Bibliography
Z
Roman, Alcide. “Une hymne du Nagara Maryam.” Revue de l’Orient Chrétien 23 (1922): 416–26.
ሮዳስ ታደሰ. መልክአ ሥዕል ንባቡና ትርጓሜው, ፳፻፲፰ ዓ/ም.
- ማስገቢያ፡
-
- ኦርኅሩኃነ፡ ሕሊና፡ አፍቅሮተ፡ ሰብእ፡ ልማድክሙ፨
- በጥቡዕ፡ ልብ፡ ንስእለክሙ፨
- ሥሉስ፡ ቅዱስ፡ ምሕረተክሙ፡ አንዝሙ፨
- ክሳደ፡ ፀርነ፡ በሰይፍክሙ፡ ግዝሙ፨
- ወዲበ፡ ርእስነ፡ እዴክሙ፡ ሢሙ፨
-
- ኦርኅርኅተ፡ ሕሊና፡ አፍቅሮተ፡ ሰብእ፡ ልማዳ፨
- ሰአሊተ፡ ምሕረት፡ ይእቲ፡ ማርያም፡ ሐጹረ፡ መስቀል፡ ዘየዐውዳ፨
- ንትቀበላ፡ ንዑ፡ ለወለተ፡ ዳዊት፡ ዘይሁዳ፨
- መጽአት፡ ነያ፡ ኅቡረ፡ ምስለ፡ ወልዳ፨
- ናንፈርዕፅ፡ ቅድመ፡ ሥዕላ፡ እንዘ፡ ንሁብ፡ ጋዳ፨
- ለለ፡ ጌሠሙ፡ ትመስል፡ እንግዳ፨
-
- ቅድመ፡ ሥዕልኪ፡ እሰግድ፡ ወአስተበርክ፡ ክሡተ፨
- ቅድመ፡ ማኅበራንኪ፡ እሉ፡ እንዘ፡ እቀውም፡ ድርገተ፨
- ፈጻሚተ፡ መፍቅድ፡ ማርያም፡ እስእለኪ፡ ስእለተ፨
- ጸግውኒ፡ እግዝእትየ፡ ለዓለመ፡ ዓለም፡ ሕይወተ፨
- እምእደ፡ እኩያን፡ አፅራርየ፡ አድኅንኒ፡ ሊተ፨
-
- ሰላም፡ ለሥዕልኪ፡ ዘይኤድም፡ ለንጻሬ፨
- ዓዲ፡ ሰላም፡ ለሥዕለ፡ ወልድኪ፡ በኁባሬ፨
- አክሊለ፡ ሢመቱ፡ ለጴጥሮስ፡ ማርያም፡ እንተ፡ ትጸድሊ፡ እምወራውሬ፨
- ለተአምርኪ፡ ባቍዕ፡ ሶበ፡ አቄርብ፡ ዝማሬ፨
- ክድንኒ፡ ሊተ፡ ለገብርኪ፡ ሣህለኪ፡ ጶዴሬ፨
-
- ሰላም፡ ለሥዕልኪ፡ ወለሥዕለ፡ ወልድኪ፡ አልፋ፨
- ማርያም፡ ዘኮንኪ፡ ለኃጥአነ፡ ምድር፡ ተስፋ፨
- እመቦ፡ እምሰብእ፡ ዘይሜንና፡ ወዘይገድፋ፨
- ለተአምርኪ፡ ባቍዕ፡ እንተ፡ ደቅስዮስ፡ ጸሐፋ፨
- ውጉዘ፡ ይኩን፡ በቃሎሙ፡ ለሳውል፡ ወኬፋ፨
- ተረፈ፡ መልክእ፡
-
- እሰግድ፡ ለኪ፡ ከመ፡ ኃጢአትየ፡ ታስተስርዪ፨
- ማርያም፡ ንግሥት፡ ቅድመ፡ ዓይነ፡ ኵሉ፡ ጸላዪ፨
- ሥዕለ፡ አድኅኖ፡ ሥዕልኪ፡ እንተ፡ ትሰመዪ፨
- ተአምረ፡ ከመ፡ ታርእዪ፨
-
- እሰግድ፡ ለኪ፡ ማርያም፡ ረድአቶ፡ ለዘእምዓራቱ፡ ተነጽሐ፨
- ሥዕለ፡ አድኅኖ፡ ሥዕልኪ፡ መዝራዕታ፡ ሰፊሓ፨
- ትርድአኒ፡ ከመ፡ አሜሃ፨
-
- እሰግድ፡ ለኪ፡ ማርያም፡ ኩኒ፡ ለሕይወትየ፡ ጸወኖ፨
- እስመ፡ ተማኅፀንኩ፡ አንሰ፡ ተማኅፅኖ፨
- በሥዕልኪ፡ ሥዕለ፡ አድኅኖ፨
-
- እሰግድ፡ ለኪ፡ በእንተ፡ ዛቲ፡ ግርምት፡ ሥዕለ፡ አድኅኖ፡ ሥዕልኪ፨
- ወሥዕለ፡ መለኮት፡ ሕፃንኪ፨
- ጽጌያተ፡ ማኅሌት፡ ስብዓ፡ ዘአወፈይኩኪ፨
- ንሥኢ፡ ማርያም፡ ቀጸላ፡ ይኩንኪ፨