Details
-
- መልክአ፡ ሥቃይ፡ ሥዑለ፡ መጽሔተ፡ ሥጋከ፡ አርአየ፨
- እምአመ፡ ትቤ፡ ለሊከ፡ እስከ፡ ፈጸምከ፡ ሥቃየ፨
- ኦጊዮርጊስ፡ በዐውደ፡ ነገሥት፡ በዝየ፨
- እመውት፡ አነ፡ በስሙ፡ ለዘሞተ፡ በእንቲአየ፨
- ወህየንተ፡ ደሙ፡ ክቡር፡ አክዑ፡ ደምየ፨
-
- ኣማሕፀንኩከ፡ በቀዊሞትከ፡ በቅድመ፡ ነገሥት፡ ዐላውያን፨
- ከመ፡ ታማሕፅነኒ፡ በርትዕ፡ መጠነ፡ ብከ፡ ሥልጣን፨
- ኦጊዮርጊስ፡ ደብረ፡ ግፉዓን፨
- ብዙኀ፡ እስመ፡ ገፍዑኒ፡ ምቅድሐ፡ ተውላጥ፡ ዘመን፨
- ወመድሎተ፡ ጕህሉት፡ ብዙኅ፡ ሐሳዊ፡ ልሳን፨
-
- ኣማሕፀንኩከ፡ በተአስሮትከ፡ ድኅሪተ፡ በአሕባል፨
- ከመ፡ ኢትርስአኒ፡ ሊተ፡ ጊዮርጊስ፡ ኀያል፨
- ዝናመ፡ ምሕረት፡ ያዝንሙ፡ እምሕረተ፡ ሰማይ፡ ቃል፨
- ጸሎትከ፡ ወስእለትከ፡ ደመናተ፡ ሰማይ፡ ልዑል፨
- እምተስፋ፡ ልምላሜ፡ በዘተዐርቀ፡ ሕይወትየ፡ ሐቅል፨
-
- አማሕፀንኩከ፡ በፍጻሜ፡ ስምዕከ፡ ጊዜ፡ ተጋድሎ፡ ፍጹመ፨
- ለእለ፡ ከዐዉ፡ ደመከ፡ ወለለ፡ አውዐዩ፡ ዘዚአከ፡ ዐፅመ፨
- ኦጊዮርጊስ፡ ከመ፡ ተጋድልከ፡ ቅድመ፨
- ተጋደለ፡ ምስለ፡ ፀርየ፡ ኢይጽብአኒ፡ ዳግመ፨
- ወኢታርእየኒ፡ ጸብአ፡ ፀር፡ ግሩመ፨
-
- ሃይማኖተ፡ ሥሉስ፡ ቅዱስ፡ እንዘ፡ ትሰብክ፡ ፍጹመ፨
- ተጋደልከ፡ ገድለ፡ ፯አክራመ፨
- ጊዮርጊስ፡ ዘኢተአምር፡ ድካመ፨
- አድኅነኒ፡ እመፅራርየ፡ ኢይጽብኡኒ፡ ዳግመ፨
- ወኢያርእዩኒ፡ መደንግፀ፡ ሕልመ፨
-
- ዘአስተጋባእኩ፡ በምድረ፡ ሥቃይከ፡ ዘተዘርአ፨
- ሥርናየ፡ ውዳሴከ፡ መባዐ፡ ተወከፈኒ፡ ኅቡአ፨
- እመሰ፡ ትብለኒ፡ ሰፍረ፡ ነገሩ፡ ኢመልአ፨
- መለኮትኒ፡ ፍቅርከ፡ ዘበፍቅረ፡ ሰብእ፡ ተሰብአ፨
- ኢየኀሥሦ፡ ለሰብእ፡ እምኀይሉ፡ ዘወፅአ፨