Bibliography
Z
Esteves Pereira, Franciscus Maria. Acta Martyrum. Corpus Scriptorum Christianorum Orientalium, Series Altera 28. Romae: Excudebat Karolus de Luigi, 1907.
-
- መዓልተ፡ ዓመታት፡ አርብዓ፡ በደመና፡ ሰማይ፡ ልዑል፨
- ወምግበ፡ ለያልይ፡ ካዕበ፡ በብርሃነ፡ እሳት፡ ጽዱል፨
- ከመ፡ ለእስራኤል፡ መርሖሙ፡ ብርሃነ፡ ቅዱሳን፡ ቃል
- አባዲር፡ ምርሐኒ፡ ለገብርከ፡ ፍና፡ ዝክረ፡ ስምከ፡ ሐቅል፨
- ምስለ፡ እኅትከ፡ ኤራኢ፡ ድንግል፨
-
- ተማሕፀንኩ፡ በድካምከ፡ እምጸዊረ፡ ማይ፡ በፃሕብ፨
- እለ፡ ውስተ፡ ሞቅሕ፡ ትርዳእ፡ እስመ፡ ምእመናን፡ ሕዝብ፨
- እንዘ፡ ይረድአከ፡ ክርስቶስ፡ ብዕለ፡ ሰሎሞን፡ ጥበብ፨
- ዘመደ፡ ኤራኢ፡ አባዲር፡ እመንገለ፡ እም፡ ወእብ፨
- ኩነኒ፡ ኃይለ፡ እምድካም፡ ዕፁብ፨
-
- ተማሕፀንኩ፡ በፍልሰትክሙ፡ ኤራኢ፡ ወአባዲር፨
- ውስተ፡ መካነ፡ ገድል፡ ስፉሕ፡ እምአንጾኪያ፡ ሀገር፨
- ከመ፡ አምክረክሙ፡ በሕልም፡ ፋሲለደስ፡ ክቡር፨
- ጸውዑኒ፡ መንገሌክሙ፡ በቃለ፡ ምዕዳን፡ ወምክር፨
- እስመ፡ ፅሩይ፡ ልብ፡ አነ፡ ወሀካይ፡ ገብር፨
-
- ተማሕፀኩ፡ በከዊኖትክሙ፡ አናግደ፡ ብሔረ፡ እስሙናይን፨
- አመ፡ ምግበ፡ ሄሮድስ፡ ባቲ፡ ዘተአንገደ፡ መድኅን፡ ድኅረ፨
- አይድዓክሙ፡ ግብረ፡ አቡከረዙን፨
- አባዲር፡ ወኤራኢ፡ ቤተ፡ ፍቅርክሙ፡ ወይን፨
- አብኡኒ፡ ከመ፡ ይቤ፡ ሰሎሞን፡ ምእመን፨
-
- ተማሕፀንኩ፡ በዑደትክሙ፡ መቅይሳ፡ ምሕራኤል፡ ኀበ፡ ሀሎ፨
- ከመ፡ እምኔሃ፡ ትርአዩ፡ መንክረ፡ ትሩፋት፡ ወተጋድሎ፨
- አባዲር፡ ወኤራኢ፡ ሥርግዋነ፡ ንጽሕ፡ ወተደንግሎ፨
- ሐውፁ፡ እለ፡ በደይን፡ ወበውስተ፡ ግሩም፡ ተኃጕሎ፨
- እስመ፡ ኪዳነ፡ ሣህል፡ ወሀበክሙ፡ ዘይኰንን፡ ኵሎ፨
-
- ተማሕፀንኩ፡ በኅድረትክሙ፡ ሰዱሰ፡ መዋዕለ፨
- ውስተ፡ ምድረ፡ ጻድቅ፡ ሳሙኤል፡ ዘበምድረ፡ ጌላ፡ ተልዕለ፨
- አባዲር፡ ወኤራኢ፡ እለ፡ ኃበርክሙ፡ ገድለ፨
- አኅድሩኒ፡ በጥቃክሙ፡ እንዘ፡ ትገብሩ፡ ሣህለ፨
- ወአስተሳትፉኒ፡ ምስሌክሙ፡ ዕበየ፡ ወብዕለ፨
-
- ተማሕፀንኩ፡ በዕርገትከ፡ ዲበ፡ ምክያደ፡ ገድል፡ ስፉሕ፨
- ወበተሰትሮትካ፡ ካዕበ፡ ለመስትረ፡ ሐፂን፡ በሊሕ፨
- ሥቃየ፡ ኤራኢ፡ ቅድስት፡ በውጠ፡ ኵነኔ፡ መፍርህ፨
- አባዲር፡ ተዘኪረከ፡ በሰዓተ፡ ብካይ፡ ወላህ፨
- ትፍሥሕተ፡ ልቡና፡ ኵነኒ፡ በረድኤት፡ ብዙኅ፨
-
- ተማሕፀንኩ፡ በሙቃሔከ፡ ውስተ፡ ቤተ፡ ሞቅሕ፡ እንበለ፡ ነውር፨
- ከመ፡ ተሞቅሐ፡ ዮሴፍ፡ እንዘ፡ ውስተ፡ ሠናይ፡ ግብር፨
- አባዲር፡ ሰማዕት፡ ወልደ፡ በክራጥስ፡ ፍቁር፨
- ኪያከ፡ ሶበ፡ ነጸሩ፡ ምስለ፡ ኤራኢ፡ በክብር፨
- ሕዝበ፡ መኰንን፡ አንከሩ፡ ወተሀውከት፡ ምድር፨
-
- ተማሕፀንኩ፡ በተቀንዎትከ፡ ምስለ፡ ፅፅ፡ ዐቢይ፨
- ከመ፡ ዲበ፡ መስቀል፡ አይሁድ፡ ለዘእም፡ ባሕርይ፡ ባሕርይ፨
- ምስለ፡ ኤራኢ፡ ድንግል፡ ሠናይተ፡ ላህይ፨
- ከመ፡ አንጸሕ፡ እምጌጋይየ፡ በደመ፡ ስምዕከ፡ ማይ፨
- በአዛበ፡ ጸጋ፡ ንዝኃኒ፡ አባዲር፡ ኅሩይ፨
-
- ተማሕፀንኩ፡ በተወድዮትከ፡ ውስተ፡ ከርሠ፡ ጤገን፨
- መጠነ፡ ዕለታት፡ ሠላስ፡ እንዘ፡ ታሕቴሁ፡ እሳት፨
- አባዲር፡ ንጉሥ፡ እኅወ፡ ኤራኢ፡ ንግሥት፨
- ማኅፀንተከ፡ ተራድአኒ፡ በዕለተ፡ ግሩም፡ ግሩም፡ ቅስት፨
- እስመ፡ ለከ፡ ኃይል፡ ወለከ፡ ረድኤት፨
-
- ተማሕፀንኩ፡ በቀዊሞትክሙ፡ ውስተ፡ ምክያደ፡ ብርት፡ በሰንዕ፨
- ከመ፡ አስካለ፡ ወይን፡ ጥዑም፡ እስከ፡ ዓፀሩክሙ፡ ሰብእ፨
- ኤራኢ፡ አግዝአት፡ ወአበዲር፡ እግዚእ፨
- ነፍስየ፡ አስተፃ፡ ንዑ፡ እስመ፡ ነፍሰ፡ ብእሲ፡ ኃጥእ፨
- አመ፡ በደብረ፡ ጽዮን፡ ድኅረ፡ ይቀውም፡ በግዕ፨
-
- ተማሕፀንኩ፡ በተመትሮታ፡ ለክሳድከ፡ ዳግመ፨
- በሰይፈ፡ ሐራዊ፡ ኤራኢ፡ እምድኅረ፡ መትረት፡ ቅድመ፨
- አባዲር፡ እምገድል፡ እስመ፡ ልብከ፡ ኢደክመ፨
- ክርስቶስ፡ ተካየደከ፡ ወወሀበከ፡ ሰላመ፨
- አመ፡ ለአጽንዖ፡ ኪያከ፡ በጥቃከ፡ ቆመ፨
-
- ተማሕፀንኩ፡ በደምክሙ፡ ድኅረ፡ ከመ፡ ማይ፡ ተክዕወ፨
- ዘአስተጋብአ፡ ሳሙኤል፡ አስተጋብኦ፡ ፍትወ፨
- አባዲር፡ ወኤራኢ፡ ዘአሥመሮክሙ፡ ሕያወ፨
- አንብሩ፡ ዲበ፡ ርእስከ፡ አክሊለ፡ በረከት፡ ፅዕድወ፨
- እስመ፡ ለክብርክሙ፡ ዘንተ፡ መውኩ፡ ድልወ፨
- ተረፈ፡ መልክእ፡
-
- ሰላም፡ ለከ፡ አባዲር፡ ሠርዌሃ፡ ለመቅደሰ፡ ገድል፡ ዓባይ፨
- ህየንተ፡ ዘበምድር፡ አድማዕከ፡ መንግሥተ፡ ሰማይ፨
- ወመዝገበ፡ ዘአዶናይ፨
-
- ሰላም፡ ለከ፡ ምክረ፡ ፋሲለደስ፡ አቡከ፡ ሶበ፡ ኣጽማዕከ፡ በእዝን፨
- ከመ፡ ጽላሎት፡ ረሰይከ፡ ግርማ፡ መኰንን፨
- አባዲር፡ ወሬዛ፡ ስን፨
-
- ሰላም፡ ለከ፡ ዘኢይጠፍእ፡ እሳተ፡ ከመ፡ ኢትርአይ፡ ግሙራ፨
- በእሳተ፡ ጤገን፡ ፈጸምካ፡ ብዝኃ፡ መከራ፨
- አባዲር፡ መስፍነ፡ ሐራ፨
-
- ሰላም፡ ለካ፡ ለእኅትከ፡ ኤራኢ፡ አባዲር፡ እንዘ፡ ትሜህራ፡ ምሥጢረ፨
- ለተወክፎ፡ ሥቃይ፡ ፈለስከ•እምብሔር፡ ብሔረ፨
- ገድልከ፡ እስከ፡ ተነክረ፨
-
- ሰላም፡ ለከ፡ ዘኢይትበተካ፡ ንስቲተ፡ ዜና፡ ምሕራኤል፡ ኃብል፨
- እስመ፡ ሰሐበከ፡ ጾርከ፡ አርዑተ፡ መስቀል፨
- አባዲር፡ መስተጋድል፨
-
- ሰላም፡ ለከ፡ ብዕለ፡ በካራጥስ፡ እንዘ፡ ትሬሲ፡ ቀትለ፨
- አባዲር፡ ፃመውከ፡ ወአብዝኅከ፡ ገድለ፨
- በወንጌል፡ ከመ፡ ተብህለ፨
-
- ሰላም፡ ለከ፡ በዕለተ፡ ምንዳቤየ፡ አጽምአ፡ እዝነ፡ ዚአከ፡ ኀቤየ
- አባዲር፡ ክቡር፡ እግዚእየ፨
- አምጣነ፡ ጽኑዕ፡ ብከ፡ ትውክልተ፡ ዚአየ፨
- ወላዕሌከ፡ አስመከት፡ ነፍስየ፨