርወ፡ ዘሮንቶስ፡ ጻድቅ፡ እምድረ፡ ፍልስጤም፡ ውስተ፡ ዐጸዳ፨
- ጊዮርጊስ፡ ጽጌ፡ ዘመዋዕሊከ፡ ወርኀ፡ መርሙዳ፨
- ቡርክተ፡ ትኩን፡ እምአህጉር፡ ከመ፡ ቤተ፡ ልሔም፡ ዘይሁዳ፨
- ሀገረ፡ ሙላድከ፡ ዛቲ፡ እንተ፡ ይእቲ፡ ልዳ፨
-
- ሰላም፡ ለዝክረ፡ ስምከ፡ ዘአደንገጸ፡ ለዱድያኖስ፨
- ወአፍርሆሙ፡ ለሰብዓ፡ ነገሥተ፡ ሜዶን፡ ወፋርስ፨
- ጊዮርጊስ፡ ሰርዌ፡ ዘሰማዕታት፡ ርእስ፨
- ሀቦ፡ ለስምየ፡ ከመ፡ ስምከ፡ ቅዱስ፨
- እንተ፡ ተሰብሐ፡ ቦቱ፡ ቃለ፡ አብ፡ ክርስቶስ፨
-
- ሰላም፡ ለሥዕርተ፡ ርእስከ፡ ዘተውህቦ፡ እምላዕሉ፨
- አክሊለ፡ ስብሐት፡ ዘይበርቅ፡ ወኮከበ፡ ጽባሕ፡ ሥነ፡ ጸዳሉ፨
- እሴፈወከ፡ ጊዮርጊስ፡ አምጣነ፡ በሥጋ፡ እሄሉ፨
- ከመ፡ ታድኅነኒ፡ እመከራ፡ ዘመን፡ ኵሉ፨
- ወእምብእሲ፡ እኩይ፡ ዘብዙኅ፡ ቃሉ፨
-
- ሰላም፡ ለበድነ፡ ሥጋከ፡ ወለግንዘትከ፡ በዕድ፨
- ወለመቃብሪከ፡ ሕትምት፡ እስከ፡ አመ፡ ይመጽእ፡ ወልድ፨
- ጊዮርጊስ፡ ለባዊ፡ ዘላፌ፡ ረሲዓን፡ ነገድ፨
- ገሥጾ፡ ሊተ፡ እግዚእየ፡ በጥበብከ፡ ፍድፉድ፨
- ለሥጋ፡ ኀጢአት፡ ሥጋየ፡ ዘግብሩ፡ ዕበድ፨
-
- ሰላም፡ ለፍልሰተ፡ ሥጋከ፡ እምሀገረ፡ ሐዳስ፡ ኀበ፡ ልዳ፨
- ወለትንሣኤከ፡ ደኃሪት፡ ዘልበ፡ ምእመናን፡ ይፈቅዳ፨
- ጊዮርጊስ፡ ወርቅየ፡ ወብሩርየ፡ ጸዐዳ፨
- ይልክኦ፡ መንፈስ፡ ቅዱስ፡ ለማሕሌትየ፡ እንግዳ፨
- ውስተ፡ ኅሊናከ፡ ነባቢ፡ ሰሌዳ፨
-
- ኦዘተዐገሥከ፡ ኵነኔ፡ ዓመታት፡ ሱባዔ፨
- እስከ፡ ቀጸላ፡ ሥን፡ ነሣእከ፡ እምአእዳወ፡ አምላክ፡ ክልኤ፨
- ጊዮርጊስ፡ ሰአሎ፡ ወበሎ፡ ቅድመ፡ ጉባኤ፨
- በድርሳነ፡ ዝንቱ፡ ሰላምየ፡ ለዘአስተሐመመ፡ ቍልዔ፨
- እግዚአብሔር፡ ምስሌየ፡ ክፍሎ፡ ትንሣኤ፨