Subjects
Trinitarian
ኢየሱስ፡ ክርስቶስ፡
ʾIyyasus Krəstos
Jesus Christ
ʾIyyasus Krəstos
Jesus Christ
Malkəʾ
-
- ዘይኤብስ፡ ላዕለ፡ ፈጣሪሁ፡ ኃጥእ፡ ዝንቱ፨
- ወዘይገብር፡ ሕስመ፡ በርእሱ፡ ረሲእ፡ ዝክቱ፨
- ወበነዉረ፡ ቢጹ፡ ዘይስሕቅ፡ መስተሣልቅ፡ ውእቱ፨
- ብፁዕሰ፡ ዘሕገ፡ ክርስቶስ፡ ሥምረቱ፨
- ወምግባሪሁ፡ በዕፅ፡ ተመሰለት፡ ሎቱ፨
-
- ዝሰ፡ መዝሙር፡ ትንቢት፡ በእንቲአከ፨
- እስመ፡ ይነግር፡ ወይብል፡ እግዚአብሔር፡ ቀብአከ፨
- በቅብአ፡ ተፍሥሕት፡ ዘይሄይስ፡ እምእለ፡ ከማከ፨
- ወላህይ፡ ዘይሤኒ፡ እምደቂቀ፡ ያዕቆብ፡ አፍቀርከ፨
- አበ፡ ጻድቃን፡ ክርስቶስ፡ ዘጽድቀ፡ አፍቀርከ፨
-
- ለእግዚአብሔር፡ አመ፡ ሜጠት፡ ሰብሕዎ፡ ቅዱሳኑ፨
- በከመ፡ ይቤ፡ ዳዊት፡ መገሥጸ፡ ሕዝብ፡ ልሳኑ፨
- ዘሰባሕኩከ፡ ዮም፡ ወዘእሴብሐከ፡ ለለ፡ ዘመኑ፨
- ክርስቶስ፡ ተወከፍ፡ በኂሩትከ፡ ወመዐዛሁ፡ አጺኑ፨
- ጸሪቀ፡ መበለት፡ ኂሩትከ፡ ተወከፍ፡ አኮኑ፨
-
- በዝየ፡ ተፈጸመ፡ ክፍል፡ ኃምስ፨
- ዘምሳሌሁ፡ ገሢሥ፨
- እንዘ፡ እሰምዮ፡ ለስሙ፡ መዝሙረ፡ ክርስቶስ፨
- ፍደ፡ አስተሐመምኩ፡ በእንቲአከ፡ ተርጕሞተ፡ መዝሙር፡ ቅዱስ፨
- ሀበኒ፡ ዐስበ፡ ዘሥጋ፡ ወነፍስ፨
-
- አመ፡ አስተዋደድኩ፡ ዘንተ፡ መዝሙረከ፡ ዘይሤለስ፡ በበ፡ ኃምሳ፨
- ንኡስ፡ አነ፡ ወልደ፡ ዓመታት፡ መንፈቀ፡ ኃምሳ፨
- እንዘ፡ ትከድነኒ፡ ክርስቶስ፡ ሞገሰ፡ ጰራቅሊጦስ፡ በዐለ፡ ኃምሳ፨
- ነፍስየ፡ አዕቢ፡ ከመ፡ ዐብዮዩ፡ ሊቀ፡ ሐራ፡ አከዐብ፡ ኃምሳ፨
- ወመቃዕለ፡ ተድላ፡ ሀበኒ፡ ካዕበቶ፡ ለኃምሳ፨
-
- በማሕልይሁ፡ ሰሎሞን፡ ይቤለከ፡ ቅድመ፨
- ደናግለ፡ ዓለም፡ ኵሎን፡ አፍቀራከ፡ ፍጹመ፨
- ንጉሠ፡ ሰላም፡ ክርስቶስ፡ ዘአስተሳለምከ፡ ዓለመ፨
- ማሕየዊ፡ መስቀልከ፡ አመ፡ በእንተ፡ ሰብእ፡ ቆመ፨
- ወእምነ፡ ሰብእ፡ ሰአረ፡ መርገመ፨
-
- ቤተ፡ ክርስቲያን፡ መርዓት፡ ትመሰል፡ ጎሐ፨
- እንዘ፡ ትሔውጽ፡ ኪያከ፡ ወልደ፡ እዱሃ፨
- እስመ፡ ተሠርገወት፡ ይእቲ፡ ሰንዱነ፡ ሃይማኖት፡ ንጹሐ፨
- ክርስቶስ፡ አምላኪየ፡ አሠርግወኒ፡ ከማሃ፨
- ልብሰ፡ ቅድስና፡ ወጸጋ፡ ብሩሃ፨