ጠቢበ፡ ጠቢባን፡ Ṭabiba Ṭabibān

Wisest of the Wise

- ኦእግዚአብሔር፡ ጠቢበ፡ ጠቢባን፡ ከሃሊ፨
- እስከ፡ ለዓለም፡ እምጥንት፡ እንተ፡ ኢትበሊ፨
- ድኩመ፡ ኅሊና፡ ገብርከ፡ ወፈራሀ፡ ልብ፡ ኢተኀባሊ፨
- እስመ፡ ኀቤከ፡ እግዚኦ፡ ጸሎተ፡ አድኅኖ፡ እጼሊ፨
- አድኅነኒ፡ ወባልሐኒ፡ እምኵሉ፡ ቀታሊ፨
- ኦፈጣሬ፡ ዓለማት፡ በኀይለ፡ አርምሞ፡ ወነቢብ፨
- እምጥንተ፡ ቀዳማይ፡ እሑድ፡ እስከ፡ ሰርከ፡ ሰዱስ፡ ዐርብ፨
- እግዚአብሔር፡ ኀያል፡ እግዚአብሔር፡ ጠቢብ፨
- ቀደሱከደርገ፡ አሜሃ፡ ትጉሃነ፡ ሰማይ፡ ወኪሩብ፨
- እስመ፡ እንበለ፡ አብ፡ ተረከብከ፡ ባሕቲትከ፡ አብ፨
- ኦዘነፃኅኮ፡ ለዲያብሎስ፡ በትዕቢቱ፨
- ወምስለ፡ ሚካኤል፡ አልዐልኮ፡ ለመንፈሰ፡ ገብርኤል፡ በተትሕቶቱ፨
- እግዚአብሔር፡ እምኵሉ፡ እስመ፡ ትሕትና፡ ትፈቱ፨
- መሀረኒ፡ ሕገ፡ ትሕትና፡ ዘእምኀቤከ፡ ወአቱ፨
- ትዕቢትስ፡ እምሰይጣን፡ ውእቱ፨
- ኦዘሞቃሕኮሙ፡ በቈላተ፡ ብካይ፡ ወወይሌ፨
- ለአባስያን፡ መላእክት፡ እንዘ፡ ታወድቆሙ፡ እምሉዓሌ፨
- እግዚአብሔር፡ ቀዋሚ፡ ለዓለመ፡ ዓለም፡ በኢስሳሌ፨
- አውድቆሙ፡ ለጸላእትየ፡ ወአቅንቶሙ፡ ብልባሌ፨
- ከመ፡ በዝንቱ፡ ያእምሩ፡ ኀይለከ፡ ከሃሌ፨
- ኦዘፈጠርኮ፡ እመሬተ፡ ምድር፡ ለአዳም፨
- እንዘ፡ ትጠበልሎ፡ በማእስ፡ ወታስተጣግዖ፡ በዐፅም፨
- መንፈሰ፡ ሕይወት፡ ነፋኅከ፡ ላዕሌሁ፡ እግዚአብሔር፡ ፍጹም፨
- ፍጥረኒ፡ በአምሳሊከ፡ በውስተ፡ ሐዳስ፡ ዓለም፨
- ከመ፡ እርሳዕ፡ ህላዌየዘሥጋ፡ ወደም፨
- ኦዘትቤ፡ ንግበር፡ ሎቱ፨
- ለእጓለ፡ እመሕያው፡ ቢጸ፡ ከመ፡ ኢይንበር፡ ባሕቲቱ፨
- እግዚአብሔር፡ መጋቢ፡ ወሠራዔ፡ ዓለም፡ በበሥርዐቱ፨
- ሥርዐኒ፡ ኀበ፡ ፈቀድከ፡ እምጾታ፡ ፈቃዳት፡ ክልኤቱ፨
- ሣልሳዊሰ፡ ግብር፡ እምሰይጣን፡ ውእቱ፨
- ኦዘአድኀንኮ፡ እምአበሳ፡ ርእሱ፡ ለብእሲ፨
- እስመ፡ አመክነየት፡ ብእሲት፡ ወይእቲኒ፡ በምክረ፡ ከይሲ፨
- በአድኅኖትከ፡ ዝንቱ፡ እግዚአብሔር፡ ተዓጋሢ፨
- ሥኅተኒ፡ ኣዕርፍ፡ እግዚኦ፡ እምቅንየተ፡ ሥጋ፡ አባሲ፨
- እስመነግድ፡ አነ፡ ወበግብር፡ ፈላሲ፨
- ኣዘአቅለልከ፡ ትካዛተ፡ አዳም፡ አበኵልነ፨
- እምቅንየስደቱ፡ እምገነት፡ እንዘ፡ ታሴፍዎ፡ ግዕዛነ፨
- እግዚአብሔር፡ አቅልል፡ ዘአጾርከኒ፡ ሐዘነ፨
- ትካዘ፡ ዓለምሰ፡ በበመዳልው፡ ኮነ፨
- ባሕቱ፡ ለሐዘንየ፡ ኀጣእኩ፡ ወሰነ፨
- ኦዘተወከፍከ፡ ዘአቤል፡ ቍርባነ፨
- እስከ፡ ብእሴ፡ ቅንኣት፡ ቀተሎ፡ እንዘይወግር፡ እብነ፨
- እግዚአብሔር፡ ኩነኒ፡ እምስኩረ፡ ቅንአት፡ ጸወነ፨
- እስመ፡ ዕዉረ፡ ልብ፡ ውእቱ፡ ቀናኢ፡ ወኢይሬኢ፡ ብርሃነ፨
- ወላዕለ፡ እኁሁ፡ የዋህ፡ የሐቂ፡ አስናነ፨
- ኦመንሥኤ፡ ሴት፡ ህየንተ፡ አቤል፡ ዘኖመ፨
- ወዘአለበውኮ፡ ለሄኖስ፡ ጸውዖተ፡ ስምከ፡ ቅድመ፨
- እግዚአብሔር፡ ክድነኒ፡ መንዲለ፡ በረከት፡ እኑመ፨
- ወርግም፡ ጸላእትየ፡ በከመ፡ ቃየን፡ ተረግመ፨
- ሶበ፡ ነፍሰ፡ ጻድቅ፡ ቀተለ፡ ወከዐወ፡ ደመ፨
- ኦዘዐቀብኮ፡ ምስለ፡ ንጹሓን፡ ሕዝቡ፨
- አመ፡ ደቂቀ፡ ሴት፡ ወረዱ፡ ኀበ፡ አንስተ፡ ቃየን፡ በወርኀ፡ ምግቡ፨
- እግዚአብሔር፡ ለያሬድ፡ በደብረ፡ መዛግብት፡ ደብረ፡ ምስካቡ፨
- ዕቀበኒ፡ በምሕረትከ፡ ኢይምስወኒ፡ በላህቡ፨
- ገሃነማዊ፡ እሳት፡ ለጽልመት፡ መዝገቡ፨
- ኦዘኀባእኮ፡ ለነቢይከ፡ ሄኖክ፨
- ወብሔረ፡ ሕያዋን፡ ወሰድኮ፡ እምገጸ፡ ሞት፡ ድሩክ፨
- እግዚአብሔር፡ ሕያው፡ ዘኢትመውት፡ አምላክ፨
- ኅብአኒ፡ በጽላሎትከ፡ እምሰብአ፡ ምንሳዌ፡ ወሀውክ፨
- እስመ፡ ተወከልኩ፡ በኀይልከ፡ ፈጣሪ፡ ቡሩክ፨
- ኦዘወሀብኮ፡ ኑኀ፡ መዋዕል፡ ለመቱሳላ፨
- ወለአበወ፡ ሕዝብ፡ ኵሎሙ፡ እለ፡ ውስተ፡ ፍጽም፡ ወከዋላ፨
- እግዚአብሔር፡ ወይንየ፡ ለብርሃነ፡ ልብየ፡ ቀላዔ፡ ግላ፨
- አስክረኒ፡ በጣዕምከኑኀ፡ መዋዕልየ፡ ኵላ፨
- ወበስቴከ፡ መስተፍሥሒ፡ አርብሐኒ፡ ተድላ፨
- ኦዘኀባአኮ፡ ውስተ፡ ከርሠ፡ ታቦት፡ ለኖኅ፨
- ደቂቀ፡ ቃየን፡ ወሴት፡ አመ፡ ተሰጥሙ፡ በአይኅ፨
- እግዚአብሔር፡ መሓሪ፡ ወእንበለ፡ ቂም፡ የዋህ፨
- ለኃጥእ፡ ገብርከ፡ እግዚኦ፡ ኢትቅሥፈኒ፡ በፍትሕ፨
- እስመ፡ እምኀጢአት፡ አልቦ፡ ብእሲ፡ ንጹሕ፨
- ኦዘኀደርከ፡ ውስተ፡ ቤተ፡ ጻድቅ፡ ሴም፨
- እንዘ፡ ተኀሪኪያሁ፡ እምነያፌት፡ ወከም፨
- ለመቅደሰ፡ ነፍስየ፡ ሐዳስ፡ ኢየሩሳሌም፨
- እግዚአብሔር፡ ኅድር፡ ላዕሌሃ፡ በሥነ፡ ተዋሕዶ፡ ሕሩም፨
- ከመ፡ ነባቢት፡ ነፍስ፡ ተኀድር፡ በደም፨
- ኦዘአማዕቀብኮ፡ ቀበረ፡ አዳም፡ አቡነ፨
- ለመልከ፡ ጼዴቅ፡ ንጹሕ፡ እንዘ፡ ትሰምዮ፡ ካህነ፨
- እግዚአብሔር፡ ኩነኒ፡ ለዑቃቤየ፡ መድኅነ፨
- ላዕሌየ፡ ሰብአ፡ ነገር፡ እመ፡ አንሥኡ፡ ተከናነ፨
- ወከመ፡ አርዌ፡ ርግምት፡ አብልኁ፡ ልሳነ፨
- ኣዘዘረውከልሳነ፡ ኵሉ፡ አንጋድ፨
- ኀበ፡ ኍልቈ፡ ሰብዓ፡ ወክልኤ፡ እምቃለ፡ ዕብራዊ፡ ዋሕድ፨
- ሶበ፡ እምድኅረ፡ አይኅ፡ ወጠኑ፡ ሐኒጸ፡ ልዑል፡ ማኅፈድ፨
- ዝርዎሙ፡ ለአፅራርየ፡ ከመሐሠረ፡ እክል፡ እምዐውድ፨
- ወከመ፡ በነፋስ፡ ኀያል፡ ይዘረው፡ ሐመድ፨
- ኦዘአውፃእኮ፡ እምከላውዴዎን፡ ምድረ፡ ርስቱ፨
- ወጸዋዕኮ፡ እምካራን፡ እማእከለ፡ አፍላግ፡ ክልኤቱ፨
- እግዚአብሔር፡ አሐዱ፡ ለአብርሃም፡ ሃይማኖቱ፨
- ጸውዐኒ፡ ኀበ፡ አሚን፡ እምአምልኮ፡ ጣዖት፡ ከንቱ፨
- እስመ፡ ሐውዛተ፡ ምድር፡ ኵሎሙ፡ ጣዖታት፡ እሙንቱ፨
- ኦፈናዌ፡ እሳት፡ ዲበ፡ አህጉር፡ ኅምስቱ፨
- ወመድኅነ፡ ጻድቅ፡ ሎጥ፡ በእደ፡ መላእክት፡ ክልኤቱ፨
- አድኅኖተ፡ ዚአየ፡ ሥመር፡ እግዚአብሔር፡ አምላከ፡ ዝንቱ፨
- ወሚጣ፡ ኀበ፡ ዕድውየ፡ ዘይጸልአኒ፡ በከንቱ፨
- እንተ፡ አንደዳ፡ ላዕሌየ፡ ትብልዖ፡ እሳቱ፨
- ኦዘወሀብካ፡ ድኅረ፡ ማዕዘ፡ አንስት፡ ኀደጋ፨
- ለብእሲተ፡ አብርሃም፡ ሳራ፡ ወልደ፡ በረከት፡ መላኤ፡ ንትጋ፨
- እግዚአብሔር፡ ሀበኒ፡ ዘኢሰአልኩከፍድፋዴ፡ ጸጋ፨
- ቅድመኒ፡ በእዴከ፡ ፈጣሬ፡ ኵሉ፡ እንግልጋ፨
- እንበለ፡ እስአልከ፡ አነከደንከኒ፡ ሥጋ፨
- ኦዘአድኀንኮ፡ ለይስሐቅ፡ እምተጠብሖ፨
- አመ፡ አዕረጎ፡ አብርሃም፡ ላዕለ፡ ዕፀ፡ ምሥዋዕ፡ እንዘ፡ ይሞቅሖ፨
- እግዚአብሔር፡ ፍጹም፡ በኂሩት፡ ወተራኅርኆ፨
- አድኅነኒ፡ ወባልሐኒ፡ እምኵሉ፡ እኩይ፡ ዘእፈርሆ፨
- ለፀርኒፍና፡ ሀጕል፡ ምርሖ፨
- ኦዘአድኀንኮ፡ እምቀትለዔሳው፡ እኁሁ፨
- ወአመ፡ ሳባ፡ ዴግኖ፡ እንበይነ፡ ክልኤሆን፡ አዋልዲሁ፨
- ለወልደ፡ ርብቃ፡ ያዕቀብ፡ እግዚአብሔር፡ ዐቃቢሁ፨
- አድኅነኒ፡ ብምሕረትከ፡ ወዕቀበኒ፡ ከማሁ፨
- እስመ፡ ጸላእትየ፡ ጥቀ፡ ፈድፈዱ፡ ወበዝኁ፨
- ኦፈታኔ፡ ኢዮብ፡ በደዌ፡ ተጽናስ፡ ወዐበቅ፨
- እስመ፡ አመከርኮ፡ ለሰይጣን፡ ሃይማኖተ፡ ዝንቱ፡ ጻድቅ፨
- እግዚአብሔር፡ አንተ፡ ማእምረ፡ ዘውስተ፡ ልበ፡ ባሕር፡ ዕሙቅ፨
- ኢትፍትነኒ፡ በሕማም፡ ወበጽንዐ፡ ንዴት፡ መጽዕቅ፨
- እስመ፡ ድኩመ፡ ኀይል፡ አነ፡ ወብእሲ፡ ውዱቅ፨
- ኦዘአዕበይኮ፡ ለዮሴፍ፡ በብሔረ፡ ግብጽ፨
- ድኅረ፡ አኀዊሁ፡ ሤጥዎ፡ በብሩረ፡ ቅንአት፡ ሕጹጽ፨
- ወዘአኰነንኮ፡ ለሙሴ፡ ዐራቄ፡ ፪አብያጽ፨
- አዕብየኒ፡ ላዕለ፡ ሥጋየ፡ እመንገለ፡ ጸባብ፡ አንቀጽ፨
- ወአኰንነኒ፡ በካልእ፡ ገጽ፨
- ኦዘፈነውኮ፡ እምብሔረ፡ ምድያም፡ ለሙሴ፨
- አርብዓ፡ ዓመተ፡ ድኅረ፡ ነበረ፡ ፈላሴ፨
- ሕዝበ፡ እስራኤል፡ ያግዕዝ፡ እምግብርናተ፡ ፈርዖን፡ ንጉሠ፡ ራምሴ፨
- ፈኑ፡ ሊተ፡ ከማሆሙ፡ ዘያግዕዘኒ፡ ብእሴ፨
- እምቅንየተ፡ ሕማም፡ ፀዋግ፡ ወጽኑዕ፡ ዝልጋሴ፨
- ኦዘሰማዕከ፡ ገዓረ፡ ሕዝብከ፡ እስራኤል፨
- ወብሔረ፡ ግብጽ፡ ወረድከ፡ ትባልሖሙ፡ በኀይል፨
- ከመተናገርኮ፡ ለሙሴ፡ እማእከለ፡ እሳት፡ ወጽል፨
- ከማሆሙ፡ ስማዕ፡ ገዓርየ፡ ወአድኅነኒ፡ እምሀጕል፨
- በእድ፡ ጽንዕት፡ ወበመዝራዕት፡ ልዑል፨
- ኦዘአድኀንከ፡ አንጋደ፡ ኤፍሬም፡ ወምናሴ፨
- አመ፡ ግብጻውያን፡ ተቀሥፉ፡ በኍልቈ፡ ዐሥር፡ መቅሠፍተ፡ ሙሴ፨
- እስመ፡ መስተዐግሥ፡ አንተ፡ ወኢታስተፋጥን፡ ለድምሳሴ፨
- ሊተሰ፡ ጽንሐኒ፡ እግዚኦ፡ እስከ፡ እከውን፡ ተሣሤ፨
- ፍኖተ፡ ዚአከ፡ ዘምሉእ፡ ቅዳሴ፨
- ኦዘከፈልከ፡ ባሕረ፡ ኤርትራ፡ ግሩመ፨
- ወአዕደውኮሙ፡ ቦቱ፡ ለሕዝበ፡ እስራኤል፡ ገዳመ፨
- እስከ፡ አስጠምኮ፡ ለፈርዖን፡ ምስለ፡ ሰራዊቱ፡ ፍጹመ፨
- ኣዕድወኒ፡ ባሕረ፡ እሳት፡ እንዘ፡ ትገብር፡ መድምመ፨
- እግዚአብሔር፡ በጽድቅ፡ ዘትኴንን፡ ዓለመ፨
- ኦዝተሰባሕከ፡ በአስጥሞተ፡ ፈርዖን፡ ውስቴቱ፨
- ለባሕረ፡ ቍልዝም፡ ዕሙቅ፡ ዘኢይትዌሰን፡ መስፈርቱ፨
- ለአእላፈ፡ ሙሴ፡ ሕዝበከ፡ እንዘ፡ ታፀድዎሙ፡ ቦቱ፨
- ተሰባሕ፡ ዲበ፡ ፀርየ፡ እስመ፡ ተመያኒ፡ ውእቱ፨
- እግዚአብሔር፡ አሐዱ፡ ወአኮ፡ ክልኤቱ፨
- ኣዘአጽለልከሙ፡ እምሐሩረ፡ መዓልት፡ በደመና፨
- ወበነደ፡ እሳት፡ ሌሊተ፡ ዘመራሕኮሙ፡ በፍና፨
- ለእለ፡ ሙሴ፡ ሕዝብከ፡ እግዚአብሔር፡ አምላከ፡ ሲና፨
- ጸልለኒ፡ በረድኤትከ፡ ከመ፡ ኢይርአይ፡ ሙስና፨
- ወሶበ፡ እርኅብ፡ ከማሆሙ፡ ሴስየኒ፡ መና፨
- ኦዘሴሰይኮሙ፡ አርብዓ፡ ዓመተ፨
- ለሕዝበ፡ እስራኤል፡ መና፡ ሰማያዊ፡ ኅብስተ፨
- እምዐይነ፡ ኰኵሐ፡ ኮሬብ፡ ማየ፡ እንዘ፡ ታሰትዮሙ፡ ግብተ፨
- እግዚአብሔር፡ በዓለ፡ ጸጋ፡ እንበለ፡ ታኅጥአኒ፡ ምንተ፨
- መፍቅዳተ፡ ሥጋ፡ ወነፍስ፡ ሴስየኒ፡ አንተ፨
- ኦዘቀደስከ፡ ለአሮን፡ ክህነቶ፨
- ወኀረይከ፡ ለከ፡ እምቤተ፡ ያዕቆብ፡ ቤቶ፨
- እግዚአብሔር፡ ቀድስ፡ ለኅሊናየ፡ መልእክቶ፨
- ወበላዕሌየ፡ ቀናኢ፡ ለእመ፡ ነበበ፡ ከንቶ፨
- በእሳተ፡ ቆሬ፡ ኣውዕዮ፡ ወደምስስ፡ ሕይወቶ፨
- ኦዘወሀብኮሙ፡ ለሕዝበ፡ እስራኤል፡ ዘተቀደሱ፨
- አህጉረ፡ ሠላሳ፡ ነገሥት፡ ለትውልደ፡ ትውልድ፡ ይረሱ፨
- እግዚአብሔር፡ ዘሙሴ፡ እግዚአብሔር፡ ዘኢያሱ፨
- አብአኒ፡ ውስተ፡ ምድረ፡ ርስትከ፡ እንተ፡ ተዋረሳ፡ በነፍሱ፨
- ጻድቅ፡ አብርሃም፡ ለአሚን፡ ርእሱ፨
- ኦዘአቀምከ፡ ተከዜ፡ ዮርዳኖስ፡ ቀዳሚ፨
- ከመ፡ ኢያሱ፡ ይዕድዎ፡ ምስለ፡ ተረፈ፡ ዮሴፍ፡ ውብንያሚ፨
- እግዚአብሔር፡ ወጣኒ፡ እግዚአብሔር፡ ፈጻሚ፨
- እስከ፡ ተኀልቅ፡ መብዝኅቶሙ፡ ለዕድዋንየ፡ አረሚ፨
- ለፀሓይ፡ በላ፡ በገባኦን፡ ቁሚ፨
- ኦዝአዘዝከሙ፡ እምድምፀ፡ ጽራኆሙ፡ እስከ፡ ንዓለ፨
- አእላፈ፡ እስራኤል፡ ይዑዱ፡ ጥቅመ፡ ኢያሪኮ፡ ልዑለ፨
- እግዚአብሔር፡ ረስዮ፡ ለዕጸብየ፡ ቀሊለ፨
- ሰይጣንሰማዕቅፍየ፡ ዘያቀብጸኒ፡ ሣህለ፨
- ጻጹተ፡ ትእዛዛት፡ ይነጥፍ፡ ወይውኅጥ፡ ገመለ፨
- ኦዘአድኀንካ፡ ለብእሲተ፡ ብሔር፡ አሐቲ፨
- አመ፡ ዐላውያን፡ ተሀጕሉ፡ በመቅሠፍትከ፡ እንታክቲ፨
- ቃለ፡ ሰብአ፡ ዐይን፡ ክልኤ፡ እስመ፡ ተወክፈት፡ ይእቲ፨
- በምሕረትከ፡ ከማሃ፡ አመ፡ ይነቅህ፡ መዋቲ፨
- እግዚአብሔር፡ አድኅና፡ ለነፍስየ፡ ዛቲ፨
- ኦዝአባእኮሙ፡ ኀበ፡ ምድረ፡ ተስፋ፡ ዘይሤኒ፨
- ለወልደ፡ ነዌ፡ ኢያሱ፡ ወለካሌብ፡ ወልደ፡ ዮፎኒ፨
- እግዚአብሔር፡ ድኅረ፡ ርስተ፡ ነፍሰ፡ ጻድቃን፡ ክፍለኒ፨
- ዮምኒ፡ እግዚኦ፡ በዘአሐዩ፡ ሥርዐኒ፨
- አምጣነ፡ እሱር፡ አነ፡ በሥጋ፡ ማሳኒ፨
- ኦዘአድኀንኮሙ፡ በእደ፡ ፊንሐስ፡ ቀናኢ፨
- ለሕዝበ፡ እስራኤል፡ እምብድብድ፡ ወእምአፈ፡ ኲናተ፡ ጸባኢ፨
- እግዚአብሔር፡ ኀይሎሙ፡ ወመድኀኔ፡ ገጾሙ፡ ኢተመዋኢ፨
- ከማሆሙ፡ ተንሥእ፡ ታድኅነኒ፡ ለዘዚአከ፡ ገባኢ፨
- ሶበ፡ ላዕሌየ፡ ይትነሣእ፡ ጸላኢ፨
- ኦመድኅነ፡ እስራኤል፡ እንተ፡ ትቀትሎ፡ ለሲሳራ፨
- በእደ፡ ኢያዔል፡ ብእሲት፡ አመ፡ ምስፍና፡ ባርቅ፡ ወዲቦራ፨
- እግዚአብሔር፡ መዋኢ፡ ዘኢትትመዋእለግሙራ፨
- አድኅነኒ፡ እምእዴሆሙ፡ ለደቂቀ፡ ነኪር፡ ሐራ፨
- እለ፡ ይፈቅዱ፡ ያኅስሩ፡ ለነፍስየ፡ ክብራ፨
- ኦአምላከ፡ ጌዴዎን፡ ወመዊኦ፡ መስፍን፡ ዮፍታሔ፨
- ውኀይለ፡ ሳምሶን፡ ወልደ፡ ማኑሔ፨
- እግዚአብሔር፡ ርድአኒ፡ ሶበ፡ እጼውዐከ፡ ውስተ፡ ኵለሄ፨
- እመኒ፡ መጽኡኒ፡ ኢሎፍሊ፡ ወሞቅሑኒ፡ ሙቃሔ፨
- እትአመን፡ አንሰ፡ ኀይለከ፡ ፈታሔ፨
- ኦመድኅነ፡ እስራኤል፡ በእደ፡ ሳሙኤል፡ ድኅረ፡ ኤሊ፨
- ወበእደ፡ ንጉሥ፡ ሳኦል፡ እንተ፡ አድኀንከሙ፡ እምኢሎፍሊ፨
- እግዚአብሔር፡ ወትረ፡ መግቦተ፡ ዚአየ፡ ኅሊ፨
- ወሥመር፡ አድኅኖትየ፡ በረድኤትከ፡ ከሃሊ፨
- እምአፈ፡ መታሪ፡ መጥባሕት፡ ወኲናት፡ ቀታሊ፨
- ኦዘአድኀንኮ፡ ለኢሎፍላዊ፡ ጎልያድ፡ እምእዱ፨
- ወእምኲናተ፡ ሳኦልኒ፡ ወእምአቤሴሎም፡ ወልዱ፨
- እግዚአብሔር፡ ለዳዊት፡ እንተ፡ ኢትርሕቅ፡ እምነ፡ ዐውዱ፨
- አድኅነኒ፡ እምጸላእትየ፡ ለእመ፡ ኪያየ፡ ሮዱ፨
- እስመ፡ እሙንቱ፡ አእላፍ፡ ወአነ፡ አሐዱ፨
- ኣዘሰረይከ፡ ኀጢአተ፡ ዳዊት፡ መተንብል፨
- ሶበ፡ ቃለ፡ ብካይ፡ አምረረ፡ በሞተ፡ ኦርዮ፡ ቅቱል፨
- አናብዒሃ፡ ከማሁ፡ እንዘ፡ ትትከፍ፡ ልዑል፨
- ለነፍስየ፡ ስረይ፡ ጌጋያ፡ እምቅድመ፡ ይጸውን፡ ቃል፨
- ነፍስ፡ እግዚአብሔር፡ ፍጡነ፡ ብጽሒ፡ ዘይብል፨
- ኦዘረሰይኮ፡ ላዕለ፡ ነገሥተ፡ ምድር፡ መክብበ፨
- ለወልደ፡ ዳዊት፡ ሰሎሞን፡ ዘምሳሌ፡ ኵሉ፡ ነበበ፨
- ሀበኒ፡ እግዚኦ፡ እምኔከ፡ ጥበበ፨
- ዘባቲ፡ ነገሥት፡ ይነግሡ፡ እለ፡ ይኮንኑ፡ ሕዝበ፨
- ወኀያላን፡ ያጸንዑ፡ ምግበ፨
- ኦዘሰማዕኮሙ፡ ሶበ፡ ኀቤከሰአሉ፨
- ነገሥተ፡ እስራኤል፡ ወይሁዳ፡ ዘተንሥኡ፡ በመዋዕሉ፨
- እግዚአብሔር፡ ኀያል፡ መዋኤ፡ ኀያላን፡ ኵሉ፨
- ከማሁ፡ ትስማዕ፡ ነገርየ፡ አእዛነ፡ ርኅራኄከ፡ ጽሉ፨
- ወአድኅኖትከ፡ ወትረ፡ ምስሌየ፡ ተሀሉ፨
- ኦዝነረይኮሙ፡ ለነቢያተ፡ እስራኤል፡ ወይሁዳ፨
- ዕሴተ፡ ጻድቃን፡ ይርአዩ፡ ወዘኃጥኣን፡ ፍዳ፨
- መንፈሰ፡ ላእካኒከ፡ እሉ፡ ቅኑታነ፡ ማእስ፡ ወአነዳ፨
- ጸግወኒ፡ ሊተ፡ ለገብርከ፡ ዘፈጻሜ፡ ስምከቴዳ፨
- እግዚአብሔር፡ ለጽድቅ፡ ምዳ፡ ወድዳ፨
- ኦዘተበቀልከ፡ እምቤተ፡ አክዓብ፡ ክሡተ፨
- በቀለ፡ ናቡቴ፡ በግፍዕ፡ በይነ፡ ዐጸደ፡ ወይኑ፡ ዝሞተ፨
- እግዚአብሔር፡ ፈታሒ፡ እንዘ፡ ታነውን፡ መቅሠፍተ፨
- አርእየኒ፡ በጸላእትየ፡ ወኢትቅትሎሙ፡ ግብተ፨
- እመ፡ ቀተልኮሙሰ፡ ይረክቡ፡ ሣኅተ፨
- ኦዘትቤ፡ ርኢከኑ፡ ኤልያስ፨
- ከመ፡ በሕቁ፡ ደንገፀ፡ ልበ፡ ካብ፡ ንጉሥ፨
- እግዚአብሔር፡ ጸናሒ፡ ወመስተዕግሥ፨
- ርኢ፡ አንተ፡ ከማሁ፡ ድንጋፄ፡ ነሳሒት፡ ነፍስ፨
- ዘትሰግድ፡ ለከ፡ በአብራክ፡ ወርእስ፨
- ኦመድኅነ፡ ኤልያስ፡ እምእደ፡ ኤልዛቤል፡ ዘሰማርያ፨
- እስከ፡ ብሔረ፡ ሕይወት፡ ወሰድኮ፡ ዐይነ፡ መልአከ፡ ሞት፡ እንተኢ፡ ርእያ፨
- ወሐጹረ፡ ነቢይ፡ ኤልሳዕ፡ አመ፡ ገትዎ፡ ሰብአ፡ ሶርያ፨
- ሐጹረ፡ መድኀኒት፡ ኩነኒ፡ ከማሁ፡ እማዕገተ፡ እኩይ፡ ጕሕልያ፨
- እግዚአብሔር፡ ኀያል፡ ወጠቢብ፡ ኬንያ፨
- ኦዘአውፃእኮ፡ እምድኅረ፡ ውኅጦ፡ ዐንበሪ፨
- ሶበ፡ ጸውዐከ፡ ዮናስ፡ በቃለ፡ ጽራኅ፡ ተናጋሪ፨
- እግዚአብሔር፡ ትጉህ፡ ዘኢትነውም፡ ፈጣሪ፨
- አውፅአኒ፡ በጥበብከ፡ እምአንቀጸ፡ መጥባሕት፡ መታሪ፨
- እስመ፡ አምላከ፡ ጽድቅ፡ አንተ፡ ወእግዚእ፡ መሓሪ፨
- ኦእግዚአብሔር፡ ባሳሔ፡ አንጋድ፡ ክልኤቱ፨
- አመ፡ ስልምናሶር፡ ንጉሥ፡ ወዎሙ፡ ለዐሠርቱ፨
- ወአመ፡ ሰናክሬም፡ ዐርገ፡ በዘመነ፡ ሕዝቅያስ፡ እምድኅረ፡ ዝንቱ፨
- አድኅነኒ፡ ዘአድኀንኮሙ፡ እንበለ፡ ጸባኢት፡ በከንቱ፨
- አምላከ፡ ሙሴ፡ ወአሮን፡ እስመ፡ አንተ፡ ውእቱ፨
- ኦዘርኢከ፡ ለሰናክሬም፡ ትዕይርቶ፨
- በመቅሠፍተ፡ መልአክ፡ ኅቡእ፡ እስከ፡ አህጐልከሰራዊቶ፨
- ለጻድቅ፡ ሕዝቅያስ፡ ተወኪፈከ፡ ስእለቶ፨
- ትዕይርተ፡ ፀርየ፡ ርኢ፡ ከማሁ፡ ወአርእየኒ፡ ድቀቶ፨
- እስመ፡ ሐሳዊ፡ ውእቱ፡ ወያፈቅር፡ ከንቶ፨
- ኦዘፈታሕኮ፡ እሙቃሔ፡ እግሩ፡ ወእዱ፨
- ሶበ፡ ምናሴ፡ ጸለየ፡ እንዘ፡ ያዜክረከ፡ ብዝነ፡ እበዱ፨
- እግዚአብሔር፡ ፍትሐኒ፡ ለኀጢአትየ፡ እምጽንዐ፡ ጕንዱ፨
- ወኢታሙተኒ፡ ግብተ፡ በከመ፡ አሞጽ፡ ወልዱ፨
- እንበለ፡ ኣሥምርከ፡ በዘመን፡ ዘሕጹጽ፡ ፍቅዱ፨
- ኦዘአንጻሕኮ፡ ለኢሳይያስ፡ እምለምጽ፨
- እንዘ፡ ታለክፎ፡ አፉሁ፡ በፍሕመ፡ እሳት፡ ብቁጽ፨
- እግዚአብሔር፡ አዝዝ፡ መላእክቲከ፡ አብያጽ፨
- ይውሥርዎ፡ ለፀርየ፡ እማእከለ፡ አእጋር፡ ወገጽ፨
- እስከ፡ ይሠጥቅዎ፡ በሞሠርት፡ ዘዕፅ፡ =፨
- ኦዘተወከፍኮ፡ ለኢዮስያስ፡ በፓሳ፨
- አመሦዐ፡ ለከ፡ መሥዋዕተ፡ ፈቃድ፡ በኀሠሣ፨
- እግዚአብሔር፡ ተወከፍ፡ ቍርባነ፡ ጸሎትየ፡ እንዘ፡ ትቄድሳ፨
- ወአጕይይ፡ ጸላእትየ፡ እምገጸ፡ አሐዱ፡ አንበሳ፨
- ከመ፡ ይጐይዩ፡ አእላፍ፡ እንስሳ፨
- ኦዘአውፃእኮ፡ እምግበ፡ ዐምዐም፡ ለኤርምያስ፨
- ዘወደይዎ፡ ጳስኮር፡ ወሴዴቅያስ፡ ንጉሥ፨
- እግዚአብሔር፡ ዘሥጋ፡ እግዚአብሔር፡ ዘነፍስ፨
- አውፅአኒ፡ በረድኤትከ፡ እምአንቀጸ፡ ተስናን፡ ወባእስ፨
- ከመ፡ አውፃእከኒ፡ አንተ፡ ቀዳሚ፡ እምከርሥ፨
- ኦዘአትረፍከነዳያነ፡ ሕዝብከ፡ ውስቴታ፨
- ለአብዕልተ፡ ብሔርሰ፡ አውረድከሙ፡ ምድረ፡ ዴብላታ፨
- ለኢየሩሳሌም፡ ቤትከ፡ ናቡከደነጾር፡ አመነታ፨
- አትርፈኒ፡ እምተፄውዎ፡ በውስተ፡ ዓለማት፡ መንታ፨
- እግዚአብሔር፡ ጸወንወሥሙር፡ ወልታ፨
- ኦዘአድኀንከ፡ ነፍሳተ፡ ፫ደቂቅ፨
- አመ፡ በእንቲአከ፡ ቦኡ፡ ማእከለ፡ እቶን፡ ዕሙቅ፨
- እንዘ፡ ትከውኖሙ፡ ጠለ፡ ህየንተ፡ ዋዕይ፡ ወሞቅ፨
- አድኅነኒ፡ እምነበልባል፡ ወእምአየራዊ፡ መብረቅ፨
- እግዚአብሔር፡ መሓሪ፡ ወአምላከ፡ ጻድቅ፨
- ኦዘሰዐርከ፡ ለናቡከደነጾር፡ ዕዘዞ፨
- እስከ፡ አርዌ፡ ገዳም፡ ረሰይኮ፡ እንዘ፡ እምቅኔ፡ ሰብእ፡ ታግዕዞ፨
- ሕዙነ፡ ሕዙናን፡ ገብርከ፡ እብለከ፡ በተዐንብዞ፨
- ትክልኑ፡ እግዚአብሔር፡ ነፍስ፡ ዚአየ፡ ናዝዞ፨
- ወለሐራውያን፡ ሥጋየ፡ ከመ፡ ትወልጥ፡ ግዕዞ፨
- አዘወሀብኮ፡ ለናቡከደነጾር፡ ልባዌ፨
- መጠነ፡ ፯ዓመት፡ ድኅረተአንሰሰ፡ በግዕዘ፡ አርዌ፨
- ወአግባእኮ፡ ያእኵትከ፡ ውስተ፡ ምድረ፡ ንግሡ፡ ነነዌ፨
- ጸግወኒ፡ ኣእምሮትከ፡ ዘመልዕልተ፡ ኵሉ፡ ግጻዌ፨
- እግዚአብሔር፡ ህልው፡ በዋሕድ፡ ህላዌ፨
- ኦዘአድኅንካ፡ እምእደ፡ ረበናት፡ ክልኤቱ፨
- ለወለተ፡ ካህናት፡ ሶስና፡ ለዳንኤል፡ አመ፡ እብሬቱ፨
- እንዘ፡ ኪያሃ፡ ታጸድቅ፡ በፍትሐ፡ ነቢይከ፡ ዝንቱ፨
- እግዚአብሔር፡ አድኅነኒ፡ እምዕድዋንየተስዐቱ፨
- እንበለ፡ ንስሓ፡ ነፍሶሙ፡ ኢትቅትል፡ ባሕቱ፨
- ኦዘአድኀንኮ፡ እምአፈ፡ ዐናብስት፡ ርኁባን፨
- አመ፡ ወገርዎ፡ በግብ፡ ሐራ፡ ዳርዮስ፡ መስፍን፨
- ለነቢይከ፡ ዳንኤል፡ እግዚአብሔር፡ መድኅን፨
- አንግፈኒ፡ እምአራዊት፡ ኢይውግኡኒ፡ በቀርን፨
- ወኢይንስኩኒ፡ በክልኤ፡ አስናን፨
- ኣዘአጾርኮ፡ ምሳሐ፡ ዳንኤል፡ ዘመዱ፨
- እስከግበባቢሎን፡ ይሰድ፡ እምኢየሩሳሌም፡ ምድረ፡ ሙላዱ፨
- ወአግባእኮ፡ ፍጡነ፡ ለዕንባቆም፡ ውስተ፡ ዐጸዱ፨
- አግብኦ፡ ለኅሊናየ፡ እምእንስሳዊ፡ እበዱ፨
- ኀበ፡ ጥበብከፍጣሪ፡ አሐዱ፨
- ኦአምላከ፡ ሕዝቅኤል፡ መንሥኤ፡ አዕፅምት፡ እለ፡ ሞቱ፨
- ወዘአርአይኮ፡ በሕልም፡ ህላዌ፡ እንስሳከ፡ አርባዕቱ፨
- እግዚአብሔር፡ ገጸከ፡ አርእየኒ፡ ለለሰዐቱ፨
- መንበርከኒ፡ እንተይነቅዕ፡ እምታሕቱ፨
- ባሕረ፡ ተደሞ፡ ግሩም፡ ዘክልኤ፡ ፍኖቱ፨
- ኦዘአልዐልኮ፡ ኀበ፡ እለ፡ ሄኖክ፡ ተልዕሉ፨
- ለገብርከ፡ ዕዝራ፡ አምጣነ፡ አሥመረከ፡ በመዋዕሉ፨
- እግዚአብሔር፡ ንሥአኒ፡ በአግዋረ፡ ገነት፡ አሀሉ፨
- እስመ፡ አንተ፡ በዓለ፡ ጸጋ፡ እንተ፡ ተአከል፡ ለኵሉ፨
- ወመጥኖ፡ ሀብትከ፡ አምላካዊ፡ ፍጡራን፡ ኢይክሉ፨
- ኦዘፈታሕኮ፡ ለኢኮንያ፡ እማእሰሩ፨
- አመ፡ በባቢሎን፡ ነግሠ፡ ኤዎልማርዴቅ፡ በኵሩ፨
- ለናቡከደነጾር፡ ዘሞተ፡ ወፈለሰ፡ እምነ፡ ክብሩ፨
- ፍትሖ፡ ለኅሊናየ፡ እማእሰረ፡ እዱ፡ ወእግሩ፨
- እግዚአብሔር፡ ኄር፡ ለዳዊት፡ ፍቁሩ፨
- ኦዘመተርከ፡ ርእሰ፡ ብልጣሶር፡ መዐምፅ፨
- አመ፡ አውፃእከሙ፡ ካዕበ፡ ለዕብራውያን፡ አብያጽ፨
- እምሀገረ፡ ሕማም፡ ባቢሎን፡ እንተ፡ ተመሰለት፡ በግብጽ፨
- እግዚአብሔር፡ ምትር፡ እምልብየ፡ አፍቅሮተ፡ ዓለም፡ ሕጹጽ፨
- ከመ፡ በማሕጺ፡ ይትመተር፡ ወይትገዘም፡ ዕፅ፨
- ኦዘአስተጋባእከ፡ ማኅበረ፡ እስራኤል፡ ወከዋላ፨
- በእደ፡ ንጉሠ፡ ፋርስ፡ ቂሮስ፡ ፈጻሜ፡ ብዕዓት፡ ወመሐላ፨
- አምጣነ፡ ተዘርዉ፡ ቅድመ፡ እመዋዕለ፡ ሆሴ፡ ወልደ፡ ዔላ፨
- አስተጋብእ፡ ኀበ፡ ሀለወ፡ ፍቅረ፡ ዚአከ፡ ገደላ፨
- አንስርተ፡ ልብየ፡ እምአድባር፡ ወቈላ፨
- ኦዘሜጥከሙ፡ ለሰብአይሁዳ፡ እምፄዋዌ፨
- በፍጻሜ፡ ሰብዓ፡ ዓመት፡ ምስለ፡ ዘሩባቤል፡ ሰርዌ፨
- እግዚአብሔር፡ ሚጠኒ፡ እምግዕዘ፡ እበድየ፡ ኀበ፡ ልባዌ፨
- ለነቢይከ፡ ዮናስ፡ በስብከቱ፡ ከመ፡ ተመይጠት፡ ነነዌ፨
- እስከ፡ እመቅሠፍት፡ ድኅነት፡ ወሐይወት፡ እምደዌ፨
- አዘወሀብኮሙ፡ ምህርካ፡ ነኪራን፡ ሰብአ፡ ጎግ፨
- ለዘሩባቤል፡ ወዮሴዕ፡ ሊቃውንተ፡ ኄራን፡ አእሩግ፨
- ከመ፡ ምዝባሬሃ፡ ይሕንጹ፡ በመቅደሰ፡ ብሊት፡ ሕግ፨
- ሀበኒ፡ ብዕለ፡ ጸጋከ፡ ዘኢይዌስኖ፡ ድንጋግ፨
- እግዚአብሔር፡ የዋህ፡ እምእከይ፡ ወፁግ፨
- ኦዘቀተልኮለሆሎፎርኒስ፡ ብእሴ፡ ደም፨
- በእደ፡ ዮዲት፡ ብእሲት፡ ዕብስተ፡ አባል፡ ወዐፅም፨
- እግዚአብሔር፡ ርድአኒ፡ በቀቲለ፡ ሰይጣን፡ ርጉም፨
- እስመ፡ አኮ፡ መንክር፡ መዊኦተ፡ ኀያል፡ ግሩም፨
- መንክርሰ፡ ለእመ፡ ሞአ፡ በኀይል፡ ድኩም፨
- ኦዘአድኀንኮሙ፡ በቀቲለ፡ ፀሮሙ፡ ሐማ፨
- ለአዝማዲሃ፡ እስራኤል፡ ወለመርዶኬዎስ፡ ሱታፌ፡ ደማ፨
- እግዚአብሔር፡ ለአስቴር፡ ሶበ፡ ርኢከ፡ ሕማማ፨
- ስቅሎ፡ ለጸላእትየ፡ በመስቀለ፡ ሕማም፡ ወጻማ፨
- እስመ፡ ቃለ፡ ነፍስየ፡ ራሔል፡ ተሰምዐ፡ በራማ፨
- አዘአድኀንኮሙ፡ እመልአከ፡ ሳምር፡ ሰንባላጥ፨
- አመ፡ እለ፡ ዕዝራ፡ ወጠኑ፡ ሐኒጸ፡ አረፍት፡ ውሉጥ፨
- እንዘ፡ ታረድኦሙ፡ ኀይለ፡ እምወልደ፡ አስቴር፡ ሥሉጥ፨
- እግዚአብሔር፡ አድነነኒ፡ ለብእሴ፡ ንስሓ፡ ቅጥቁጥ፨
- እምቀትለ፡ ሕዋሳት፡ ዘአፍአ፡ ወፍርሃት፡ ዘውስጥ፨
- ኦዘአፍራህኮ፡ በርእየተ፡ መልአክ፡ ጸዋሬ፡ ሰይፍ፨
- ለንጉሠ፡ ነገሥት፡ እስክንድር፡ ወዮናናዊ፡ ፍልሱፍ፨
- ለሊቀ፡ ካህናቲከ፡ ይስግድ፡ ምስለ፡ አምኃ፡ ትሩፍ፨
- አፍርሆሙ፡ ለጸላእትየ፡ ወአደንግፆሙ፡ ዝዘልፍ፨
- በመብረቀቃል፡ መለኮታዊ፡ ዘይነጥር፡ እምአፍ፨
- ኦዘአጽናዕኮ፡ እምዘመነ፡ በጥሊሞስ፡ ዮናኒ፨
- እስከ፡ አመትወልድ፡ ድንግል፡ ለስምዖን፡ ተአማኒ፨
- እግዚአብሔር፡ ኅዳጠ፡ ዕድሜ፡ ንስሓጽንሐኒ፨
- ብዙኀሰ፡ ኢይብለከ፡ በከመ፡ ቃየን፡ ሀበኒ፨
- እሙስና፡ አእሩግ፡ አኮኑ፡ መቃብር፡ ይሤኒ፨
- ኦዘአድኀንኮሙ፡ ለደቂቀ፡ መቃቢ፡ መቃብያን፨
- እምአንጥያኮስ፡ ፀራዊ፡ ተመሳሌ፡ ንኡስ፡ ቀርን፨
- በእንቲአየ፡ በሎሙ፡ ለላእካኒከ፡ ኄራን፨
- ይደልዎ፡ ይደልዎ፡ ይደልዎ፡ ድኂን፨
- እመከራ፡ ዝንቱ፡ ዘመን፡ ለዝንቱ፡ ምስኪን፨
- ኦዘአጥባዕኩሙ፡ በእንተ፡ ስምከይሙቱ፨
- ለአልዓዛር፡ ወለመክብዩ፡ ወለደቂቆሙ፡ ሰብዐቱ፨
- በመብስለ፡ ብርት፡ ርሱን፡ ለአንጥያኮስ፡ አመ፡ መንግሥቱ፨
- አጥብዖ፡ ለኅሊናየ፡ ወአስተዋድድ፡ ውስቴቱ፨
- ጸሊኦተ፡ ዝንቱ፡ ዓለም፡ ዘርኩስ፡ ፍኖቱ፨
- ኦዘኅረይካ፡ እምአንስተ፡ ዓለም፡ ዘአሜሃ፨
- ማኅደረ፡ ቃልከትኩን፡ እስመ፡ ርቱዓት፡ ፍናዊሃ፨
- ለወለትከ፡ ማርያም፡ እግዚአብሔር፡ አቡሃ፨
- ነፍስየ፡ ቀድስ፡ እግዚኦ፡ በዘቀደስከ፡ ኪያሃ፨
- ወሥጋየ፡ አንጽሕ፡ በንጽሐ፡ ሥጋሃ፨
- ኦዘፈነውኮ፡ ከመ፡ ይልበስ፡ ሥጋ፡ ሰብእ፨
- ውስተ፡ ከርሠ፡ ድንግል፡ ሕርምተ፡ ሩካቤ፡ ወዘርእ፨
- ለቀዳሚ፡ ቃልከ፡ ክርስቶስ፡ ወየማንከ፡ ጽኑዕ፨
- ፈኑ፡ ሊተ፡ ረድኤትከ፡ እግዚአብሔር፡ እግዚእ፨
- በዘቦቱ፡ እድኅን፡ ገብርከ፡ ኃጥእ፨
- ኦዘአርአይኮሙ፡ ለኖሎተ፡ ብዙኀ፡ መራዕይ፨
- ስብሐተ፡ ልደቱ፡ ለክርስቶስ፡ በሀገረ፡ ዳዊት፡ ዐባይ፨
- እንዘኑኀ፡ ሌሊት፡ ታበርህ፡ ከመ፡ መዓልታዊ፡ ፀሓይ፨
- አርእየኒ፡ መለኮተከ፡ በመጽሔተ፡ አሚን፡ ጽሩይ፨
- እግዚአብሔር፡ ስፉሕ፡ ወረቂቅ፡ ባሕርይ፨
- ኦዝኣዘዝኮ፡ ከመ፡ ይፈጽም፡ ኦሪተ፨
- ወከመ፡ አይሁድ፡ ይትገዘር፡ በሰሙነ፡ ልደት፡ ግዝረተ፨
- ለአካለ፡ ቃልከ፡ ክርስቶስ፡ አመ፡ አልበስኮ፡ ትስብእተ፨
- እንዘ፡ ትገዝር፡ በእዴከ፡ ዘኅሊናየቍልፈተ፨
- እግዚአብሔር፡ ዘለከ፡ ረስየኒ፡ ቤተ፨
- ኦዘመራሕከሙ፡ በኮከበ፡ ልደት፡ ሐዲስ፨
- ሐቅለ፡ ቤተ፡ ልሔም፡ ይዕርጉ፡ መሰግላን፡ እምፋርስ፨
- ከመ፡ የሀብዎ፡ ወርቀ፡ ለዘተወልደ፡ ክርስቶስ፨
- ምርሐኒ፡ ወአዕርገኒ፡ ኀበ፡ ደብርከ፡ ቅዱስ፨
- እግዚአብሔር፡ ነባቢ፡ መንፈስ፨
- ኦዘአዘዝኮ፡ ለዮሴፍ፡ ትኩዘ፡ ገጽ፨
- ሕፃነ፡ ያጕይይ፡ እመዐተ፡ ሄሮድስ፡ ሕጹጽ፨
- እግዚአብሔር፡ ኀያል፡ በስረተ፡ ቃልከ፡ ሐጽ፨
- ስድዶሙ፡ ለአጋንንት፡ እምብሔረ፡ ልብየ፡ ግብጽ፨
- ወርእሰ፡ ጣዖቶሙ፡ ቀጥቅጥ፡ በበትርከ፡ ዕፅ፨
- ኦዘአድኀንኮ፡ ለዮሐንስ፡ መጥምቅ፨
- ከመ፡ ኢይቅትሎ፡ ሄሮድስ፡ ቀታሌ፡ ሕፃናት፡ ደቂቅ፨
- ሶበ፡ ኢረከቦ፡ ለክርስቶስ፡ እጓለ፡ ማርያም፡ ማዕንቅ፨
- ተማሕፀንኩ፡ በደመ፡ ግፍዑ፡ ለዘካርያስ፡ ጻድቅ፨
- ከመ፡ ታድኅነኒ፡ እምጋኔን፡ ወድድቅ፨
- ኦዘሰባሕኮ፡ በሐይቀ፡ ዮርዳኖስ፡ በደብር፨
- ለክርስቶስ፡ ወልድከ፡ እግዚአብሔር፨
- እምነ፡ መጥምቁ፡ ዮሐንስ፡ ከመ፡ ውእቱ፡ ክቡር፨
- ሰብሐኒ፡ በስብሐቲከ፡ መልዕልተ፡ ኩሉ፡ ነገር፨
- ዘአንተ፡ በሰማይ፡ ወአንተ፡ በምድር፨
- ኦዘወሀብኮ፡ ለትስብእተ፡ ክርስቶስ፡ መዊአ፨
- ሰይጣን፡ ሥሥዕት፡ ምስሌሁ፡ አመ፡ ተጻብአ፨
- ቀኖና፡ ጸሎት፡ ወጾም፡ ድኅረ፡ በገዳም፡ ሠርዐ፨
- ሊተኒ፡ ለገብርከ፡ እስከ፡ ዕለታት፡ አርብዓ፨
- ሀበኒ፡ ጾመ፡ ወአኮመብልዐ፨
- ኦዘአርአይከሙ፡ ምስጢረ፡ ቍርባን፡ እንግዳ፨
- በምሴተ፡ ኀሙስ፡ ለአርድእት፡ እምቅድመ፡ ይፃእ፡ ይሁዳ፨
- በእደ፡ ወልድከ፡ ክርስቶስ፡ እግዚአብሔር፡ አጽናሔ፡ ፍጻ፨
- ሀበኒ፡ እንሣእ፡ ሥጋሁ፡ እንበለ፡ ኵነኔ፡ ወዕዳ፨
- ወደሞ፡ ክቡረ፡ ምስለ፡ ማይ፡ ጸዐዳ፨
- ኦዘፈነውከ፡ ኀበ፡ ወልድከ፡ ኣእቲ፨
- ዘያጸንዖ፡ መልአክ፡ እስከ፡ ጽዋዐ፡ ይሰቲ፨
- እግዚአብሔር፡ ከማሁ፡ እቤለከ፡ ወልደ፡ መዋቲ፨
- አባ፡ አኅልፋ፡ እምኔየ፡ ለጽዋዐ፡ መስቀል፡ እንታክቲ፨
- ባሕቱ፡ ለትኩን፡ ፈቃድከ፡ ዛቲ፨
- ኢዘሰባሕኮ፡ ዲበ፡ ዕፀ፡ መስቀል፡ ዘሀሎ፨
- ለክርስቶስ፡ ወልድከ፡ መሠረታተ፡ ምድር፡ በአንቀልቅሎ፨
- እስከ፡ ጲላጦስ፡ አንከረ፡ ወመስፍነ፡ ፻፡ ዘይመስሎ፨
- ሰብሐኒ፡ በዕለተ፡ ደይን፡ ወአልዕለኒ፡ አልዕሎ፨
- እግዚአብሔር፡ በርትዕ፡ አመ፡ ትኴንን፡ ኵሎ፨
- ኦዘነሣእከ፡ ነፍሳተ፡ ኃጥኣን፡ እምተሀጕሎ፨
- ወኢረሳዕኮ፡ ለአዳም፡ በደብረ፡ መዛግብት፡ ዘሀሎ፨
- ትረስዕኑ፡ እግዚአብሔር፡ ተሣህሎ፨
- ወትደፍንኑ፡ ባሕረ፡ ምሕረታቲከ፡ ኵሎ፨
- በመዐትከ፡ ዘይጸንዕ፡ እምዐውሎ፨
- ኦዘአንሣእኮ፡ እምነ፡ ሙታን፡ ባቲ፨
- በዕለተ፡ እሑድ፡ ዐባይ፡ ወበኵረ፡ ዕለታት፡ አሐቲ፨
- እግዚአብሔር፡ እኰት፡ ለወልድከ፡ አእኳቲ፨
- በኪነ፡ ጥበብከ፡ ኅብእት፡ ዘኢያአምራ፡ መዋቲ፨
- አንሥኦተ፡ ነፍስየ፡ ምክር፡ ወተጠበብ፡ ላቲ፨
- ኦዘአዕረጎ፡ ነፍሳተ፡ ጻድቃን፡ ኀበ፡ ኢዐርጋ፨
- ወአንበርኮ፡ ፍጹመ፡ ውስተ፡ የማንከ፡ መሳኤ፡ ንትጋ፨
- እምነ፡ ምውታን፡ ለክርስቶስ፡ እንዝታነሥኦ፡ በሥጋ፨
- አዕርገኒ፡ ወአብአኒ፡ ሀገረ፡ ንጹሓን፡ እንግልጋ፨
- እግዚአብሔር፡ ኄር፡ አቡየ፡ በጸጋ፨
- ኦዘፈነውከ፡ ጰራቅሊጦስሃ፡ መጽንዔ፨
- ኀበ፡ ሐዋርያት፡ ሀለዉ፡ እንዘ፡ ይገብሩ፡ ጉባኤ፨
- በፍጻሜ፡ ፶ዕለት፡ እምከመ፡ ኮነ፡ ትንሣኤ፨
- አስትየኒ፡ ዘንተ፡ ወይነ፡ ኀይል፡ መጥለሌ፨
- እግዚአብሔር፡ ዘትነግሥ፡ ለዓለም፡ ክልኤ፨
- ኢታርእየኒ፡ እግዚኦ፡ ገሃነመ፡ እሳት፡ ውዑየ፨
- ወኢትስድደኒ፡ እጹር፡ ምስለ፡ ኃጥኣን፡ ሥቃየ፨
- እግዚአብሔር፡ ወልድከ፡ አመ፡ ይኴንን፡ ዕሩዋ፨
- ወይብሎሙ፡ ለጻድቃኒሁ፡ ንዑ፡ ኀቤየ፨
- ቡሩካኒሁ፡ ለቡሩክ፡ አቡየ፨
- ሶበ፡ እዜከር፡ ምጽአተ፡ ወልድከለኰንኖ፡ አግብርት፡ እለናፈቁ፨
- በግርማ፡ መለኮት፡ መፍርህ፡ ወመደንግፅ፡ በሕቁ፨
- እግዚአብሔር፡ ኀያል፡ አምላከ፡ አዳም፡ ወደቂቁ፨
- ተኅጠኒ፡ ምድር፡ እስእላ፡ እንዘ፡ አፉሃ፡ ታበቱ፨
- ወእብሎሙ፡ ለአድባር፡ ላዕሌየ፡ ደቁ፨
- ኦእግዚአብሔር፡ አምላከ፡ ነዳያን፡ ሕዝብ፨
- ኦእግዚኦ፡ ተስፋ፡ ቅቡጻን፡ መዝገብ፨
- ኦእግዚኦ፡ መቅለሌ፡ ነገር፡ ዕጹብ፨
- ኦዘትሰምዕ፡ በርኅራኄውያተ፡ ኵሉ፡ ምንዱብ፨
- ስእለተ፡ ኃጥእ፡ ገብርከ፡ ኢትመንን፡ አብ፨
- ኦአምላከ፡ ጴጥሮስ፡ ወአምላከ፡ ጳውሎስ፡ አምላክነ፨
- ዘአጽናዕኮሙ፡ በገድሎሙ፡ ወኢኮንኮሙ፡ መድኅነ፨
- ከማሆሙ፡ አኅድር፡ መንፈስ፡ ትዕግሥት፡ ላዕሌነ፨
- እመሰ፡ በኵሉ፡ አድኅኖትከ፡ ሰፈነ፨
- ነሢአ፡ ዕሴት፡ በነፍስ፡ በአይቴ፡ እምኮነ፨
- ኦዘኅደጎሙ፡ አምሳለ፡ ብሩር፡ ይትፈተኑ፨
- ለሐዋርያት፡ ወሰማዕታት፡ እለ፡ አስተርአዩ፡ በበዘመኑ፨
- በቍዔተ፡ ሥቃይ፡ ሎሙ፡ በዘአሥመሩከ፡ አኮኑ፨
- ከመ፡ ይበቍዖ፡ ለብሩር፡ አጽርዮተ፡ እሳት፡ በርስኑ፨
- ሊተኒ፡ እምትዕግሥቶሙ፡ ይሁበኒ፡ መኑ፨
- ከመ፡ ኢይበሉ፡ አሕዛብ፡ አይቴ፡ ውእቱ፡ አምሳከሙ፨
- እምአፈ፡ ዐናብስት፡ ወእሳት፡ መድኀኔ፡ ሥጋ፡ ኮንኩሙ፨
- ወነሢአ፡ አክሊል፡ በነፍስ፡ ከመ፡ ኢይዘራዕ፡ በሙ፨
- ዘገደፍኮሙ፡ ለሰማዕታት፡ በብዝኀ፡ ሥቃያት፡ ይሕምሙ፨
- እግዚአብሔር፡ ተባረክ፡ ለኂሩት፡ ማኅተሙ፨
- አኮ፡ በዝንቱ፡ ልሳነ፡ ሥጋ፡ ተናጋሪ፨
- ወኢበዝ፡ ቃለ፡ ሕንጻ፡ ተመዝባሪ፨
- አላ፡ በዝንቱ፡ ቃለ፡ መንፈስ፡ ቅዱስ፡ ነባሪ፨
- በዝ፡ ዓለም፡ ኣአኵተከ፡ ፈጣሪ፨
- በዘይመጽእኒ፡ በዓለም፡ ደኃሪ፨

Details

Other Titles

መልክአ፡ ጠቢበ፡ ጠቢባን፡
Malkəʾa Ṭabiba Ṭabibān
Image of the Wisest of the Wise
ጸሎተ፡ አድኅኖ፡
Ṣalota ʾAdḫəno
Prayer of Salvation

Subject

Trinitarian ኢየሱስ፡ ክርስቶስ፡
ʾIyyasus Krəstos
Jesus Christ

Clavis Aethiopica: 2393 CAe: 2393
MC: 364, 372
Permalink: https://w3id.org/malke/2393/
Last modified: 28 October 2024

XML JSON src BetMaṣ

Bibliography Z

Dillmann, Christian Friedrich August, ed. Chrestomathia Aethiopica edita et glossario explanata. Lipsiae: T. O. Weigel, 1866.

Euringer, Sebastian. “Ṭabiba Ṭabibân.” Oriens Christianus Series 9, Volume 3 (1934): 240–60.

Pietruschka, Ute. “Ṭäbibä Ṭäbiban.” In Encyclopaedia Aethiopica, IV:799b–800a, 2010.

ኤፍሬም የኔሰው, ed. ጠቢበ፡ ጠቢባን። ግእዝ እና ዐማርኛ. አዲስ አበባ, ፳፻፲፭ ዓ/ም.