Malkəʾa Wəddāse Māryām (Image of the Praises of Mary)

ማስገቢያ፡
- ሰላም፡ ለኪ፡ እንዘ፡ ንሰግድ፡ ንብለኪ፨
- ማርያም፡ እምነ፡ ናስተበቍዐኪ፨
- እምአርዌ፡ ነዓዊ፡ ተማሕፀነ፡ ብኪ፨
- በእንተ፡ ሐና፡ እምኪ፡ ወኢያቄም፡ አቡኪ፨
- ማኅበረነ፡ ዮም፡ ድንግል፡ ባርኪ፨
- ታዐብዮ፡ ነፍስየ፡ መጠነ፡ ኅሊናየ፡ ክህለ፨
- ለእግዚአብሔር፡ ወልድኪ፡ እንተ፡ ይሰመይ፡ ልዑለ፨
- ዘበእንቲአኪ፡ ገብረ፡ ዐቢያተ፡ ኀይለ፨
- ትሑታነኒ፡ በትሕትናሁ፡ አልዐለ፨
- ወለርኁባን፡ አጽገሆሙ፡ እክለ፨

- ፈቀደ፡ እግዚእ፡ ለአዳም፡ ያግዕዞ፨
- ሥጋኪ፡ ንጹሐ፡ አመ፡ ረእየ፡ አራዞ፨
- ማርያም፡ ድንግል፡ ለምሕረት፡ ወለናዝዞ፨
- ይቅብአኒ፡ ዕፍረተ፡ ጽድቅ፡ ወያምዕዘኒ፡ እምዕዞ፨
- የማነ፡ እዴኪ፡ እዴየ፡ እኂዞ፨
- ለሔዋን፡ እምነ፡ ከይሲ፡ ዘአስሐታ፨
- እግዚአብሔር፡ ናዘዛ፡ ኪያኪ፡ በወሊዶታ፨
- ማርያም፡ ድንግል፡ ማርያም፡ ርግበ፡ ኤፍራታ፨
- ለነፍሰ፡ ዚአየ፡ አስተዳልዊ፡ ማኅቶታ፨
- ከመ፡ ኢተኀሉ፡ ነፍስየ፡ ባሕቲታ፨
- ኢየሱስ፡ ክርስቶስ፡ አመ፡ ላዕሌኪ፡ ኀደረ፨
- ሥጋኪ፡ ንጹሐ፡ ምስለ፡ መለኮቱ፡ ደመረ፨
- ለፍልሰትኪ፡ ድንግል፡ ጊዜ፡ ነዐርግ፡ መዝሙረ፨
- አድኅንኒ፡ አመናስው፡ ዛተ፡ ሀገረ፨
- ወካልአተኒ፡ አህጉረ፨
- ርእየ፡ ኢሳይያስ፡ ለአማኑኤል፡ ምሥጢሮ፨
- መንጦላዕተ፡ ሥጋኪ፡ እንተ፡ ሰወሮ፨
- ማርያም፡ ድንግል፡ ንግሥተ፡ ሰላም፡ ወተፋቅሮ፨
- መዝሙር፡ አነሥአ፡ እምቃልየ፡ ወእሁብ፡ ከበሮ፨
- ጊዜ፡ ለስምኪ፡ ኣቄርብ፡ ዘምሮ፨
- ተፈሣሕ፡ ወተሐሠይ፡ ኦዘመደ፡ እጓለ፡ እመሕያው፨
- እስመ፡ አፍቀሮ፡ እግዚአብሔር፡ ለዓለም፡ ሕልው፨
- ማርያም፡ ድግንል፡ ሙዳየ፡ አፈው፨
- ከመ፡ እስብሕኪ፡ በቃለ፡ ውዳሴ፡ ፍትው፨
- ልስሐተ፡ አፉየ፡ ቀስሚ፡ በጼው፨
- ዘሀሎ፡ ወይሄሉ፡ እግዚአብሔር፡ መዋኢ፨
- በሥጋኪ፡ መጽአ፡ ወካዕበ፡ መጻኢ፨
- ስእለተ፡ ነዳያን፡ ማርያም፡ ዘኢትሰምዒ፨
- ለዐቂቦትየ፡ ኀይለኪ፡ አንሥኢ፨
- ከመ፡ በላዕሌየ፡ ኢያሕስም፡ ጸላኢ፨
- ተፈሥሒ፡ እንዘ፡ እብል፡ ለቤተ፡ ልሔም፡ እዌድሳ፨
- እስመ፡ ወለድኪዮ፡ ባቲ፡ ለክርስቶስ፡ ዘይሔድሳ፨
- ማርያም፡ ድንግል፡ ዘትምዐዚ፡ እምፈርከሊሣ፨
- ይማኦ፡ ጽድቀ፡ ዚአኪ፡ ለዘዚአየ፡ አበሳ፨
- ከመ፡ አራዊተ፡ ይመውእ፡ አንበሳ፨
- ትትፌሣሕ፡ ወትትሐሠይ፡ ነፍሳተ፡ ጻድቅ፡ ወኃጥእ፨
- ማኅደንኪ፡ ድንግል፡ በልደተ፡ ክርስቶስ፡ ቅቡእ፨
- ዘበእንቲአሁ፡ ይቤሉ፡ መላእክተ፡ ሰማይ፡ አርባዕ፨
- ስብሐት፡ በሰማያት፡ ለእግዚአብሔር፡ እግዚእ፨
- ወሰላም፡ በምድር፡ ሥምረቱ፡ ለሰብእ፨
- ብርሃንኪ፡ ዘበአማን፡ ያበርህ፡ ፍጹመ፨
- ለኵሎሙ፡ ሰብእ፡ ለእለ፡ ይነብሩ፡ ዓለመ፨
- ማርያም፡ ዘኮንኪ፡ ለእግዚአብሔር፡ እመ፨
- ጽምዕት፡ ምድር፡ እንተ፡ ትሴፎ፡ ዝናመ፨
- እሴፎ፡ ምሕረተኪ፡ ቀዊምየ፡ ፍጽመ፨
- አክሊለ፡ ምክሕነ፡ አንቲ፡ እንተ፡ ኀጣእኪ፡ መምስለ፨
- እስመ፡ ወለድኪ፡ ለነ፡ ዘእግዚአብሔር፡ ቃለ፨
- ማርያም፡ ድንግል፡ ዘትጸውሪ፡ አስካለ፨
- ጊዜ፡ ንዴትየ፡ አጥረይኩኪ፡ ብዕለ፨
- ወጊዜ፡ ድካምየ፡ ካዕበ፡ ረሰይኩኪ፡ ኀይለ፨
- ዐቢይ፡ ውእቱ፡ ስብሐተ፡ ድንግልናኪ፡ ክልኤ፨
- እንዘ፡ እብል፡ እሰብሕ፡ በግናይ፡ ወበጽዋዔ፨
- ማርያም፡ ድንግል፡ ማርያም፡ ምክሕ፡ ጉባዔ፨
- ጊዜ፡ ድቀትየ፡ ሶበ፡ ኀጣእኩ፡ ረዳኤ፨
- በቃለ፡ ዚአኪ፡ እሴፎ፡ ትንሣኤ፨
- አንቲ፡ ውእቱ፡ ዕፀ፡ ጥበብ፡ ወልቡና፨
- ሙሴ፡ ነቢይ፡ ዘርእየኪ፡ በደብረ፡ ሲና፨
- ማርያም፡ ዑጽፍት፡ ወኁብርት፡ በቅድስና፨
- ህብኒ፡ እግዝእትየ፡ ከመ፡ ኢይርአይ፡ ሙስና፨
- መጽሐፈ፡ ብርሃናዌ፡ ወኅቡአ፡ መና፨
- አንቲ፡ ውእቱ፡ ገራህተ፡ ንጉሥ፡ ሰማያዊ፨
- ዘእምኔኪ፡ ሰማያዊ፨
- ዘእምኔኪ፡ ሠረቀ፡ ሕያው፡ ወማሕየዊ፨
- ማርያም፡ ድንግል፡ ወለተ፡ ይሁዳ፡ ወሌዊ፨
- በትንብልናኪ፡ አንቀጸ፡ ምንዳቤ፡ ዕጽዊ፨
- ወበምሕረትኪ፡ አንቀጾ፡ አርኅዊ፨
- ተፈሥሒ፡ ኦወላዲተ፡ እግዚእ፡ ሐሤቶሙ፡ ለመላእክት፨
- ተፈሥሒ፡ ኦንጽሕት፡ ዜናሆሙ፡ ለነቢያት፨
- ማርያም፡ ክብርት፡ ማርያም፡ ልዕልት፨
- እምኅሩያንኪ፡ ኢትፍልጥኒ፡ ንግሥት፨
- ወኢትኅድግኒ፡ በሕይወት፡ ወሞት፨
- ተፈሥሒ፡ ማርያም፡ ዘተሰመይኪ፡ ድልወ፨
- ከመ፡ ትለዲ፡ ፀሓየ፡ ወኮከበ፡ ሰማይ፡ ሥርግወ፨
- ማርያም፡ ድንግል፡ እንተ፡ አጥበውኪ፡ ጥብወ፨
- እምከናፍርኪ፡ ሥነ፡ ሞገስ፡ ተክዕወ፨
- ላዕለ፡ ሕፃንኪ፡ ዘይምዕዝ፡ አፈወ፨
- ኦድንግል፡ ከመ፡ ትለዲ፡ ንጉሠ፨
- እምኀበ፡ እግዚአብሔር፡ አምላክ፡ እስመ፡ ረከብኪ፡ ሞገሰ፨
- ማርያም፡ ድንግል፡ ዘትፈጽሚ፡ ማዕሠሠ፨
- ዝክረ፡ ስምኪ፡ ጸግዎሙ፡ ለሕሙማን፡ ፈውሰ፨
- ወለዕሩቃን፡ ከደኖሙ፡ ልብሰ፨
- ቃለ፡ አብ፡ ሕያው፡ ውስተ፡ ደብረ፡ ሲና፡ ዘወረደ፨
- ሥጋኪ፡ ንጹሐ፡ እስመ፡ ረሰየ፡ ማኅፈደ፨
- ማርያም፡ ድንግል፡ ዘተቃልሊ፡ ክበደ፨
- ከመ፡ ታጽድቂ፡ ኃጥኣነ፡ ብኪ፡ መፍቅደ፨
- ወከመ፡ አጥበውኪ፡ ዘከማየ፡ አብድ፨
- ውእቱኬ፡ ቃለ፡ አብ፡ እግዚአብሔር፨
- ሥጋኪ፡ ተአጽፈ፡ በመንክር፡ ምሥጢር፨
- ማርያም፡ ድንግል፡ ወላዲተ፡ ክርስቶስ፡ ክቡር፨
- ክዕወ፡ ኮነ፡ ወርቀ፡ ስብሐት፡ ወከመ፡ ኆፃ፡ ዘባሕር፨
- በጊዜ፡ ፈለስኪ፡ ሰማየ፡ እምድር፨
- ዕበይኪ፡ ድንግል፡ ኢይትከሀል፡ ለተነግሮ፨
- በነቢብ፡ ወበፈክሮ፨
- ማርያም፡ ድንግል፡ ለእግዚአብሔር፡ ማኅደሮ፨
- እምአእምሮትኪ፡ ክፍልኒ፡ አእምሮ፨
- ከመ፡ ለዓለም፡ ዘይዴግን፡ ፍቅሮ፨
- ዝ፡ ውእቱ፡ዕብን፡ ወልድኪ፡ ዋሕድ፨
- ዘተበትከ፡ እምደብር፡ ነዋኅ፡ ዘእንበለ፡ እድ፨
- ማርያም፡ ድንግል፡ ዘሞገስኪ፡ ፍድፉድ፨
- እምኵሉ፡ ቀዳማዊ፡ ወደኀራዊ፡ ትውልድ፨
- ለዝክረ፡ ስምኪ፡ ይደሉ፡ ሰጊድ፨
- ኮንኪ፡ አጽቀ፡ ሕይወት፡ ማርያም፡ እግዝእትነ፨
- ርትዕት፡ ሃይማኖቶሙ፡ ለቅዱሳን፡ አበዊነ፨
- ኦድንግል፡ ዘትትዐጸፊ፡ ብርሃነ፨
- ነሲአነ፡ ነፍስነ፡ አርጋኖነ፡ ኵሎ፡ ዘመነ፨
- ለልደትኪ፡ ታበውዕ፡ ቍርባነ፨
- አንቲ፡ እሙ፡ ለዐቢይ፡ ብርሃን፨
- ዝ፡ ውእቱ፡ ቃል፡ ዘኢይትረአይ፡ ለዐይን፨
- ማርያም፡ ድንግል፡ ተስፋ፡ ቅቡጻን፨
- ባርክኒ፡ እግዝእትየ፡ ከመ፡ ለብሐዊ፡ ምእመን፨
- በከናፍርኪ፡ ፍሡሓት፡ እምወይን፨
- አይ፡ ልሳን፡ ዘይክል፡ ነቢበ፨
- ውዳሴኪ፡ ኵሉ፡ ዘበውስተ፡ መጽሐፍ፡ ተዘግበ፨
- ማርያም፡ ድንግል፡ ዘታቀልሊ፡ ዕጹበ፨
- በየዋሃትኪ፡ ተመሰልኪ፡ ርግበ፨
- ወበንጽሕናኪ፡ ድንግለ፡ ጠባበ፨
- ተፈሥሒ፡ ማርያም፡ እም፡ ወአመት፨
- እስመ፡ ለዘውስተ፡ ሕፅንኪ፡ ይሴብሕዎ፡ መላእክት፨
- ማርያም፡ ልዕልት፡ ማርያም፡ ክብርት፨
- የማነ፡ ንጉሥ፡ ዘትነብሪ፡ ንግሥት፨
- በእንቲአኪ፡ ዘመረ፡ ዳዊት፨
- ኵሉ፡ ሠራዊተ፡ ሰማያት፡ በእንቲአኪ፡ ይብሉ፨
- ብፅዕት፡ አንቲ፡ ሰማይ፡ ለእግዚአብሔር፡ አባሉ፨
- ሶበ፡ እፈልስ፡ ገብርኪ፡ መንገለ፡ ታሕቱ፡ ወላዕሉ፨
- አሐዱ፡ መልአክ፡ ዘዚአኪ፡ ቅድሜየ፡ የሀሉ፨
- ወካልኡ፡ መልአክ፡ በድኅሬየ፡ ይትሱ፨
- ተነበዩ፡ ላዕሌኪ፡ ዐቢያተ፡ ወመንክራተ፨
- ኦሀገረ፡ እግዚአብሔር፡ አንቲ፡ ዘትፈቅዲ፡ ማኅቶተ፨
- ማርያም፡ አብርሂ፡ ነፍሰ፡ ዚአየ፡ ዕዉርተ፨
- ከመ፡ እርአይ፡ መንገለ፡ ጽድቅ፡ እንተ፡ ይመርሕ፡ ፍኖተ፨
- ወበፍኖትኪ፡ ታበውእ፡ ገነተ፨
- አንቲ፡ ዘበ፡ አማን፡ ደመና፡ ክርስቶስ፡ አምላክ፨
- ማርያም፡ ድንግል፡ ሰአሪተ፡ መርገም፡ ወሀውክ፨
- ይዌድሱኪ፡ ኪሩቤል፡ እንዘ፡ ይሰግዱ፡ በብረክ፨
- ገብርኤልኒ፡ ፍሡሐ፡ ገጽ፡ መልአክ፨
- ይኤምኀኪ፡ በጽባሕ፡ ወሰርክ፨
- ረከብኪ፡ ጸጋ፡ መንፈስ፡ ቅዱስ፡ ኀደረ፡ ላዕሌኪ፨
- ወኀይለ፡ ልዑል፡ ይጼልለኪ፨
- ማርያም፡ ድንግል፡ እንተ፡ አምላከ፡ ወለድኪ፨
- ኵሎ፡ መዓልተ፡ ወሌሊተ፡ ሶበ፡ እጼውዕ፡ ስመኪ፨
- ሕይወትየ፡ ወሞትየ፡ ማርያም፡ ባርኪ፨
- ግብረኪ፡ ድንግል፡ ይሴብሑ፡ በዜማ፨
- መሬታውያን፡ በምድር፡ ወሰማያውያን፡ በራማ፨
- ማርያም፡ ድንግል፡ ክልልተ፡ ሞገስ፡ ወግርማ፨
- ደቂቀ፡ ቤትኪ፡ ኢይሁክ፡ መስቴማ፨
- በዲበ፡ ትእዛዝ፡ ዘይፈጥር፡ ጻማ፨
- የዐቢ፡ ክብርኪ፡ እምክብረ፡ መላእክት፡ ዘርያም፨
- ወእምክብረ፡ ጻድቃን፡ ዘገዳም፨
- ማርያም፡ ድንግል፡ ማርያም፡ እም፨
- ብኪ፡ ድኅነ፡ ዓለም፨
- ወበወልድኪ፡ ኮነ፡ ሰላም፨
- ሕዝቅኤል፡ ነቢይ፡ እንዘ፡ ይብል፡ ጸርሐ፨
- ርኢኩ፡ ኆኅተ፡ ምሥራቅ፡ ዘኅቱም፡ መናሥግቲሃ፨
- ማርያም፡ ድንግል፡ ዘትሠረገዊ፡ ንጽሐ፨
- ለዝክረ፡ ስምኪ፡ እትፌሣሕ፡ ፍሥሐ፨
- ከመ፡ ዘረከበ፡ ምሕርካ፡ ብዙኀ፨
- ኆኅትሰ፡ ድንግል፡ ይእቲ፨
- እስመ፡ ወለድኪ፡ አምላከ፡ ዘበድንግልና፡ ክልኤቲ፨
- ማርያም፡ ድንግል፡ ማርያም፡ ሣህለ፡ መዋቲ፨
- አድኅንኒ፡ እግዝእትየ፡ እመዋዕለ፡ ልሳን፡ አሐቲ፨
- እስመ፡ እኅቱ፡ ለዓለም፡ አንቲ፨
- ዕፅ፡ እንተ፡ ርእየ፡ ሙሴ፡ በደብር፨
- ምስሌኪ፡ ኮነ፡ መንገለ፡ ኅቡእ፡ ምሥጢር፨
- ማርያም፡ ድንግል፡ መንፈሳዊት፡ ሀገር፨
- አድባር፡ ብኪ፡ ተፈሥሑ፡ ወአንፈርዐፁ፡ አህጉር፨
- ከመ፡ ሐራጊት፡ ዘይቤ፡ መዝሙር፨
- ትምክሕተ፡ ኵልነ፡ አንቲ፡ እንተ፡ ኀጣእኪ፡ መርገሞ፨
- ለአዳም፡ አቡነ፡ ቅንአተ፡ ሰይጣን፡ እንተ፡ አሕመሞ፨
- ማርያም፡ ድንግል፡ ማርያም፡ ቀናንሞ፨
- እፎ፡ ፈቀደ፡ ኅሊናየ፡ ለውዳሴኪ፡ ተፍጻሞ፨
- ወእፎ፡ ኀለየ፡ ዘኢይክል፡ አቅሞ፨
- ኦዝመንክር፡ ወጥቀ፡ ዕጹብ፨
- ልደተ፡ ኢየሱስ፡ ክርስቶስ፡ ዘእንበለ፡ ዘርእ፡ ወሰብሳብ፨
- ማርያም፡ ድንግል፡ ወለተ፡ እስራኤል፡ ጠባብ፨
- በሰማይኒ፡ ቅድመ፡ ይትፈጠር፡ ኪሩብ፨
- ዘእንበለ፡ እም፡ ተወልደ፡ እምአብ፨
- ኦዝመንክር፡ ኒሢአ፡ አጽም፡ እምገቦ፨
- ኪያኪ፡ ይፍጥር፡ ከመ፡ ትኩኒ፡ መዝገቦ፨
- ማርያም፡ ድንግል፡ ባላሂት፡ እምተመንድቦ፨
- ብፁዕ፡ ለኪ፡ እግዝእትየ፡ ዘየአምር፡ የብቦ፨
- ከመ፡ ለእስራኤል፡ ቀደምት፡ ዘተሰምየ፡ ሕዝቦ፨
- መሐለ፡ እግዚአብሔር፡ ለዳዊት፡ ፍቁሩ፨
- አበውኪ፡ ነገሥት፡ ከመ፡ በመንበሩ፡ ይንበሩ፨
- ማርያም፡ ድንግል፡ ለእግዚአብሔር፡ ማኅደሩ፨
- ነቢያት፡ በእንቲአኪ፡ ሰላመ፡ ነገሩ፨
- ወሐዋርያት፡ ምስሌሆሙ፡ ኀብሩ፨
- ዳዊት፡ ዘነግሠ፡ መልዕልተ፡ አስራኤል፡ ሐራ፨
- ኪያኪ፡ ሰብሐ፡ በአውታር፡ ወበዕንዚራ፨
- ማርያም፡ ድንግል፡ ማርያም፡ ወለተ፡ ቅስራ፨
- ለነፍሰ፡ ዚአየ፡ አስተዳልዊ፡ ማኅደራ፨
- ውስተ፡ መቅደስኪ፡ ዘማኅው፡ ሕብራ፨
- አሐዱ፡ አካል፡ ዘእምቅድስት፡ ሥላሴ፨
- ሥጋኪ፡ ለብሰ፡ ወኮነ፡ ብእሴ፨
- ማርያም፡ ድንግል፡ ማርያን፡ ሥርጉተ፡ ቅዳሴ፨
- ከበሮ፡ እዝብጥ፡ ለክብርኪ፡ ወእሁብ፡ ውዳሴ፨
- ከመ፡ ማርያም፡ እኅቱ፡ ለሙሴ፨
- ቡርክት፡ አንቲ፡ ዘእምኔኪ፡ ሠረቀ፨
- ፀሓየ፡ ቅዱሳን፡ ክርስቶስ፡ እንተ፡ በይሁዳ፡ ተአውቀ፨
- ማርያም፡ ኪያኪ፡ እስመ፡ እሴፎ፡ ጥዩቀ፨
- ሞገሰ፡ ስምኪ፡ ይኩነኒ፡ ሰንቀ፨
- በኀበ፡ ፈለስኩ፡ ብሔረ፡ ርሑቀ፨
- ቡርክት፡ አንቲ፡ ተዐብዪ፡ እምሰማይ፨
- ወትበርሂ፡ እምፀሓይ፨
- ማርያም፡ ዕንቍ፡ ማርያም፡ ዕንቈ፡ ባሕርይ፨
- ሕጽብኒ፡ እግዝእትየ፡ እምኵሉ፡ ጌጋይ፨
- ከመ፡ የሐፅቡ፡ ርስሐተ፡ በማይ፨
- ቡርክት፡ አንቲ፡ ማርያም፡ ምክሖን፡ ለደናግል፨
- ዘንእዶን፡ ክርስቶስ፡ በውስተ፡ ወንጌል፨
- ማሕፀንኪ፡ ማርያም፡ ማኅደረ፡ አምላክ፡ ልዑል፨
- ሐጹር፡ የዐውዳ፡ ለስብሐተ፡ አብ፡ ወቃል፨
- ወጽጌ፡ ረዳ፡ በትእምርተ፡ መስቀል፨
- ማርያም፡ ድንግል፡ ለዕፍት፡ ሙዳዩ፨
- ዘእምኔኪ፡ ተቀብኡ፡ እለ፡ ለመንግሥት፡ ተኀርዩ፨
- ማርያም፡ ድንግል፡ ለልዑል፡ እመ፡ ባሕርዩ፨
- እስመ፡ ተቶስሐ፡ ለላሕይኪ፡ ላሕዩ፨
- ወበዕበይኪ፡ ተሠውጠ፡ ዕበዩ፨
- ማርያም፡ ንጽሕት፡ ሰአሊተ፡ ምሕረት፡ ወጻሕቅ፨
- እንበለ፡ አዕሩግ፡ ወደቂቅ፨
- ማርያም፡ ድንግል፡ ማርያም፡ ማዕነቅ፨
- ገቦኪ፡ ሥርግው፡ በሐመልማለ፡ ወርቅ፨
- ወአክፋንኪ፡ በብሩር፡ ፍሑቅ፨
- ትጸርሕ፡ ወትብል፡ ኢየአምር፡ ምንተኒ፨
- ዘእንበለ፡ ድምፀ፡ ቃሉ፡ ለመልአክ፡ ዘአብሰረኒ፨
- ኦድንግል፡ ፍናወ፡ ጽድቅ፡ ምርሕኒ፨
- ዓለምሰ፡ ምስለ፡ ክብሩ፡ ማሳኒ፨
- ዝኒ፡ የኀልፍ፡ ወይሰአር፡ ዝኒ፨
- ንጽሕት፡ ወብርህት፡ እምነ፡ ፀሓይ፡ ዘትጸድሊ፨
- ወእምኑኀ፡ ሰማይ፡ ዘትትሌዐሊ፨
- ማርያም፡ ድንግል፡ ወለተ፡ ዳዊት፡ አርከ፡ ቤርዜሊ፨
- ኦእግዝእትየ፡ ሶበ፡ ኀቤኪ፡ እጼሊ፨
- በክሂሎትኪ፡ ኪያየ፡ አክህሊ፨
- ናስተበፅዕ፡ ዕበየኪ፡ ማርያም፡ ወትረ፨
- ወንፌኑ፡ ለኪ፡ ፍሥሓ፡ ምስለ፡ ገብርኤል፡ ኅቡረ፨
- በዝ፡ ዓለም፡ ወበዘይመጽአ፡ ድኅረ፨
- ውስተ፡ መቅደስኪ፡ እፈቱ፡ ኀዲረ፨
- ወኢትኅብአኒ፡ ዘይሤኒ፡ ምክረ፨
- ከመ፡ ከብካብ፡ ንጹሕ፡ ዘአልቦ፡ ጥልቀት፡ ውስቴቱ፨
- ያስተፌሥሐኪ፡ ጥቀ፡ ማርያም፡ በበ፡ ሥርዓቱ፨
- እምሀብተ፡ በረከት፡ ወሣህል፡ መንገለ፡ ላዕሉ፡ ዋታሕቱ፨
- ለማሕፀንኪ፡ በረከቶ፡ እፈቱ፨
- እግዚአብሔር፡ ዘተጸውረ፡ ቦቱ፨
- አንቲ፡ ውእቱ፡ ለዳዊት፡ ዘመዱ፨
- ዘእምኔኪ፡ ሕዝብ፡ ወአበውኪ፡ ተወልዱ፨
- ማርያም፡ ድንግል፡ ለልዑል፡ እመ፡ ዋሕዱ፨
- በስብሐትኪ፡ እግዝእትየ፡ ኢይትዌሰን፡ ፍቅዱ፨
- እስመ፡ እምወሰን፡ ወሰነ፡ የዐዱ፨
- ኮንኪ፡ ዲበ፡ ምድር፡ ዳግሚተ፡ ሰማይ፨
- ከመ፡ ትለዲ፡ ፀሓየ፨
- ማርያም፡ ድንግል፡ እመ፡ እግዚእየ፨
- በቅድስናኪ፡ ቀድሲ፡ ነፍስየ፨
- ወበተስፋኪ፡ አኅድሪ፡ ሥጋየ፨
- አንቲ፡ ውእቱ፡ ደብተራ፡ ክርስቶስ፡ ብርሃን፨
- ዘሰመዩኪ፡ አበው፡ ቅድስተ፡ ቅዱሳን፨
- ማርያም፡ ድንግል፡ በዓልተ፡ ዛቲ፡ መካን፨
- ለብሔረ፡ ንግሥኪ፡ ከመ፡ ብሔረ፡ ነገሥት፡ ባዕዳን፨
- ኢይዌስንዎ፡ ቤርሳቤህ፡ ወዳን፨
- ተሰመይኪ፡ እመ፡ ለክርስቶስ፡ ፈታኔ፡ አልባብ፡ ወልቡና፨
- ድኅረ፡ ወለድኪ፡ ኪያሁ፡ ነበርኪ፡ በድንግልና፨
- ማርያም፡ ድንግል፡ ወለተ፡ ኢያቄም፡ ወሐና፨
- ዲበ፡ እንግድዓየ፡ አክብዲ፡ ኅሊና፨
- ወበልቡናየ፡ ሠዕሊ፡ ትሕትና፨
- አንቲ፡ ውእቱ፡ ሰዋስወ፡ ወርቅ፡ ቀዲሙ፨
- እስራኤል፡ ያዕቆብ፡ ዘነጸረኪ፡ በሕልሙ፨
- ማርያም፡ ድንግል፡ ሞገሰ፡ ፍጹማን፡ ኵሎሙ፨
- ለወፅኦትኪ፡ ሐዋዘኒ፡ ዳእሙ፨
- ከመ፡ ኤልሳቤጥ፡ ለዮሐንስ፡ እሙ፨
- ናሁ፡ እግዚእ፡ ዘእምኔኪ፡ ወፅአ፨
- በኍልቈ፡ ዕለታት፡ ሰብኡ፡ ለእለ፡ እጼውዐኪ፡ ሰብአ፨
- ማርያም፡ ድንግል፡ ማርያም፡ ወለተ፡ መርዓ፨
- አጽድቂ፡ እሙ፡ ኪያየ፡ ኃጥአ፨
- ወናዝዚ፡ ኀዘንየ፡ እንተ፡ ውስጥ፡ ወአፍአ፨
- ተፈሥሒ፡ ተፍሥሒ፡ ምእልተአ፡ ጸጋ፡ ማርያም፨
- ልሕኵት፡ ንጽሕት፡ ክብረ፡ ኵሉ፡ ዓለም፨
- ሶበ፡ /ዋዕኩ፡ ስመኪ፡ ከመ፡ ለበሐዊ፡ እምቅድም፨
- ዘአቅረብኩ፡ ለኪ፡ ተጋንዮ፡ በልሳንየ፡ ድኩም፨
- ማርያም፡ እግዝእትየ፡ ተወክፊ፡ ዮም፨
- ተሰመይኪ፡ ፍቅርተ፡ ኦቡርክት፡ እምአእኑስ፨
- አንቲ፡ ውእቱ፡ ቀመረ፡ ዳግሚት፡ ሐዳስ፨
- ማርያም፡ ድልግል፡ ወለተ፡ ዳዊት፡ ንጉሥ፨
- ሰላም፡ ሰላም፡ ለመልክእኪ፡ ውዱስ፨
- ለለ፡ አሐዱ፡ አሐዱ፡ እስከ፡ እግር፡ እምርእስ፨
- ታቦት፡ አንቲ፡ ዘረሰየኪ፡ ታእካሁ፨
- ኢየሱስ፡ ክርስቶስ፡ እስመ፡ ሥጋኪ፡ ሥጋሁ፨
- ማርያም፡ ድንግል፡ ለእጓለ፡ እመሕያው፡ ተስፋሁ፨
- ዕቀብኒ፡ እግዝእትየ፡ ለለ፡ መዋዕሉ፡ ወወሩ፨
- እስመ፡ ኢየአምር፡ ሰብእ፡ ዘይመጽእ፡ ላዕሌሁ፨
- መቅደስ፡ አንቲ፡ ዘይኬልኩኪ፡ ኪሩቤል፨
- እለ፡ ሥዑላን፡ በሥዕለ፡ እግዚአብሔር፡ ቃል፨
- ማርያም፡ ንጽሕት፡ ማርያም፡ ድንግል፨
- ሰላም፡ ሰላም፡ በምልአ፡ ኅሊናየ፡ እብል፨
- ለልደትከ፡ ፍሥሓ፡ ወሣህል፨
- አንቲ፡ ውእቱ፡ መሶበ፡ ወርቅ፡ ቀይሕ፨
- እንተ፡ ውስቴታ፡ መና፡ ብሩህ፨
- ማርያም፡ ታቦት፡ ዘተለዐልኪ፡ በንጽሕ፨
- አድኅንኒ፡ እግዝእትየ፡ እማየ፡ ሙስና፡ መፍርህ፨
- ከመ፡ አድኀንኪዮ፡ ቀዳሚ፡ ለኖኅ፨
- አንቲ፡ ውእቱ፡ ተቅዋመ፡ ወርቅ፡ ዘትነብሪ፨
- ብርሃኑ፡ ለዓለም፡ ዘትጸውሪ፨
- ኦድንግል፡ መሓሪት፡ እመ፡ መሓሪ፨
- ኃጥኣን፡ ዘከማየ፡ አመ፡ ይኴንን፡ ፈጣሪ፨
- አድኅኖትየ፡ ማርያም፡ ስመሪ፨
- አንቲ፡ ውእቱ፡ ማዕጠንት፡ ዘወርቅ፡ እግዝእትየ፨
- ፍሕመ፡ መለኮቱ፡ ውዑይ፡ እንተ፡ በዲቤኪ፡ ተወድየ፨
- ማርያም፡ ድግንል፡ ደመና፡ ብዕልየ፨
- በዝናመ፡ ንጽሕኪ፡ ሐረገ፡ ወይን፡ ጸንየ፨
- ወሮማን፡ ሐዋዘ፡ ፈረየ፨
- ተፈሥሒ፡ ማርያም፡ ርግበ፡ ገነት፡ ጽባሓይ፨
- እስመ፡ ኮንኪ፡ እሙ፡ ለእግዚአብሔር፡ አዶናይ፨
- አንቲ፡ ውእቱ፡ ጽጌ፡ መዐዛ፡ ሠናይ፨
- ዘሠረፅኪ፡ እምሥርወ፡ ዕሴይ፡ ወእምጕንደ፡ ዳዊት፡ ኅሩይ፨
- ፍሬ፡ ማሕፀንኪ፡ ወልድ፡ ይሴፎ፡ ነዳይ፨
- በትረ፡ አሮን፡ እንተ፡ ሠረፀት፡ ዘእንበለ፡ ተክል፡ ቀዳሚ፨
- ምስሌኪ፡ ኮነ፡ መነለ፡ ኅቡእ፡ በሥምረተ፡ አምላክ፡ ቀዳሚ፨
- ስእለተ፡ ነዳያን፡ ማርያም፡ እንተ፡ ኢትጽምሚ፨
- አስተበቍዐኪ፡ በዕለተ፡ ምንዳቤ፡ ማሕምሚ፨
- ውስተ፡ የማንየ፡ ለነዳይ፡ ትቁሚ፨
- ለኪ፡ ይደሉ፡ ውዳሴ፡ ወስባሔ፨
- በአፈ፡ መላእክት፡ ወሰብእ፡ እለ፡ ይነብሩ፡ ውስተ፡ ኵለሄ፨
- ማርያም፡ ድንግል፡ ማርያም፡ እመ፡ ኤሎሄ፨
- ከመ፡ ለበሀዊ፡ ፍቁርኪ፡ አቅረብኩ፡ እማኄ፨
- ለዝክረ፡ ስምኪ፡ ዘይምዕዝ፡ እምርሔ፨

ተረፈ፡ መልክእ፡
- ሰአሊ፡ ለነ፡ ሰአሊ፡ ለነ፨
- ሰአሊ፡ በእንቲአነ፨
- ማርያም፡ እምነ፡ ወእሙ፡ ለእግዚእነ፨
- ወልድኪ፡ ይምሐረነ፡ ወመዋርስቲሁ፡ ይረስየነ፨
- በየማኑ፡ ያቁመነ፨
- ስብሐት፡ ለኪ፡ ማርያም፡ በኍልቈ፡ አድባር፡ ወአውግር፨
- ስብሐት፡ ለኪ፡ ማርያም፡ በኍልቈ፡ ቀላያት፡ ወባሕር፨
- ስብሐት፡ ለኪ፡ ማርያም፡ በኍልቈ፡ ዕፀው፡ ወሣዕር፨
- ስብሐት፡ ለኪ፡ ማርያም፡ በልሳነ፡ ኵሉ፡ ፍጡር፨
- እስመ፡ ምሉእ፡ ስብሐትኪ፡ በሰማይ፡ ወምድር፨

መልክአ፡ ውዳሴ፡ ማርያም፡ Malkəʾa Wəddāse Māryām

Image of the Praises of Mary

Subject