Subjects
Martyr
ፊቅጦር፡
Fiqṭor
Victor
Victor
Malkəʾ
-
- መንክራቲከ፡ ብዙኅ፡ ወገድላቲከ፡ ይስብኩ፨
- ከናፍረ፡ ኅሊና፡ ላዕሌየ፡ ወልሳናተ፡ ልብ፡ ተሐውኩ፨
- አለብጠኒ፡ ፊቅጦር፡ ፈጽሞ፡ ውዳሴከ፡ ዝኩ፨
- እመሰ፡ ሰልጦ፡ ክህልኩ፨
- ወጢነሰ፡ ናሁ፡ ሰወጠንኩ፨
-
- ሰላም፡ ለፅንሰትከ፡ ዘተዛወገ፡ ነበባ፨
- ምስለ፡ ፅንሰ፡ ዮሐንስ፡ ነቢየ፡ ራባ፨
- ፊቅጦር፡ ስሒን፡ ዘሀገረ፡ ላባ፨
- ከመ፡ ትዜኑ፡ ተፀንሶትከ፡ ኀአበ፡ እምከ፡ ቀራባ፨
- ለሥዕለ፡ ማርያም፡ ርኅራኄ፡ አጽሐባ፨
-
- ሰላም፡ ለልደትከ፡ ለማርታ፡ እምከርሣ፨
- ድኅረ፡ ተፈጸመ፡ ዘመነ፡ ፅንሳ፨
- ፊቅጦር፡ ንጹሕ፡ ሕሩመ፡ ኀጢአት፡ ወአበሳ፨
- ለወላዲትከ፡ ለኃጢአ፡ ውሉድ፡ አጽበሳ፨
- ሶበ፡ ርእየተከ፡ ተፈሥሐት፡ ነፍሳ፨
-
- ሰላም፡ ለሐውጾትከ፡ ውስተ፡ ቤተ፡ ምጥማቅ፡ ለገይስ፨
- ከመ፡ ትትወለድ፡ ዳግመ፡ እመንፈስ፡ ቅዱስ፨
- ፊቅጦር፡ በለስ፡ ዘቀስሙከ፡ ለፈውስ፨
- እምድኅረ፡ ቅብአከ፡ ቅብአ፡ ሃይማኖት፡ ቀሲስ፨
- አሜሃ፡ እምሰማያት፡ ተውህበከ፡ ልብስ፨
-
- ሰላም፡ ለሞገሰ፡ ስምከ፡ ልበ፡ ዐላውያ፡ ዘአደንገፀ፨
- እመ፡ እምሰማያት፡ ሐወጸ፨
- ፊቅጦር፡ ብርሃን፡ እንተ፡ አልብከ፡ ሕፀፀ፨
- ቅድመ፡ ስብሐቲከ፡ ሥነ፡ ርኅራኄከ፡ ቢጸ፨
- ይፈርህ፡ ኦርያሬስ፡ ወየኀፍር፡ ገጸ፨
-
- ሰላም፡ ለዝክረ፡ ስምከ፡ ውስተ፡ አፈ፡ ኵሉ፡ ዘተሠይመ፨
- እንዘ፡ መና፡ ሰማይ፡ ይትሜሰል፡ ዲበ፡ ሐቅለ፡ ሲና፡ ዘዘንመ፨
- ፊቅጦር፡ አርዝየ፡ ዘአዕብይከ፡ ቆመ፨
- ሰውረኒ፡ በጽላሎትከ፡ እመንፈሰ፡ ደዌ፡ መቅድመ፨
- ወእምእደ፡ ደዌ፡ ዘይስዕር፡ ስመ፨
-
- ሰላም፡ ለሥዕርተ፡ ርእስከ፡ እለ፡ ጽፉቀ፡ በቈላ፨
- ለርእስከ፡ ውስተ፡ መልዕላ፨
- ፊቅጦር፡ ልምሉም፡ ዘገራህተ፡ መንፍሥት፡ ሄላ፨
- ኢያስተርኢ፡ በላዕሌየ፡ ለሥዕርት፡ ጌጋይ፡ በቈላ፨
- ነፍኒፈ፡ ቅብእከ፡ ለርእስየ፡ ያጥልላ፨
-
- ሰላም፡ ሰላም፡ ለመዝገበ፡ ከርሥከ፡ ዛቲ፨
- ነዋየ፡ ኀጢኣት፡ መስቴማ፡ እንተ፡ ኢያንበሩ፡ ባቲ፨
- ፊቅጦር፡ ጠቢብ፡ ዘኢየኀደጠከ፡ ምክረ፡ መስሓቲ፨
- ዕቀበኒ፡ በጸሎትከ፡ ለብእሲ፡ መስሓቲ፨
- እስመ፡ እምኀቤከ፡ ተምኔትየ፡ ዛቲ፨
-
- ሰላም፡ ለንዋየ፡ ውስጥከ፡ ዘአውፅእዎ፡ እመዝገቡ፨
- ከመ፡ ይግድፍዎ፡ ሐራ፡ ለአጵሎን፡ ውስተ፡ መርኅቡ፨
- ፊቅጦር፡ ልምሉም፡ ለገነተ፡ ጽባሕ፡ ኅንባቡ፨
- አቡ፡ አቡ፡ ዘያሥተፌሥሕ፡ ንናቡ፨
- እንተ፡ ውእቱ፡ ለወይንየ፡ ገይቡ፨
-
- ሰላም፡ ለመላክኢከ፡ እለ፡ መጽለዋ፡ ወጸልማ፨
- ውስተ፡ ከርሠ፡ እሳት፡ ወማይ፡ አመ፡ ወደዩከ፡ ደቂቀ፡ ዘማ፨
- ፊቅጦር፡ ወሬዛ፡ ተወካፌ፡ ሕማም፡ ወጻማ፨
- ዘመላክኢከ፡ ውስከኒ፡ ግርም፨
- ርእዮ፡ ይደንግፅ፡ ወይጕየይ፡ መስቴማ፨
-
- ሰላም፡ ለፍልሰተ፡ ነፍስከ፡ ውስተ፡ መንፈሳዊት፡ እንጣልጋ፨
- ለመልአከ፡ ዓለም፡ ዲያብሎስ፡ ድኅረ፡ ሞእኮ፡ በሥጋ፨
- ጽርሐ፡ ሃይማኖት፡ ፊቅጦር፡ ወለኆኅተ፡ ፍቅር፡ መንሰጋ፨
- አስተሳትፈኒ፡ ለክብረ፡ ፍልሰትከ፡ ሕጋ፨
- ዘተውህባ፡ ላቲ፡ ሞገሰ፡ ወጸጋ፨
-
- ሰላም፡ ለበድነ፡ ሥጋከ፡ ዘገደፍዎ፡ በመርኅብ፨
- ጊዜ፡ መተሩ፡ ሥጋከ፡ ድዉታነ፡ አልባብ፡ ሕዝብ፨
- ፊቅጦር፡ የዋህ፡ ዘኢይትኤረየከ፡ ርግብ፨
- እስመ፡ ሥርዓተ፡ ብንት፡ ወቀርነብ፡ ኪያየ፡ ለዐቂብ፨
- እስመ፡ አጥረይኩከ፡ ትኵነኒ፡ ከመ፡ እም፡ ወአብ፨
-
- ሰላም፡ ሰላም፡ ለበድነ፡ ሥጋከ፡ በጥብላሌ፨
- በእደ፡ ወሬዛ፡ ሆርዮን፡ ድኅረ፡ ፈጸምከ፡ ሕገ፡ ክላሌ፨
- ፊቅጦር፡ ስቡሕ፡ እንተ፡ አልብከ፡ ምሳሌ፨
- ወይሌ፡ ወይሌ፡ ለዝክረ፡ ሞትከ፡ ወይሌ፨
- እፎኑመ፡ ተኀባእከ፡ ዕንቍየ፡ ቢረሌ፨
-
- ሰላም፡ ለመቃብሪከ፡ እደ፡ ሆርዮን፡ ዘከረያ፨
- ውስተ፡ ቅጽረ፡ ባሪቆን፡ ምዝብርት፡ እምቅድመ፡ ያፍልሱከ፡ አንጾኪያ፨
- ፊቅጦር፡ ሰማዕት፡ ወሐዲስ፡ ሐዋርያ፨
- ለበድነ፡ ሥጋከ፡ እንተ፡ ትሰመይ፡ ሙዳያ፨
- ለይእቲ፡ ምድረ፡ ጻድቅ፡ አሌዕል፡ ዕበያ፨
-
- ሰላም፡ ሰላም፡ ለመቃብሪከ፡ ዳግሚት፨
- ዘበአንጾኪያ፡ ሕንጽት፨
- ፊቅጦር፡ ሰዊት፡ ወሰብለ፡ ዐቢይ፡ መንፍሥት፨
- እንዘ፡ ብከ፡ ተቅዋመ፡ ማኅቶት፡ መትሕተ፡ ከፈራ፡ ለሞት፨
- ኢመፍትው፡ ሥዋሬከ፡ አቡየ፡ ማኅቶት፨
-
- ሰላመ፡ ጳውሎስ፡ ጸሐፈ፡ መልእክተ፨
- ናሁ፡ ዘራእኩ፡ ዘውዳሴከ፡ ሕጠተ፨
- ፊቅጦር፡ ባሕቱ፡ ፍሬ፡ ከናፍርየ፡ ዘንተ፨
- ዘዘርአ፡ ሰብእ፡ በሥጋሁ፡ የአርር፡ ሞተ፨
- ወዘዘርአ፡ በመንፈሱ፡ የአርር፡ ሕይወተ፨