Subject
Trinitarian
አማኑኤል፡
ʾAmmānuʾel
Emmanuel
Emmanuel
Malkəʾ
-
- በሰሌዳ፡ ዝንቱ፡ ልብየ፡ አምጣነ፡ ለምንክር፡ ተጽሕፈ፨
- ፊደለ፡ አሐዱ፡ ፍቅርከ፡ እንተ፡ ኢኮነ፡ ግዱፈ፨
- አማኑኤል፡ ኰናኒ፡ ማእከላተ፡ ወአጽናፈ፨
- ከመ፡ እንብብ፡ ቅድመ፡ ጉባኤ፡ ነገረ፡ ሥጋዌከ፡ ዘልፈ፨
- እግዚአብሔር፡ ሀበኒ፡ ጥበበ፡ ወአፈ፨
-
- ሰላም፡ ለፈንዎትከ፡ ገብርኤልሃ፡ ኀበ፡ ድንግል፨
- እምነ፡ አርያም፡ ቤትከ፡ መካነ፡ ምሕረት፡ ወሣህል፨
- ነገረ፡ ትስብእትከ፡ እጽሐፍ፡ በቀለመ፡ ልሳን፡ ወቃል፨
- አልኆስስ፡ ውስተ፡ እዝንየ፡ አባሕኩከ፡ ዘይብል፨
- አማኑኤል፡ አምላኪየ፡ መደንግጽ፡ ኀያል፨
-
- ሰላም፡ ሰላም፡ ለርደትከ፡ ኀቤነ፨
- ብስራተ፡ ፍሥሓ፡ ገብርኤል፡ ድኅረ፡ አስምዐ፡ እሙነ፨
- በሕፅነ፡ ማርያም፡ ድንግል፡ እንተ፡ ይእቲ፡ እምነ፨
- ብፁዓን፡ ዘነጸሩከ፡ ከዊነከ፡ ሕፃነ፨
- አማኑኤል፡ መድኃኒተ፡ ዘኮንከነ፡ ለነ፨
-
- ሰላም፡ ለዝክረ፡ ስምከ፡ ዘሀሎ፡ እምቅድም፨
- ወሄሉ፡ ካዕበ፡ በዘይመጽእ፡ ዓለም፨
- አማኑኤል፡ ኄር፡ ዘልብሰትከ፡ አፍሓም፨
- ልደትከ፡ እምኀበ፡ አብ፡ እንበለ፡ ብእሲት፡ መድምም፨
- ወመንክር፡ እንበለ፡ አብ፡ እምድንል፡ እም፨
-
- ሰላም፡ ለሥዕርተ፡ ርእስከ፡ ዘኵለንታሁ፡ ሥሙር፨
- ወለርእስከ፡ ዓዲ፡ በመልዕልተ፡ ክሳድ፡ ንቡር፨
- ጊዜ፡ ልደትከ፡ ክርስቶስ፡ በኵረ፡ ወላዲ፡ ክቡር፨
- አስተማወቁከ፡ ለፈጣሬ፡ ሰማያት፡ ወምድር፨
- ክልኤቱ፡ እንስሳ፡ ሶበ፡ ጸንዐ፡ ቍር፨
-
- ሰላም፡ እብል፡ ለትንሣኤከ፡ ዘኮነ፨
- ለጻድቃን፡ ሕይወተ፡ ወለኃጥኣን፡ ደይነ፨
- አማኑኤል፡ በኵር፡ በለቢሶትከ፡ ሥጋነ፨
- ዘተሐንጸ፡ አረፍተ፡ ጽልእ፡ ነሠትከ፡ ለነ፨
- በከመ፡ ይቤ፡ ሐዋርያ፡ ጳውሎስ፡ እኁነ፨
-
- ሰላም፡ ለዕርገትከ፡ ወለንብረትከ፡ የማነ፡ አብ፨
- እንዘ፡ ይቄድሱከ፡ ደርገ፡ ግሩማነ፡ ራእይ፡ አርባብ፨
- አማኑኤል፡ ኄር፡ ሕፃነ፡ ማርያም፡ ጠባብ፨
- ለገብርከ፡ እመ፡ ሤምከኒ፡ ውስተ፡ ሰማያዊ፡ መዝገብ፨
- ይከውን፡ ለከ፡ አምላኪየ፡ ምዝጋና፡ ዕጹብ፨
-
- በዝንቱ፡ ቃለ፡ ማሕሌት፡ ወበዝንቱ፡ የብቦ፨
- ለዘይስእለከ፡ ብእሲ፡ ጊዜ፡ ምንዳቤ፡ ረከቦ፨
- ኢየሱስ፡ ክርስቶስ፡ ተወካፌ፡ ስእለት፡ መልዕልተ፡ ጸልቦ፨
- ረዳኢ፡ አንተ፡ እግዚኦ፡ ወምስካይ፡ ለዘዐጸቦ፨
- ለረዲኦትየ፡ አፍጥን፡ ጸዊረከ፡ ዐስቦ፨