Details
-
- ማኅበረ፡ ምእመናን፡ ወምእመናት፡ እለ፡ ኪያከ፡ ተአምኑ፨
- ለነሢአ፡ ሥጋከ፡ ወትረ፡ ኀበ፡ ተዐየኑ፨
- ወልደ፡ አብ፡ ክርስቶስ፡ ዘኢትትፈለጥ፡ እምሕፅኑ፨
- እስብክ፡ ሎሙ፡ ሕማመከ፡ ወመስቀለከ፡ እዜኑ፨
- ጸጋ፡ መንፈስ፡ ቅዱስ፡ ሊተ፡ እምሰማይ፡ ፈኑ፨
-
- ዝውእቱ፡ ጊዜ፡ ባርኮት፡ እምኵሉ፡ ንሣእ፨
- ወዕርገተ፡ ቍርባን፡ ቅዱስ፡ መልዕልተ፡ ምሥዋዕ፨
- ኦክርስቶስ፡ ተቅዋመ፡ ስድስቱ፡ አብራዕ፨
- አኡድ፡ የማነከ፡ በማእዝኒሁ፡ አርባዕ፨
- ለባርኮ፡ ዝንቱ፡ ኅብስት፡ ወዝንቱ፡ ጽዋዕ፨
-
- አምሳለ፡ ብእሲ፡ ዘይጼሊ፡ በውሳጤ፡ ቤት፡ ወየዐጹ፡ ኆኅቶ፨
- አስተጋቢአነ፡ ልበ፡ እምኅሊና፡ እበድ፡ ወአስትቶ፨
- ለሊሁ፡ ክርስቶስ፡ ከመ፡ አዘዘ፡ አርድእቶ፨
- ንዑ፡ ንስተይ፡ ጽዋዖ፡ ወንብላዕ፡ ኅብስቶ፨
- እንዘ፡ ሕማሞ፡ ንኄሊ፡ ወንዜከር፡ ሞቶ፨
-
- ለኂሩተ፡ እግዚእ፡ ክርስቶስ፡ በዘታአምሩ፡ ዐቅሞ፨
- አምጣነ፡ ትበልዑ፡ ሥጋሁ፡ ወለለ፡ ትሰትዩ፡ ደሞ፨
- ኀልይዎ፡ እስኩ፡ በትጋህ፡ ወአስተሐምሞ፨
- ይፍትሖሙ፡ እምሕማማት፡ ለእለ፡ የአምኑ፡ ሕማሞ፨
- ከመ፡ አፍተዎ፡ በመስቀል፡ ለመዊት፡ አደሞ፨
-
- ተዘከርዎ፡ ለክርስቶስ፡ ወሠናያቲሁ፡ ኢትርስዑ፨
- ትሳተፍዎ፡ በሞቱ፡ ወበትንሣኤሁ፡ ትትነሥኡ፨
- አምጣነ፡ ትሰትዩ፡ ደሞ፡ ወለለ፡ ሥጋሁ፡ ትበልዑ፨
- ይቁም፡ ቅድሜክሙ፡ ተዝካረ፡ መስቀሉ፡ ወግፍዑ፨
- ከመ፡ ለሊሁ፡ አዘዘ፡ ለጳውሎስ፡ ረድኡ፨
-
- ተዘከር፡ እግዚኦ፡ ተአምኖተነ፡ ብከ፨
- ወአጥብዖተነ፡ ጥቀ፡ በአፍቅሮትከ፨
- መለያልየ፡ አሐደ፡ ከመ፡ ንኩን፡ ለከ፨
- ናሁ፡ በሥጋነ፡ ንዴምር፡ ሥጋከ፨
- ወበደምነ፡ ንቶስሕ፡ ደመከ፨
-
- በከመ፡ ኀደጉ፡ ለነ፡ ደቂቀ፡ እስራኤል፡ አምሳለ፨
- አመ፡ በልብሶሙ፡ ገብሩ፡ ትእምርተ፡ ደርከኖ፡ ፍቱለ፨
- በጥብሐ፡ ሥጋሁ፡ ወደሙ፡ ጊዜ፡ ንገብር፡ በዓለ፨
- ክርስቶስሃ፡ ንኔጽር፡ ስቁለ፨
- እንዘ፡ ዲበ፡ ርእሱ፡ ይጸውር፡ ዘአሥዋክ፡ አክሊለ፨
-
- ትእዛዘ፡ አምላክ፡ ይዘከሩ፡ ወኢይርስዑ፡ ኪዳኖ፨
- ደቂቀ፡ እስራኤል፡ አሰሩ፡ በዘፈረ፡ ልብሶሙ፡ ፈትለ፡ ደርከኖ፨
- ንሕነሰ፡ ለክርስቶስ፡ ጊዜ፡ ናዐርግ፡ ቍርባኖ፨
- ይንጦላዕ፡ ቅድመ፡ ገጽነ፡ መጽሔተ፡ ከዊኖ፨
- በዘሕማሞ፡ ንኄሊ፡ ወንኔጽር፡ በድኖ፨
-
- ቅንዋተ፡ እደዊከ፡ ወእገሪከ፡ ወአክሊለከ፡ ዘሦክ፨
- ሶበ፡ ንኔጽር፡ ውቱረ፡ በመሥዋዕተ፡ ጽባሕ፡ ወሰርክ፨
- ተዘከረነ፡ እግዚኦ፡ ወመሐረነ፡ በበክ፨
- በከመ፡ ተዘከርኮ፡ ለፈያታዊ፡ በማዕርገ፡ ፍቁር፡ ወዐርክ፨
- እስከ፡ ትሕትናከ፡ ያነክር፡ መልአክ፨
-
- ተዝካረ፡ ፀአቶሙ፡ እምድረ፡ ገብጽ፡ ወግዕዛኖሙ፡ እምግብርናት፨
- ደቂቀ፡ እስራኤል፡ ገብሩ፡ በመሥዋዕተ፡ በግዕ፡ ዘዓመት፨
- ንሕነሰ፡ ለክርስቶስ፡ በኵሉ፡ ሰዓት፨
- ንዜከር፡ ሕማመከ፡ ወጥብሐተከ፡ ለሞት፨
- ለባርኮ፡ ዝንቱ፡ ጽዋዕ፡ ወዝንቱ፡ ኅብስት፨
-
- አመ፡ ዐሡረ፡ ወርኅ፡ ታስዕ፡ ይበክዩ፡ ለለዓሙ፨
- ሶበ፡ ይዜከሩ፡ አይሁድ፡ ምዝባሬ፡ ሀገሮሙ፡ ዘቀዲሙ፨
- ንሕነሰ፡ ለክርስቶስ፡ ንበኪ፡ ለለ፡ ጌሰሙ፨
- ሶበ፡ ንኔጽሮ፡ ለምሥቃዕ፡ ዘተቀደሰ፡ በስሙ፨
- እንዘ፡ መሌሊቱ፡ ይትከፈል፡ ወይትከዐው፡ ደሙ፨
-
- እንዘ፡ ብዙኃን፡ ንሕነ፡ እምጾታ፡ ዘመን፡ ዘዚአሁ፨
- ነአምን፡ ሞቶ፡ ወንሴፎ፡ በትንሣኤሁ፨
- ለእግዚእነ፡ ክርስቶስ፡ ዘኢይትአተት፡ ጸጋሁ፨
- መለያልየ፡ አሐደ፡ ይረስየነ፡ ምስሌሁ፨
- በአጽናፈ፡ ዓለም፡ ይጠባሕ፡ አሐዱ፡ ሥጋሁ፨
-
- ኦክርስቶስ፡ መሥዋዕተ፡ መድኀኒት፡ አሐዱ፨
- ካህነ፡ ወንጌል፡ ሥጋከ፡ ለለ፡ ጊዜ፡ ይሠዋዕ፡ በፈቃዱ፨
- ለተዝካረ፡ ሞትከ፡ ባሕር፡ ለልበ፡ ምእመናን፡ ምእላዱ፨
- ነፋሰ፡ ኅሊና፡ መንፈሳዊ፡ ሶበ፡ ይነፍኅ፡ በዐውዱ፨
- ከመ፡ ነበልባል፡ ይትነሣእ፡ ሞገዱ፨
-
- ጊዜ፡ ይሠዋዕ፡ ኅብስተ፡ ሥጋከ፡ እመልክአ፡ ሥጋ፡ ፍሉጥ፨
- ወደምከ፡ ወይን፡ እምደመ፡ ጠባይዕ፡ ውሉጥ፨
- ፍጹመ፡ መድኀኒት፡ ክርስቶስ፡ ለስርየተ፡ ኀጢአት፡ ሥሉጥ፨
- ንሕነሰ፡ በዐይነ፡ ሃይማኖት፡ ምሡጥ፨
- ፍጹመ፡ ሥጋዌከ፡ ንሬኢ፡ እምውስጥ፨
-
- አብርሃም፡ ተመነየ፡ ወተፈሥሐ፡ ወተነበየ፨
- ምስጢረ፡ ሞትከ፡ ክርስቶስ፡ አመ፡ በበግዕ፡ ርእየ፨
- ብጹዓን፡ ንሕነ፡ እምኔሁ፡ ዘአፈድፈድናሁ፡ ዕበየ፨
- ጊዜ፡ ንሠውዐከ፡ ለለዕለቱ፡ ወንጠብሐከ፡ ዝየ፨
- ወበደምከ፡ ነኀፅብ፡ ጌጋየ፨
-
- በመንፈቀ፡ ሳብዕ፡ ወርኅ፡ በዓለ፡ መጸለት፡ ይገብሩ፨
- ተድላ፡ ንብረቶሙ፡ በገዳም፡ እንዘ፡ እስራኤል፡ ይዜከሩ፨
- ንሕነሰ፡ ለክርስቶስ፡ ንበኪ፡ ለለ፡ አሚሩ፨
- ንዜከር፡ ሕማመከ፡ ዘኅቱም፡ ምስጢሩ፨
- ወግብረ፡ ሞትከ፡ ዘዕጹብ፡ ነገሩ፨
-
- ናሁ፡ ማእከሌነ፡ ወማእከሌከ፡ ሥዩም፨
- ትእምርተ፡ መሐላ፡ ሥጋከ፡ ወቀስተ፡ ኪዳንከ፡ ደም፨
- ኢየሱስ፡ ክርስቶስ፡ መሥዋዕተ፡ ሰላም፨
- በከመ፡ ተገብረ፡ ቀስተ፡ ደመና፡ አመ፡ ተአይኅ፡ ዓለም፨
- ዝናመ፡ ጌጋይየ፡ ይዕጹ፡ ጥብሕከ፡ ልጓም፨
-
- ደቂቀ፡ እስራኤል፡ ቅድመ፡ በንስከተ፡ አርዌ፡ ደወዩ፨
- ወበርእየ፡ አርዌ፡ ዘብርት፡ እምነ፡ ሕማሞሙ፡ ጥዕዩ፨
- ንሕነሰ፡ ለክርስቶስ፡ ሱቱፋነ፡ ደሙ፡ ወማዩ፨
- ኢነሐምም፡ በዓለም፡ ከመ፡ ኢየሐምም፡ ባሕርዩ፨
- ወለእመ፡ ነሥአነ፡ ሞት፡ ዳግመ፡ ነሐዩ፨
-
- ግነዩ፡ ለእግዚአብሔር፡ ወጸውዑ፡ ስሞ፨
- ኢትፍልጡ፡ እሞ፨
- ምእመናን፡ አኀው፡ ወትረ፡ በኢያርምሞ፨
- ተዘኪረክሙ፡ በመልዕልተ፡ መስቀል፡ ሕማሞ፨
- በእንቲአነ፡ ዘከዐወ፡ ደሞ፨
-
- ግነዩ፡ ለእግዚአብሔር፡ እስመ፡ ለዓለም፡ ምሕረቱ፨
- ዐቢይ፡ ኀይሉ፡ ወብዙኅ፡ አኰቴቱ፨
- እምልብክሙ፡ በቀለ፡ እንዘ፡ ታአትቱ፨
- ስረዩ፡ አበሳክሙ፡ ሰአልዎ፡ ሎቱ፨
- እስመ፡ መሓሪ፡ ውእቱ፡ ወጻድቅ፡ ባሕቲቱ፨
-
- ግነዩ፡ ለእግዚአብሔር፡ ኀበ፡ ማርያም፡ ሰአሉ፨
- እስመ፡ ንጽሕት፡ አንቲ፡ ኵለንታሁ፡ አባሉ፨
- ኅሊናክሙ፡ ሰማየ፡ እንዘ፡ ታሌዕሉ፨
- ከመ፡ ትትባልሑ፡ እምግባረ፡ እከይ፡ ኵሉ፨
- መሐረነ፡ አምላክነ፡ አቡነ፡ ብሉ፨